LIDAN irumu 1934 nágurahoua. Barühali meha Fred, le núguchi, tuma Edna Molohan, to núguchu, wein irumu kei Aturiahatiña Bíbülia (gefentiña luagu Heowá). Seremei numutiña luagu harufudahan nun lun hínsiñe lan Heowá nun. Lidan meha aban liraüraü aüdü Kansas le gíribei Parsons, wawinwanda. Hiibe-agei meha lílana damuriguaü le ñein wabéi kristiánugu anuadirúaaña. Súnwandan meha woudin adamuridagua ani furitiwa giñe apurichihei inarüni le tídanbei Lererun Bungiu. Liibe-agei dan, apurichihatiwa ǘmadarugu samudi rábounweyu, le unbei wariñaga uguñe weyu apurichihani lidan guririguaü. Anihein meha dan buchá lan wawagu, aba méhati lanügüniwa núguchi ata ice cream.

Wéiriti meha fulasu le unbei letenira liraüraü damuriguaü le ñein wabéi, mosu meha wapurichihan lidan lirahüñü aüdü, ichari lánina bunaguaü luma ñein lubéi hagüriahóua animaalu. Rútiña meha ha ábunagutiña, gañéin to sun liña temeilihoun tuma burí amu katoun to lánina ábouaguni woun, íbini gayu ha wínwangiña teweñegua garüdia. Kei meha rúhali lubéi núguchi seinsu tuagu agumeiraguagüdüni, le meha híchugubei gürigia woun ligía meha eseriwidubei woun lun weigin.

Aba hibihin nagübürigu aban gramófono lun apurichihani. Siñá numuti meha ayusura ladüga ñǘraügidina lan, hínsiñeti meha nun níderaguni núguchi íchigei yanu burí le gürawárü lubéi íbiri Rutherford, dan le woudin abisidahaña gürigia o woudin íchiga aturiahani tídangiñeti Bíbülia.

Aba líchugun núguchi tábulugu likarün to Ford aban máhina lun laganbún yanu dise. Huutu meha ugunei tuguya lun apurichihani. Súnwandan meha líchugun músika furumiñe lun habusenrun gürigia haganbun, lárigiñe, aba wíchugun aban yanu le gürawaruwarügüti. Dan le lagumuchun, aba wíchugun agumeiraguagüdüni houn ha arufudubaña busén hamá hafurendeirun.

Lidan aban liraüraü aüdü Kansas gíriti Cherryvale, aba hamahadun lúrudu ha lídanbaña párüke le  ñein lubéi houdin gürigia emeraagua sagü dimaasu, lun lesetiruni núguchi yanu le aganbahouwarügübei. Gama lumoun, aba hariñagun lun gayara lan líchuguni bóugudi. Ítara liñati, aba líchugunu likarün bóugudi luéi párüke masigenehanga. Aba líchuguni yanu le aganbahouwarügübei lun hasigirun gürigia aganbei programa lau lumenrengun. Gúndaatina meha lau nawinwanduni sügǘ burí ligía luma núguchi lau sun Jerry, le níbugaña.

Lagumuchagüle irumu burí darandi, aba wapurichihan lidan apurichihani le gíribei “campañas relámpago”, lun wegeyedaguni sun fulasu le ñein lubéi gaturobulin wamá lun wapurichihan. Kei buga nabahüdahani hun lidan lagumeseha abahüdaguni, dan le nayanuhabei luagu Joplin (Misuri), luagu sará wamá lubá larugan lidan manimaniga lan, aba woudin íchaaha tratadu tuma burí garüdia lábugiñe habenari gürigia. Lárigiñe, aba wóundarun bóugudin luéi uburugu lun warihin anhein ragǘ habéi lúrudu somu hádangiñe íbirigu.

Lidan dan ligía, anihein meha aban ligaburi apurichihani le meha gíribei amarücharuni lánina ariñahani. Aba wadaürün gárada lau abürüdǘni wawouguoun, aba wéibugun afileiheina lidan sun uburugu asubudiragüdei Larúeihan Bungiu. Haritaguanágili aban lídangiñe arümacharuni ligía lidan aüdü le ñein lubéi nawinwanda. Barütiña íbirigu gárada hawougua to ariñaguboun “Relihión aban sádara ani híwerutiña tílana”. Wábiñegiñe háfurida ani éibugatiña murusunraü lóugiñe aban kilometuru dimí (aban maili), lárigiñe aba hagiribudun. Le buídubei, madarirun wamá ebedaagutiña, gama lumoun, ariha hamutiwa saragu gürigia ha genegeti busén hamá hafurendeirun.

