1, 2. a) Ka dasi unbei líchaagua Hesusu lungua ani ka uagu? b) Ka lunbei wadügüni lun wídehan luma Bungiu?

SARAFANGEI meha Hesukrístu ani máisturu meha giñe (Mar. 6:3; Huan 13:13). Adüga lumuti bián wadagimanu le buidu. Luéigiñe aban oubaü, furendeiti ahandiliha tulu to hayusuruboun sarafangei lun ladügün katei huuti lau fulansu. Luagu le aban oubaü, yusu lumuti iarani lánina lasubudirunu Lererun Bungiu buidu buidu lun líderaguniña gürigia lun gunfuranda hamani inarüni le tídanbei Lererun Bungiu (Mat. 7:28; Luk. 24:32, 45). Dan meha 30 lubéi irumu lau, aba lígiruni lifisiute kei sarafangei lun lederegeruni libagari lun lapurichihani uganu luáguti Larúeihan Bungiu. Subudi lumuti meha ligía lan dasi súdinitimabei lugundun ariñagati ligía lan aban lídangiñe lébuna lóunahani Bungiu ubouagun (Mat. 20:28; Luk. 3:23; 4:43). Apurichihani meha súdinitimabei lun Hesusu lidan libagari ani busenti meha lun hadügüni amu ligiaméme (Mat. 9:35-38).

² Lau sun mama lan sarafangei hiibe-agei wádangiñe, sun wagía arufudaha wamuti uganu buiti. Súdiniti dasi le darí lun ídeha lan Bungiu lidan. Ariñagatu Bíbülia “wídehaña lan luma Bungiu” (1 Ko. 3:9, TNM; 2 Ko. 6:4). Subudi wamuti inarüni lan tídanbei Lererun Bungiu (Sal. 119:159, 160). Ligía mosu lubéi wachoururuni warufudahañein lan “uganu lánina inarüni kei lubudubu” lidan wapurichihan (aliiha huméi 2 Timotéu 2:15). Lau saminaü le wachügüwagu, lunti wáfaagun lun buídutima wamá lidan wayusurunu Bíbülia, agumeiraguagüdüni to súdinitimaboun lun warufudahani inarüni luagu Heowá, Hesusu luma luagu Larúeihan Bungiu. Lun gayara lan buídutima lan lidin woun lidan wapurichihan,  anúadiraaru lóundarun Heowá amu burí agumeiraguagüdüni to luntu wasubudirunu buidu ani tuguya tídangiñe agumeiraguagüdüni tótima wayusuruboun lun warufudahan.

3. Kaba un wetenira lidan murusun dan le mégeigilibei lubá lagünrinchawagun ubóu le, ani ida liña líderaguniwa Adügaü 13:48 lun wadügüni?

³ Másiñati wálügüdagun woungua ka lan uéigiñe wariñaga agumeiraguagüdüni tótima wayusuruboun lun warufudahan ani mama agumeiraguagüdüni tótima wayusuruboun lun wapurichihan. Wagúarunbei tun ítara, ladüga dan le wayanuhan luagu apurichihani, mini lan wíchuguñein lan uganu. Danti le wayanuhan luagu arufudahani, mini lan wafuranguagüdüni uganu houn gürigia lun gunfuranda hamani luma lun hawinwanduni le hafurendeirubei. Lidan murusun dan le mégeigilibei lubá lagünrinchawagun ubóu le, lunti wetenirun lun wagumeserun íchiga aturiahani tídangiñeti Bíbülia luma lun warufudahani inarüni. Mini lan le, mosu lan wáluahaniña gürigia haruma tanigi ha lúntiñabaña ibagari magumuchaditi luma lun wíderaguniña lun hadügagun houngua lubúeingume Heowá (aliiha huméi Adügaü 13:44-48).

