“Ka biri?”, másiñati anihán lan furumiñeti álügüdahani le wadügübei lun aban gürigia dan le busén wamá wasubudiruni. Lun hamuga wadügüni álügüdahani le lun Bungiu, kaba hamuga lóunaba?

“Au Heowábei, ligía níribei” (Isaíasi 42:8, TNM).

Súdiniti lun Bungiu. Mama amu gürigia íchugubalin iri le luagu Bungiu; ligía guánarügü íchugubalin luougua. Ariñagati Heowá: “Ligíaba niri lun súnwandan ani ligía lunbei hóuseruni gürigia lúmagiñe guentó lun lubaruaguóun” (Áfuriduni 3:15). Gíbetimati wéiyaasu láfuachun liri Bungiu tidan Lererun sügǘ lau furumiñeguarügü ligaburi laguarún lun kéiburi Suntigabafu, Úguchili, Aburemei o Bungiu, luma luéi furumiñeguarügü amu iri, kéiburi Abüraámü, Moisesi, Dawidi o Hesusu. Le linarün katei, busenti Heowá lun wasubudiruni liri. Ariñagatu Bíbülia: “[Subudi haméi] gürigia Heowá lan bíribei, buguyarügüñein le Íñutimabei ligibuagu sun ubóu” (Sálumu 83:18, TNM).

Súdiniti lun Hesusu. Lidan furíei le subudiwabei kei wáguchi Bungiu, arufudahati Hesusu houn ha afalarubalin ida luba lan hafurieidun lun Bungiu lau dimurei burí le: “Inebewalá biri” (Matéu 6:9). Ani Hesusuméme ariñagubei lun Bungiu lidan furíei: “Núguchi, rualá uéiriguni lun biri” (Huan 12:28). Ariha lumuti meha Hesusu lichugún uéiriguni lun liri Bungiu kei aban katei le wéiriti lisudinin. Ligía meha gayara lubéi lariñagun: “Subudigüda naali biri houn, ani nasubudiragüdamemebei” (Huan 17:26, TNM).

Súdiniti houn ha subudihabúbaña lun Bungiu. Subudi hamuti meha lubúeingu Bungiu ha lánina binadu dan súdini lan iri móubawati le luágubei Bungiu lidan hounigirún luma hesefurúniwa. Ariñagati aban hádangiñe: “Aban wáyelesi héreti liri Bungiu, ñǘdüntiña ha richaguabaña aramudagua lidan”. Ani ariñagati giñe amu: “Sun le agúaruti liri Heowá, lesefuruba” (Ariñawagúni 18:10; Hoeli 2:32, TNM). Arufudatu Bíbülia hasubudirúba lan lumutuniña Bungiu ladüga hanügüni liri.  “Ha híbiri gürigia, luéigiñe hóubadina, héibuguba lidan liri habungiute; anhein wagía, luagu wóubadina, wéibuguba lidan liri Heowá le Wabungiute lun súnwandan” (Mikeasi 4:5, TNM; Adügaü 15:14).

Úati amu kei Bungiu. Úaratiña saragu sásaamu luagu “Adüga [lan] lun Lasuseredun” mini lubéi iri Heowá. Ídehati giñe le lariñagubei Heowá luougua, dan le layanuhanbei luma Moisesi, lun gunfuranda wamani le mini lubéi liri. Ariñagati Bungiu: “Au, le adügübalin le nabusenrun” (Áfuriduni 3:14, TNM). Ligíati, arufudati liri Bungiu ligía lan Adügübalin sun katei. Arufudati giñe adügagua lan Bungiu lungua kei labusenruni o gayara lan layusuruni le adüga láalibei según le mégeiwabei lun lagunfuliruni lisuuni. Lau sun gayara lan lídehan ligaburi laguarún lun Heowá lun lasubudirún lubara o lubafu, lírirügüñein arufudei káteiñein lan luma le liyaraabei adüga.

Arufudati berese lan Bungiu wau. Adügati le mini lubéi liri lun wachoururuni berese lan lau sun le adüga láalibei, wagía haganagua. Kei subudigüda laali lan liri woun, arufudati lira busén lan lun wasubudiruni. Lau sun luwuyeri, ligía asubudiragüdübalin liri woun furumiñe íbini lubaragiñe wálügüdagun woungua ka lan liri. Furanguti mabuseerun lan lun wasaminarun aban lan Bungiu le díseti hawéi gürigia ligía o le úati furangu lan káteiñein lan, lubaragiñe lira, busenti lun wasubudiruni aban lan Bungiu inarüniti ligía ani gayara lan wayarafadun lun (Sálumu 73:28).

Dan le wayusuruni liri, arufuda wamuti berese wamá lau. Samina humá: Lun hamuga busén lan aban gürigia gamadagua lan huma ani aba hariñagun lun gürigia ligía lun lagúarun hun lau hiri, ida luba hamuga hasandiragun hungua anhein maha ladügüni? Másiñati ladügüña lan hamuga lira lun machourun humani anhein busén lubéi gürigia ligía gamadagua lan huma. Ligiaméme asuseredubei luma Heowá. Ariñaga laali woun ka lan líribei ani busén lan lun wayusuruni. Dan le wadügüni, arufudatiwa busén wamá wayarafadun lun. Ariñagatu Bíbülia subudi lani Bungiu kátaña lan asaminarubaña luagun liri (Malakíasi 3:16, TNM).

Lun wagumeserun asubudirei Bungiu súdiniti lun wasubudiruni liri. Ani moun lumuti gufuruma wamá lau lira. Mosu giñe wasubudiruni le anügübalin iri le, subudi wameime ligaburi.