ÍBINI adüga lan hamaganbadin furumiñetiña wagübürigu, Adán tuma Ewa, lun galagante wamani figóu luma óunweni, madügünti lira lun lasansiragun lisuuni Bungiu houn gürigia. Yusu lumutu Bungiu Lererun, to Bíbülia, lun lachoururuni woun masansiragun lan lisuuni.

• “Galangantehabei gürigia buítiña múa, haganóuba giñe lidan súnwandan” (Sálumu 37:29).

• “Lagünrinchagubei Wabureme óunweni lun súnwandan, laragahabei águiraü luéigiñe hagu sun gürigia” (Isaíasi 25:8).

• “Óunweni, ligíaba lagumuhóun ágani agünrinchawaguti” (1 Korintuna 15:26).

• “Úaalime óunweni ni ayahuni ni íruni ni igarigu” (Arufudúni 21:4).

Kaba ladüga Bungiu lun lagumuchun lau óunweni sunsuinagubei? Kei aubei warihei, furanguti tariñaguni Lererun Bungiu luagu haganóuba lan gürigia buítiña lidan Ubóu lun súnwandan. Ani ariñagatu giñe ua lan “ni aban gürigia úaraguati ubouagu le adügüti buiti súnwandan lun mafigouhanbei lan” (Apurichihati 7:20). Mini lan san le lasansirubei lan Bungiu lugumadin lun lagumuchun lau óunweni? Uá. Madügün lubéi lira lugundun “Bungiu, le meyeehanbei” ligía (Titu 1:2). Kábati ladüga lun lagunfuliruni lubuidun lisuuni houn gürigia?

Ínchaha lumuti ínsiñeni Heowá lun lafayeiruni ebegi le mégeiwabei lun wesefurúniwa luéi óunweni. Lebegi esefuruni, ligía ebegi le afayeirúbei lun laransehóun somu damichi o lun lagunfulirún lau somu katei lánina lúrudu. Lunti lubeiti ligiaméme lan ebegi afayeirúti luagu lebegi esefuruni luma lebegi damichi le adügǘbei. Kei gafigoun wabéi ani siádiwaadiwa lun óunweni, ariñaga tumuti Lererun Bungiu le furangu: “Úati ni aban gayaraati lesefuragun lungua ni lun lafayeiruni Bungiu lun lesefuruni libagari. Úati seinsu gayaraati lagañeihani libagari gürigia” (Sálumu 49:7, 8).

Dan lounwen somu gürigia, luágurügüñein lifigoun gayara lan lafayeihan. Siñati lesefuragun lungua ni lafayeirun luagu lifigoun amu gürigia (Rómana 6:7). Mégeitiwa meha lun lafayeihan aban gürigia le mafigounti lau líchuguni libagari, mama luagu lifigoun, lubaragiñe lira, lun ferudunawa lan wafigoun (Ebüréu 10:1-4).

Ligía ladügübei Bungiu. Óunaha lumuti Hesusu, le Liráü, siélugiñe lun nasirua lan kei aban gürigia le mafigounti ubouagu (1 Féduru 2:22). Ariñagati Hesusu ñübuin lan lun líchuguni libagari “lebegime hasalbarun saragu gürigia” (Márükosu 10:45). Hilati lun lagumuchúniwa lau óunweni luma lun líchugun chansi woun lun wawinwandun lun súnwandan (Huan 3:16).

Lagunfuliruña profesía burí le tídanbei Lererun Bungiu uguñe weyu. Hénrenguti katei lidan burí weyu le ídanbei wawinwanda ani arufudati lira wawinwanduña lan lidan “lagumuhóun dan” lani  ubóu wuribati le (2 Timotéu 3:1). Lagumuchuba lagumuhóun dan le lidan “luéyuri guséi luma hagünrinchawagun wuribatiña” (2 Féduru 3:3, 7). Ánhañati ha hínsiñehabubaña lun Bungiu, hásügürüba lau ibagari lídangiñe agünrinchawaguni ligía ani ábame habihin “ibagari magumuchaditi” (Matéu 25:46, TNM).

Gachansinbaña saragu míñunu gürigia ha lúnbaña háguyugun lun hawinwandun lun súnwandan. Gayaraati láguyuguagüdün Hesusu hilaaña. Dan meha lídinbei uburugu Naín, ínchaha lumuti lugudemehabu lun láguyuguagüdüni tiráü aban würi to hilaaru úmari le ábanrügüti (Lúkasi 7:11-15). Ariñagati apostolu Pábulu: “Anihein giñe emenigini [...] luagu Bungiu nuagu, luagu lásaaragüdübaña lan hilaaña, dandu ha buídubaña kei ha wuribabaña”. Furanguti larihíniwa ínsiñeni le lasandirubei Bungiu hawagu gürigia lidan lubuidun emenigini le (Adügaü 24:15).

Gayaraati hemenigidun saragu míñunu gürigia hawinwanduba lan lun súnwandan. Ariñagatu Lererun Bungiu: “Galangantehabei gürigia buítiña múa, haganóuba giñe lidan súnwandan” (Sálumu 37:29). Lídounme dan ligía, gayaraabei wabuinchun lau ugundani sunme awanha lan ariñagei dimureimeme le meha labürüdübei apostolu Pábulu kéiburi bián-milu irumu guentó: “Óunweni, hageigia bubafu lun bagañeirun? Hageigia bímiragüle?” (1 Korintuna 15:55). Chülüdügaame dan lun lagumuchúniwa lau óunweni, hágani gürigia le wéiritimabei.