Sánsiwaali san ariñahani le tídanbei Lererun Bungiu?
Añahein gürigia álügüdaguatiña houngua anhein madügǘnwagili lubéi funa asansiruni tidan Lererun Bungiu. Ariñagati profeta Isaíasi laduraruba lan Lererun Bungiu “lun súnwandan” (Isaíasi 40:8). Ida luba wachoururuni kípuwa lan füramasei burí le ladügübei Bungiu tidan Lererun kei aubei lariñagei?
Gabafuti Bungiu lun lakipurunu Lererun luma lun lóunigirunu luéi tamigisirúniwa lau iyeeni. Dan meha le hakopiahanu wügüriña líburu burí sagüráutu to lidan binadu dan, abahüda hamuti meha kada létüra le habürüdübei lun hachoururuni míchugun hamá lanwoun, masansirun hamani, magida lídangiñe. Keiti chará habéi gürigia, añahein hádangiñe akopiahatiña ha adügütiña lirahüñü burí charati lidan le habürüdübei madügünga lau lira lun lasansirun luganute Bungiu.
KA UAGU GAYARA LUBÉI WACHOURURUNI LUGANUTE LAN BUNGIU TÍDANBEI LERERUN?
Anuhein saragu milu kopia tánina Lererun Bungiu to meha abürüdǘboun lidan binadu dan. Anhein adarirúa aban liraüraü múarani tidan aban kopia, aba konparárua tan tuma burí amu lun larihíniwa anhein aban lubéi charati (anhein busén hubéi lanwoun ariñahani, belú humá lidoun jw.org, ábameti haliihani arütíkulu “¿Se ha cambiado o manipulado la Biblia?”).
Samina wamá tuagun burí binadu dugumedu to subudiwaboun kei Hóuburatu to adarirúboun yarafa lun barana Hilaali, lidan irumu 1947 tadarirúa. Aban fánreinti tídangiñeti Lererun Bungiu dugumedu burí tuguya ani sügühali lóugiñe bián milu irumu lúmagiñe tabürüdǘn. Konparárü hamutu sásaamu dugumedu burí to tuma Lererun Bungiu to wayusuruboun uguñe weyu. Kati harihibei?
Aba híchugun sásaamu ha fe luganutemémegili lan Bungiu waliihabei tidan Lererun uguñe weyu. * Dan le wakutihanu binadu burí dugumedu to, aba wachoururuni luagu ítara liña lan. Furanguti góunigi lanu Bungiu Lererun dagá lumoun wadaani.
Ligía gayara lubéi wachoururuni gayara lan wafiñerun luagu le waliihabei tidan Lererun Bungiu. Lau lira lidan wasaminan, ariha waméi ka lan harufudahabei profetagu woun luagu Bungiu.
^ par. 7 Geza Vermes: The Complete Dead Sea Scrolls in English, páh. 16.