URÚEI Salomón, le meha wéiribei lichú lau, ariñagubalin dimurei burí le ani furanguti larufuduni le wasandirubei. Kei weiri lubéi lichati ibagari ani úati esefuruti luéi óunweni, háfuga ligía ayumaha habéi gürigia lun gíbetima lan dan habagaridun. Anihein saragu úraga le arufudubalin lǘhaña lan gürigia áluaha hachawaraguagüdüni lidura habagari.

Samina humá luagu abahüdaguni luáguti aban urúei sumeriu gíriti Gilgamési. Gíbeti úraga luáguti libagari urúei le libügürü wéiyaasu denchati le ladügübei áluga lasubudiruni ida luba lan lesefurun luéi óunweni. Ani madari lumuti le lálugubei.

Lidan sígulu gádürü lubaragiñe lidaani Kristu, añahein meha cheiní gabiñarahatiña álugutiña hadariruni lubuña uniñein lánina abiñarahani le uágubei hasaminara líderagubaña lan awinwanda lun súnwandan. Adügatiña aban uniñein le gaganati lirahüñü lagu merükúriu luma arüséniku. Ani genegeti hilagua hamá saragu gumadimatiña cheiní lárigiñe hátuni uniñein ligía. Labadinagua burí irumu 500 luma 1,500 lárigiñe lidaani Kristu, añahein meha gabiñarahatiña Yuropa óuchutiña hadügün lun geigúadi lan golu, lugundun kei magahüdadi lubéi, saminatiña yebe gayaraabei lan ladügün lun lachawaragun lidura ibagari.

Ítara kei meha laluahóun “uniñein le adügübei lun lawinwandúniwa lun súnwandan” lidan binadu dan, uguñe weyu, añahein giñe sásaamu lidan siensia ha aturiahabaliña nibagaritiña luma burí igaburi le galagante habéi isaanigu hámagiñe agübürigu lun hálugun hasubudiruni lébuna aweiyaduni. Arufudati le hakutihabei añahagua lan gürigia afiñera luagu gayara lan habihin lun lachülürün dan lun maweiyadun hamá, móunwegun hagíame. Kati hafurendeirubei lídangiñe le hakutihabei?

Íridaaña sásaamu ha aturiahabarun hani gürigia sélula lóugiñe ǘrüwa-san ámuñegueinarügü lébuna waweiyadun luma wóunwegun. Lidan burí irumu le málügilibei lúmagiñe lásügürün, ibihaaña hachawaraguagüdüni lidura habagari animaalugu luma tidura hani gürigia sélula. Ligía añahein lubéi gürigia rísitiña íchugutiña seinsu houn lun hasigirun akutiha libügürü ka lan uagu wóunwegua. Ka adüga hamaalibei sásaamu ha?

 Houchun hachawaraguni lidura ibagari. Añahein sásaamu saminatiña lígirugu lan burí kromosóma, le unbei hagúara telomero, adügübei lun waweiyadun. Lugundun eibu tagibedagun sélula, ágüdaheina liñalin burí telomero ariñahani le tídanbei luáguti igaburi le galagante wabéi, ságüti lasuseredun lira, aba achatireina lan telomero. Lau lásügürün dan, aba masigiharu lan sélula afanreinragua, ábati wagumeserun aweiyada.

Lidan irumu 2009, ibihatu Elizabeth Blackburn afayeiruahaü luagu tuadigimari lidan siensia, úara hama tánigu paaná, le ñein lubéi híchiga fe anihein lan aban ubuñei tíchugun sélula le adarasarubalin lachatirun burí telomero ani adüga lan lira lun ladarasarun taweiyadun burí sélula. Íbini ítara, ariñagatiña lidan ariñahani le híchugubei gabaroun hamani madügün lan burí telomero lun gíbetima lan dan habagaridun gürigia.

Ladügǘn asansiruni tidan burí sélula. Dan le taweiyadun wani burí sélula, aba masigiharu lan agibedagua, ábati tagumeserun óunaha ariñahani charati tun sélula burí to óunigirubalin átuadi, adügatiti lira lun laginenedun ámuñegueinarügü fánreinti luagu wágubu, gabügürügua lan wasandirun gáriti o ladagarun amu burí sandi wawagu. Málügili lúmagiñe hasagarun fiu sásaamu faransuna sélula burí hawéi wéiyaaña mutu, ha ídanbei añahein hamá wéiyaaña ha gúnfulihaña lóugiñe san irumu, lun hadügün asansiruni tidan burí sélula tuguya, ábayati tagumeserun agibedagua. Ariñagati Jean-Marc Lemaître, le ábutibei lidan akutihani ligía, arufuda lani wadagimanu ligía gayara lan ladügǘniwa lun “labakürün taweiyadun” sélula.

Mama sun aturiahatiña siensia afiñetiña gayara lan ladügün árani lun maweiyadun lan gürigia lúntima lachawaragun lidura wabagari. Inarüni gíbetimahali lan lidura habagari gürigia lúmagiñe sígulu disinéfu ani susereti lira ladügatima gíbetimahali lan hasubudin gürigia luagu arumani, hóunigiragun houngua luéi sandi galugurahati luma himirún luéi ladagarun ítaga sandi hawagu, yusu hagía árani le agidarubalin ühü. Añahein sásaamu lidan siensia, ha aturiahabalin igaburi le galagante habéi isaanigu hámagiñe agübürigu, afiñerutiña buíduraühaali lan lidura wabagari.

Sügühali kéiburi 3,500 irumu guentó lúmagiñe lariñagun Moisesi, aban hádangiñe ha abürüdübarun Lererun Bungiu: “Ǘrüwa wein diisi irumu ligía wabagaridubei; ha héretimabaña chülütiña darí gádürü-wein; gama lumoun igarigu luma wadagimanu líchugubei limigifen ibagari” (Sálumu 90:10). Íbini adügaaña lan gürigia saragu áfaaguni lun hachawaraguagüdüni lidura ibagari, ítaragili lidura wabagari kei lariñaguni Moisesi.

Añahein animaalugu, kéiburi águnu funati le lídanbei barana o aban tuwuyeri síndiri wéinamutu, ha gayaraati habagaridun lóugiñe bián-san irumu. Ani anuhein burí tídibu wewe kéiburi sekuoya, to wéiriboun, awinwandutu saragu milu irumu. Dan le wagoubadaguagüdüni lidura wabagari luma hadura amu burí gabagaritiña, gayaraati álügüdagua wamá woungua: “Kati lisuunibei wawinwandun luágurügü ǘrüwa-wein-diisi irumu o gádürü-wein?”.