Lun buídutima lan wasubudirun aban gürigia, súdiniti lun wasubudiruni le adüga láalibei. Ítarameme, anhein busén hubéi lúntima hasubudiruni Bungiu buidu, mosu hasubudiruni le adüga láalibei. Taweiriduba hanigi danme hasubudiruni ibiha wamá saragu buiti lídangiñe le adüga láalibei Bungiu ani gadan lani lira wabagari ámuñegü.

Heowá adügübaliwa ani gayaraati lasubudirúniwa ligaburi “lau burí katei le ladügübei” lugundun “arihúaali furangu lúmagiñe lagumeserun ubóu” (Rómana 1:20). Heowá “adügübalin múa lau lubafu; derebugugüdalei ubóu lau lichú lau; tulegualéi sielu lau lualin lichügü” (Heremíasi 10:12). Arufuda lumuti giñe sun lubuidun-agei katei le adüga láalibei Bungiu hínsiñe wamá lun.

Samina humá luagun buiti le wibihibei lidan wabagari lau ladügüniwa Heowá “lenege guánarügü” (Agumesehani 1:27). Ídehati lira lun gayara lan wáyeihani igaburi burí móubati le larufudubei, íbini madügün wamani buidu buidu kei ligía. Ruti giñe iarani woun lun busén wamá wáhuduragun lun, lidan amu dimurei, lun gayara lan gunfuranda wamani lugumadin luma ligaburi lisaminan. Adügati wígirun lun ladundehaniwa lugumadin lun gunda wamá luma lun gasuuni lan wabagari. Ani gayaraati giñe lumadagu wamá Bungiu.

Arufuda lumuti ubóu le ídanbei wawinwanda hínsiñe wamá lun Heowá. Kei aubei lariñagei apostolu Pábulu, súnwandan larufuduni Bungiu houn gürigia “káteiñein lan lau buiti le ladügübei houn. Ruti huya woun luma alubahani buiti, ru ligía éigini buídurügüti woun, belugüda lumuti ugundani tidoun wanigi” (Adügaü 14:17). Dan le ladügünbalin Bungiu Ubóu, mámarügüñein katei le wemegeirubei lun wawinwandun ladüga, adüga lumuti giñe sun le wemegeirubei lun gunda lan wabagari. Ani ábanrügüñein igaburi ñǘraüti lira le ídanbei larufudei sun le lunbei líchuguni woun ámuñegü.

Adüga lumuti Heowá Ubóu lun wawinwandun lidan lun súnwandan. Ariñagatu Lererun Bungiu ru lani múa houn gürigia ani adüga lani “lun haganóun gürigia” lidan (Sálumu 115:16; Isaíasi 45:18). Kaba awinwanda ñein ani luagu átiri dan? Óunabatu  Bíbülia: “Galangantehabei gürigia buítiña múa, haganóuba giñe lidan súnwandan” (Sálumu 37:29).

Lun yebe lira ladügei Heowá Adán, le furumiñeti wügüri tuma Ewa, to furumiñetu würi. Ru lumutiña lidan aban paraísu “lun hábunaguni, luma lun hóunigiruni” (Agumesehani 2:8, 15). Aba líchuguni Bungiu lubuidun dasi le houn: “Garahüñügua humá saragu, buíngüda huméi ubóu hau hirahüñü ani gumadi huméi” (Agumesehani 1:28). Ligíati, gayaraabei yebe lawinwandun Adán tuma Ewa lau ugundani ubouagu lun súnwandan. Ma lirun aba lan hanúadirun maganbadi hamá lun Bungiu ani aba heferidiruni chansi lun hadan hamá “gürigia buítiña” ha lúnbaña galagante hamani ubóu. Lau sun lira, ítara keime warihini, madügünti ligaburi hóuserun lun lasansirun lisuuni Heowá houn gürigia luma lun Ubóu. Guentó, ariha waméi ka lan amu katei adüga láalibei Bungiu.

Ka uagu líchigoun Bungiu Lererun, to Bíbülia, woun? Furumiñe, ladüga busén lan lun wasubudiruni (Ariñawagúni 2:1-5). Inarüni móunabun tani Bíbülia sun álügüdahani le gayaraabei wadügüni wóuniwagua luagu Bungiu; siñati tadügüni ni aban líburu (Apurichihati 3:11). Íbini ítara, íderagua lumutiwa sun le tariñagubei Bíbülia lun wasubudiruni Bungiu. Gayaraati wasubudiruni ida liña lan Bungiu, lau ligaburi lóuseruniña gürigia. Ariha wamuti ka lan hawuyeri gürigia ibihubalin lufulesein (Sálumu 15:1-5). Furendei wamuti giñe ka lan áhuduraguni unbei lánhara, ka lan lúrudu líchugubei luagu laruman ibagari luma ka lan lasaminarubei luagu lagamadún umegeguni. Íderagua tumutiwa giñe Bíbülia asubudirei Heowá buidu buidu lidan le lariñagubei luma le ladügübei Hesukrístu, le Liráü (Huan 14:9).

Ru lumutu giñe Heowá Lererun woun lun wasubudiruni ida luba lan wibihin ugundani, gasuuni ligíame wabagari. Tidan, ariñaga lumuti woun ka lan lunbei wadügüni lun gunda wamá keisi iduheñu, ida luba lan wasandiragun woungua buidu luma le lunbei wadügüni lun mígiraguagüdün wamá woungua lun idiheri. Ítara keime lafuranguagüdüniwa tidan garüdia to, óunaba tumuti Lererun Bungiu álügüdahani burí le súdinitimabei lidan ibagari, kéiburi ka lan uagu anihein lubéi saragu asufuriruni luma kaba lan asusereda woun ámuñegü. Afuranguagüda tumuti giñe woun ka lan adüga láalibei Bungiu lun lagunfuliruni lisuuni.

