Anihein inarüni tidan Lererun Bungiu
Lidan sun dan le sügühalibei, rúhaña ámuñegueinarügü gürigia fe ariñaga tani Lererun Bungiu inarüni. Ani uguñe weyu, añahein saragu míñunu gürigia ha falá hamuti le tarufudahabei lidan habagari. Ánheinti amu gürigia, saminatiña aban lan líburu to mahuudunharu Bíbülia o buin tiña lan lau úraga. Agia huguya, ka hisaminanbei? Gayaraati funa san wadariruni inarüni tidan Bíbülia?
KA UAGU GAYARA LUBÉI HAFIÑERUN TUAGU LERERUN BUNGIU?
Ida luba hasubudiruni anhein gayara lubéi hafiñerun tuagu Bíbülia? Samina humá luagun aban humada le barühali saragu irumu ariñagei inarüni hun, ma hariñaguña hamuga gayara lan lafiñerúniwa luagu gürigia ligía? Ítara tiña san Bíbülia kei aban umadaü le uáguti gayara lan lafiñerúniwa? Súnwandan san tariñaguni inarüni? Ariha wamá fiu hénpulu.
Abürühatiña ha meyeehantiña
Ariñaga hamuti meha ha abürüdübarun Bíbülia sun inarüni, abahüdagua hamuti íbini charati le guánarügü hadügübei luma luriban igaburi le harufudubei. Kéiburi profeta Honasi le abürüdübarun líburu to anügübalin liri, abahüdaguati tidan aba lan meha maganbadi lan lun Bungiu (Honasi 1:1-3). Gumú lumutu liliburun lau labahüdaguni erereha lan Bungiu lun, íbini ítara málugunti laricharaguagüdüni ligaburi lóuserun lau lariñagun anha lan lun ererehóuni ligía (Honasi 4:1, 4, 10, 11). Lau hariñaguni abürühatiña sun katei kei lasuseredun arufuda hamuti weiri lan habusenrun lun lasubudirúniwa inarüni.
Adundehani huuti
Súnwandan san hu lan adundehani le tídanbei Lererun Bungiu lidan le wadügübei sagü weyu? Anha. Kéiburi le tariñagubei libügürü le lunbei wadügüni lun buidu lan wanaagun woungua hama amu. Ariñagatu: “Súnwandanla lubeiti hadügün houn amu kei le habusenrubei lun hadügün hun” (Matéu 7:12). “Óunabagülei le buiti, gáluma lumuti igañi” (Ariñawagúni 15:1). Chóuruti húugili lan adundehani tídangiñeti Bíbülia le uguñe weyu kei lidan dan le labürüdǘnbei.
Ariñaga tumuti inarüni luagu dan le sügühalibei
Lidan sun dan le sügühalibei, adügaali katei burí le hadarirubei sásaamu ha akutihabaña binadu burí umegeguni lun lachoururúniwa inarüni lan le tariñagubei Bíbülia hawagu gürigia, fulasu luma burí sügǘ le tíridubei. Akutiha wamá aban lídangiñe, ariha wamaamugei ariñaga tani inarüni íbini lidan katei ñǘbüriti. Abahüdaguatu Bíbülia añahein lan meha tíruna (fenisiana ha lílana Tiru) awinwanda uburugu Herusalén lidan lidaani Neemíasi ani barǘ hamá meha “úduraü luma sun luwuyeri ebegidinaü” ñeinhin (Neemíasi 13:16).
Anihein san katei le arufuduti inarüni lan lira? Anha. Darihaña sásaamu umegeguni burí fenisiana lidan ageiraü Ísüraeli le arufudubei aluguraha hamá meha ísüraelina hama fenisiana marasun hámagua lidan binadu dan. Lanwoun lira, darihaña giñe habu burí úduraü ha lídangiñetiña barana Mediteraniu lidan hachíahan uburugu Herusalén ani genegeti lídangiñe lan meha lidise burí kosu hanügǘwa ñeinhin. Lárigiñe lakutihani aban abahüdaguti katei le, aba lariñagun: “Genegeti inarüni lan ñüdün hamá meha tíruna aluguraha úduraü uburugu Herusalén kei lariñaguni Neemíasi 13:16”.
