Ida liña warufudun ínsiñeni houn amu?
Lúmagiñe Adán le furumiñeti wügüri wayabin súngubei wagía. Mini lan lira iduheñu wamá súngubei. Lau sun agurabúa lan lun hínsiñegua hamá iduheñu hámagua inebegua hagíame houngua, le linarün aban katei, hénrenguti larihíniwa luwuyeri ínsiñeni le ubouagu. Ani mama yebe ligía labusenrubei Wabungiute woun.
KA TARIÑAGUBEI LERERUN BUNGIU WOUN LUAGU ÍNSIÑEHABUNI?
“Hínsiñehabu humá houn gürigia híledigu” (FÁDIRIGU 19:18).
“Hínsiñe hamá háganiñu hun” (MATÉU 5:44).
IDA LIÑA WARUFUDUNI HÍNSIÑE HAMÁ AMU WOUN?
Lidan 1 Korintuna 13:4-7, ariñaga lumuti Bungiu woun ida liña lan gürigia le hínsiñehabubei.
“Le hínsiñehabubei gaguraasunti [ani] areidati”.
Samina humá luagun le: Ida liña hasandiragun hungua dan le gaguraasun lan amu hubá, gamadoun lan huma ani magañidun lan dan le habulieidagun?
“Le hínsiñehabubei [...] magimuganti”.
Samina humá luagun le: Ida liña hasandiragun hungua dan le mafiñerun lan aban gürigia huagu o gimuga lan hun?
“Le hínsiñehabubei [...] mámarügüñein luougua laritagua”.
Samina humá luagun le: Ida liña hasandiragun hungua dan le inebe lan le hasaminarubei lun amu gürigia ani méredunti gürigia ligía lun ladügǘniwa katei kei labusenruni?
“Le hínsiñehabubei [...] máguyugüdünti wuribani luagu wuribani”.
Samina humá luagun le: Aranseñu liña Bungiu lun feruduna lániña afigouhatiña ha asakürihabaña. “Madeinhanti woun sagü dan, madurati giñe ligañi lun súnwandan” (Sálumu 103:9). Gúndaatiwa dan le feruduna hamaniwa amu dan le wachararun houn. Ligíati lunti lubéi aranseñu wamá lun feruduna wamaniña ha achararubaña woun (Sálumu 86:5).
“Le hínsiñehabubei [...] magundaarunti lau marichaü”.
Samina humá luagun le: Mínsiñeti woun lun hagundaarun amu dan le lasuseredun aban katei wuribati woun. Ligía magundaaragun wabéi dan le lasuseredun katei wuribati houn amu, íbini óusera hamaadiwa lan wuriba.
Anhein busén wabéi lun labiniruniwa Bungiu, mosu hínsiñe hamá ha híbiri gürigia woun meberesenga harumudiri, hanechanin o hani relihión. Arufudatiwa ínsiñehabuni houn amu dan le wíderaguniña ha mégeibalin.