Anihein saragu amu katei le arufudubalin amu tan Bíbülia tuéi tíbiri líburu ani lúmagiñetu lan giñe Bungiu. Íbini habürüdün lan kéiburi 40 wügüriña lidan kéiburi 1,600 irumu, úaraguati saminaü le tídanbei ladüga lúmagiñetu lan Bungiu (2 Timotéu 3:16). Amu tuéi amu burí líburu to binaduharu, masansiragunti ariñahani le tídanbei Lererun Bungiu eibu lásügürün dan, ítara kei larihíniwa tidan saragu milu binadu abürüdǘni to tani Bíbülia. Le linarün katei, anuheingua Lererun Bungiu lau sun adügǘwaali lan saragu katei lun másügüragüdünwa tan lidoun burí amu iñeñein, lun machülürün tan háhaburugun gürigia luma lun maliihóun tan. Uguñe weyu, tuguyatima líburu alugurúboun lidan sun ubóu, sügügüdawa tuguya lidoun amu burí iñeñein. Lau anuhagua lan líburu to uguñe weyu, arufudati taduraruba lan Lererun Bungiu “lun súnwandan” (Isaíasi 40:8).

Adügaali giñe Bungiu amu katei: layusurun aban idewesei espechaliti lun lachoururagüdüni lagunfulirun lisuuni. Kei buga wariñaguni, busenti meha Bungiu lun hawinwandun gürigia lun súnwandan ubouagu. Keiti aba lubéi maganbadi lan Adán lun Bungiu afigouha ligía, féridi lumuti chansi lun lawinwandun lun súnwandan ani galagante hamuti lisaanigu ligiaméme. “Ítara kei lídangiñe lan meha aban wügüri lebelura figóu ubouagun, belú ligía óunweni lídangiñe figóu, ítara liña giñe hóunweguba lubéi sun gürigia lugundun afigouhaaña súngubei” (Rómana 5:12). Adügati maganbadi ligía lun larihíniwa kamá hamuga magunfulirunbei lisuuni Bungiu. Kati ladügübei Heowá?

Arihúati ligaburi Heowá lidan le ladügübei dan le lasuseredunbei lira. Óuserati lau irichaü ani bei lumuti Adán tuma Ewa ladüga hamaganbadin, ínchaha lumuti giñe línsiñehabu adügei le  mégeiwabei lun lachoururuni habagari gürigia lubá ámuñegü. Yusu lumuti Heowá lichú lau lun lanúadiruni ida luba lan meha lahandilihani sügǘ ligía ani írida lumuti lau lóufudagun kaba lan ladüga lun laranseruni turobuli ligía (Agumesehani 3:15). Layusurubei meha Hesukrístu, le Liráü, lun lesefuruniwa lídangiñe figóu luma óunweni. Ka meha lunbei lasuseredun lun ladügǘn lira?

Lun laransehani wuribati le lanügübei lebedaagun Adán, aba lóunahani Heowá Hesusu ubouagun lun larufuduni émeri le anügübei lidoun ibagari houn gürigia luma lun líchuguni libagari “lebegime hasalbarun saragu” a (Matéu 20:28; Huan 14:6). Gayaraati meha lafayeiruni Hesusu lebegi esefuruni lugundun mafigounti, ítara kei meha mafigoun lan Adán furumiñe, ani súnwandan gaganbadi lan Hesusu lun Bungiu íbini dan le mosu lubéi meha lounwen. Kei meha ua lubéi yu lan lun lounwen Hesusu, aba láguyuguagüdüni Heowá ani ígirati lun lagiribudun sielun. Ítara, gayaraabei meha líchuguni Hesusu le lásiñarubei Adán íchiga houn gürigia ha gaganbadibaña: ibagari magumuchaditi. “Ladüga lubeiti lumaganbadin ábanrügü wügüri, ñǘbuintiña sun gürigia lun hafigouhaba lan; ítarameme giñe, ladüga laganbadi ábanrügü wügüri, gayaraati hayabin sun gürigia lun richaguabaña lan ligibugiñe Bungiu” (Rómana 5:19). Layusurubei Heowá sákürifisiu le ladügübei Hesusu lun lagunfulirun lau le füramase lubéi: hawinwandun gürigia lun súnwandan ubouagu.

Ídehati ligaburi laransehani Heowá turobuli le lanügübei lebedaagun Adán lúntima wasubudiruni buidu. Furendeitiwa ua lan ni kata gayaraati ladügün lun magunfulirun lani le labusenrubei ladügün; gúnfuliti le lariñagubei súnwandan (Isaíasi 55:11). Íderagua lumutiwa giñe arihei lueirin ínsiñeni le lasandirubei Heowá wawagu. “Arufuda lumuti Bungiu wínsiñe lun lau lóunahani Liráü le ábanrügüti ubouagun gabagari wamaamuga lídangiñe. Anihán ínsiñenibei: Mama luagu wagía lan hínsiñehabubei lun Bungiu, luagu ligía lan hínsiñehabubei woun, aba lóunahani Liráü le ábanrügüti lun lounwen, lun lébuname ferudunawa lan wafigoun” (1 Huan 4:9, 10).

Anhein derege lubalin Bungiu libagari Liráü guánarügü wawagu, gayaraati wachoururuni líchugubei lan sun líbiri katei le füramase láalibei woun keisi líchuguni Liráü woun (Rómana 8:32). Ka burí amu katei füramase láalibei Bungiu woun? Ariha waméi.