Rúhali Bungiu aban idewesei espechaliti woun: iyaraani lun wayanuhan luma luma lun wabahüdaguni le wasandirubei lun. Ariñagati profeta Dawidi lun Bungiu: “Aganba bumuti afurieiduni! Ñǘbuintiña sun gürigia bumoun” (Sálumu 65:2). Ida lubati wafurieidun lun laganbuniwa Bungiu biní láamugawa?

Ariñagati Sálumu 62:8: “Hadimureha lidan furíeigi lau sun hemenigin”. Dan le wafurieidun lun Bungiu suntigabafu, gayaraati wariñaguni lun ka lan wasandirubei lidan tilulin-agei wanigi. Wéiriti lebegi luwuyeri afurieiduni le lun Bungiu.

Lau sun ámuñegueinarügü lan ligaburi laguarún lun Bungiu, ábanrügüñein liri. Ariñagati: “Au Heowabei, ligía níribei” (Isaíasi 42:8, TNM). Kéiburiñein sedü milu wéiyaasu láfuachun liri Bungiu Heowá tidan Lererun. Yusu hamuti meha saragu profetagu liri Bungiu dan le hayanuhan lun. Kéiburi profeta Abüraámü le ariñagubei: “Heowá, [...] adügabá fulesei nun, ígirabana lun nasigirun ayanuha buma” (Agumesehani 18:30 TNM). Lunti giñe wayusuruni liri Bungiu, Heowá, dan le wafurieidun lun.

Meberesenga ka lan wererunbei, gunfuranda lumuti Bungiu le wasandirubei luma le wasaminarubei. Chóurugüda tumuti Lererun woun: “Úati [...] himei lan Bungiu aban gürigia luéi aban, [...] resibirügü lumutiña sun ha inebehabubaña lun ani adüga haméi le buídubei, lídangiñe hamá yebe furumiñeguarügü néchani” (Adügaü 10:34, 35).

Lau sun lira, lun labiniruniwa Bungiu, úati buídurügü lan lau wafurieidun lun. Lidan burí leweñegua arütíkulu warihibei ka lan amu katei gayaraabei wadügüni.