1, 2. a) Ida liña lasandiragun aban kristiánu lungua dan le lasansirun gádanti lidan libagari sódini? (Ariha humóun iyawaü to lídanboun lagumeseha arütíkulu). b) Según Sálumu 131, kaba íderaguawa lun wasandiragun woungua lidan darangilaü?

BARÜHALI meha Lloyd tuma Alexandra lóugiñe 25 irumu eseriwida tidan Beteli. Ligíati, dan le lasansirubei hadasin, furumiñe aba hírudun. Abahüdahati Lloyd: “Hechuhadina meha tuagu Beteli ani hínsiñeti meha wadagimanu le meha nadügübei ñein nun. Gunfuranda numuti lébuna asansiruni, gama lumoun, dimaasu luma burí hati lárigiñe sandiguatina saragu wéiyaasu nungua mabusenrunwadina lan. Saragu wéiyaasu, aba burí nahirudagun. Sódini, aba meha narihini katei buidu ani lárigiñe ábaya nahirudagun”.

² Dan le lasuseredun aban katei magurabunti lidan wabagari, gayaraati wasandiragun woungua lau idiheri o wadiheridun saragu (Ari. 12:25). Gayaraati wasandiragun woungua hénrengu lan woun wánharun lun iseri asansiruni. Kaba íderaguawa lun deregüdagua wamá luma lun darangilu wamá lidan burí sügǘ le? (aliiha huméi Sálumu 131:1-3). Ariha waméi ka lan hadügübei fiu lubúeingu Bungiu ha lánina tidaani Bíbülia hama ha lánina wadaani lun  hasandiragun houngua lidan darangilaü íbini labadinagua asansiruni.

3. Ka asuseredubei lun Hosé?

³ Hosé, ligía meha liráü Hakobu le hínsiñetimabei lun. Ligía gimuga habéi líbugañanu lun darí lun haluguruni kei idamuni dan meha le 17 lubéi irumu lau (Agu. 37:2-4, 23-28). Mosu meha lawanduni Hosé lamudirawagun kei burí 13 irumu luma ladaürǘn Ehiptu, dise luéi lúguchi le hínsiñehabubei lun. Ka íderagubalin Hosé lun meferidirun lani luguraasun?

4. a) Ka un letenira Hosé dan le furisunrugu lubéi? b) Ida liña lóunabuni Heowá lafurieidun?

⁴ Lidan anihán lan Hosé asufurira furisunrugu, chóuruti aba lan lasaminarun lóunigirubei lan Heowá (Agu. 39:21; Sal. 105:17-19). Ani adügati uénedü le luénedübei dan meha nibureingili luáguti le meha lunbei lasuseredun ámuñegü, lúntima lachoururuni katei le (Agu. 37:5-11). Chóuruti dará lanu lanigi lun Heowá lóugiñe aban wéiyaasu (Sal. 145:18). Óunaba lumuti Heowá lau lachoururagüdüni lun ñeinbei lan luma meberesenga kaba lan asusereda (Adü. 7:9, 10). *

5. Ka lánibei gani wamani lidarangilan Bungiu lidan wáfaagun lun waganwoundagüdüni weseriwidun lun?

⁵ Uguñe weyu, gayaraati wásügürüña lan lídangiñe lénrengunga lidan ibagari. Lidan kesi le gayaraati wafurendeirun ida liña lan lóunigiruni ‘lidarangilan Bungiu’ wasaminan (aliiha huméi Filipuna 4:6, 7). Ligíati, yarafa wamá lun Heowá dan le nidiheri wamá saragu. Ábameti ladügün darangilaü lun lederebugudun wabusenrun waganwoundagüdüni weseriwidun ani líderagubadiwa lun mábürühan lan warüna. Ariha wamá fiu sügǘ le lánina wadaani le arufudubalin katei le woun.

6, 7. Ida liña lahuudun wafurieidun luagu waturobulin lun wibihin darangilaü? Abahüdagua humá aban sügǘ.