4. Ida luba wadariruniña “ha lúntiñabaña ibagari magumuchaditi”?

⁴ Ida luba wadariruniña “ha lúntiñabaña ibagari magumuchaditi”? Ítara kei meha lidan furumiñeti sígulu, lunti wapurichihan. Ligíati, lunti wafalaruni adundehani le líchugubei Hesusu: “Danme le hachülürün lidoun aban uburugu o aban lan liraüraü fulasu, ábame hálugun gürigia ha ánhatiña lun heresibirunün ñein” (Mat. 10:11). Subudi wamuti máhabaña lan gürigia ha marumanbaña anigi lun uganu, hama ha pántabaña o ha mabusenrunbaña gamadagua hamá luma Bungiu. Áluaha wamutiña gürigia ǘnabugutiña ha harumabaña anigi, ha busenbaña hafurendeiruni inarüni. Samina wamá luagu aban katei. Dan meha le lawadigimaridunbei Hesusu, kei sarafangei, chóuruti áluaha lan meha wewe to buitu lun gayara lan ladügün katei kéiburi dábula, haláü, bena luma burí yugu. Dan le sagá laali fulansu ligía, yusu lumutu litulun buidu lun ladügüni umegeguni burí le. Lunti giñe wadügüni ligiaméme: furumiñe, lunti wáluahaniña gürigia ha haruma tanigi, ítarati gayaraabei wayusurunu agumeiraguagüdüni buidu lun warufudahan lun wadügün disipulugu (Mat. 28:19, 20).

5. Afuranguagüda huméi lau aban hénpulu ida luba lan wayusurunu agumeiraguagüdüni tótima wayusuruboun lun warufudahan. (Ariha humóun iyawaü to lídanboun lagumeseha arütíkulu).

⁵ Yúsuatu kada tulu lun kada katei. Samina wamá tuagu tulu lun lawadigimaridun aban sarafangei to másiñati yusu lanu meha giñe Hesusu. * Anuhein tuguya, seriwitu lun amisuragülei o lun lamakürǘn fulansu, amu lun tíbuguni, lun tagiweriha o lun techepuruni luma burí amu katei, kéiburi lun larihín anhein úaragua lubéi fulansu luma lun láfadaraguagüdün. Ítarameme, kada agumeiraguagüdüni tótima wayusuruboun lun warufudahan huutu lun ítaga katei. Kei súdiniti tubéi súngubei, warihaali ida luba lan wayusurunu.

6, 7. a) Ida liña hayusurunu tarühéta? b) Ka bián katei unbei tahuuda agunbirahagülei lun adamuridaguni?

⁶ Tarühéta. Lau sun ñüraü tan agumeiraguagüdüni to, huutu lun wíderaguniña gürigia lun hasubudiruniwa luma lun hebelurun lidoun wani páhina lidan Internet, le ñeinba luéi hadarira lanwoun ariñahani wawagu ani gayaraati hamuriahan aturiahani tídangiñeti Bíbülia luéigiñe páhina le. Darí guentó, amuriahaaña hóugiñe 400,000 gürigia aturiahani tídangiñeti Bíbülia luéigiñe jw.org. Ani sagü weyu amuriahatiña saragu san gürigia aturiahani! Gayaraati san wanügün fiu tarühéta wámagua? Ítara gayaraabei wayanuhan tuagu Bíbülia lidan woudin adügei waberesegun le lánina sagü weyu.

⁷ Agunbirahagülei. Seriwitu agunbirahagülei lun adamuridaguni lun bián katei. Ariñagatu houn gürigia: “Amisuraha wamutün aturiahoun Bíbülia hama gefentiña luagu Heowá”. Lárigiñe, ru tumuti chansi houn lun hanúadahan anhein hadügübei lubéi lidan adamuridaguni o hábiñe. Ligíati, mámarügü  lun tayanuhan wawagu tahuuda agumeiraguagüdüni to, huutu giñe lun tagunbirahaniña “ha asubudirubalin luagu megei hamani lídehan Bungiu” lun haturiahanu Bíbülia wama (Mat. 5:3). Inarüni sun lan gürigia gayaraati hachülürün lidoun wadamuridagun, íbini mabusenrun hamá haturiahanu Bíbülia. Ánhaña achülüra, harihibei átiribei lan gayara hamá afurendeira tuagu Bíbülia.

