Liri. Ligía guánarügü ariñagubei: “Au Heowábei, ligía níribei” (Isaíasi 42:8, TNM). Lau sun fuá lan liri Bungiu kéiburi sedü-milu wéiyaasu tidan Lererun, sagawaali tídangiñe saragu Bíbülia, ábati híchugun amu burí dimurei ñein kéiburi Aburemei. Busenti Bungiu gamadagua humá luma, ligía busén lubéi lun hagúarun lun lau liri (Sálumu 105:1).

Dimurei burí le ayusurúbei lun laguarún lun. Tidan Bíbülia, wáwati lun Heowá lau dimurei kéiburi Bungiu, Suntigabafu, Le adügübalin sun katei, Úguchili, Aburemei luma Le íñugutimabei. Tidan, daritiwa saragu furíei le adügǘbei lun Bungiu le ídanbei layusurúa aban lídangiñe dimurei burí le lun layanuhóuniwa lun lau inebesei ani yúsuati giñe liri: Heowá (Danieli 9:4).

Ida liña san Bungiu? Aban sífiri marihúaditi Bungiu (Huan 4:24). Chóurugüda tumuti  Bíbülia woun “úagili [lan] ni aban arihiti Bungiu” (Huan 1:18). Ariñagatu giñe gayara lan ladügün le wadügübei lun lagundaarun o lírudagun (Sálumu 78:40, 41; Ariñawagúni 27:11).

Lubuidun burí ligaburi. Aban labu lanügüniña Bungiu sun gürigia, meberesenga hanasiñun o le winwan hamaalibei (Adügaü 10:34, 35). Gudemehabuti, gaguraasunti, hínsiñehabuti ani súnwandan lariñaguni inarüni (Áfuriduni 34:6, 7). Ani lídangiñe sun igaburi le luágubei, anihein gádürü le furangutimati larihíniwa.

Ubafu. Ligía “Búngiubei le Suntigabafu”. Mini lan lira mébeha lan lubafu lun lagunfuliruni sun le füramase láalibei (Agumesehani 17:1).

Lichú aau. Úati chútimaati aau luéi Bungiu. Ligía tariñagunbei Bíbülia luagu: “Ligíarügüti chu aau” (Rómana 16:27).

Irichaü. Súnwandan lóuserun Bungiu lau irichaü. “Richaguati sun le ladügübei” ani “úati marichaü lidan” (2 Lúrudu 32:4).

Ínsiñeni. Ariñagatu Bíbülia: “Ínsiñeni Bungiu” (1 Huan 4:8). Mama arufudarügüti Bungiu ínsiñeni, ligía guánarügü ínsiñenibei. Wéiriti línsiñehabu darí lun gayara lan larihíniwa lidan sun le ladügübei, ani sagatiwa buiti lídangiñe línsiñehabu lidan ámuñegueinarügü igaburi.

Lumadagua Bungiu hama gürigia. Wáguchi hínsiñehabuti le siélubei Bungiu (Matéu 6:9). Ánhawa afiñera luagu, gayaraabei lumadagu wamá (Sálumu 25:14). Wéiriti lebereserun wau darí lun agunbiraha lániwa lun wayarafadun lun lidan furíei luma lun wabahüdaguni sun wadiheri lun (Santiagu 4:8; 1 Féduru 5:7).

Mama Bungiu Hesusu. Úati amu kei Hesusu ladüga ligíarügüñein lan ladügün Bungiu lábuguarügü. Ligía wawa lubéi lun Hesusu tidan Bíbülia “Liráü Bungiu” (Huan 20:31). Adüga lumuti Heowá Hesusu, le lígirama, ani lárigiñe aba líriduni keisi “nadagimeinti hemeniti” lun ladügüni sun le líbiri katei hama ha híbiri gabagaritiña (Ariñawagúni 8:30, 31, TNM; Kolosana 1:15, 16).

Mariñagunti Hesusu ni aban wéiyaasu Bungiu lan ligía. Lubaragiñe lira, aba lariñagun:  “Lúmagiñe [Bungiu] niabin, ani ligía óunahabalina” (Huan 7:29). Dan meha layanuhaña lubéi Hesusu tuma aban hádangiñe lani disipulugu wati lun Heowá “Núguchi, le giñe Húguchi” luma “Nubungiute le giñe Hubungiute” (Huan 20:17). Dan lóunwenbei Hesusu, aba láguyuguagüdüni Heowá lun lawinwandun sielu, ábati ladügün lun lañuurun luéigiñe lóunwenren ani ruti óunwenbu ubafu lun (Matéu 28:18; Adügaü 2:32, 33).

Gayaraati líderagunün Hesukrístu ayarafada lun Bungiu

Ñǘbuinti ubouagun lun larufudahan woun luagu Lúguchi. Heowá guánarügü ariñagubei luagu Hesusu: “Anihán Niráü le hínsiñebei nun; adüga huméi le lubeibei” (Márükosu 9:7). Úati amu le buítimati lasubudiruni Bungiu kei Hesusu. Ariñagati Hesusu: “Úati giñe ni aban subudihabúti káteiñein lan Núguchi nuéidigia hama ha úntiña nabusenra nasubudiragüdüni” (Lúkasi 10:22).

Arufuda lumuti Hesusu ligaburi Bungiu buidu buidu. Wéiriti lubuidun láyeihani Hesusu ligaburi Lúguchi darí lun gayara lan meha lariñagun: “Le arihitina, larihiñein giñe Bungiu Úguchili” (Huan 14:9). Íderagua lumutiña Hesusu gürigia ayarafada lun Bungiu lugundun, dandu lau le lariñagubei kei lau le ladügübei, arufuda lumuti houn gürigia hínsiñe hamá lun Lúguchi. Ariñagati Hesusu: “Au ǘmabei, au inarüni, au ibagari. Ani úati achülürüti lumoun Bungiu Úguchili anhein mama lubéi nuéigiñe” (Huan 14:6). Ariñagati giñe: “Sun áhuduragutiña lun Úguchili ha tímatimaatiña háhuduraguba lun lau sífiri luma lau inarüni. Chóuruti láluahaña lan Úguchili gürigia ítaratiña lun háhuduragun lun” (Huan 4:23, TNM). Samina huméi le! Láluahaña Heowá gürigia kei huguya, ha busentiña hasubudiruni inarüni luagu.