Füramaseti Bungiu lun profeta Abüraámü habinirúba lan “sun néchani ha ubouagubaña” lídangiñe aban hádangiñe ladügawagun (Agumesehani 22:18). Ka adügawaguni uágubei layanuhóua?

Sügühali yarafa lun bián milu irumu guentó lúmagiñe líchugun Bungiu ubafu lun Hesusu lun ladügün burí milaguru. Arufudati milaguru burí ligía Hesusuba lan, le ladügawagun Abüraámü, ayusurúa lun lagunfulirun füramasei burí le ladügübei Bungiu lun Abüraámü libügürü labiniruniña sun néchanigu (Galasiana 3:14).

Íderagua lumutiña milaguru burí le ladügübei Hesusu gürigia arihei luagu ligía lan profeta le lanúadirubei Bungiu lun labiniruniwa. Arufuda lumuti giñe milaguru burí ligía ida luba lan layusuruni Heowá Hesusu ámuñegü lun labiniruniwa lun súnwandan. Ariha waméi ida liña lan larufudun milaguru burí ligía fiu lídangiñe lubuidun ligaburi Hesusu.

Hínsiñehabuti: areidaguagüdati sánditiña.

Aban weyu, aban lamuriahan aban gawaguti lépüra luma Hesusu lun lareidaguagüdüni anhein busén lubéi. Aba laguurun Hesusu luagu ani aba lariñagun lun: “Busentina”. Ábati lareidagun gürigia ligía lídangiñe lisandi (Márükosu 1:40-42).

Gíchigaditi: hóugüdati lamatiña.

Mabusenrunti meha Hesusu lun hawandun gürigia ilamaü. Adügati milaguru lóugiñe aban wéiyaasu lun léigagüdün saragu milu gürigia táurügü fiu fein hama bianraü úduraü (Matéu 14:17-21; 15:32-38). Hóutiña súngubei darí hakimuledun ani ígiraguati saragu éigini.

Gudemehabuti: saragüdati hilaaña.

Dan le larihinbei Hesusu aban hilaali le ligíarügüñein tiráü lúguchu to hilaaruboun úmari ani úaali kaba lan óunigiroun, “aba tagudemedagun lun”, ábati láguyuguagüdüni Hesusu nibureinti ligía (Lúkasi 7:12-15).