8. Ka uagu súdini lubéi lun hachülürün gürigia lidoun wadamuridagun íbini ábanrügü wéiyaasu? Ru humá aban hénpulu.

⁸ Súdiniti lun wagunbirahaniña gürigia lun hachülürün lidoun wadamuridagun íbini aban wéiyaasu. Ka uagu? Ladüga ítara luba harihini amu wamá hawéi lílana relihión mama inarüniti, wagía gefentiña luagu Heowá arufudaha wamuti inarüni tídangiñe Bíbülia ani íderagua wamutiña gürigia lun hasubudiruni Bungiu (Isa. 65:13). Ligía asuseredubei lun Ray tuma Linda, aban feru maríeitiña merigana, fiu irumu lubaragiñe le. Afiñetiña luagu Bungiu ani sanditiña lunti lan meha houdin ligilisirugu lun hasubudiruni Bungiu buidu. Ligía hagumeserunbei abisidaha kada aban tídangiñe ligilisi to lídanboun uburugu le ñein lubéi hawinwanda. Anuhein meha saragu ligilisi tuma saragu relihión lidan uburugu ligía. Lúmagiñe furumiñe, ariñagagubeitiña ánhaña lan eredera tidan aban ligilisi mosu lan harihin bián katei. Furumiñe, mosu lan hafurendeirun somu katei lídangiñe le ariñawagúbei ñein. Ani le libiaman, lunti lan hadaüragun tílana ligilisi kei hadaüragun ha ariñagubaña seriwi hamá lun Bungiu. Lárigiñe saragu irumu, ñǘdünhaña meha tidan sun ligilisi to lídanboun uburugu ani hírutiña meha lugundun mafurendeirun hamá ni kata ani masansiraguntiña tílana lau lubudubu. Dan le háfuridunbei tídangiñe tagumuhóun ligilisi to tídanboun lísüta to hadügüboun, aba tidin Linda awadigimarida, ánheinti Ray, aba lidin hábiñoun. Dan le éibugeina lubéi, aba lásügürün turugabugiñe Luban Wadamuridagun, ábati lasaminarun: “Aba hamugatia nebelurun lun narihini ka lan hadügübei ñein”. Ma lugundan! Sun ha ñéinbaña arufudatiña ínsiñehabuni ani buiti giñe hasansiragun. Aba lañuurun Ray lidan furumiñeti burí haláü ani gúndaati lau le lafurendeirubei. Susereti kei lariñaguni apostolu Pábulu luagu le hariñagubei gürigia dan le hachülürün luagu furumiñeti wéiyaasu lidoun adamuridaguni: “Anihein [...] Bungiu huma le tímatimaati” (1 Ko. 14:23-25). Lúmagiñe weyu ligía lun lubaruaguóun, aba lagumeserun Ray abasiha sagü dimaasu lidoun adamuridaguni, lárigiñe, aba giñe labasihan lidan sun adamuridaguni le adügǘbei labadinagua dimaasu. Aba giñe tagumeserun Linda ñüdün luma. Íbini lóugiñe haali lan 70 irumu hau biángubei hagía, aba hagumeserun aturiahoun Bíbülia, lárigiñe aba habadiseirun.

9, 10. a) Ka uagu ménrengun lubéi tayusurún tratadu lidan apurichihani? b) Afuranguagüda huméi ida luba lan wayusurunu tratadu Katei san Larúeihan Bungiu?

⁹ Tratadu. Anuhein widü tratadu wama to ménrengunti lun tayusurún ani buitu lun wagumeserun ayanuha hama gürigia. Lúmagiñe wagumeserun apurichiha tau lidan irumu 2013, imprimíruaaru kéiburi seingü milu míñunu tídangiñe. Le buídubei tuagu, dan le lan wafurendeirun ayusura aban, ménrengunhali woun wayusurunu to tíbiri ladüga ligiaméme tesetirun súngubei. Ida luba wayusurunu lun wagumeserun ayanuha hama gürigia?