Súnwandan meha haweiyasuhan niduheñu Kansasgiñe lun Texas lun houdin lidan adamurini. Nadagimeinti meha núguchi tidan kónpeni to tani íngiini to meha aweiyasuhaboun Misurigiñe lun Kansas luma Texas, ítarati aweiyasuhatiwa mafayeihanga lun woudin abisidahaña waduheñu luma lun woudin lidan adamurini. Temple (Texas) meha lawinwanda tati núguchu le gíribei Fred Wismar, tuma Eulalie, to lani weiriou. Lidan meha lagumesehan sígulu 20 lafurendeirei Fred, le niyaurite inarüni, dan meha le nibureingili, aba labadiseirun ani aba layanuhan luagu le lafurendeirubei houn lítunu núguchu haganagua. Subudi hamuti meha íbirigu ha awinwandubaña lurageirugun Texas, le ñein lubéi leseriwida kei óunigiruti sirkuitu. Buiti meha lasandiragun gürigia lungua lerederun luma, lugundun hínsiñehabuti ani gúndaati. Anihein meha ubebeni luagu lun larufudahani inarüni ani íderagua lumutina ligaburi dan meha nibureingidina lun gamadagua nan luma Bungiu.

Lidan irumu 1941, aba woudin tidan íngiini lun San Luis (Misuri), lun woudin lidan aban adamurini le wéiriti. Agunbirahóuatiña irahüñü hama nibureintiña lun hañuurun úara lidan aban fulasu espechaliti lun haganbuni liyanun íbiri Rutherford, le gíribei “Lirahüñü Urúei”. Hóugiñeñadiwa 15,000 gürigia ñein. Dan le lagumuchun yanu, magurabuntiwa yebe ledewehaba lan íbiri Rutherford hama ha íderagubalin iseri líburu to gíriboun Hijos lun kada aban wádangiñe.

Lidan gádürü-hati, irumu 1943, lidan aban adamurini ñǘraüti Coffeyville (Kansas), le gíribei “Llamada a la Acción”, aba lariñawagún ñein tagumesera lan  “Leskuela Kristiánu lánina Apurichihani”. Furitu giñe aban garüdia to lautu 52 leksióun, to lunboun meha tayusurún tidan leskuela tuguya. Murusun dan lárigiñe, tídanmeme leskuela tuguya níchigei furumiñeti niyanun kei aturiahati. Lídanmeme adamurini ligía nabadiseira úara hamá amu gürigia lidan lidili duna le lídanbei ichari le yarafabei woun. Aban meha sügǘ espechaliti lira nun dan ligía.

Dan le nagumuchunu nileskuela lidan irumu 1951, mosu meha nasaminaruni kaba lan meha nadüga lau nibagari. Busentina meha neseriwidun tidan Beteli, le meha ñein lubéi leseriwida Jerry, le níbugaña. Ábati nóunahanu nigaradan Brooklyn. Murusun dan lárigiñe, aba haguaragüdün nuagu lun neseriwidun Betelirugu, 10 lidan ǘrüwa-hati, irumu 1952. Barüti buiti nun lidan numadagua luma Bungiu neseriwidun tidan Beteli.

Agurabatina yebe nawadigimaridun lidan fulasu le ñein lubéi imprimírua tan garüdia tuma amu burí agumeiraguagüdüni. Gama lumoun, mawadigimaridungubeitina lidan fulasu ligía ladüga aban híchugunina lun nawadigimaridun eseriwida éigini, lárigiñe aba hóunahanina gusinarugun. Hínsiñeti meha le nadügübei ñein nun ani furendeitina saragu lídangiñe. Kei le góurate lubéi meha wadagimanu gusinarugu, gadaanitina meha wéyuagu lun naturiahan lau darangilaü tidan óunwenbu áfisi to tani líburu-agei to Beteliruguboun. Ligía ederebudagüdübalin numadagua luma Heowá, nafiñen luma busén nan neseriwidun Betelirugu darí ñein lumuti lébeda. Furihali meha Jerry tídangiñe Beteli lidan irumu 1949 ani maríeihali meha tuma aban íbiri gíritu Patricia, gama lumoun, aba lerederun awinwanda Brooklyn. Lidan furumiñeti irumu nau eseriwida Betelirugu, íderagua hamutina saragu ani rútiña meha dǘgüdaguaü nun.