⁶ Dan le líchugunbei Ryan tuma Juliette fe luagu gumuha lan heseriwidun kei prekursorugu espechalitiña ha eseriwidubaña luagu átiri dan, aba hasandiragun houngua wuriba. Abahüdaguati luagu aba lan lafurieidun lau lóufudagun. Aba lariñagun: “Subudi wamuti meha lunti lan warufuduni afiñe wamá luagu Bungiu. Iseri meha saragu íbirigu ha lídanbaña damuriguaü lidan afiñeni, aba wamuriahan luma Heowá lun líderaguniwa lun wíchugun aban hénpulu buiti houn”.

⁷ Ida liña lóunabuni Heowá hafurieidun? Ariñagati Ryan: “Lárigiñe lagumuchun nafurieidun, aba lidin sun idiheri nuéi ani aba masaminarun haadina lan wuriba. Lóunigiruñoun meha lidarangilan Bungiu wanigi luma wasaminan. Aba gunfuranda nani gayaraagili wahuudun lun Heowá ánhawa arufuda aban lubuidun igaburi”.

8-10. a) Ida luba líderaguniwa lani Bungiu sífiri lun wagagibudagun luma saragu idiheri? b) Ida luba labiniruni Heowá wáfaagun lun wetenirun lun katei le lánina wamadagua luma?

⁸ Amu luéi wagalumadun, gayaraati ladügün lani Bungiu sífiri sandu lun waritagun aban bérusu súdiniti lun líderaguniwa lun madireirun wamani wasaminan luéi katei lánina Bungiu (aliiha huméi Huan 14:26, 27). Ariha waméi likesin Philip tuma Mary, aba feru maríeitiña ha eseriwidubaña Betelirugu luagu kéiburi 25 irumu. Lídanrügü 4 hati, aba tounwen háguchu biángubei luma aban hádangiñe liduheñu. Aba hagumeserun óunigirei túguchi Mary, ladüga bulíei bulíei hali lan.

⁹ Abahüdaguati Philip: “Genegeti meha nun buidu lan léibugun katei íbini anihein  lan mégeiti. Luagu aban weyu dan le anahán lan aliiha aban arütíkulu tidan Garüdia Awisahatu to lánina aturiahani aba nararamagun lidan Kolosana 1:11. Aba níchugun fe luagu nawanduña lan, gama lumoun, mama lau lubudubu. Aba líderagunina bérusu le lun narihini luagu lunti lan nawandun lau gurasu luma lun gunda nan. Aba laritaguagüdünina le ugundani lan le nasandirubei lidan nibagari mama ladüga buidu lan lidin nun o wuriba lan, le íchugubalin ugundani le nun lidan nibagari lani Bungiu sífiri”.

¹⁰ Aba láfaagun Philip tuma Mary lun hadügüni katei lidan habagari kei larufudahan Heowá ani biní lumutiña lidan ámuñegueinarügü igaburi. Kei hénpulu, murusun dan lárigiñe háfuridun Betelirugugiñe, biángubei hagía aba hadarirun gürigia ha busentiña haturiahanu Bíbülia lóugiñe aban wéiyaasu lidan dimaasu ani awansetiña aturiahatiña hagía lau lóufudagun. Dan le taritaguni Mary lira aba tariñagun: “Gúndaagüda hamutiwa, ítara liña larufuduni Heowá woun luagu buídubei lan léibugun sun katei”.

11, 12. a) Ka ladügübei Hosé lun gayara lan labiniruni Heowá? b) Ida liña labiniruni Heowá lawandun Hosé?

¹¹ Ménrengunti lun ladügün asansiruni le sódiniti lun warihin luagu ámuñegü lau anufudei luma lun werederun madügünga ni kata. Másiñati ligía lan asuseredubei lun Hosé. Gama lumoun, furanguti larihín adüga lani sun liyaraati lun labiniruni Heowá. Ligíati, íbini furisunrugu lan, áfaaguati ladügüni sun liyaraati lun lagunfulirun lau wadagimanu le líchugubei tábuti furisun lun, gúnfuli lumuti luadigimari ítara kei dan le lawadigimaridubei lun Potifárü (Agu. 39:21-23).