¹⁰ Samina wamá aba lan wayusurunu tratadu to gíriboun Katei san Larúeihan Bungiu? Gayaraati warufuduni tidáü lun gürigia, ábameti wariñagun lun: “Álügüdaguaadün san hungua katei lan Larúeihan Bungiu? Hariñaguña hamuga san...?”. Mariñagunga lun anhein buidu lubéi lóunabun o mabuidun lan, sügǘ wamá lidoun le aban páhina ani arufuda waméi fánreinti “Le tariñagubei Bíbülia” lun ani aliiha waméi Danieli 2:44 luma Isaíasi 9:6, le bürüwañubei tidan tratadu. Anhein gayara, sigí wamá lau yanu. Lagumuhóun, arufuda waméi álügüdahani le tanagangiñebei tratadu lun, lábugiñe fánreinti le gíribei “Álügüdagua humá hungua”: “Ida luba ibagari lábugiñe Larúeihan Bungiu?”. Ítara luba wígirun kaba lan uagu wayanuha danme wagiribudun. Dánmeya le wayanuhan luma gürigia ligía, gayaraati wakutihani leksióun 7 tidan garüdia Uganu buiti lúmagiñeti Bungiu, to ábanboun tídangiñe agumeiraguagüdüni tótima wayusuruboun lun  wagumeserun arufudaha tídangiñe Bíbülia houn gürigia.

11. Ka un tabürüdǘwa wani garüdia, ani ka lunbei wasubudiruni tuagu?

¹¹ Garüdia. Garüdia Awisahatu tuma garüdia Agaguduabá!, tuguya garüdia tótima ásügürawagüdüboun lidoun saragu iñeñein ani tótima subudiwaboun lidan sun ubóu. Kei aliihóua tan lidan saragu ageiraü, anuadirúati katei le uágubei tayanuha le luágubei tidáü lun busén hamá gürigia lidan sun ubóu lun hasubudiruni ariñahani le tídanbei. Lunti wayusurunu lun wadügün lun busén hamá gürigia hasubudiruni létima lunbei súdinitima lan lidan habagari. Lun gayara lan wígirunu houn gürigia ha gadünabaña heresibirunu, lunti wasubudiruni ka lan hawuyeri gürigia unbei tabürüdǘwa kada garüdia.

12. a) Ka san un tadügǘwa garüdia Agaguduabá!, ani ka tisuunibei? b) Ka lubuidun sügǘ winwan humaalibei lau hayusurunu garüdia to lidan apurichihani?

¹² Adügǘwatu garüdia Agaguduabá! houn gürigia ha lóuguabei hasubudin tuagu Bíbülia o ibidiñeti ni kata houn tuagu. Másiñati ibidiñe lan arufudahani hani kristiánugu houn o machourun hamá tuagu relihión o ibidiñe lan houn anihein lan adundehani buiti tidan Bíbülia lun habagari. Ábatima lídangiñe katei le unbei tadügǘwa garüdia to lun tíderaguniña aliihatiña lun hachoururuni houngua anihein lan Bungiu (Rom. 1:20; Ebü. 11:6). Gayaraati giñe tíderaguniña gürigia lun hafiñerun luagu Lererun lan Bungiu tídanbei Bíbülia (1 Tesa. 2:13). Anihán ǘrüwa ámuñegueinarügü katei le uágubei layanuhóua tidan garüdia Agaguduabá! lidan irumu 2018, “El camino de la felicidad”, “12 claves para una familia feliz” luma “Ídemuei houn egeburihatiña”.

13. a) Ka un hawuyeri gürigia tadügǘwa Garüdia Awisahatu to hountu sun gürigia? b) Ka lubuidun sügǘ winwan humaalibei lau hayusurunu garüdia to lidan apurichihani?