Murusun dan lárigiñe nachülürün Betelirugun, aba hagumeserun íbirigu óuchaguaña wügüriña lun híchugun hanwoun íbirigu ha tóunahan Beteli íchiga yanu. Ounahóutiña íbirigu ha abisidahein damuriguaü le dísebei kéiburi 322 kilometuru (200 maili) luéi Brooklyn. Rútiña aban yanu le adurarubei aban oura, lárigiñe aba háfuridun apurichiha hama íbirigu. Ibiha numuti lubuidun chansi ligía lun hanuádirunina. Dan le nagumeserunbei abisidahei damuriguaü luma íchiga yanu, hanufudetina meha. Liibe-agei dan, tidan meha íngiini naweiyasuha. Haritagua nágili buidu le asuseredubei aban weyu dimaasu rábounweyu irumu 1954, lidan lidaani lidiliga. Nagiribuduña tidan íngiini lun uburugu Newayóru, mosu yebe nachülürün Betelirugu guñoun. Aba téiguahan niewe ani hanarimeti téiguahan ani diligati darí lun lagadeirun tumahina íngiini. Aba nachülürün uburugun kei burí ladáün seingü binaafin weyu leindi. Aba nádinun tidoun íngiini lun Brooklyn, aba nidin sügülügü gusinarugun, tárüraühali ani buchá nuagu ladüga bou larugan nau tidan íngiini marumugunga. Gama lumoun, turobuli kei le ni kata lumoun ugundani le nuágubei lau neseriwidun houn íbirigu luma nadügün saragu umadagu dimaasu burí ligía.

Lidan furumiñe irumu nau Betelirugu, aba hóunahanina ídeha tidan radiu WBBR, dan meha ligía lídanñoun libiaman fuló áfisi, tidan muna númeru 124, üma Columbia Heights. Anihein meha aban programa dimaasu-auti, le ídanbei láfurida hamalali aban sétanu hau gürigia ha aturiahabarun Bíbülia úara. Au meha aban hádangiñe. Íbiri meha A. H. Macmillan, le meha unbei wagúara lau saragu ínsiñeni íbiri Mac, anihein meha giñe lidan programa le tani WBBR. Seriwiti meha íbiri le saragu irumu tidan Beteli ani aban meha hénpulu buiti woun wagía ha málügiña tidan Beteli, lau lawandun lidan leseriwidun lun Heowá.

Lidan irumu 1958, aba nagunbirahóun lun nídehan tidan Leskuela tídangiñetu Bíbülia Galaadü. Íderagua numutiña iseri misionerugu lun hibihinu habisa luma lun naransehan lubá haweiyasuhan íbirigu ha. Dan lügüra, séruti meha haweiyasuhan gürigia tidan awión, ligíati, murusunrügüñanu meha eresibihatiña aweiyasuhatiña tidan awión. Hiibe-agei ha ñǘdünbaña Áfürika o lidoun amu fulasu le díseti kéiburi India luma Hapón, tidan meha waporu to anahaboun ílagu houdin. Dan le lararirunbei lebegi paséi tidan awión, ligía hagumeserun misionerugu aweiyasuha tidan.

Aba laganwoundun nuadigimari lidan irumu 1960, au meha arihibei lau táhayahoun awión  lun tadügün wéiyaasu Merigagiñe lun Yuropa lun adamurini burí le ídanbei houdin íbirigu ha lídangiñetiña saragu ageiraü lidan irumu 1961. Au guánarügü aweiyasuhatina lidan wéiyaasu libe le Newayorugiñe lun Hamburgo (Yámani). Lárigiñe adamurini le adügǘbei lidan uburugu ligía, au hama 3 íbirigu ha eseriwidubaña tidan Beteli aba wáhayahan aban karü, aba woudin Italia, le ñein lubéi woudin abisidahóun Beteli to Romaboun. Lárigiñe, aba woudin Faransu, sügǘ wamuti wübü burí le lani Pirineos, aba webelurun Esüpáña, le ñein lubéi máhawa lan lun apurichihani dan ligía. Ma wagundan lau wasubudiruniña íbirigu ha Barselonabaña luma wíchugun fiu agumeiraguagüdüni aramudaguarügü houn kei idewesei le óuburawarügüti. Lúmagiñe Esüpáña aba woudin Ámsterdam, ñéingiñe wáhamara lun Newayóru.

