Ka uagu anihein lubéi saragu iyereehabúni?
Geyegu waña lau saragu iyereehabúni lidan ubóu le. Ka uagu? Lun wasubudiruni lóunabagüle, mosu wasubudiruni katei lan iyereehabúni ani ida liña ligaburi laburuchaguagüdün.
Katei san iyereehabúni?
Iyereehabúni aban igaburi le adügübei lun wasandirun lueirin mínsiñehabuni hawagu amu gürigia o aban sétanu gürigia. Le linarün katei iyereehabúni le mama aban katei gásügürati.
KA SAN LÉBUNABEI IYEREEHABÚNI HADAN GÜRIGIA?
Gíbeti lébuna láhüchün lílagüle iyereehabúni hadan gürigia. Besafu dan, gayaraati hasandirun iyereehabúni hawagu gürigia mama luagu katei le hadügübei lubaragiñe lira iyereegutiña houn ladüga kátañanu lan gürigia hagía. Besafu dan másiñati ariha hamaniña gürigia ha kei gürigia wuribatiña, o íbini ladügarügü samina hamá máraninatiña lan. O saminatiña giñe ǘnabugu hamá gürigia ha hawéi o hagía lan gadurunbaña luagu sun turobuli. Ani besafu hádangiñe sanditiña iyereehabúni hawagu amu ladüga sügühaña lídangiñe katei wuribati, marichaü o katei líbeina lira.
IDA LIÑA SAN LABURUCHAGUAGÜDÜN IYEREEHABÚNI?
Anihein dan, sanditiña gürigia iyereehabúni hawagu ha ibidiñebaña houn. Kei hénpulu, gayaraati lánharun aban gürigia lun iyereehabúni le lasandirubei aban liduhe o aban lumada hawagu amu gürigia ibidiñega lun. Ligíati, dan le lúaradun ligaburi hasaminarun fiu gürigia, adügati katei le lun laburuchagun iyereehabúni.
Dan le gunfuranda wamani fureseti lan ligaburi laburuchagun iyereehabúni, gayaraabei gunfuranda wamani ida liña lan hasandiragun saragu gürigia houngua. Anihein giñe saragu katei le adügati lun ñein lan iyereehabúni geyegu wau. Afuranguagüda tumuti Bíbülia buidu.
AFURANGUAGÜDA TUMUTI BÍBÜLIA LÍLAGÜLE TURÓBULI LE
MAGUMESERUNTI IYEREEHABÚNI HAGANAGUAGIÑE GÜRIGIA GAFIGOUNTIÑA. Gumeseti iyereehabúni sielu luma aban ánheli le ebedaagubei luagu Bungiu ani subudiwati kei Satanási, le Mafia. Dan le lagumeserunbei lebedaagun Mafia, aba ladügagun lungua kei aban gáfarahati. Kei “yee lubéi ani ligía lúguchibei iyeeni”, mararamungili Satanási ínchahaña gürigia lidoun iyereehabúni luma anarimeni (Huan 8:44; 1 Huan 3:11, 12). Arufudahatu Bíbülia salufuriti, furundeti ani wéiriti ligañi Mafia (Hobu 2:7; Arufudúni 12:9, 12, 17).
SUN GÜRIGIA GALAGANTE HAMUTI IYEREEHABÚNI. Kei aba lubéi lafalaruni furumiñeti wügüri Adán, Satanási lidan lifigoun, sun lirahüñü galagante wamuti figóu (Rómana 5:12). Iyereeguti meha Aweli lun Kaín lau sun lamulen lan, le furumiñe lisaani Adán, ani aba láfaruni hilagubei (1 Huan 3:12). Íbini añahein lan gürigia gudemehabutiña ani hínsiñehabutiña houn amu, kei galagante wamani figóu, ligía ménrengunti lubéi houn saragu gürigia lun hóunguarügü lan habusenra buiti, gimugatiña ani panta hagía, igaburi burí le adügati lun lasigirun iyereehabúni (2 Timotéu 3:1-5).
HA MÍNSIÑEHABUBAÑA HOUN HA AMUBAÑA HAWÉI MENRENGUNTI HOUN LUN HARUFUDUN IYEREEHABÚNI. Ínchaha lumutiña ubóu gürigia lun furunde hamá luma lun mínsiñehabu hamá, igaburi burí le adügati lun iyereehabu hamá gürigia. Kei “lábugiñeñanu lan lubafu Mafia” sun ha lánigubaña ubóu larufuduniwa mínsiñehabuni houn ha ámubaña hawéi, lun hóunguarügü lan habusenra buiti, hanabawaguniwa gürigia, habuleseirúniwa luma lagünrinchawagun hamegen amu arihúati igaburi le sagü weyu (1 Huan 5:19).
Ligíati, mámarügü ariñagarügütu Bíbülia halíagiñe lan liabin turobuli le, ariñaga tumuti giñe ida luba lan laransehóuniwa.