¹³ Afuranguagüda tumuti Garüdia Awisahatu to hountu sun gürigia arufudahani le tídanbei Bíbülia houn gürigia ha inebeti Bungiu houn tuma Lererun. Gayaraati subudi hamá somu arufudahani tídangiñeti Bíbülia íbini ua lan gunfuranda hamani le tarufudahabei buidu (Rom. 10:2; 1 Tim. 2:3, 4). Tidan ǘrüwa garüdia to lánina irumu 2018, ounabúati álügüdahani burí le: “Húugili san adundehani le tídanbei Bíbülia?”, “Kaba asusereda ámuñegü?” luma “Saminati san Bungiu huagun?”.

14. a) Ka un hu lan gádürü bidéu le tídanbei agumeiraguagüdüni tótima wayusuruboun lun warufudahan? b) Ka lubuidun sügǘ winwan humaalibei lau hayusuruni bidéu burí le?

¹⁴ Bidéu burí. Lidan lidaani Hesusu, mosu meha hayusuruni sarafangei here lun hahandilihanu tulu to hayusuruboun, uguñe weyu anuhein tulu to lautu elekütrisida, kéiburi siera, búroka, máhina lun láhiahoun fulansu o lun ládarawagun gürabu. Ítarameme, amu tuéi agumeiraguagüdüni to imprimíruaboun, aniheinhali lubuidun burí bidéu wama. Gádürü lídangiñe anihein tidan agumeiraguagüdüni tótima wayusuruboun lun warufudahan: Ka uagu lunti lubéi haturiahanu Bíbülia?, Ida liña wíchugun külase tídangiñeti Bíbülia?, Ka adügǘbei lidan wadamuridagun? luma Kátaña san gefentiña luagu Heowá? Gayaraati layusurún bidéu burí le adurarubei ǘnabu luéi bián minutu lidan furumiñeti bisida. Le adurarubei lóugiñe bián minutu, gayaraati leseriwidun lun wagiribudun abisidahaña gürigia luma houn ha gadaanitimabaña. Huuti burí bidéu le lun línchahaniña gürigia lun hánharun lun haturiahanu Bíbülia luma lun houdin adamuridagua.

15. Írida humá somu sügǘ le arufudubalin ida liña lan hasandiragun gürigia houngua lau harihini bidéu lidan hererun.

¹⁵ Ariha waméi ka lan hariñagubei gürigia dan burí le harihini bidéu o dan le hayusuruni íbirigu. Aba tadarirun aban íbiri aban würi to águyuboun Miküronesiagiñe ani aba tarufuduni bidéu le gíribei Ka uagu lunti lubéi haturiahanu Bíbülia? tun lidan yapés, le tererun. Dan le lagumeserunbei bidéu, aba tariñagun würi tuguya: “Hee, lídanñein nererun! Mafiñengidina! Aban layanuhan gürigia le ayanuhabei lidan bidéu le kei hayanuhan gürigia ha lídanbaña ubouhu le ñéingiñe nubéi. Ariñaga lumuti  nererun!”. Lárigiñe, aba tariñagun taliihabei lan arihateime sun le lídanbei jw.org le lídanbei yapés (ariha huméi giñe le lariñagubei Adügaü 2:8, 11). Óunahatu giñe aban íbiri merigana aban abürüdǘni lun tibase, le awinwandubei lidan amu ageiraü, lun lebelurun lidoun wani páhina arihei bideuméme le lidan lererun. Lárigiñe larihini, aba labürühan tun luéigiñe Internet, aba lariñagun: “Létima aweiridagüdübarun nanigi fánreinti le afuranguagüdübalin aban lan sífiri gabafuti ani wuribati abugurubalin ubóu. Amuriahatina lun hayabin arufudaha nun tídangiñe Bíbülia”. Lawinwanduña lidan aban ageiraü le ñein lubéi máhawa lan lun wapurichihan.

16. Afuranguagüda huméi ka lan un tahuuda kada aban tídangiñe garüdia to: a) Aganba huméi Bungiu ábame hawinwandun lun súnwandan. b) Uganu buiti lúmagiñeti Bungiu. c) Kátaña san adügübalin lugundan Heowá uguñe weyu?

