IDA LUBA MABURUCHAGUAGÜDÜN WAMANI IYEREEHABÚNI
1 | Ua lan himei humá aban gürigia luéi aban
Ariñagatu Bíbülia:
“Úati lan himei lan Bungiu aban gürigia luéi aban, lubaragiñe lira, resibirügü lumutiña sun ha inebehabubaña lun ani adüga haméi le buídubei, lídangiñe hamá yebe furumiñeguarügü néchani” (ADÜGAÜ 10:34, 35).
Ka mini lubéi?
Úati himei lan Heowá * aban gürigia luéi le aban ladügarügü fulasu le ñéingiñe lubéi liabin, lirasan, likolorun o lechun. Lubaragiñe lira ariha lumuti le súdinitimabei, kéiburi le wasaminarubei luma le wasandirubei. Afuranguagüdatu Bíbülia: “le ligibugiñebei lagu wügüri ligía larihibei, anhein Bungiu anigi larihiboun” (1 Samueli 16:7).
Houcha humá hadügüni le:
Íbini siñati lan warihini le tídanbei hanigi amu, gayaraati ua lan himei wamá aban gürigia luéi aban ítara kei ladügüni Heowá. Áfaagua humá lun ábana ábana lan harihiniña gürigia mama kei aban sétanu. Anhein rúhadün lubéi fe, mínsiñe hamá somu gürigia hun, ladügarügü lídangiñetiña lan amu rasa o lídangiñe hamá amu ageiraü, amuriaha huma luma Bungiu lun líchugun erei hun lun hagidaruni iyereehabúni tídangiñe hanigi (Sálumu 139:23, 24). Chouru huméi líderagubadün lan Bungiu lun hibihini (1 Féduru 3:12).
^ par. 6 Heowá líribei Bungiu (Sálumu 83:18).
“Mañuurun gíidina meha lau darangilaü luma aban gürigia haruti […]. Guentó au aban hádangiñe íbirigu ha ítarabaña kei iduheñu ha lídangiñetiña sun ubóu” (TITUS).
Háfuga hínsiñebei lan giñe le hun
GARÜDIA AWISAHATU
“Úati himei lan Bungiu aban gürigia luéi aban”
Aganba lumuti Bungiu hafurieidun ha áhuduragubaña lun meberesenga ka lan harasanbei, hageira, o gádantiña. Ida liña wasubudiruni le?
AGAGUDUABÁ!
Mínsiñetiña san amu hun ladügarügü amu hamá huéi?
Ka burí san katei gayaraabei larufuduni woun anhein anihein lubéi iyereehabúni houn amu tidan wanigi?
