MABUSENRUNTI yebe Bungiu lun ítara lan ibagari kei uguñe weyu. Busenti yebe lun labuinchun Ubóu hau gürigia ha úntiña inebe lan liricha lun larúeihan, ha asagarutiña buiti lídangiñe ladundehan ani ha arufudubalin lubuidun ligaburi. Busenti giñe lun hawinwandun gürigia lidan darangilaü, lun gasaanigu hamá luma lun aban lan paraísu Ubóu.

• Gumuguagüda lumuti “wuribu chülǘ lumoun lagumuhóun larigeirugu ubóu” (Sálumu 46:9).

• “Chülüha weyu lun [...] bagünrinchaguniña ha agünrinchagubalin ubóu” (Arufudúni 11:18).

• “Mariñagunbei ni aban lílana fulasu: ‘Sándiñadina’” (Isaíasi 33:24).

• “Harihubei numutuniña le hawadigimaridubei lau háhabu” (Isaíasi 65:22).

Ida luba lagunfulirun profesía burí le? Írida laali Bungiu Hesusu, le Liráü, keisi Lurúeite arúeihani le lunbei lagumadiruni Ubóu siélugiñe. Watu Bíbülia lun arúeihani ligía Larúeihan Bungiu (Danieli 2:44). Ariñagatu giñe luagu Hesusu: “Larúeigüdübei Wabureme Bungiu [...], ani magumuchadibei larúeihan” (Lúkasi 1:32, 33).

Dan le ya lubéi Hesusu ubouagu, adügati saragu lubuidun katei lun larufuduni buídutimabei lan habagari gürigia lábugiñe larúeihan.

• Areidaguagüdati sun luwuyeri sandi, ítara liña larufuduni gayara lan lagidaruni sunsuinagubei (Matéu 9:35).

• Gáluma lumuti liñawan dan, ítara liña larufuduni gabafu lan luagu katei líbeina lira (Márükosu 4:36-39).

• Hóugüdati saragu milu gürigia, ítara liña larufuduni gayara lan líchuguni le wemegeirubei woun lun wabagaridun (Márükosu 6:41-44).

• Adügati lun lasaliragun duna diweinme lidan aban maríei, ítara liña larufuduni ladügüba lan lun gunda lan wabagari (Huan 2:7-11).

Ka lunbei hadügüni lun heresibiruni le labusenrubei Bungiu houn sun ha hínsiñehabubaña lun? Anihein aban “üma” le lunti lafalarún. Ariñagatu Lererun Bungiu aban lan “üma” le anügübaliña “gürigia lidoun ibagari le magumuchaditi” ani murusunrügüñanu lan adarirei (Matéu 7:14).

Katei san üma le anügübei lidoun ibagari magumuchaditi? Ariñagati Heowá: “Au [...] le Bubungiute; arufudaha numuti le buídubei bun, adundeha numutibu luéigiñe üma le lunbei bafalaruni”  (Isaíasi 48:17). Wafalaruni üma le, ligía igaburi buítimabei lun wanügüni wabagari.

Ariñagati Hesusu: “Au ǘmabei, au inarüni, au ibagari” (Huan 14:6). Ladügüba wáyeihani Hesusu luma wafiñerun luagu larufudahan, lúntima wayarafadun lun Bungiu luma lun buídutima lan wabagari.

Ida luba hadariruni üma le anügübei lidoun ibagari magumuchaditi? Kei anuhein lubéi saragu ligilisi, eweridihati Hesusu: “Mama sun ha ariñagutiña nun: ‘Nabureme, Nabureme’, lun hebeluruba lan lidoun arúeihani le siélubei [...]. Hárügübaña adügübalin lugundan Núguchi Bungiu le siélubei ebelura” (Matéu 7:21). Ariñagati giñe: “Gayaraabei hasubudiruniña luagu le hadügübei” (Matéu 7:16). Gayaraati tíderagunün Lererun Bungiu asubudirei ka lan igaburi buídutimabei lun láhudurawagun lun Bungiu (Huan 17:17).

Ka lunbei hadügüni lun hafalaruni üma le anügübei lidoun ibagari magumuchaditi? Mosu hasubudiruni le íchugubalin ibagari woun. Katei san? Ka san líribei? Ida liña san ligaburi? Ka ladügübei? Ka labusenrubei lun wadügüni? *

Mabusenrunti Bungiu lun wawinwandun lúnrügü wawadigimaridun, weigin, wásügürün lubuidun dan luma lun gasaanigu wamá. Busenti lun wasubudiruni luma lun lumadagu wamá. Dan le gaganbadi wamá lun, arufuda wamuti lun hínsiñe lan woun. Ariñagati Hesusu: “Anihán lébunabei ibagari le magumuchaditi, lun hasubudirunibu buguya le Bungiu ábanrügüti, le inarüniti” (Huan 17:3).

Másiñati mégeibadün lan hadügün asansiruni lun hagundaaragüdüni Bungiu le ábanrügüti ani inarüniti. Lau sun genege lan hun hénrengubei lan, gayaraati ítara lan leibugúniwa üma le kei aban lubuidun aweiyasuhani le agumeserubei lau hádaruni furumiñeti pasu. Anhein busén hubéi hasubudirun lóunabagüle somu álügüdahani luáguti Bungiu, amuriaha humá aban aturiahani tídangiñeti Bíbülia lidan wani páhina lidan Internet, www.pr418.com/cab. Gúndaabaña gefentiña luagu Heowá lun habisidahanün lidan oura luma fulasu le buídutimabei hun.