Kéiburi aban irumu lárigiñe, aba lichugún dasi nun lun nadügün aransehani lun ladügǘn aban wéiyaasu houn 583 íbirigu ha lúnbaña houdin lidan adamurini espechaliti, le ñein lubéi houdin íbirigu ha lídangiñe saragu ageiraü. Wayanuhaña luagu adamurini le gíribei “Buenas Nuevas Eternas”, le adügǘbei lidan irumu 1963. Ladügǘba meha adamurini le Yuropa, Asia luma luagu burí ubouhu le luágubei Barana Pasifiku ani le lagumuhóun ladügǘba meha Honolulú (Hawái) luma Pasadena (Kalifornia). Ani lidan wéiyaasu ligía, hararamaguba meha íbirigu Líwanu luma Hordán, lun hafurendeirun somu katei luagu fulasu le lánina tidaani Bíbülia. Amu luéi wagañeiha paséi lubá burí wéiyaasu luma wadarirun rumu tidan haban chülüdügütiña, mosu meha giñe larihin departamentu le ñein nubéi luagu tasagarún gárada to amuriahóuboun lidan saragu ageiraü.

Luagu amu oubaü, espechaliti meha giñe irumu 1963 nun. Lugundun, 29 lidan sisi-hati ligía namarieidun tuma aban íbiri misurina gíritu Lila Rogers, barüharu meha 3 irumu eseriwida Betelirugu. Aban dimaasu lárigiñe wamarieidun, aba wóundarun hamoun ha lúnbaña haweiyasuhan lidan sun ubóu; ñǘdüntiwa Güresia, Ehiptu luma Líwanu. Hamátiwa Beirutgiñe lun Hordán ani málütiwa huwañurugu. Kei meha siñá lubéi lapurichihóun Hordán, míchuguntiña gárada houn Gefentiña lun hebelurun lidoun ageiraü le, aba wálügüdagun woungua kaba lan asusereda danme le wachülürün ñein. Aba taweiridun wanigi dan le wíchugubei fe tábulugu lan muna to lídanboun fulasu le ñeinba lubéi tadagara awión añahein lan fiu íbirigu ñein lau abürüdǘni le ariñagubei “Buiti achülürüni, gefentiña luagu Heowá!”. Gúndaatiwa warihini fulasu le lánina tidaani Bíbülia: fulasu le meha ñein lubéi hawinwanda binadu lubúeingu Bungiu, le ñein lubéi lapurichiha Hesusu hama lani apostolugu luma fulasu le burí ñein lubéi lagumeseha apurichihani “darí lumoun lagumuhóun fulasu ubouagu” (Adü. 13:47).

Lidan 55 irumu le naubei maríeiñu, íderagua táadina Lila lidan sun dasi le ichugúbei nun, kei aban paaná buitu. Ñǘdünhadiwa úara saragu wéiyaasu Esüpáña luma Portugali, dan meha le maha lubéi lúrudu lun lapurichihóun ñein. Rútiwa dǘgüdaguaü houn íbirigu ani barütiwa agumeiraguagüdüni houn luma amu burí katei le hemegeirubei. Ñǘdüntiwa giñe arihaña hádangiñe íbirigu ha adaürǘbaña tidan aban binadu haban milidaru to lídanboun uburugu Kádis (Esüpáña). Aba nasandirun aban lanarime  ugundani lau níchugun gurasu houn lau aban yanu tídangiñeti Bíbülia.

