MAMA ABAN LÍBURU LÁNINA SIENSIA BÍBÜLIA, GAMA LUMOUN, ANIHEIN ARIÑAHANI TIDAN LE AWANSETI LUN DAN LE ÍDANBEI TADÜGǗWA. ARIHA WAMÁ FIÚ HÉNPULU.

Adügǘwarügüti san sun ubóu?

Anihein meha aban dan le ídanbei hachoururei aturiahatiña siensia ha subudiwatiña saragu, mítaran lan. Guentó ariñagaaña hibe-agei adügǘwarügü lan sun ubóu. Ariñaga taali meha Bíbülia lúmagiñe furumiñeti dan adügǘwarügü lan (Agumesehani 1:1).

Ida liña san lesetirun ubóu?

Saminatiña meha saragu gürigia fadá lan Ubóu. Lidan sígulu 5 lubaragiñe lidaani Hesusu, ariñagatiña fiú chu tau gürieguna, ítara liña lan lesetirun ubóu kei aban bali. Gama lumoun saragu dan lubaragiñe lira, lidan sígulu 8 lubaragiñe lidaani Hesusu, ayanuhati abürühati Bíbülia gíriti Isaíasi luagu rounuti lan ubóu (Isaíasi 40:22, TNM).

Gádeiti san sun le huáriñurugubei lau lásügürün dan?

Ariñagati Aristóteles, ubóurügüñein lan agadeira lídangiñe sun le huáriñurugubei, masansiragunti ani magadeirunti le líbiri katei. Durati afiñeni le saragu san irumu, darí sígulu 19 dan hadarirunbalin aturiahatiña siensia ariñahani luáguti entropía, le adügübei lun lagadeirun sun le huáriñurugubei. Ruti Lord Kelvin, aban hádangiñe sásaamu le ídehabei lun lasubudiruniwa katei le, fe luagu le tariñagubei Bíbülia luagu sielu luma Ubóu. Dan le tariñagubei Bíbülia: “Sun ligía lawesiruba kei daüguaü” (Sálumu 102:25, 26). Afiñe lumuti meha Kevin luagu le tariñagubei Bíbülia luáguti gayara lan ladügün Bungiu lun magadeirun lan sun le adüga laalibei (Apurichihati 1:4).

Ka ágüdahabalin sun burí ubóu?

Lidan sígulu 4 lubaragiñe lidaani Hesusu, arufudahati Aristóteles lídanñein lan burí katei le rounuguati kei bali ani le gayaraabei larihíniwa sun le lurageirugubei sun waruguma luma burí amu katei le siélubei. Arufudahati giñe anihein lan aban lídangiñe katei rounuti ligía lurageirugu amu le wéiritimati luéi ani ubóu lan le ídanbei wawinwanda lamidanguabei lúmagua. Lidan sígulu 18 lidan wadaani aba hagumeserun aturiahatiña siensia ariñaga másiña lan dibiñu liña lan sun burí ubóu ligibuagu ni kata. Gama lumoun, tidan liliburun Hobu, to abürüdüboun 15 sígulu lubaragiñe lidaani Hesusu, aliihatiwa dibigüdalani Bungiu “múa ligibuagu ni kata” (Hobu 26:7).

MAMA ABAN LÍBURU LÁNINA ÁRANI BÍBÜLIA, GAMA LUMOUN, ANIHEIN ADUNDEHANI TIDAN LE ARUFUDUBALIN SUBUDI LE TÍDANBEI LUAGU ÁTUADI ANI LE AWANSETI LUN DAN LE ÍDANBEI TADÜGǗWA.

Hadisedagüdün sanditiña luagu bián-wein weyu.

Ariñagati meha lúrudu le líchugubei Bungiu lun Moisesi mosu lan herederun ha sándibaña lau lépüra díseñu hawéi ha masandibaña. Huugili adundehani le uguñe weyu, gama lumoun, madügün hamuti surusiagu katei le darí dan le ladagarunbei sandi galugurahati hawagu saragu gürigia kéiburi lúmagiñe 700 irumu guentó (Fádirigu kapítulu 13 luma 14).

Lachibún úhabu lárigiñe haguurún hilaaña.

Darí lidan burí lagumuchun sígulu 19, añahagua meha surusiagu aguura hawagu hilaaña ani lárigiñe aba meha haguurun hawagu sánditiña, machibunga haméi háhabu, adügati lira lun hóunwegun saragu gürigia. Gama lumoun, ariñagati meha Lúrudu le líchugubei Bungiu lun Moisesi wiye lan meha lerederun gürigia le aguurubei hilaali. Ani lidan kesi lira mosu meha larumadaguagüdün gürigia ligía lungua lau duna. Furanguti ídeha lan meha hechun lubúeingu Bungiu lun buidu lan hátuadi (1 Lúrudu 19:11,19).

Hábununi hawiye.

Sagü irumu hóunwegun hóugiñe 500,000 irahüñü lau luburu urageirugu, libe-agei dan ladüga yarafa hamá lun hawiyedun gürigia le mabunúbei buidu. Ariñagati meha Lúrudu le líchugubei Bungiu lun Moisesi mosu lan meha lábunun hawiyedun gürigia dise luéi ñein lubéi meha hawinwanda (2 Lúrudu 23:13).

Lidaani lichugúniwa seini tuagu hóustarun wügüriña.

Ariñagati meha Lilurudun Bungiu mosu lan lichugún seini tuagu lóustarun aban irahü lidan liwidün weyu lárigiñe lágurahoun (Fádirigu 12:3). Gumeseti lita aban irahü figigili éibaagua buidu lúmagiñe furumiñeti dimaasu lárigiñe lágurahoun lánina libagari. Saragu dan lubaragiñe ñein lan árani le awanseti, lidan tidaani Bíbülia, aba meha aransehani chóuruti hagurabahan lóugiñe aban dimaasu lárigiñe lágurahoun irahü lun líchugun seini tuagu lóustarun.

Ligaburi hasandiragun hungua lidan hisaminan kei lidan húgubu.

Ariñagatiña surusiagu hama aturiahatiña siensiasi ha akutihabalin katei, ídehati lan ugundani, emenigini, geteingiradi luma gíchigadi lan gürigia ferudun lun buidu lan látuadi. Ariñagatu Bíbülia: “Árani buiti anigi gúndaatu, ánheinti íruni gidati lídangiñe erei” (Ariñawagúni 17:22).