Aba tagumeserun garüdia The Watch Tower to lánina 1 lidan eneru, irumu 1918 lau álügüdahani le: “Kaba funa san lanüga irumu 1918?”. Aniheingua meha Óunwenbu Wuribu agünrinchaguei Yuropa, gama lumoun, genegeti lasusereda lan meha aban katei buiti houn Aturiahatiña Bíbülia luma lun sun ubóu lidan lagumesehan irumu.

Ruti urúei Woodrow Wilson aban yanu, 8 lidan eneru, irumu 1918 lidan Sétanu le arihibei luáguti lúrudu lidan ageiraü (Konguresu) to lageiraboun, ani ayanuhati luagu 14 katei lun lakutihóun lun libihín “darangilaü le richati”. Ani lidan óundaruni ligía ruti gumadi lun gayara lan hawadigimaridun lílana aban ageiraü luma amu úara, lun mayusurun hamá áruma saragu ani adügati giñe lun ñein tan aban “óundaruni hani néchani” le meha lunbei leseriwidun houn “lílana ageiraü ñǘbüriti luma wéinamuti”. Katorusu katei ligía ligía lébubei lun hagumeseruni Óundaruni hani Néchani lun gayara lan haransehani katei luma daradu le adügǘbei uburugu Versalles, le adügübei lun lagumuchun Óunwenbu Wuribu.

Hénrenguti meha irumu le ásügürübei houn aturiahatiña Bíbülia. * Gama lumoun, le asuseredubei lidan adamuridaguni irumu-auti le tani Watch Tower Bible and Tract Society genegeti houn anite lan aban dan lánina darangilaü.

Adügǘwati adamurini ligía 5 lidan eneru, irumu 1918. Lidan, añahein meha saragu wügüriña ha meha íñuti habara tidan Beteli ani bugawaaña meha ñéingiñe ani háluguña meha lun gabafu hamá tuagu lóundarun Heowá. Aba lagumeseruni aban óunigiruti sirkuitu úaraguati gíriti Richard Barber adamurini lau aban furíei. Aba líchugun ariñahani luagu apurichihani le adügǘbei lidan irumu le ásügürübei dan ligía, lárigiñe, aba ladügǘn abuduhani irumu-auti lun hanuadirúniwa ha lúnbaña harihin tau óundaruni to. Aba líriduni íbiri Barber Joseph Rutherford hama sisi íbirigu. Aba líridun awogóu le hámagiñebei ha áganiñu, 7 wügüriña ani haganagua añahein meha ha abugúbaña Betelirugugiñe. Fériditiña ladüga habuduhan hiibe-agei ídehatiña luagu íbiri Rutherford hama 6 íbirigu úaraguatiña.

Saragu íbirigu ha achülürübaña ariñagatiña ligía lan adamurini le ñein lubéitima harihei lawadigimaridun lani Heowá sífiri. Gama lumoun, madurati hagundan.

Barühaña meha aturiahatiña Bíbülia saragu irumu afanreihoun líburu The Finished Mystery (El misterio terminado). Buiti meha hóunabun gürigia ha haruma tanigi lun inarüni le tídangiñe Bíbülia le tídanbei líburu tuguya.

Abahüdahati aban óunigiruti sirkuitu kanadána gíriti Edward Crist hawagu aban feru maríeitiña ha aliihabarun líburu to ani aba hánharun lun inarüni lídanrügü 5 dimaasu. Ariñagati íbiri: “Biángubei hagía derege hamaali habagari lun Bungiu ani hawanseruña buidu”.

Aban wügüri le aliihabarun líburu to aba labahüdahani le lafurendeirubei houn lumadagu. Gayaraati lariñawagún “hingí lanu” uganu le tídanbei líburu to lanigi, aba lariñagun: “Néibuguña lidan üma le gíribei  Tercera Avenida, sódini aba ladagarun somu katei nuagun, según yebe au aban ladiríyu. Ani mama ladiríyu! Líburu to gíriboun El misterio terminado. Aba nanügünün múnadoun ani sun numutu aliiha. [...] Lárigiñe, aba níchugun fe aban lan apurichihati [...] águrubarun luéigiñe funedera ladüga gáñiñein lan. [...] Chouru numuti lau lan igaburi le adüga lan lun hemenigi hamá saragu gürigia, anihán buiti ladüga lidan libagari sügǘ luéi furumiñeguarügü katei. [...] Seremei igañi le luágubei apurichihati ligía, walawahañein Bungiu guentó”.

