1. Dan le labugun aban gürigia lídangiñe damuriguaü, ida liña hasandiragun liduheñu houngua?

DAN le labugun aban gürigia lídangiñe damuriguaü, gayaraati ladügün katei le lun hasandirun liduheñu buleiseiwaru lan hanigi. Ariñagatu aban íbiri gíritu Hilda: * “Hilá meha nani weiriei, barühadina meha 41 irumu luma maríeiñu, saminatina yebe lounwen lan, ligía lan katei gáritimabei nun. Gama lumoun, gáritimati nun dan le lígirunbalin nisaani damuriguaü ani ígiraloun lani weiriou habu lisaanigu”.

2, 3. Según Sálumu 78:40, 41, ida liña lasandiragun Heowá lungua dan le hígiruni lumutuniña?

² Samina wamá ida liña lan meha lasandiragun Heowá lungua dan le hagarabaagunbei saragu ánheligu luagu ha meha hádangiñebaña lufamilian (Hud. 6). Saminatiwa san luagu ida liña lan lasandiragun lungua dan le larihiniña ísüraelina, lumutuniña ha hínsiñebaña lun, agarabaagua luagu saragu wéiyaasu? (Aliiha huméi Sálumu 78:40, 41). Anhein hígira aban hádangiñe gürigia ha hínsiñebaña hun Heowá, chouru huméi gari lan giñe lun Wáguchi le siélubei le hínsiñehabubei. Gunfuranda lumuti le hasufurirubei ani gudemehabubei hun lau líchugun gurasu luma ídemuei le hemegeirubei.

³ Lidan aturiahani le, warihiba ka lan lunbei wadügüni lun weresibirun ídemuei lúmagiñe Heowá dan le labugun aban hádangiñe waduheñu. Ani wayanuhaba giñe ida luba lan wíderaguniña íbirigu ha lídanbaña damuriguaü ha ásügürübaña lídanbaña sügǘ le. Ani lubaragiñe lira wayanuhaba luagu aban igaburi mabuidunti le lunbei madügün wamani.

4. Ida liña hasandiragun saragu agübürigu houngua dan le lígiruni aban hasaani Heowá?

⁴ Dan le lígiruni aban isaani Heowá, álügüdaguatiña saragu agübürigu houngua ka lan amu katei gayaraabei hamuga hadügün lun híderaguni hasaani lun lasigirun lidan inarüni. Lárigiñe labugun lisaani aban íbiri gíriti Luke aba lariñagun: “Saminatina yebe au lan gadurunbei. Darí lun ládüragun nídabagu. Anihein burí dan aba nayahun ani gáriti meha nasandirunu nanigi”. Anuhein meha aban íbiri gíritu Elizabeth, tásügürüña meha lídangiñe ligiaméme, meredeti meha tasaminarun: “Ka san ida nacharara keisi úguchuru? Sandiguatina nungua madügün nani sun niyaraati lun narufudahani inarüni lun nisaani”.

5. Anhein lígira aban gürigia Heowá, ka gadurunbei?

⁵ Lunti waritaguni ru lani Heowá iyaraani woun súngubei lun wanúadahan. Ligíati kada aban lunti lanúadiruni anhein gaganbadibei lubéi lun o maganbadibei lan. Añahein hádangiñe nibureintiña mama lidan inarüni hagüriarúa, ani aba hanúadirun heseriwidun lun Heowá ani añahamémegua úaraguñu lun. Añahein amu adüga hamuti hagübürigu sun hayaraati lun hagüriaruniña según adundehani le tídanbei Bíbülia, gama lumoun dan le haweinamudun aba hígiruni Heowá. Le linarün katei, kada aban lunbei lanúadirun anhein leseriwiduba lubéi lun Heowá o meseriwidunbei lan (Hos. 24:15). Ligíati, agübürigu, anhein lígira hisaani Heowá, ragügua humá hungua, míchiga huméi duru huouguoun.

6. Ida liña hasandiragun nibureintiña houngua dan le hadisedun aban hádangiñe hagübürigu luéi Heowá?

⁶ Anihein dan, úguchili o úguchuru ígirubalin inarüni o anihein burí dan aba houdin hawéi haduheñu (Sal. 27:10). Gayaraati lanügün lira saragu igarigu houn isaanigu ladüga ariha hamutiña isaanigu hagübürigu keisi aban hénpulu. Abahüdahatu Esther ida liña lan tasandiragun tungua dan le labugunbei túguchi lídangiñe damuriguaü, ariñagatu: “Gabügürüguati nayahun ladüga níchugun fe mama lan murusun murusun ladiseda luéi inarüni, anuadirarügüti lígiruni, ani lau lichú lau ladügei. Hínsiñeti núguchi nun saragu. Ligíati, dan le labugunbei lídangiñe damuriguaü, nidiheritina meha luagu saragu. Darí lun burí terederun nanigi áhüchüha”.

