Lau sun gibe hamá gürigia ariñagutiña afiñe hamá luagu Bungiu, dan le halügüdǘniwa katei lan, ámuñegueinarügüti hóunabagüle. Añahein afiñetiña aban lan aguseragüdüti furundeti Bungiu le unbei línsiñeda labeichaguniña gürigia luagu hafigoun. Añahein amu, afiñetiña aban lan Bungiu hínsiñehabuti ligía le ferudunabaliwa súnwandan meberesenga le wadügübei. Ani añahein amu, saminatiña meberesen lan hau gürigia ani díseñu liña lan hawéi. Keiti ámuñegueinarügü lan hasaminan gürigia luagu Bungiu, háfuga añahein lan saminatiña siñá lan lasubudirúniwa.

Súdiniti san lasubudirúniwa Bungiu? Anha, ítara liña. Gayaraati ladügün hasubudiruni Bungiu lun gasuuni lan hibagari (Adügaü 17:26-28). Éibutima hayarafadun lun Bungiu, hínsiñetimabadün lun ani ábatimame líderagunün (Santiagu 4:8). Anhein hasubudira buidu, gayaraabei hawinwandun lun súnwandan (Huan 17:3).

Ida luba hasubudiruni Bungiu? Samina humá luagun aban gürigia le subudi humuti buidu, aban humada le úmabei buidu lan hanaagun hungua. Ka adügübei lun gamadagua humá? Chóuruti aba lan hasubudiruni liri furumiñe, lárigiñe, aba híchugun fe ida liña lan ligaburi, ka lan hínsiñebei lun luma le mínsiñebei lun, le adüga láalibei luma le lasaminarubei ladügün. Adügati hasubudiruni sun lira lúntima buidu lan humadagua luma.

Ítarameme, gayaraati hasubudiruni Bungiu lau hakutihani lóunabagüle álügüdahani burí le:

• KA LÍRIBEI BUNGIU?

• IDA LIÑA LIGABURI?

• KA KATEI ADÜGA LÁALIBEI?

• KABA LADÜGA ÁMUÑEGÜ?

• KABA BUITI HIBIHA ANHEIN HASUBUDIRA BUNGIU?

Adügǘwatu garüdia to lun hasubudiruni óunabagülei le tíchugubei Bíbülia lun álügüdahani burí le. Líderagubadün arütíkulu burí le asigirubei asubudirei Bungiu luma kaba lan buiti hibiha ánhadün gamadagua luma.