RARA liña meha Esütéban hagibugiñe 71 wügüriña aguseragüdütiña ha wuribabaña, ha lílana liñun-agei lúrudu Ísüraeli. Hagía meha fiu hádangiñe wügüriña gabafutimatiña lidan ageiraü. Gáifasi, fádiri le íñutimabei, ligía óundaraguabaliña, lememe arihibei lau aguseragüdüni dan le lasiadirunbei Hesusu lun lounwen fiu hati lubaragiñe (Mat. 26:57, 59; Adü. 6:8-12). Barütiña aguseragüdütiña gefentiña ha yéetiña, aban lárigi aban. Danti le harihini lúrudugu hama sun ha ñéinbaña ligibu Esütéban, aba taweiridun hanigi ladüga ítara liña ligibu kamá ligibu aban ánheli (Adü. 6:13-15).

Ida liña gayara lan meha lerederun Esütéban darangilañu lidan aban kesi kei le? Lubaragiñe meha lanügǘn ligibugiñoun liñun-agei lúrudu, ru lumuti meha sun libagari lun leseriwidun lidan damuriguaü lau lídehan lani Bungiu sífiri sandu (Adü. 6:3-7). Ligiaméme sífiri íchugubei gurasu lun ani íderagua lumuti aritagua fiu katei dan le laguserunbei (Huan 14:16). Dan le lagagibudagunbei hama áganiñu lau ganigi, según Adügaü kapítulu 7, íderagua lumuti sífiri sandu lun laritagun kéiburi 20 abürüdǘni lídangiñe Abürüdǘni Ebüréu (Huan 14:26). Ani ábatima léredun lafiñen Esütéban dan le libihinbei aban arufudúni luagu Hesusu rara luéigiñe lóunwenren Bungiu (Adü. 7:54-56, 59, 60).

Háfuga lachülürüba lan giñe dan lun wagagibudagun luma éibaahouni luma asiadirúni hanarimeti (Huan 15:20). Anhein hechu wabéi aliihoun Lererun Bungiu sagü weyu, teni wagía lun weseriwidun, wígiruba lun lawadigimaridun lani Heowá sífiri wawagu. Wibihiba giñe erei lun wagagibudagun hama ha máhabaña lun wáhuduragun lun Heowá luma lun wakipuruni wadarangilan (1 Fe. 4:12-14).