Mámarügüñein apurichihati ligía óusera wuriba ítara. Duusu lidan bián-hati, irumu 1918, aba herederuni gumadimatiña kanadána lapurichihóun tau líburu to ladüga nege ínchaha lániña le tariñagubei líburu to gürigia lun hebedaagun lun lúrudu, ayanuha tuguya luagu moun lumuti lan houdin gürigia awuribuha. Murusun dan lárigiñe, aba giñe hadügüni gumadimatiña ha Merigabaña ligiaméme. Asagaraha hamutu fiu wügüriña ha awadigimaridubaña luma urúei Beteli tuma áfisi to Newayóruboun, Pensilvania tuma to Kaliforniaboun. Áluahatiña ida luba lan híchugun hadurun íbirigu ha arihibaña tuagu óundaruni. Katorusu lidan ǘrüwa-hati lidan irumu 1918, aba lamahadun Departamentu lánina aguseruni to lani Meriga tun líburu to. Aba hasigenehan maha lan lúrudu tun líburu to ni lun tafanreinhoun ladüga adüga tan lun hebedaagun gürigia lun lúrudu luma lun mawuribuhan hamá.

Sedü lidan seingü-hati, irumu 1918, aba libihinu Departamentu lánina aguseruni gárada lun lárügüdün íbiri Giovanni DeCecca, George Fisher, Alexander Macmillan, Robert Martin, Frederick Robison, Joseph Rutherford, William Van Amburgh luma Clayton Woodworth. Aba híchugun hadurun luagu hínchahañanu lan gürigia lun hebedaagun, gáfarahadi hamá ani gebedaaguadi hamá, múaragun hamá lun lúrudu ariñaga hagía maha hamá hasudarahan. Gumeseti aguseruni 3 lidan sisi-hati, irumu 1918, ani arufuda lumuti duru lan le ichugúbei hawagun lunti lan hasiadirún. Ka uagu?

Ariñagati lábuti Departamentu lánina aguseruni, Lúrudu luáguti lamahadún luma lebedaagún lun asudarahani aban lan “áruma lun hagarabaagun luagu urúei”. Disisi lidan seingü-hati, irumu 1918, aba lamaharun Konguresu lun lasansirún lúrudu le óunigirubaliña ha agumeiraguagüdübaña ariñahani “inarüniti le buiti ani le richati”. Sun sigenei le hasigenehabei ñein, tuágutima líburu El misterio terminado. Anihán ariñahani le tíchugubei Konguresu to Merigaboun: “Aban tídangiñe katoun tótima denchaboun, líburu to gíriboun El misterio terminado”. Ani sigitiña ariñaga: “Adügarügütu lun hasaminarun wasudaranigu mabuidun lan le wadügübei [...] luma lun masudarahan hamá”.

Wein lidan sisi-hati, irumu 1918, aba lariñagun lúrudu gadurun hamá widü wíbirigu ladüga duru le ichugúbei hawagu. Larugan, aba lasiadiruniña aguseragüdüti. Ariñagati: “Ñunsu tánina relihión le haburuchaguagüdübei ha gadurunbaña ani le hageindagubei [...] denchatimati sügǘ hawéi súdaragu yámanina”. Ani aba lagumuchun ariñageina: “Lunti hadaürǘn luagu saragu irumu”. Bián dimaasu lárigiñe, aba hadaürǘn widügubei íbirigu tidan Penitenciaría  Federal de Atlanta (Georgia) luagu kei burí diisi o wein irumu.

Aban meha dan hénrenguti lira houn Aturiahatiña Bíbülia. Aba hadügün FBI (Oficina Federal de Investigación) lun laturiahoun buidu buidu le hadügübei Aturiahatiña Bíbülia. Arufudati le woun aranseñu haña lan meha wíbirigu lun hasigirun apurichiha.

