1, 2. Kátima katei adügaalibei dañu houn gürigia, ani ka gadurunbei?

ADÜGAALI gágamuru, bonbiyu, karü, réfüri luma amu burí katei lun ménrengun lan ibagari. Lau sun lira, anihein ámuya katei le ladügün wügüri ani denchati, anihán fiúrügü lídangiñe, áruma, bonba to esetirúboun lábugiñe múa, sígaru tuma bonba to hanarimetu. Gama lumoun, létima adügübei dañu houn gürigia aban katei le ñéinhali lubaragiñe ladügǘn sun burí katei le wíridubei. Ka uagu wayanuha? Luagu iyeeni, le subudiwabei luagu mama lan inarüni ani ariñawagúati lun heyeedún amu. Mafia ligía eyeehabei furumiñe, le unbei lagúara Hesukrístu ‘lúguchi iyeeni’ (aliiha huméi Huan 8:44). Ida buga leyeehan Mafia furumiñeti wéiyaasu?

² Susereti lúmagiñe lóugiñe milu irumu guentó, lidan fuluri-agei Edén. Gúndaati meha libagari Adán tuma Ewa lidan paraísu le líchugubei Bungiu houn. Ariñagati meha houn lun meigin hamá lídangiñe tin “wewe to lánina lasubudirúniwa le buídubei lumoun le wuribabei”. Ánhaña lan maganbadi, hóunweguba lan. Íbini subudi lani Satanási sun le, aba layusurun aban hewe lun lariñaguni furumiñeti iyeeni: “Móunwegunbadün”. Ani ariñagati: “Subudi lumuti Bungiu luagu danme lan heigin tídangiñe tin tídibu wewe tuguya, léfegechuba lan hagu lun hasubudiruni le buídubei luma le wuribabei” (Agu. 2:15-17; 3:1-5).

3. a) Ka uagu wariñaga hanarime lan luriban iyeeni le lariñagubei Satanási? b) Ka asuseredubei lárigiñe leyeehan Mafia?

³ Le meha lanarime luriban Satanási lariñagunbalin iyeeni ligía,  ladüga subudi lumuti meha tóunweba lan Ewa anhoun afiñera lun, ani anhoun eiga lídangiñe tin tídibu wewe to uáguboun lariñaga Bungiu tun lun meigin tan. Ani ligía asuseredubei. Dandu tuguya kei tani weiriei, aba maganbadi hamá lun Heowá ani lau lásügürün dan, aba hóunwegun (Agu. 3:6; 5:5). Létima hírubei, adüga lan figóu lun hóunwegun sun gürigia, “lau sun mama lan ladüga maganbadi hamá hafigouhanbei keisi ladügüni Adán” (Rom. 5:12, 14). Siñati hawinwandun gürigia mafigounga lun súnwandan, kei meha labusenruni Bungiu lúmagiñe furumiñeti dan, mosu hagufurumadun lau hawinwandun 70 irumu o anhein here habéi 80. Íbini ítara, buin liña ibagari lau “igarigu luma wadagimanu” (Sal. 90:10). Ma lirun! Lasuseredunbei lira, ladüga liyeeni Mafia.

4. a) Kaba burí álügüdahani súdiniti wóunaba? b) Según Sálumu 15:1, 2, kátaña gayaraabei gamadagua hamá luma Heowá?

⁴ Dan le lafuranguagüdünbalin Hesusu le ladügübei Satanási, aba lariñagun: “Márügüdünti luéigiñe inarüni, mariñagunti giñe inarüni”. Ani ítaramemegili. Aniheingua Mafia eyeehei “sun ubóu” (Aruf. 12:9). Mabusenruntiwa wéiguadun tidoun lisadaran. Ligía wóunabaali lubéi ǘrüwa álügüdahani le: Ida liña leyeeduniña Satanási gürigia? Ka uagu heyeeha gürigia? Ani kei mabusenrun wamá lun ítara wamá kei Adán tuma Ewa lun weferidiruni wamadagua luma Heowá, ida luba warufuduni ariñaga wamani inarüni sun dan? (Aliiha huméi Sálumu 15:1, 2).

5. Ida liña leyeeduniña Satanási gürigia?

⁵ Subudi lumuti meha apostolu Pábulu gayara lan wadügün lun meyeedun lániwa Mafia “ladüga subudi wamani luriban laritagun” (2 Ko. 2:11). Subudi wamuti Satanási lan abugurubalin sun ubóu, íbini relihión mama inarüniti, urúeigu ha móuserunbaña lau arumani luma buriti lílana bísinisi ubouaguna ha hawouguounrügübei hasaminara (1 Huan 5:19). Maweiriduntu wanigi lau línchahaniña Satanási hama lumafianu gürigia ha súdinibei habara lun heyeehan (1 Tim. 4:1, 2). Añahein wügüriña taburiña bísinisi to wéinamutu eyeehatiña lúnrügü haluguruni hebegidina lun herederun lau haseinsun gürigia íbini adüga lan hebegidina dañu.

