Abahüdaguatu Rosi: “Wéiriti meha nadiheridun luagu nituróbulin luma luagu katei wuribati le gayaraabei lasuseredun ámuñegü”. Ka burí bérusu tídangiñeti Bíbülia íderagubarun? Aba lídangiñe, Matéu 6:34, le ariñagubei: “Madiherida humá lubeiti luagu haruga, ladüga barǘ lumuti giñe haruga lidiheridüna lúmagua. Buídurügüti lénrengunga le lanügübei kada weyu lúmagua”. Ariñagatu Rosi íderagua lumutu lan dimurei le lariñagubei Hesusu lun madiheridun tan luagu le gayaraabei lasuseredun haruga. Ani ariñagatu giñe: “Gaturobulin haadina meha saragu luagu nerederun asaminara luagu katei le masuseredungili ani másiñati masuseredunbei lan”.

Sanditu giñe Yasmín siñagua tan meha tungua lau idiheri le tuágubei. Abahüdaguatu: “Sagü meha dimaasu nau ayahuaha ani anihein meha guñoun le ídanbei siñá lan narumugun. Ladügüña meha saminaü híruti dañu nun”. Ka bérusu tídangiñe Bíbülia íderagubarun? Ayanuhatu Yasmín luagu 1 Féduru 5:7, ñein lubéi lariñaga: “Madiheri humá luagu ni kata; ígira huméi sun katei lun Bungiu, lugundun lóunigiruñadün le tímatimaati”. Ariñagatu giñe Yasmín: “Furíeitina lun Heowá ani lau lásügürün dan, óunaba lumuti nafurieidun. Sanditina kamá aba lan lagidarún aban óunweboun ihürügu nuéi. Anihein dan aba lebelurun luriban saminaü nun, gama lumoun, subudi naali kaba lan nadüga lun nagidaruni”.

Ariñagatu aban nibureintu gíritu Isabella: “Afiñetina lúmagiñe lan núguchi galagante nani igaburi lígirahoun  lubá amu dan katei le lunbei ladügüniwa, ladüga gagaburi lumuti giñe. Anihein dan aba nígiruni katei le súdinitimabei lubá amu dan lúnrügü madügün nan ni kata, lun nerederun aríagua bigibigitu o emeraagua. Mabuidunti béchudun adügei katei le ladüga adügati lira lúntima badiheridun, ani dan le badügüni le lunbei badügüni lárigiñe, adüga bumuti wuriba”. Íderagua lumutu adundehani le lídanbei 1 Timotéu 2:15, le ariñagubei: “Houchabéi sun bubafu lun barufudagun bungua ligibugiñe Bungiu keisi aban nadagimeinti buiti, le úati kaba lan uagu labusigarida”. Ariñagatu Isabella: “Mabusenruntina meha nibusigari lan Heowá nau ladüga nígiruni nuadigimari lubá lagumuhóun”. Sánsihali tigaburi Isabella, guentó.

Luagu amu oubaü afuranguagüdatu Kelly: “Dan lunti lan meha nederegerun aban wadagimanu ígira numuti meha lubá lagumuhóun. Aba méhati nadiheridun, nayahun ani murusunrügüñein meha narumugun. Mama meha aban katei buiti lira nun”. Íderagua lumutu adundehani le lídanbei Ariñawagúni 13:16 saragu, le ariñagubei: “Gürigia ha buídubaña ichügü, lau lualin ichügü hadügei sun katei; ánhañati ha ibidiouguabaña aau, arufuda hamuti libidiounigan hau houn súngubei”. Abahüdagua tumuti le tafurendeirubei dan le tararamagunbei asaminara luagu bérusu le: “Buiti badügüni katei lubaragiñe lasuseredun somu katei o badügün aransehani lau dan lubá badügüni. Guenlé, anuhein aban kalendáriu lidan dábula ñein lubéi nawadigimarida lun nabürüdüni le lunbei nadügüni, íderagua lumutina lira lun ua lan chagaguaü numa luma lun mígirun nani katei lubá lagumuhóun”.

Abahüdaguatu Kristina: “Aba lígirunina nani weiriei nábuguarügü hau gádürü irahüñü ñǘbürigiña”. Ka adundehani tídangiñe Bíbülia íderagubarun? Ariñawagúni 17:17 le ariñagubei: “Aban umadaü, súnwandan buidu lan, ítara liña kei aban íbiri lidan lidaani idiheri”. Áluahatu giñe ídemuei hama amu lumutuniña Bungiu. Ida liña lidin tun? Ariñagatu: “Íderagua hamutina numadagu lau lóufudagun ani lidan ámuñegueinarügü igaburi. Añahein hádangiñe barütiña éigini luma fuluri woun. Ǘrüwañein wéiyaasu híderaguniwa saragu hádangiñe numadagu águya. Dariti aban hádangiñe wadagimanu nun. Súnwandan ñein hamá numadagu nurugabu”.

Sandiguatu giñe Diana, to meha uáguboun wayanuha, tungua tábuguarügü. Haritagua tumuti ida liña lan tasandiragun tungua lárigiñe sun le teferidirunbei. Ariñagatu: “Ítara liña meha kei barihin lásügürün sun habagari gürigia bigibugiñe ani siñá lan meha nagundaarun kei hagía. Hanarimeti meha nasandiragun nungua nábuguarügüñadina lan”. Aban líderagunün Sálumu 68:6, le ariñagubei: “Ruti Bungiu fulasu houn ha hábuguarügübaña lun haganóun ñein”. Ariñagatu Diana: “Subudi numuti meha mayanuha lan bérusu le tuagun aban muna lun lawinwandúniwa tidan. Gunfuranda numuti ru lumutu lan Heowá lóundarun, ñein lubéi gayara lan wasandirun ichouruni luma úarani hama gürigia ha áhuduragubaña lun. Gama lumoun, subuditi nun mosu lan meha yarafatima nan furumiñe lun Heowá lubaragiñe nayarafadun houn ha híbiri. Ligía aban lubéi líderagunina le lariñagubei Sálumu 37:4, le ariñagubei: ‘Gundaabá le tímatimaati lidan Aburemei, ábame lagunfuliruni tayumahan banigi’”.

Gumuti tabahüdahan Diana ítara: “Aba níchugun fe mégeitima nan meha nayarafadun lun Heowá, úati amu le buídutimabei kei ligía. Aba nadügün aban lísüta luagu le meha gayaraabei nadügüni lun gamadagua nan hama ha gamadaguabaña houngua luma Bungiu. Furendeitina arihei le buídubei hawagu amu luma lun metenirun nan hachara”.

Furanguti gafigoun hamá giñe ha eseriwidubaña lun Bungiu. Sügütiña giñe gefentiña luagu Heowá lídangiñe saragu turobuli kei furumiñeguarügü gürigia, gama lumoun, adügati le furendei hamaalibei tídangiñe Bíbülia lun busén hama híderagun amu gürigia sagü gayara lan. Úati amu katei buídutimati kei gamadagua ban bungua hama hawuyeri gürigia ha. Gama lumoun, gayaraati san líderaguniwa adundehani le tídanbei Bíbülia lun wagagibudagun luma turobuli hénrenguti kéiburi, aban sandi máraninati o lounwen somu waduhe?