Lúmagiñe irumu 1963, nadagimei haadina lidan lubuidun dasi le, aranseha lubá burí wéiyaasu lubá adamurini le ñein lubéi hachülüra íbirigu lídangiñetiña saragu ageiraü, adügǘwati adamurini Áfürika, Lamidan Meriga luma Suedi Meriga, Australia, Yuropa, Hawái, Ageiraü burí le díseti, Néwaselanda luma Puerto Riku. Au tuma Lila, ñǘdünhadiwa lidan saragu adamurini ani le mabulieidun wabéi, kei burí le adügǘbei lidan irumu 1989, Barsobia (Polonia). Gíbetiña íbirigu rúsiana achülürütiña lidoun óunwenbu adamurini ligía, le meha furumiñetibei adamurini lidan habagari. Fiu hádangiñe ha wasubudirubaña sügǘ haña meha saragu irumu dáüwañu ladüga hafiñen.

Ábaya dasi buiti le wadügübei wabisidahaniña íbirigu ha Betelirugubaña hama misionerugu ha lídanbaña ámuñegueinarügü ageiraü ubouagu lun wíchugun dǘgüdaguaü houn. Lidan lagumuhóun bisida le wadügübei houn, ñǘdüntiwa Koréa le Súrubei ani aba wasubudirun 50 íbirigu ha adaürǘbaña tidan furisun to lídanboun uburugu Suwon. Sun hagía arufudatiña aban lubuidun igaburi ani aranseñu haña lunya heseriwidun lun Heowá danme le háfuridun. Ibihatiwa dǘgüdaguaü lau wasubudiruniña (Rom. 1:11, 12).

Eibu lásügürün irumu, ariha naali haganwoundun lumutuniña Heowá seremei labiniruniña. Dan le nabadiseirunbei lidan irumu 1943, kéiburi san-milu ñanu meha apurichihatiña lidan sun ubóu. Ani guentó awanhein hóugiñe 8,000,000 eseriwida lun Heowá lidan 240 ageiraü luma burí fulasu. Liibe-agei le ibihúbei lidan apurichihani seremei lun hídehan ha eresibihabaña tídangiñe Leskuela Galaadü. Gúndaatina lau nídehan sun irumu le hama saragu hádangiñe misionerugu ha luma lun níderaguniña lun hachülürün lidoun ageiraü le ñeinba lubéi heseriwida.

Gúndaatina luagu le nadügübei dan meha le nibureingidina lau nayusuruni nibagari lun neseriwidun lun Heowá luma nabuinchagüdünün gárada lun neseriwidun tidan Beteli. Lúmagiñe dan ligía, biní laali Heowá saragu le nadügübei lidan neseriwidun. Amu luéi ugundani le wawinwandubei tidan Beteli, au tuma Lila, gúndaatiwa giñe lidan saragu burí irumu le ásügürübei lau weseriwidun lidan saragu damuriguaü le Brooklynbei luma luagu wadügün umadaguaü lun sun wabagari.

Anahagua eseriwida tidan Beteli sagü weyu lau tídehan Lila. Barühadina lóugiñe 84 irumu, gama lumoun, gayaraagili nadügün wadagimanu le huuti, neresibirunu gárada to ounahoubóun tun Beteli.

Gúndaatiwa lau tílana wamá tubuidun lóundarun Heowá luma warihini ida liña lan lagunfulirun dimurei le lídanbei Malakíasi 3:18: “Ábameti hasubudiruni le buídubei lumoun le wuribabei, le áhuduragubei lun Bungiu lumoun le máhuduragunbei lun”. Sagü weyu warihini laribaduntima ubóu le lábugiñebei lubafu Satanási ani memenigitiña gürigia ani magundan hagía lidan habagari. Ánhañati ha hínsiñehabubaña lun Heowá ani seriwi hagía lun, gúndaatiña, íbini lidan dan hénrenguti, lugundun derebuguti emenigini le wawagubei lubá ámuñegü. Buiti chansi le wámabei, lau wanügüni uganu lánina Larúeihan Bungiu houn gürigia (Mat. 24:14). Yarafa madise lagumuchun Larúeihan Bungiu lau binadu ubóu le, ábame paraísuhali lan ubóu. Ayumahatiwa lachülürün weyu ligía! Ábameti wagundaarun wagía lubúeingu Heowá ha úaraguabaña lau aban lubuidun átuadi ani ábame wawinwandun lun súnwandan ya ubouagu.