6, 7. a) Ka san uéigiñe gaduruntima habéi alidihatiña relihión ha yéebaña? b) Ka iyeeni aganba humaalibei hariñagun alidihatiña relihión?

⁶ Tábutigutima relihión ha eyeehabaña gadurunbaña. Ka uagu? Lugundun ha afiñerubaña lun hayeeni adüga hamuti le mínsiñebei lun Bungiu ani gayaraabei heferidiruni chansi lun hawinwandun lun súnwandan (Ose. 4:9). Subudi lumuti meha Hesusu heyeeduñanu lan tábutigu relihión ha meha lídanbaña lidaani gürigia. Ariñagati houn hagibuagun: “Fugiabugu huguya arufudahatiña lilurudun Moisesi hama fariséugu! Biangua tigibu! Éibuga humuti múa, áfayaha huméi barana áluaha gürigia lun hánigume; danti le ibiha humaali le habusenrubei, aba hadügüniña gürigia hagía lun gadünatima hamani [heena, TNM] sügǘ hau” (Mat. 23:15). Siadi lumutiña meha Hesusu, ligía lariñagubei houn tídangiñe sun lanigi: “Mafia húguchibei [...] gáfarahadigubeiñein [...] lúmagiñe furumiñeti dan” (Huan 8:44).

⁷ Tábutigu relihión, fádirigu, tábutigu ligilisi... Meberesenga ida liña lan laguarún houn, uguñe weyu, buin liña ubóu hau alidihatiña relihión. Ítara kei meha fariséugu, mígiruntiña sun gürigia ha “lun lasubudirúniwa linarün Bungiu” ani “sansi hamaali linarün Bungiu luagu iyeeni” (Rom. 1:18, 25). Arufudahatiña iyeeni, kéiburi “anhein séfuhali lubéi gürigia aban wéiyaasu, séfuhali lun súnwandan”, luagu móunwedadi tan uani, ábaya lan hawinwandun gürigia lidan  amu úgubu, arufudaha hamuti giñe lagübüri saminaü luagu anha lan Bungiu lun lagamaridun wügüri wügüri líledi o würi würi tíledi luma luagu gayara lan hamarieidun hámagua.

8. a) Kaba iyeeni hariñaga lílana polítika yarafa madise? b) Ida luba lunti lanme wóunabun?

⁸ Yeeda hamaña giñe lílana polítika gürigia. Aban lídangiñe iyeeni le lunbei hariñaguni yarafa madise, lídanñein lan “darangilaü luma achoururuni sun katei”. Ani ligíaba “liabin günringuaü hawagun sódini”. Mígiraguagüda wamá woungua lun heyeeduniwa lau hálugun haramuduni le gádanbalin ubóu. Subudi wamuti buidu buidu lachülürüba lan luéyuri Heowá “danme magurabúniwa lan, keisi liabin aban íweruhati áriebu” (1 Tesa. 5:1-4).

9, 10. a) Ka san uagu heyeeha gürigia, ani ida liña lidin houn? b) Ka lunbei waritaguni luagu Heowá?

⁹ Uguñe weyu, wéiritimahali hariñagun gürigia iyeeni. Mámarügü ha gabafutiña. Lidan arütíkulu le gíribei “Ka uagu weyeeha?”, ariñagatu aban garüdia subudiwatu: “Subudiwaali iyeeni kei aban katei le hanügübei gürigia hámagua”. Liibe-agei dan, eyeehatiña gürigia lun hóunigiragun houngua luma lun hadouragun lau hachara luma lau katei wuribati le hadügübei, lun hibihin aban ubaraü buiti lidan wadagimanu o lun buidu lan lidin houn o lun gaseinsun hamá. Ariñagati giñe arütíkulu ligía, ariñaga hamá gürigia iyeeni “lau lumenrengun, ariñagatiña iyeeni wéinamuti luma le ñǘbüriti, houn gürigia ha ibidiñetiña houn, houn hánigu paaná lidan wadagimanu, houn hamadagu luma houn haduheñu”.