Abürühati tábuti koréu to Orlandoboun (Florida) houn FBI hawagu Aturiahatiña Bíbülia: “Héibuguñein sun uburugu tidan burí muna, guñountima. [...] Según warihin lun, busentiña hafudagüdüniña gürigia”.

Abürühati aban gurunelu le lánina Departamentu lani Wuribu houn lílana FBI lun lariñaahan houn luagu le ladügübei Frederick Franz, le eseriwidubei dan lárigiñe kei aban hádangiñe lílana Musu Úaraguati. Aba lariñagun gurunelu buin liña lan íbiri Franz “lidan talugurahóun saragu milu líburu to gíriboun El misterio terminado”.

Súfuriti meha giñe íbiri Charles Fekel lanarime éibaahouni, le giñe eseriwidubei dan lárigiñe kei aban hádangiñe lílana Musu Úaraguati. Ragǘ hamuti lúrudu ladüga lafanreinhanu líburu El misterio terminado ani aba hóunigiruni sun lagararaagun. Ábanñein hati lau adaürǘwa Baltimore (Maryland) ani ariñagatiña luagu, “ágani austüriana”. Lau lapurichihan lau ganigi, aba laritaguni le lariñagubei 1 Korintuna 9:16, le ñein lubéi lariñaga Pábulu: “Fugiabu au anhein mapurichihan nan uganu le!”. *

Amu luéi hapurichihan Aturiahatiña Bíbülia lau ubebeni, abudahatiña seini hámagiñe gürigia lun gayara lan háfuridun íbirigu furisunrugugiñe. Ariñagatu íbiri Anna Gardner: “Súnwandan beresegu waña lan. Dan le hadaürǘbei íbirigu, aba woudin hábiñe gürigia amuriaha hama lun haseinirun. Ibihatiwa saragu milu aseiniruni hámagiñe gürigia. Aba burí wariñagun houn gürigia kristiánugu inarünitiña lan íbirigu ha ani maricha lan lun hadaürǘn”.

Lidan dan hénrenguti ligía, adügǘwati saragu adamurini lun lederebugudun hafiñen íbirigu. Según garüdia to, lidan inglesi, adügǘwati lóugiñe 40 adamurini lidan irumu ligía. Ariñagatu: “Resibihadiwa lubuidun ariñahani lídangiñe sun adamurini le”. Luagu aban dan, adügǘwati adamurini le lagumuchagüle burí irumurugu ani guentó sagü hati adamurini”.

Añahagua meha gürigia haruma tanigi óunaba lun uganu le wanügübei houn. Adügǘwati aban adamurini Cleveland (Ohio), le ñein lubéi hachülüra kéiburi 1,200 gürigia ani badiseitiña 42. Ariñawagúati luagu aban irahü le sun líñabei labadiseirun luagu “gunda lan lasubudiruni Bungiu luma luagu lederegeruni libagari lun le lunbei larufuduni houn saragu kristiánugu ha derebugu haña”.

Yarafaali meha lun lagumuchun irumu 1918 ani ibidiñeti meha houn Aturiahatiña Bíbülia kaba lan asusereda houn ámuñegü. Alugura hamá meha lídangiñe hámati Brooklyn, aba háguyun hani áfisi Pittsburgh (Pensilvania). Lidan añahagua lan íbirigu furisunrugun, aba ladügǘn adamurini irumu-auti le hani ha ídehabaña tuma lóundarun Heowá 4 lidan eneru, irumu 1919. Kaba meha asusereda?

Sigitiña íbirigu agunfulira lau hadasin. Chouru hamuti meha buídubei lan léibugun sun katei darí lun hanúadiruni dimurei le lídanbei Isaíasi 54:17 lun ligíaba lan bérusu lánina irumu 1919, le ariñagubei ítara: “Úagili ni aban adügütu áruma to lunboun tagünrinchagunibu”. Layarafaduña meha aban lanarime asansiruni le lunbei lederebudagüdüni hafiñen íbirigu ani ru ligíame erei houn lun hagunfulirun lau sun dasi le lunbei hadügüni.