Dan le hegeburihan
ANHEIN hilá lubéi somu gürigia le hínsiñeti hun, gayaraati giñe sandí humá íruni, igarigu, hasandiragun hungua hábugua, ligari hun mabafu humá lun hasansiruni lirun gádantün, habuinchun lau igañi, hasandiragun hungua lau duru o lau anufudei. Másiñati íbini gumeseedün lan álügüdagua hungua anhein lunti lubéi hasigirun abagarida.
Gayaraati hachoururuni mariban lan hasandirun igarigu dan le hegeburihaña lan. Le linarün katei, arufudati lira weiri lan meha línsiñe gürigia le óunwebei hun. Gayaraati funá san hadarirun awalidaguni?
LE ADÜGA HAMAALIBEI SARAGU GÜRIGIA
Lau sun laganóun lan hun kamá úabei ni kata agalumaruti higarigu, háfuga líderagunün hafalaruni adundehani burí le lunbei wakutihani.
HAYAHUAHAN SUN DAN LE MÉGEIWABEI
Ámuñegueinarügüti lidura luma ligaburi lagagibudagun kada egeburihati luma ligarigu. Íbini ítara, gayaraati líderagunün hayahun lun lawalidagun hasandiragun hungua. Ariñagatu Vanessa, to buga uáguboun wayanuha: “Meredeti meha nayahun. Megei numuti meha lira lun nawaragun”. Hilatu tamulelua Sofía sódini, ligía tariñagunbei: “Sanditina aban óunwenbu igarigu dan le nasaminarun luagun le asuseredubei. Ítara liña kei dan le larumadahóun aban guméi. Lau sun weiri lan ligari, mosu lachibún ühü luéi lun gayara lan lareidagun”.
HABAHÜDAGUNI LE HASANDIRUBEI LUMA LE HASAMINARUBEI
Subudiwati ñeinbei lan dan habusenrun lun hábuguarügü humá, íbini ítara lunti gabaroun humani hǘrüya
lan anügüni le líchugubei egeburihani lun hanügüni hábugua. Lárigiñe lounwen lúguchi Jared, aban nibureinti le 17 irumu lau, ariñagati: “Afiñetina gibe lan meha libidiounigan aau nariñagun, íbini ítara, íderagua lumutina nabahüdaguni le nasandirubei houn amu”. Íridatu giñe Janice, to buga uáguboun wayanuha lidan furumiñeti arütíkulu, amu buiti le asagarúbei lídangiñe lira: “Sanditina meha aban óunwenbu gurasu dan le nayanuhan luma somu gürigia. Sanditina meha giñe gunfurandawa nan, ábati maweirin haali lan nasandiragun nungua nábugua”.HÁNHARUN LUN HÍDERAWAGUN
Ariñagatu aban surusia: “Gürigia ha ígirubaña lun híderaguniña haduheñu hama hamadagu lidan lagumeseha hageburihan, ménrenguntimati houn lun hárügüdagun houngua lídangiñe le líbiri katei le lanügübei egeburihani”. Ariñaga huméi houn humadagu ka lan gayaraabei hadügüni lun híderagunün. Másiñati busén hamá híderagunün, ibidiñerügü liña houn ida luba lan hadügüni (Ariñawagúni 17:17).
HAYARAFADUNTIMA LUN BUNGIU
Ariñagatu Tina: “Dan láfarunbalin kánserü nani weiriei sódini, féridi numuti gürigia létima uágubei nafiñera, ábati nagumeserun abahüdaguei sun nuáguti lun Bungiu. Kei meha nagagudún, ábaha namuriahan erei luma lun gayara lan nadügüni sun le lunbei nadügüni weyu ligía. Íderagua lumutina Bungiu lidan saragu igaburi”. Abahüdaguatu Tarsha, to eferidirubarun túguchu lidan óunweni dan meha le 22 lubéi irumu tau: “Sanditina meha awalidaguni dan le naliihanu Lererun Bungiu sagü weyu. Súnwandan meha tíderagunina asaminara luagun somu katei buiti”.
HASAMINARUN LUAGUN ÁGUYUGUNI
Ariñagatu giñe Tina: “Furumiñe, míchuti meha emenigini lánina águyuguni gurasu nun. Megei numuti meha nani weiriei lidoun dan ligía ani megei hamuti meha giñe nisaanigu háguchi. Ánheinti guenlé, gádürü irumu lárigiñe, ru numuti sun nafiñen luagu emenigini le. Íderagua lumutina lun nasigirun nubaruaguóun. Gúndaagüda lumutina nadiraaruni lidan nisaminan dánmeya nadunragun luma wéyume le láguyugun ani darangilu haali nasandiragun nungua”.
Másiñati masandirunbadün lan awalidaguni lau lóufudagun, íbini ítara, gayaraati líchugun le tariñagubei Vanessa gurasu hun. Ariñagatu: “Lau sun samina humá miñuragunbadün lan lídangiñe le gádanbalün, lachülürüba dan lun maweirin haali lanme íruni le hasandirubei”.
Haritagua huméi le: lau sun úabei lan amu gürigia árügüdüti lubara gürigia le óunwebei huéi, anihein resun buiti lun hasigirun abagarida. Lau lídehan Bungiu, gayaraagili hásügürün lubuidun dan hama humadagu luma lun gasuuni lan hibagari. Málühali Bungiu águyuguagüdaña hilaaña. Busenti lunya hóuburuniña gürigia ha hínsiñebaña hun luma lun lagidarun igarigu le hasandirubei guentó lun súnwandan.