¹⁶ Amu burí garüdia. Ida luba warufudahani inarüni lun aban gürigia anhein maliiradi lubéi buidu o ua tan agumeiraguagüdüni tídangiñe Bíbülia lidan lererun? Anuhein aban agumeiraguagüdüni buitu wama: garüdia Aganba huméi Bungiu ábame hawinwandun lun súnwandan. * Ábaya agumeiraguagüdüni buitu lun wíchugun aturiahani, garüdia Uganu buiti lúmagiñeti Bungiu. Gayaraati warufuduni lagumuhóun páhina lun gürigia le ñein lubéi láfuacha 14 ámuñegueinarügü katei le uágubei tayanuha garüdia, wálügüdüni ka lan lídangiñe hínsiñetimabei lun, ábameti wagumeserun aturiahei leksióun ligía luma. Houcha wamaali san wadügüni dan le wabisidahañanu lan gürigia? To tǘrüwan garüdia to tídanboun agumeiraguagüdüni tótima wayusuruboun lun warufudahan, garüdia Kátaña san adügübalin lugundan Heowá uguñe weyu? Adügǘwatu lun tadundehaniña aturiahatiña tidoun lóundarun Heowá. Lun wasubudiruni ida luba lan wayusurunu, gayaraati warihini lidan ubanaü Le lunbei ladügǘniwa lidan adamuridaguni Habagari Kristiánugu luma Heseriwidun le lánina ǘrüwa-hati, irumu 2017.

17. a) Ka un tahuuda kada líburu to lánina aturiahani? b) Ka lunbei hadügüni sun ha abadiseirúbaña, ani ka uagu?

¹⁷ Líburu. Ánhawa agumesera aban aturiahani tídangiñeti Bíbülia tau aban garüdia, gayaraati wásügürün furumiñeguarügü oura tidoun líburu Kátima san tarufudahabei Bíbülia? * Seremei líburu to, lafurendeiruba aturiahati lanwoun arufudahani súdiniti le tídanbei Bíbülia. Ánheinti gumú laaru lubéi aturiahati líburu ani labuiduruña lumadagua luma Bungiu, sügǘ wamá tidoun líburu “Redei humá lidan línsiñehabu Bungiu”. Ladügüba le lafurendeirubei tídangiñe líburu to lun lawinwanduni le furendei láalibei. Haritagua waméi mosu lan hagumuchunu sun aturiahatiña biángubei líburu íbini habadiseirun lubaragiñe hagumuchunu. Ítara, derebugubei hafiñen lidan inarüni (aliiha huméi Kolosana 2:6, 7).

18. a) Según 1 Timotéu 4:16, ka lunbei wadügüni, ani ida luba lidin woun ánhawa adügei? b) Ka wabusenrubei wibihin dan le wayusurunu agumeiraguagüdüni tótima wayusuruboun lun warufudahan?

¹⁸ Mosu hapurichihani gefentiña luagu Heowá uganu lánina inarüni le gayaraabei lanügüniña gürigia lidoun ibagari magumuchaditi (Kol. 1:5; aliiha huméi 1 Timotéu 4:16). Lun wadügüni, resibi wamaali sun le wemegeirubei tidan agumeiraguagüdüni tótima wayusuruboun lun warufudahan lun gayara lan tíderaguniwa (ariha huméi rekuáduru “ agumeiraguagüdüni tótima wayusuruboun lun warufudahan”). Yusu wamóun buidu. Kada íbiri, ligía lun larihin kaba lan agumeiraguagüdüni layusura ani ídaba lan layusuroun. Haritagua waméi le, mama lan wafanreinhan agumeiraguagüdüni súdinibei. Ni lun wígirunu houn gürigia ha meberesenbaña lau uganu. Le wabusenrubei, ha lan “lúntiñabaña ibagari magumuchaditi”, ha harumabaña anigi, ǘnabugu hagía ani busentiña hafurendeirun luagu inarüni, lun hachülürüba lan lun lani hamá Kristu disipulugu (Adü. 13:48; Mat. 28:19, 20).