¹⁰ Ka lanügübei leyeehan gürigia saragu? Aba mafiñerunwaali lan luagu ani aba leferidirun umadaguaü. Samina wamá ida liña lan lasandiragun aban wügüri maríeiti lungua dan le tagabarahani lani weiriou ani aba teyeehan lun taramuduni tidurun. Wéiriti giñe luriban dan le lafamurun aban wügüri maríeiti ani úguchili buidu lan ligaburi, ani wuribati lóuserunu lani weiriou hama lisaanigu. Lunti waritaguni siñá lan haramudun gürigia ni kata luéi Heowá, lugundun “furanguti sun katei lun le lunbei laguseragüdüniwa” (Ebü. 4:13).

11. Ka larufudahabei luriban ligaburi Ananíasi tuma Safira woun? (Ariha huméi dibuhu le lídanbei lagumeseha arütíkulu).

¹¹ Daritiwa aban sügǘ tidan Bíbülia hawagu aban feru maríeitiña ha lílana aban damuriguaü lidan furumiñeti sígulu, Ananíasi tuma Safira, ha layusurubaña Satanási lun heyeehan ligibugiñe Bungiu. Aba halugurun aban fulasu ani aba hariñagun houn apostolugu hederegeruñein lan sun seinsu houn lárigiñe halugurahan ani le linarün katei, lídangiñerügüñein seinsu ligía hederegera. Busentiña meha lun hafiñerun lílana damuriguaü buidu hamá ani gíchigaditima hamá sügǘ lau le lubeibei. Lau sun lira, ariha lumuti Heowá heyeehaña lan, ábati labeichuniña (Adü. 5:1-10).

12. Kaba asusereda houn ha eyeehabaña ani masakürihantiña, ani ka uagu?

¹² Ka lasaminarubei Heowá luagu iyeeni? Lagurúba Satanási hau sun yéetiña ha masakürihanbaña lidoun “lagunu le laubei watu gemeti”, lidan amu dimurei, hagünrinchawaguba lun súnwandan (Aruf. 20:10; 21:8; Sal. 5:6). Ka uagu? Ladüga, ariha lumutiña Heowá yéetiña ha óuserubaña ítara kei “óunli”, lidan amu dimurei, ha héchubaña adüga katei le mínsiñebei lun Bungiu (Aruf. 22:15).

13. Ka wasubudirubei luagu Heowá, ani kaba un línchahawa wasubudiruni lira?

¹³ Subudi wamuti mítaran lan Bungiu “kei ha góunwedadibaña”, “ladüga siñá lan leyeehan” (1 Lur. 23:19; Ebü. 6:18). Ariñagatu Bíbülia mínsiñe tan “iñeñein yeetu” lun (Ari. 6:16, 17). Lun gunda lan Bungiu wau,  lunti úaragua lan wabagari luma lugumadin, ariñaga wameime inarüni súnwandan. Lunti gaganbadi wamá lun gumadi le: “Mariñaga humá iyeeni húmagua” (Kol. 3:9).

14. a) Ka idan amu wabéi hawéi tílana relihión mama inarüniti? b) Afuranguagüda huméi adundehani le lídanbei Lúkasi 6:45.

¹⁴ Ida liña amu hamá kristiánugu inarünitiña hawéi tílana relihión mama inarüniti? Ariñaga wamuti inarüni (aliiha huméi Sakaríasi 8:16, 17). Ariñagati Pábulu dan le lan wariñaguni inarüni, warufuduñein “eseriwidutiña lan lun Bungiu wagía” (2 Ko. 6:4, 7). Ariñagati Hesusu le lan buinbei tidan anigi ligía lan lariñagubei gürigia (Luk. 6:45). Ligíati, dan le ñein lan inarüni tidan wanigi, ariñaga wamuti giñe. Mariñaguntiwa iyeeni wéinamuti ni ñǘbüriti, súnwandan wariñaguni inarüni houn gürigia ha ibidiñetiña woun, houn wánigu paaná lidan wadagimanu, houn wamadagu luma houn waduheñu. Ariha wamá fiu kesi le ídanbei mosu lan wáfaagun lun wariñaguni inarüni.

15. a) Ka uagu mabuidun lubéi lun biangua lan bigibu lidan bibagari? b) Kaba íderaguabu lun bawanduni óuchawaguni? (Arihabéi abürüdǘni).

