Inarüni luagu le lunbei lasuseredun ámuñegü
Álügüdaguañahaadün san hungua kaba lan asusereda ámuñegü? Ariñagatu Bíbülia málühadiwa lan súngubei wagía agagibudagua luma burí sügǘ le lunbei ladügün lun taweiridun wanigi.
Ariñaga lumuti Hesusu woun ida luba lan wasubudiruni “madiseeli lan lidaani” Larúeihan Bungiu (Lúkasi 21:31). Laganagua profesía le líchugubei, ariñagati ñeinbei lan óunwenbu burí wuribu, hárabaganali, ilamaü luma laburuchagun sandi. Ani warihiñein lasuseredun sun le uguñe weyu (Lúkasi 21:10-17).
Ariñaga tumuti giñe Bíbülia lidan profesía ida luba lan hagaburi, o luriban hagaburi, hiibe-agei gürigia lídounme “lagumuhóun dan” le lubaragiñebei lagumuchúniwa lau harúeihan gürigia. Aliiha huméi profesía le lidan 2 Timotéu 3:1-5. Ma inarüni ítara liña lan ligaburi hóuserun gürigia ha geyegubaña wau kei lariñaguni profesía le?
Ka mini lubéi sun le? Málühali lan Larúeihan Bungiu anüga óunwenbu burí asansiruni le lunbei ladügün lun buídutima lan ibagari ubouagu (Lúkasi 21:36). Füramaseti Bungiu tidan Bíbülia ladügüba lan saragu katei buiti luagu Ubóu luma hawagu lílana. Ariha wamá fiu.
ABAN ARÚEIHANI BUITI
“Aba líchugun [Bungiu] ubafu luma uéiriguni luma arúeihani lun [Hesusu], aba heseriwidun sun néchanigu lun. Masansiragunbei lubafu, magünrinchawagunbei giñe larúeihan” (DANIELI 7:14).
Le mini lubéi: Gachansinbadiwa lan lun wawinwandun gúndaañu lábugiñe Arúeihani móubawati le adüga láalibei Bungiu lun lagumadihani sun Ubóu le ñein lubéi Hesusu lan Urúeibei.
LUBUIDUN ÁTUADI
“Mariñagunbei ni aban lílana fulasu: ‛Sándiñadina’” (ISAÍASI 33:24).
Le mini lubéi: Úaali lanme ni murusun danimaü wawagu ani madagarun háalime sandi wawagu. Gachansinbadiwa lun wawinwandun lun súnwandan.
DARANGILAÜ LE DAYARÜTI
Lagumuchúba lau “wuribu chülǘ lumoun lagumuhóun larigeirugu ubóu” (SÁLUMU 46:9).
Le mini lubéi: Úaali lanme ni kata adügüti lun ua lan darangilaü, masufurirun wagíame ladüga burí wuribu.
BUIN LUBA UBÓU HAU GÜRIGIA BUÍTIÑA
“Málühaña ánhaña ua wuribatiña. [...] Ánhaña ha ǘnabubei hanaagun houngua, hagíaba laburiña múa” (SÁLUMU 37:10, 11).
Le mini lubéi: Úaaña lanme gürigia wuribatiña; gürigiarügübaña ha busentiña gaganbadi hamá lun Bungiu eredera ubouagu.
ÁBANBEI PARAÍSU SUN UBÓU
“Hábunaguba gürigia haban ábame haganóun tidan, hábunaguba beibei ábame héiginu tin” (ISAÍASI 65:21, 22).
Le mini lubéi: Ábanbei lan lubuidun fuluri-agei sun Ubóu. Lagunfulirubei Bungiu le wamuriahabei luma: ladügǘniwa lugundan “ubouagu” (Matéu 6:10).
