Anhein masuseredungili lubéi houn, másiñati ariha hamaali lasuseredun houn amu. Ariha wamuti lidan ñunsu súfuri hamá gürigia iyereehabúni ladüga lídangiñe hamá amu ageiraü, lílana hamá amu rasa o ladüga katei líbeina lira. Ligía áfaaguatiña lubéi gumadimatiña lun lalouguadun iyereehabúni lau hadügün burí lúrudu.

Liibe-agei dan, barüti iyereehabúni lanwoun iyereehabúni. Gürigia ha asufurirubaña iyereehabúni aba giñe habusenrun hagiribudagüdüni houn amu ani adügarügüti katei le lun magumuchagun lan iyereehabúni.

Másiñati sandí hamaali igarigu ladüga himei hamá amu gürigia hawéi, ladügǘn bula hau, o lariñawagún houn ladügǘba lan katei wuribati houn hámagiñe amu gürigia. Gama lumoun, wuribatimati iyereehabúni. Liibe-agei dan, gumuti lau habuleseirúniwa gürigia, lananihóuniwa houn, lagünrinchawagun hamegen, hágurawagun luma háfarawagun saragu gürigia.

Tafuranguagüdübei garüdia to anhein gayara lubéi wagañeiruni iyereehabúni ani lóunabuba álügüdahani burí le:

• Ka uagu anihein lubéi saragu iyereehabúni?

• Ka lunbei wadügüni lun wagumuchun lau iyereehabúni?

• Lachülürüba san dan lun lagumuchun iyereehabúni?