¹⁵ Anhein nibureingidibu lubéi, maribanti busén ban lun hínsiñe ban houn bánigu paaná, íbini ítara, maweiyasunbá abagarida lau biangua igibu, kei hadüga fiu. Hagibugiñe haduheñu luma hagibugiñe lílana damuriguaü, aba hafamurun kristiánugu hamá ha buítiña, gama lumoun, amu hóuserun dan le hama hamá nibureintiña ha ubouaguna o ha lídanbaña páhina le ñein lubéi hadügǘwa umadagu lidan Internet. Ariñagatiña liwiye iyumaü, daüguatiña daüguaü to mabuiduntu, aganbaha hagía uremu le wíyeti lila, gátaditiña, yúsutiña düroga, gadaritiña aramudaguarügü ani adügatiña amu katei hanarimetimati. Wínwantiña lidan iyeeni: ariñagatiña iyeeni houn hagübürigu, houn íbirigu luma lun Bungiu (Sal. 26:4, 5). Gama lumoun, subudi lumuti Heowá anhein wíchuguña lubéi uéiriguni lun láurügü le wariñagubei ani lau sun lira dísetu wanigi luéi (Mar. 7:6). Buídutimabei wadügüni le lariñagubei Ariñawagúni: “Magimugarabaña gafigountiña, lubaragiñe lira, ruba inebesei lun Bungiu” (Ari. 23:17). *

16. Ida luba wabuinchagüdünu gárada lun weseriwidun lidan dan dayarüti?

¹⁶ Másiñati busén ban beseriwidun kei prekursoru ha adügütiña 70 oura luagu hati o lidan eseriwiduni espechaliti lidan dan dayarüti, kéiburi tidan Beteli. Danme le babuinchagüdünu gárada, súdiniti lun bariñaguni  inarüni lidan sun álügüdahani le adügǘbei ñein libügürü átuadi, isebáhari luma luáguti laruman ibagari (Ebü. 13:18). Ánheinti adügaadibu lubéi somu katei le mabuidunti ani mabahüdagunbagili houn wéiyaaña lidan afiñeni. Amuriahabá ídemuei hama lun gayara lan beseriwidun lun Heowá lau saminaü le darangilati (Rom. 9:1; Gal. 6:1).

17. Ka lunbei wadügüni ánhawa hálügüdagua ha éibaahabaliwa hawagu wíbirigu?

¹⁷ Luagu amu oubaü, samina wamá aba lan hamahadun gumadimatiña lun wapurichihan luagu Larúeihan Bungiu ani aba hálügüdaguniwa hawagu wíbirigu. Lunti san wariñaguni sun le wasubudirubei houn? Samina wamá luagu le ladügübei Hesusu dan le lálügüdagubalin urúei rómana. Aba lafalaruni adundehani luáguti anihein lan “lidaani ámanichuni luma lidaani adimurehani”, ligía anihein lubéi meha dan mariñagun lan ni kata (Apur. 3:1, 7; Mat. 27:11-14). Lidan burí kesi le, lunti duari wamá lun míchugun wamaniña wíbirigu lidan denchaü (Ari. 10:19; 11:12).

18. Ka lunbei wadügüni ánhawa hálügüdagua wéiyaaña lidan afiñeni luagu somu íbiri?

¹⁸ Samina wamá luagu ámuya kesi. Aba léiguadun somu íbiri lidoun figóu wéiriti ani subudi wamuti le asuseredubei. Kei lunti lan hakipuruni wéiyaaña lidan afiñeni damuriguaü lidan arumani, másiñati hadügüba lan álügüdahani woun luagu ka lan wasubudirubei. Kaba wóunabagüle, dántima le somu lan wamada o waduhe? Ariñagatu Bíbülia gürigia lan le úaraguati “ruti ariñahani le richati”, le lílabei le, ariñaga lani inarüni (Ari. 12:17; 21:28). Ligíati, lunti wabahüdahani sun le asuseredubei houn wéiyaaña lidan afiñeni, magidarunga ni murusun lídangiñe ariñahani, maramudun wagíame ni kata. Garichatiña lun hasubudiruni inarüni lun harihin ka lan buídutimabei lun híderaguni le afigouhabei lun gayara lan gamadagua lanya luma Heowá (Sant. 5:14, 15).

19. Kaba uagu layanuhóua lidan leweñegua arütíkulu?

¹⁹ Ariñagati Dawidi lun Heowá lidan furíei: “Hínsiñetu anigi harumatu bun” (Sal. 51:6). Le linarün katei, subudi lumuti meha Dawidi weiri lan lisudinin wanügüni inarüni tidan wanigi. Keisi kristiánugu inarünitiña, ariñaga wamuti inarüni lidan sun le wadügübei, ítara kei lariñaguni bérusu le lánina arütíkulu le. Ámuya katei le arufudubalin amu wamá wagía lubúeingu Bungiu hawéi híbiri gürigia ladüga arufudaha wamuti inarüni houn. Lidan leweñegua arütíkulu wayanuhaba luagu ida luba lan wadügüni.