Ka uagu megei wabalin Larúeihan Bungiu?
Dan le hagumeserunbei gürigia ubouagu, úati meha amu gumadimati luéidigia Heowá, Bungiu le adügübaliwa, ani agumadihati lau ínsiñeni. Adügati aban lubuidun fulasu —fuluri-agei Edén— lun hawinwandun gürigia ñein ani buin liña meha fulasu ligía lau éigini. Ruti giñe aban lubuidun wadagimanu houn (Agumesehani 1:28, 29; 2:8, 15). Lun hamuga meha redei hamá gürigia lábugiñe lagumadihan Bungiu, darangilubei hamuga wabagari.
Aba hamahadun furumiñetiña gürigia lun lagumadihan Bungiu.
Abahüdaguatu Bíbülia aba lan meha lebedaagun aban ánheli —Satanási le Mafia— ani aba lan lasigeneruni liricha Bungiu lun larúeihan. Adügati lun lasaminarúniwa buídutimabei lan lidin houn gürigia ánhaña madundehan lan Bungiu. Híruti aba lan hóundarun furumiñetiña gürigia, Adán tuma Ewa, lumoun Mafia ani aba giñe hebedaagun lun Bungiu (Agumesehani 3:1-6; Arufudúni 12:9).
Kei meha aba lubéi lamahadun Adán tuma Ewa lun herederun lábugiñe lagumadihan Heowá, féridi hamuti Paraísu le ídanbei hawinwanda luma chansi lun hawinwandun lun súnwandan lau lubuidun átuadi (Agumesehani 3:17-19). Ani sun isaanigu ha nasirubaña houn dan lárigiñe, ágawaha hamuti wuribani le lanügübei ligaburi hóuserun. Ariñagatu Lererun Bungiu adüga lan lafigouhan Adán lun lebelurun “figóu ubouagun, belú ligía óunweni lídangiñe figóu” (Rómana 5:12). Barüti giñe figóu amu turobuli: yusu lumuti gürigia ubafu le luágubei “lun ladügün damichi lun gürigia líledi” (Apurichihati 8:9). Lidan amu dimurei, súnwandan anihein lan turobuli dan le harúeihan gürigia hawougua.
HAGUMESERUN GÜRIGIA ARÚEIHA
Ebedaaguati Nimüródu lun Heowá.
Nimüródu furumiñetibei gürigia uáguti tariñaga Bíbülia agumadiha lan. Ebedaaguati Nimüródu lun lagumadihan Heowá. Lúmagiñe dan ligía, yusu hamuti gürigia habafu lun hadügün wuribani houn amu. Ligía meha labürühanbei urúei Salomón, kéiburi ǘrüwa-milu irumu guentó: “Aba narihin saragu amudirawagutiña ani óuserawagua hagía. Ayahuahatiña [...], gama lumoun [...] úati íderagutiña ladüga hámañein lan ha éibaahabaliña ubafu” (Apurichihati 4:1).
Masansirungili katei uguñe weyu. Lidan irumu 2009, ariñagati aban ariñahani tídangiñeti Óundaruni hani Néchanigu éibutima lan dan haganwoundun gürigia ha asaminarubaña luriban lan ligaburi hagumadihan gürigia “ábanbei lídangiñe lébuna sun wuribani le ubouagubei”.
ÓURAALI LUN ÑEIN LAN ABAN ASANSIRUNI!
Mégeiti ubóu le gumadimatiña ha buídutimatiña luma aban ligaburi arúeihani le buítimati. Ligía füramase lubéi Bungiu le adügübaliwa.
Ni gumadimatiña ha buídutimabaña siñaguatiña houngua lun haransehani luéinamun burí haturóbulin gürigia.
Aranse laali Bungiu Larúeihan, aban arúeihani le lunbei lagumuchun lau sun harúeihan gürigia, ligíarügübeiti adurara lun súnwandan (Danieli 2:44). Anihán Arúeihani le hamuriahabei saragu míñunu gürigia lidan furíei (Matéu 6:9, 10). Lau sun lira, mama Bungiu Lurúeitebei Arúeihani le, íridaali aban gumadimati le meha wínwanhalibei kei wügüri ubouagu. Ka gürigia uágubei wayanuha?
Háfuga hínsiñebei lan giñe le hun
ÁLÜGÜDAHANI LE TÓUNABUBEI BÍBÜLIA
Aban san katei le hanügübei gürigia tidan hanigi Larúeihan Bungiu?
Ka tabusenrubei Bíbülia tariñagun lau dimurei “hídanñein larúeihan Bungiu”?
