SANDIGUAÑAHAADÜN san hungua wuriba darí lun mabusenrun humá hasigirun abagarida? Anhein ítara liña lubéi, másiñati gunfuranda humani le tasandirubei Adriana. Wéiriti meha tidiheri ani híruti meha tasandiragun tungua, maguraasun tuguya. Lau lásügürün dan, aba tíchugun fe anihein lan sandi le lánina lueirin íruni tuagu.

Ariha huméi le asuseredubei lun Kaoru, aban wügüri haponna le óunigirubaliña lagübürigu ha wéiyougaaña ani sandi sándihaña. Ariñagati: “Lidoun dan ligía, wéiriti meha ladügüdarúniwa nuagu lidan nuadigimari, aba lagidarun nilama luma nidabagu. Busentina meha nounwen lun lásurun nasufurirun”.

Ariñagati aban wügüri niheriana gíriti Ojebode: “Hírutina meha súnwandan ani ayahuagüda lumutina meha furumiñeguarügü katei. Darí lun nagumeserun asaminara lun náfaragun nungua”. Máfaragunti Ojebode lungua, ni Kaoru ni Adriana, íbini ítara, áfaraguatiña yarafa houn widü-san-milu gürigia houngua sagü irumu.

Wügüriña hiibe-agei gürigia ha áfaragubaña houngua, ladüga nibusigari hamá saragu hádangiñe hamuriahan ídemuei. Ánheinti Hesukrístu, ariñagati megei hamá ha sándibaña houdin lumoun surusia (Lúkasi 5:31). Ligíati, anhein sandigua hubéi hungua lau lueirin íruni, mabusigari humá háluahan ídemuei. Añahein saragu gürigia ha láutiña sandi le lánina lueirin íruni ha hóuchaaguaali hasandiragun houngua lárigiñe hátahan árani lúmagiñeti surusia. Ligía ladügübei Ojebode, Kaoru tuma Adriana, áluahatiña surusia ani buíduhali hasandiragun houngua.

Añahein surusia ha agaranihabaña houn gürigia ha láubaña sandi le, lau hariñaguni houn kaba lan árani hátaha o lau hayanuhan hama lun híderaguniña asansirei ligaburi hasaminan ani anihein dan adüga hamuti biángubei katei le. Mégeitiña giñe ha láubaña sandi le ídemuei hámagiñe haduheñu luma hámagiñe hamadagu, lun gunfuranda hamaniña, gaguraasun hagíame habá. Úati umadaü buítimati luéi Heowá ani rúhali aban lubuidun ídemuei woun: Bíbülia, to Lererun.

Liibe-agei dan, mégeitiña gürigia ha láubaña sandi le lánina lueirin íruni hátahan árani luagu saragu dan ani mosu giñe hadügün asansiruni lidan habagari lun hawanduni hasandi. Anhein anihein lubéi sandi le huagu, gayaraati hachoururuni wéiribei lan lubuidun hibagari ámuñegü. Ligía lasaminarubei Ojebode, le ariñagubei: “Memeniha nanigi lun narihini lagunfulirun le lariñagubei Isaíasi 33:24, ñein lubéi profesía le ariñagubei lachülürüba lan dan lun úaali lanme ariñaguti ubouagu: ‘Sándiñadina’”. Hasandiruba giñe awalidaguni lau hasubudiruni füramase haali lan Bungiu ñeinbei lan “aban iseri ubóu” le ídanba lubéi úaali lanme “igarigu” ni idiheri (Arufudúni 21:1, 4). Lagidarúba asufuriruni le lanügübei luriban lasandiragun gürigia lungua lun súnwandan. Masandirundigia humaalime katei burí le, habulieidubei “sun le sügühalibei” ani maritagun háadünme luagun (Isaíasi 65:17).