Lúmagiñe ñein hamá gürigia ubouagu, yúsuhali Bungiu profetagu hama ánheligu lun layanuhan hama gürigia. Adügati giñe lun labürüdǘniwa luganute luma burí füramasei le adüga láalibei, kéiburi ladügüba lan lun gunda lan wabagari ámuñegü. Halíati ladarirúa füramasei burí le?

Dariwati luganute Bungiu tidan Lererun (2 Timotéu 3:16). Ida liña layusuruniña Bungiu profetagu lun habürüdüni luganute? Adügati lun habürüdüni wügüriña lisaminan tidan Lererun (2 Féduru 1:21). Ítara kei dan le lariñagun aban ábuti lun lani abürühati lun labürüdün aban gárada lun, dan le wasaminarun luagun tabureme gárada, masaminaruntiwa luagun abürühati le layusurubei, luagun le abürügüdübarun wasaminara. Ítarameme, lau sun yusu lan Bungiu wügüriña lun habürüdüni luganute, Ligía abürügüdübalin ariñahani le tídanbei Lererun.

Wéiriti lisudinin luganute Bungiu darí lun busén lan lun haliihani luma lun gunfuranda hamani sun gürigia. Uguñe weyu, gayaraati haganbuni gürigia ha lídangiñetiña sun néchani, sun rasa luma sun “luwuyerigu dimurei” luganute Bungiu (Arufudúni 14:6). Lau labinihan Bungiu, sügügüdawaaru Lererun dayarügü o lidan burí fánreinti lidoun lóugiñe ǘrüwa milu iñeñein, sügügüdawaaru sügǘ tau furumiñeguarügü amu líburu.