Wéiriti wínsiñe lun Bungiu le adügübaliwa
1. ADÜGATI BUNGIU LUN LÁFUACHUN WEYU
Ida luba hamuga san wabagari lun hamuga ua lan Weyu? Adügati Weyu lun láhüchün ubanaü luagu burí tídibu wewe, lafulurihan, líchugun furuda luma burí ilaü. Adügati giñe lun lachuuruni lílagüle tídibu wewe duna múarugugiñe lun lanügüni luagun burí tubana ani lárigiñe, aba lahinchuni ñéingiñe lun garabalirugun.
2. ADÜGATI BUNGIU LUN LÁHUYUN HUYA
Aban idewesei lúmagiñeti Bungiu le wéiriti lubuidun huya. Adügati huya lun líchugun múa éigini. Ruti Bungiu huya woun, alubahani buiti, éigini nófuti ani buíngüda lumutu wanigi lau ugundani.
3. ADÜGATI BUNGIU LUN GEIGIN WAMÁ GADAÜRAGUN WAGÍA
Gíbetiña agübürigu nidiheritiña luagu ida luba lan habihini éigini tuma daüguaü to hemegeiruboun tílana haban. Ariñagatu Lererun Bungiu: “Ariha humá houn dunuru ha áhamahabaña garabalirugu: Mábunagun haña malubahan, mareidun haméi alubahani lidan lagei; lau sun lira, ruti Húguchi le siélubei éigini houn. Ma funagia gebegitimatün sügǘ hau dunuru?” (Matéu 6:25, 26).
“Ariha humá ida liña lan láhüchün fuluri [...], ni meha urúei Salomón lau sun luéndegun, mewendedunti kei aban lídangiñe. Ánheinti ítara liña lubéi ladaüraguagüdüni Bungiu sagadi, [...] huguyadigiame san madaüraguagüdün lan?” (Lúkasi 12:27, 28).
Ítara kei adüga lan Bungiu lun geigin wamá gadaüragun wagía, gayaraati giñe líderaguniwa ibihei le líbiri katei le wemegeirubei. Dan le wáfaagun lun wadügüni le hínsiñebei lun, biní lumuti áfaaguni le wadügübei lun wibihin éigini o gayaraati líderaguniwa adarirei wadagimanu le ídehabei lun wagañeihani le wemegeirubei (Matéu 6:32, 33).
Dan le wasaminarun luagun Weyu, huya, hawagun dunuru luma luagun burí fuluri, ma gadünati Bungiu lun línsiñedun woun? Lidan leweñegua arütíkulu warihibei ida liña lan layanuhan Bungiu hama gürigia.