Sanditu Diana, to uáguboun wayanuha lidan arütíkulu le ásügürübei, busén tan meha tátagun éibutima lásügürün dan. Mariñaguntu Bíbülia siñá lan hatun gürigia murusun, gama lumoun, ariñagatu: “Móundaraguaba hama gátaditiña” (Ariñawagúni 23:20). Adügati hátagun gürigia lun hasandirun saragu, lun lagadeirun ligaburi hanaagun houngua hamá amu ani adügati lun hóunwegun gürigia lubaragiñe dan sagü irumu. Masuseredunbei hamuga sun katei le houn, lun hamuga gaganbadi hamá lun adundehani buiti le tídanbei Bíbülia.

Ligía tadügübei Diana ani ariñagatu guentó: “Aba níchugun fe maranserun lumuti lan átaguni nituróbulin. Aba nadügüni le tariñagubei Bíbülia lidan Filipuna 4:6, 7: ‘Madiherida humá luagu ni kata’ ani ‘amuriaha humá luma’ Bungiu. Sagü meha guñoun dan le hanarime lan nasaminarun, furíeitina lun Heowá ani aba meha nabahüdaguni, nigañi, nigarigu, násiñaragun nungua luma ida liña lan meha nasandiragun nungua ani amuriahatina giñe luma lun líderagunina asaminara katei buiti. Larugan, adüga numuti sun niyarati lun masaminarun nan katei híruti. Íderagua lumutina nafurieidun lun Heowá lun nasaminarun luagu le númabei mama luagu le úabei numa. Aba meha nígiruni átaguni, ladüga lueirin lebegi darangilaü le nadarirubei ani mabuseruntina meha neferidiruni”.

Úati amu katei le gáriti ani le adügübei lun hasufurirun gürigia kei magíaguni lánina agamariduni. Gama  lumoun, gayaraati ladügün adundehani le tídanbei Bíbülia lun masufurirun wamá saragu, ladüga ayanuhatu luagu ka lan burí katei adügübei lun ladügün aban gürigia magíaguni, kéiburi, ladügǘn kamá hamuga hínsiñe tan somu wuri lun ani mítaranti o taríawagun iyawaü o bidéu lánina agamariduni. Ariñagati aban nibureinti gíriti Samueli: “Ménrenguti ladügün gürigia lun tasandirun aban wuri hínsiñe tan lun... Anihein meha dan mínsiñegubeitu nun, gama lumoun, adügati narihin hínsiñe nan tun, lun nadügün kamá hamuga berese nan tau”. Kei ariñawagúa lan luagu Samueli hínsiñe lan lun ladügün kamá hamuga berese lan tau somu wuri, íbini mama lan ligía labusenrubei, aba desidírü lan ladügüni katei lira lau sun lugundan, gama lumoun, sandiguati meha lungua wuriba lau ladügüni lira. Ariñagati guentó: “Wuribati badügün kamá hamuga beresetibu tau somu würi, adügati lira lun buouguounrügü lan basaminara”.

Aliihati Samueli aban arütíkulu houn nibureintiña lidan páhina jw.org. Ani saminati giñe luagu le lariñagubei Ariñawagúni 20:11, ariñagati: “Luagu ligaburi hóuserun nibureintiña lasubudirúa anhein lídanñanu lubéi ísuruni”. Ida liña líderaguni adundehani le Samueli? Aba líchugun fe mabuidun lan ladügün kamá hamuga berese lan tau somu wuri. Ariñagati giñe: “Furendeitina le lan óuserubei ítara ábanbei lan wügüri maríeiti wuribati. Ani aba giñe nasaminarun luagu le gayaraabei tasandiruni wuri to lunboun nániboun lan weiriou anhoun hamuga íchiga fe nadügüña lan kamá hamuga hínsiñe tan amu wuri nun. Rútina fe mama lan aban katei buiti lira. Íbini ménrengun lan ladügǘn katei le, madügünti lira lun ábanbei lan katei buiti”. Aba lasansiruni Samueli ligaburi ani íderagua lumuti lira lun méiguadun lan lidan magíaguni.

Denchatimati meha le gádanbalin Antonio: Héchuti meha aríagua iyawaü o bidéu lánina agamariduni. Íbini weiri lan meha tínsiñe lani weiriou lun, éibutima lásügürün dan, ábatima labuluchun lidan katei le. Ayanuhati íderagua lani lan le lariñagubei 1 Féduru 5:8: “Agagudúañu humá, ragüguañu humá hungua, lugundun éibugañahadügü liña Mafia le hágani keisi liñún gáñiti áluaha kaba lan lagünrinchagua”. Afuranguagüdati Antonio: “Geyeguwaña meha tau iyawaü lánina agamariduni to gayaraaboun terederun lidan hasaminan gürigia. Íderagua lumutina bérusu lira lun nasaminarun ka lan úmagiñe liabin óuchawaguni le. Mosu meha nasaminarun ka lan úmagiñe tiabin iyawaü wíyetu tuguya dan le nasaminarun tuagu. Subuditi nun guentó Heowárügüñein lan gayara líderagunina lun nóuserun lau lichú aau luma lun agagudúañu nan lun nóunigiruni nisaminan, nanigi luma nibagari keisi maríeiti luéi óuchawaguni ligía”. Aba leresibiruni Antonio ídemuei le meha lemegeirubei, ani aba lígiruni luriban échuni ligía. Seremei tídehan Lererun Bungiu díreiti luéi turobuli ligía lubaragiñe laweiridagun.

Furanguti anihein lan saragu adundehani tidan Bíbülia le gayaraabei líderaguniwa adireira luéi turobuli wéinamuti. Gama lumoun, ánheinti aganwounda turobuli ani madaritiwa ida luba lan waransehani? Ariha wamá ida luba lan tíderagunün Lererun Bungiu lidan burí hituróbulin.