Ariñagati Hesusu lageindaguba lan “aban fulasu luma aban, awuribuha ligíame aban ageiraü luma amu”. Ñeinbei lan “óunwenbu burí hárabaganali, ilamaü [luma] sandi [...] lidan ámuñegueinarügü fulasu” (Lúkasi 21:10, 11). Ítara kei hu lan luhabárigi aban gürigia lun lasubudirúniwa katei lan, ladügüba giñe lasuseredun sun katei burí lira lidan ligiaméme dan lun larihíniwa furangu yarafaali lan Larúeihan Bungiu. Ligía san warihibei guentó? Susereeli san katei burí ligía lidan sun Ubóu? Ka larufudubei dan le ídanbei wawinwanda?

1. WURIBU

Lidan irumu 1914 laduura wuribu létima hanarimebei lídangiñe sun le susereelibei lubaragiñe. Ani ariñagatiña abahüdagutiña súdini lan irumu lira ladüga lidan lan lagumesera furumiñeti wuribu le gádanbalin sun ubóu. Lídantima wuribu ligía tayusurúa ugunei to lánina wuribu, awión to achüühaboun bonba, áruma to aduuhaboun mararamagunga, gasi le gaganabei péisini tuma saragu amu áruma lun háfarawagun gürigia. Ani lidan Libiaman Wuribu Wéiriti tayusurúa bonba atómika. Lúmagiñe irumu 1914, harihiñein gürigia lawuribuhan aban fulasu luma amu ani adügaali wuribu burí ligía lun hóunwegun saragu míñunu gürigia.

2. HÁRABAGANALI

Ariñagatu líburu Britannica Academic sagü lan irumu lasuseredun kéiburi 100 hárabaganali le gayaraati ladügün óunwenbu burí damichi. Ariñagatu Óundaruni Merigana to Akutihabalin le Gádanbalin Ubóu: “Arufudati ariñahani le wámabei lúmagiñe irumu 1900 agurabúa lan kéiburi disisi hárabaganali wéinamuti sagü irumu”. Másiñati añahein lan ariñagutiña mama lan gánwounrügüti hárabaganali, adügarügü lan gayaraatimahali lan lasubudirúniwa átiriñein lan lun larihíniwa kamá gíbetimarügaali. Ani le linarün katei, madügünñahagili hárabaganali, herigini o katei líbeina lira lun ñein lan saragu asufuriruni luma óunweni ubouagu kei uguñe weyu.

 3. LEKESIDUN ÉIGINI

Késiti éigini ubouagu ladüga burí wuribu, gudemei, mouserúniwa lan lau arumani, luriban lahandilihóun bunaguaü hama animaalugu ha wéigibaña, madügǘnwa ligía aransehani buiti lubá burí luriban dan. Ariñagati aban ariñahani lídangiñeti Aransehani le Adügǘbei lidan sun Ubóu lun larihíniwa lau Éigini: “Añahein 821 míñunu gürigia ubouagu ha ásügürübaña ilamaü, ani gayaraati heferidiruni 124 míñunu hádangiñe habagari” (2018 Year in Review). Adügaali magülegu lun hóunwegun kéiburi 3.1 míñunu irahüñü sagü irumu. Lidan irumu 2011, hilatiña kéiburi 45 hádangiñe kada 100 irahüñü ubouagu ladüga katei le.

4. LABURUCHAGUN SANDI

Ariñagatu Óundaruni to Arihiboun lau Átuadi lidan sun Ubóu: “Wéiriti laburuchagun sandi lidan sígulu wein-aban le. Chülüguaya binadu sandi kéiburi kólera, labilu luma burí íñanaü ani aniheinhali iseri sandi kéiburi lénrengun awaraguni, yadunu le adagarubei hawagu lílana ámuñegueinarügü ageiraü lidan aban, sandi lánina awaraguni le adagarubei nórute lani Áfürika, ébola luma sika”. Ani sandi COVID-19 lagumuhóunbei. Lau sun awanseeña lan sásaamu lánina siensia hama surusiagu lidan hakutihan luagu burí sandi, madarirun hamagili lárani súngubei.

5. LAPURICHIHÓUN LIDAN SUN UBÓU

Ayanuhati Hesusu lidan profesía luagu amu seini, ariñagati: “Lapurichihóuba uganu buiti le luáguti larúeihan Bungiu lidan sun ubóu lun lasubudirúniwa lidan sun fulasu; ligíaalimeti lagumuchun ubóu” (Matéu 24:14). Íbini lagagibudaguña lan ubóu le luma ámuñegueinarügü turobuli, añahein hóugiñe widü míñunu gürigia ha lídangiñetiña sun néchani apurichihei uganu buiti le luáguti Larúeihan Bungiu lidan 240 ageiraü luma burí fulasu lidan lóugiñe milu iñeñein. Marihínwañahagili aban katei ítarati.

Uguñe weyu, lagunfuliruña sun le uágubei layanuha Hesusu. Ka uagu lunti lubéi súdini lan le woun? Haritagua waméi ariñaga lan Hesusu: “Danme giñe le harihini lasuseredun burí katei le, subudi huméi luagu madiseeli lan lidaani Bungiu lun larúeihan” (Lúkasi 21:31).

Arufudati seini le líridubei Hesusu luma ariñahani luáguti dan le tíchugubei Bíbülia gumese lan Larúeihan Bungiu agumadiha sielu lidan irumu 1914. a Lidan irumu ligía líchigei Heowá Hesukrístu, le Liráü, arúeiha (Sálumu 2:2, 4, 6-9). Málühali Larúeihan Bungiu agumadihei Ubóu, lagumuchuba lau sun arúeihani le ubouagubei, ábameti ladügün lun aban lan paraísu winwan wamaamuga lidan lun súnwandan.

Yarafa madise, lagunfuliruba dimurei burí le larufudahabei Hesusu lidan furíei: “Ñǘbuinla barúeihan; adügüwalá bugundan ya ubouagu kei ladügǘniwa sielu” (Matéu 6:10). Kati ladaagubei Larúeihan Bungiu lúmagiñe irumu 1914? Ani kaba ladüga danme lagumadihaniña sun gürigia?