¹² Aban weyu, aba lariñawagún lun Hosé lun letenirun houn bián wügüriña adaürǘtiña ha meha gánibaña buligasion súdiniti lúbiñe faraón. Kei buidu lubéi lóuseruniña Hosé, aban weyu aba habahüdaguni hawenadün le ámuti luma hadiheri lun (Agu. 40:5-8). Ibidiñeti meha lun Hosé lasansiraguba lan gádanti lidan libagari ladüga layanuhan hama wügüriña hagía. Sügüti bián irumu lárigiñe lubaragiñe láfuridun furisunrugugiñe; weyu le láfuridunbei aba liridún kei libiaman urúei gabafuti lidan ageiraü, lárigiñe faraón (Agu. 41:1, 14-16, 39-41).

13. Ida luba wadügün somu katei lun labiniruni Heowá meberesenga ka lan gádanbaliwa?

¹³ Ítara kei Hosé, gayaraati wadariragun woungua lidan somu sügǘ le ñein lubéi lougua lan wabafu o mabafu wamá lun wadügün ni kata. Gama lumoun, ánhawa gaguraasun ani áfaagua wagía lun wadügüni le wayaraati, wadügüba somu katei lun gayara lan labiniruni Heowá (Sal. 37:5). Anhein anihein lubéi dan wásiñaragun woungua kaba lan wadüga, ‘máhüchürübadiwa’, wasubudirubei kaba lan wadüga, kei lariñaguni apostolu Pábulu  (2 Ko. 4:8). Ítara luba ánhawa etenira lun weseriwidun lun Bungiu.

14-16. Ka ladügübei Felipe le apurichihabei dan le lasansirun gádanti?

¹⁴ Ariha waméi likesin Felipe, le apurichihabei, le íchugubei aban hénpulu buiti woun luagu lunti lan wetenirun lun wani ministeriu dan le lasansiragun gádantiwa. Leteniruña meha Felipe lun aban iseri dasi lidan damuriguaü Herusalén (Adü. 6:1-6). Ábati, lagumeserun éibaahouni lárigiñe lafarún Esütéban. * Dan le larihibei Felipe hanurahaña lan ha híbiri lani Hesusu disipulugu Herusaléngiñe, merederunti lau lúhabu chaguñu. Aba lidin apurichiha Samaria, lidan aban uburugu le mapurichihoungili saragu (Mat. 10:5; Adü. 8:1, 5).

¹⁵ Aranseñu liña meha Felipe lun lidin le ñeinhin lubéi lanügei lani Bungiu sífiri sandu. Ligía, layusurubei Heowá lun lapurichiha lidan amu fulasu. Lidan dan ligía mínsiñetiña meha huríu houn samariana. Kei óusera lubaliña Felipe buidu meberesenga ka lan harasanbei, chóuruti buidu lan hasandiragun houngua lurugabu. Maweiriduntu wanigi lau haganbuni gürigia hagía (Adü. 8:6-8).

¹⁶ Ábati lanügüni sífiri sandu Asotun luma Sesaréa, lidan bián uburugu le ñein lubéi hawinwanda ha mámabaña huríu (Adü. 8:39, 40). Kei burí 20 irumu lárigiñe lagumeserun Felipe apurichiha Samaria genegeti aba lan lasansirun gádanti. Ani guentó, gasaanigu haali ani lawinwanduña meha hau lidan fulasu le ñein lubéi lapurichiha. Íbini anihein lan asansiruni lidan libagari, téniti lun lani ministeriu, seremei letenirun lun lani ministeriu, resibiti saragu abiniruni lúmagiñe Heowá, ligía hama liduheñu (Adü. 21:8, 9).

17, 18. Ida liña líderaguniwa dan le liabin asansiruni lun wetenirun lun apurichihani?

