Ka uagu busén habéi gürigia hawinwandun lun súnwandan? Ariñagatu Bíbülia ru lani Bungiu ayumahani ligía tidoun wanigi (Apurichihati 3:11, TNM). Ariñagatu giñe: “Ínsiñeni Bungiu” (1 Huan 4:8). Hínsiñetiwa lun Bungiu ani míchugun lubéi hamuga ayumahani lira tidoun wanigi lun hamuga siñabei lan lagunfulirun.

Úati gürigia busenti lounwen, darí lun ariñaga tan Lererun Bungiu ítara liña lan óunweni woun kei aban “ágani” (1 Korintuna 15:26). Anihein dan chülügia lan, anihein dan ladarasaragun, ani luagu lachülürüba lan, lachülürüba. Mínsiñeti houn saragu gürigia hasaminarun luagu óunweni darí lun ru lan anufudei houn. Lachülürüba san dan lun lagumuchúniwa lau ágani le?

Subuditi san hun mabusenrungubeiñein lan Bungiu lun hóunwegun gürigia? Arufudatu líburu tídangiñetu Bíbülia to gíriboun Agumesehani busén lan Bungiu lun wawinwandun lun súnwandan ubouagu. Aranse lumuti Heowá * Ubóu lau sun le hemegeirubei gürigia lun hawinwandun luma lun gunda hamá. Ábati ladügüni Adán, le furumiñeti wügüri, ani aba líchuguni lidan paraísu le fuluri-agei Edén. Lárigiñe, “aba larihin Bungiu luagu buidu lan sun le ladügübei” (Agumesehani 1:26, 31).

Lenege guánarügü ladügei Bungiu Adán ani mafigounti meha (2 Lúrudu 32:4). Mafigountu meha  giñe Ewa, to lani Adán weiriou, ani úati meha ni murusun mégeiti ni luagu túgubu ni luagu tisaminan. Ariñagati Heowá houn: “Garahüñügua humá saragu, buíngüda huméi ubóu hau hirahüñü ani gumadi huméi, gumadi humañame úduraü hama dunuru hama sun animaalugu ha aduruuharügübaña múarugu” (Agumesehani 1:28).

Lanügüba meha labuinchun Ubóu hau hadügawagun saragu dan. Lun lagunfulirun lisuuni Bungiu, mosu meha garahüñü tan Ewa, gasaanigu hagíame tisaanigu darí labuinchun Ubóu sunsuinagubei hau gürigia (Isaíasi 45:18). Líchuguñein hamuga san Heowá gumadi le lun Adán tuma Ewa lun hamuga lúnrügüba lan harihiniña hasaanigu hama habañan hawinwanda, siñá ligíame harihini le lunbei lanügüni lagunfulirúniwa lau gumadi ligía?

Guentó, samina humá luagu dasi le lánina hagumadiruniña animaalugu. Mosu meha líchugun Adán hiri animaalugu ani másiñati barǘ lan lira saragu dan (Agumesehani 2:19). Lunti gayara lan lóunigiruniña Adán animaalugu, mosu meha lasubudiruniña buidu ani másiñati barütima lan lira saragu dan.

Ligíati, arufudati bián gumadi le líchugubei Bungiu lun Adán tuma Ewa —habuinchagüdüni Ubóu hau harahüñü luma hagumadiruniña animaalugu— adüga lániña lun hawinwandun luagu saragu dan. Ani ligía asuseredubei lun Adán.

Arufudahatu Lererun Bungiu migifetima lan meha habagari gürigia lubaragiñe Guran sügǘ lau uguñe weyu. Lidan Agumesehani 5:5, aliihatiwa: “Nefu-san-darandi irumu lau [Adán] ligía lounwen”. Lárigiñe, írida tumuti hiri sisi wügüriña ha abagaridubaña lóugiñe 900 irumu: Setü, Enosu, Kainán, Héredi, Matusalén luma Noé. Wínwantiña sun wügüriña ha lubaragiñe Guran le asuseredubei lidaaniwagu Noé, le meha gúnfulihalibei sisi-san irumu dan lagumeserunbei Guran (Agumesehani 5:6-20, 25-27; 7:6; 9:29). Ka uagu hawinwanda saragu dan?

Águrahouatiña sun wügüriña ha murusun dan lárigiñe lafigouhan Adán tuma Ewa. Másiñati ligía lan adügübei lun hawinwandun saragu irumu. Kati lánibei lawinwandun gürigia saragu dan luma mafigoun lan? Ani ida luba lagumuchúniwa lau óunweni? Lun wóunabuni álügüdahani burí le, mosu wasubudiruni furumiñe ka lan uagu waweiyada, hilagua wagía.