Ariñaga tumuti inarüni luagu siensia
Lau sun luágutima lan Bungiu luma katei le asuseredubei lidan binadu dan tadimureha Bíbülia, ariñaga tumuti inarüni dan lan tayanuhan luagu katei le lánina siensia. Ariha wamá aban hénpulu.
Sügühali kéiburi ǘrüwa-milu-seingü-san irumu lúmagiñe tariñaguni Lererun Bungiu dibiñu liña lan Ubóu “ligibuagu ni kata” (Hobu 26:7). Ánheinti lidan burí úraga, ariñawagúati meha fayañu liña lan Ubóu ligibuagu duna o tigibuaguñein lan aban óunwenbu bugudura. Kéiburi milu-san irumu lárigiñe tabürüdǘniwa liliburun Hobu, añahagua meha gürigia afiñera ligibuaguñein lan somu katei Ubóu. Ǘrüwarügügili-san irumu ásügürüti lúmagiñe lasubudiragüdüni Isaac Newton, lidan irumu 1687, ariñahani le ladarirubei lidan lakutihan libügürü erei le achawahabalin katei luouguoun, le ídanbei lafuranguagüdei erei lan ligía adügübei lun lerederun Ubóu lidan lubara. Adügati ariñahani súdiniti lánina siensia le lun larihíniwa inarüni lan le tariñagubei Bíbülia lóugiñe ǘrüwa-milu irumu guentó.
Profesía le uáguti gayara lan lafiñerúniwa
Darí halía lébeda gayara lan lafiñerúniwa luagu burí profesía le tídanbei Bíbülia? Akutiha wamá aban hénpulu: profesía le labürüdübei Isaíasi luáguti lábürühan Babilónia.
Profesía: Kéiburi lidan irumu 732 lubaragiñe lidaani Kristu, dan meha le mámagili lichügüdina aban arúeihani gabafuti uburugu Babilónia, abürühati Isaíasi aban profesía tidan Bíbülia le ídanbei lariñaga ladügǘba lan lun lábürühan Babilónia ani lerederuba lan málouga lau lásügürün dan (Isaíasi 13:17-20). Ariñaga lumuti Isaíasi íbini liri gumadimati le meha lunbei lábürügüdüni Babilónia: Siru. Bürǘ lumuti giñe lidan profesía kaba lan ladüga gumadimati le: lamabeidagüdüni burí duna le ásügürübei lídangiñe uburugu ligía ani hunren luba lan ladariruni lubenari (Isaíasi 44:27-45:1).
Lagunfulirun: Kéiburi bián-san irumu lárigiñe labürüdüni Isaíasi profesía le, ligía lábürühan aban urúei pérüsiana luagun Babilónia. Ka méhati líribei? Siru. Hanarimeti meha lubarieirun uburugu le, ligía aba lubéi líchuguni Siru larihin luagun duna le ásügürübei Babilóniagiñe: duna Éufüratesi. Aba hachigin luwügüriñanigu Siru aban émeri íñugiñe libiti duna lun hegeyeduni lidoun aban fulasu gubegubeti. Dan rarihali duna darí lachülürün luagun hayada súdaragu, aba héibugun luéigiñe lémeri darí hachülürün luagun lubenari uburugu. Ani lau sun gürewei lan lafiñerúniwa, hunren liña hígiruni babilóniana bena. Aba hebelurun lisudaranigu Siru Babilónioun, ábati hárügüdüni.
Íbini ítara, anihagua meha aban fánreinti lídangiñe profesía le le mégeigili lun lagunfulirun: lerederuba meha san uburugu Babilónia málouga? Lau sun winwan hamá gürigia ñein luagu saragu sígulu, uguñe weyu, lárigirugurügaali Babilónia eredera —anihein yarafa lun uburugu Bagdad (ageiraü Irak)—, arufuda lumuti lira gúnfuli lan profesía le sunsuinagubei. Ligía gayara lubéi lafiñerúniwa luagu le tariñagubei Bíbülia lubá ámuñegü.