¹⁷ Saragu lubúeingu Bungiu ha lídanbaña dan dayarüti rútiña fe dan le lan letenirun gürigia lun lani ministeriu íderagua lumuti lun lawandun dan le lagagibudagun luma asansiruni. Ariha waméi le asuseredubei lun Osborne tuma Polite, aban feru maríeitiña Suru Áfürika. Dan le háfuridunbei Betelirugugiñe, saminatiña yebe hadariruba lan lau lóufudagun wadagimanu le ruti chansi houn lun hapurichihan luma aban fulasu lun hawinwandun ñein. Gama lumoun, ka asuseredubei? Ariñagati Osborne: “Madaritiwa wadagimanu lau lóufudagun kei yebe wagurabuni”. Ariñagatu Polite: “Dereti meha lidin  woun, sügüti 3 hati mawadigimariduntiwa ani úati meha seinsu areidati wama”.

¹⁸ Ka íderagubaliña lidan sügǘ ligía? Ariñagati Osborne: “Íderagua lumutiwa wapurichihan hama lílana damuriguaü lun wetenirun lun wani ministeriu luma lun wakipurun aban lubuidun igaburi. Ábagubei wetenirun lun wapurichihan lubaragiñe wañuurun asaminara kaba lan wadüga. Ruti katei ligía ugundani woun. Áluahatiwa wadagimanu lidan sun fulasu darí wadarirun”.

19-21. a) Kaba íderaguawa lun wasandiragun woungua lidan darangilaü? b) Ida luba lahuudun woun wéchudun luagu iseri gádantiwa?

¹⁹ Kei larufuduni sügǘ burí le, ánhawa adügei sun le wayaraati ani afiñe wagía luagu Heowá, wasandiraguba woungua lau darangilaü (aliiha huméi Mikeasi 7:7). Másiñati, ánhawa lan échuda luagu iseri wadasin gayaraabei wíchugun fe lahuuduba lan woun saragu lidan wamadagua luma Bungiu. Ariñagatu Polite, to buga uáguboun wayanuha lidan párafu 17, luagu le tásügürübei: “Arufudahaali nun neresibirun iseri dasi lun nafiñerun luagu Heowá, íbini laganagua lénrengunga. Derebuguhali numadagua luma”.

²⁰ Anuhagua Mary, to buga uáguboun wayanuha lidan párafu 8, etenira lun túguchi ani teseriwiduña giñe kei prekursora. Ariñagatu: “Furendei haadina dan le lan nasandiragun nungua lau idiheri, mosu nafurieidun luma nanügüni katei lau darangilaü. Ani létima nafurendeirubei lídangiñe sügǘ burí le lunti lan nígiruni sun katei lúhaburugun Heowá. Ani lahuuduba katei le nun ámuñegü”.

²¹ Subudi lumuti Lloyd tuma Alexandra, ha buga uágubaña wayanuha lidan lagumeseha arütíkulu, óuchagua lani asansiruni hafiñen lidan aban igaburi le masaminarungubeitiña ítara luba lan. Ariñagatiña: “Adügati óuchawaguni lun warihini anhein derebugu lubéi wafiñen, anhein lágüdahabadiwa lubéi lidan lénrengunga ani guentó buídutimahali wagaburi”.

22. Ka gayaraabei wachoururuni ánhawa adügei sun le wayaraati lidan le gádanbaliwa?

²² Anhein asansira gádantiwa sódini, ladüga lan yebe weresibirun iseri dasi, laribadun wátuadi o somu asansiruni lidan wabagari hadan iduheñu, gayaraati wachoururuni berese lan Heowá wau ani íderagua lumutiwa lidan dan le buídubei (Ebü. 4:16; 1 Fe. 5:6, 7). Ligíati, adüga waméi sun wayaraati lidan le gádanbaliwa. Yarafatima wamá lun Wáguchi le siélubei lau wafurieidun lun luma wafurendeirun ígiraguagüda woungua lun lun ladundehaniwa. Ítara luba wasandiragun woungua darangilañu íbini lidan lasansirun gádantiwa.