7. Ka lasandirubei Heowá hawagun nibureintiña ha gagübürigubaña bugawaaña?

⁷ Nibureinti, anhein bugawaali lubéi aban hádangiñe hagübürigu lídangiñe damuriguaü sandí wamuti higarihabu. Ani chouru huméi subudi lan lun Heowá buidu ida liña lan hasandiragun hungua. Hínsiñetün lun ani gúndaati lau sigimémegidün lan eseriwida lun lau úaraguni. Wagía —híbirigu dandu wügüriña kei würiña— gúndaatiwa giñe hau. Haritagua huméi mama lan huguya gadurunbei luagu le hanúadirubei hagübürigu. Kei buga wariñaguni, ru hali Heowá iyaraani houn gürigia lun hanúadirun anhein heseriwiduba lubéi lun. Ani kada aban hádangiñe lubúeingu Bungiu ha deregeguaañabaña houngua lun “lunti lanügüni lanügün guánarügü” (Gal. 6:5).

8. Ka gayaraabei hadügüni iduheñu ha úaraguabaña sun añahán lan agurabahei hagiribudun haduheñu lun Heowá? (Ariha huméi giñe rekuáduru “ Busenti Heowá lun bagiribudun”).

⁸ Dan le hígiruni gürigia ha hínsiñebaña hun inarüni, maribanti hasandirun emenigini lachülürüba lan weyu lun hagiribudun lun Heowá. Ka gayaraabei hadügün sun hagurabahaña lan?  Ítarameme humá óunigirei humadagua luma Bungiu. Lau hadügüni lira, híchuguña aban lubuidun hénpulu houn hiduheñu, másiñati dandu lan lun le abugúbei. Amu luéi lira, líchugubei erei le hemegeirubei lun hawanduni igarigu luma íruni. Ariha humá fiu katei le gayaraabei hadügüni lun derebugu lan humadagua luma Bungiu.

9. Kaba íderaguaün akipura aban afiñeni derebuguti? (Ariha huméi giñe rekuáduru “ Bérusu le lunbei líchugun gurasu hun anhein ígira laali lubéi aban hiduhe Heowá”).

⁹ Adüga huméi sun hiyaraati lun héredagüdüni humadagua luma Heowá. Súdiniti lun hederebudagüdüni humadagua luma Heowá luma hamadagua hiduheñu. Ida luba hadügüni? Aban katei le lunbei líderagunün lun derebugu lan humadagua luma Heowá, haliihanu Lererun, hasaminarun hulili luagu le haliihabei, luma habasiihan adamuridagua. Ariha waméi le tásügürübei Joanna. Aba lígiruni túguchi luma tamulen inarüni. Ariñagatu Joanna: “Dan le naliiha hawagu fiu gürigia ha tídanbaña Bíbülia kei burí Awigaili, Esütérü, Hobu, Hosé luma Hesusu, aba nasandirun aban lanarime awalidaguni. Buíngüda lumutu nanigi le naliihabei hawagu ani buíngüda lumuti giñe nisaminan lau katei le buíduburiti le adügübei lun labulubudun nigarigu. Ruti giñe uremu le lídanbei JW Broadcasting saragu dǘgüdaguaü nun”.

10. Según Sálumu 32:6-8, ka gayaraabei hadügün ánhaadün asandiragua hungua lau idiheri?

¹⁰ Dará humoun hanigi lun Heowá. Dan le hasandiragun hungua nidiheri humá meredera lan hafurieidun. Ayumuragua humá lun Wabungiute le hínsiñehabubei lun líderagunün arihei hásügürün kei larihini, luma lun líchugun lichú au hun luma giñe lun larufuduni üma le lunbei hafalaruni (aliiha huméi Sálumu 32:6-8). Másiñati hénrengubei lan hun habahüdaguni ida liña lan hasandiragun hungua. Lau sun lira gunfuranda  lumutün Heowá buidu buidu. Hínsiñetün lun saragu ani agunbiraha lumutün lun hadaarunu hanigi lun (Afu. 34:6; Sal. 62:7, 8).

11. Según Ebüréu 12:11, ka uagu mosu lubéi wafiñerun luagu ererehóuni le ñǘbuinbei lúmagiñe Heowá lau ínsiñehabuni? (Ariha waméi rekuáduru “ Aban ínsiñehabuni lúmagiñeti Heowá habugún ha afigouhabaña”).

¹¹ Ídeha humá hama wéiyaaña lidan afiñeni lidan le anúadira hamaalibei. Aban gumadi lánina ínsiñehabuni le ñǘbuinbei lúmagiñe Heowá abugúni lun habuidun súngubei, íbini ha habugubaña (aliiha huméi Ebüréu 12:11). Másiñati hariñagun fiu bulíeiguaaña lan wéiyaaña lau habuguni le afigouhabei, gama lumoun, haritagua waméi mariñagun habéi lan wéiyaaña sun lácharagun lébuna labugun afigouhati. Le linarün katei úati sun ariñahani wama. Ligíati, le buídubei lun wafiñerun hawagu wéiyaaña lidan afiñeni ha aguseragüdünbaliña ha achararubaña luagu adüga hamani sun hayaraati lun hafalaruni adundehani le tídanbei Bíbülia lun haguseragüdün lun Heowá (2 Kro. 19:6).

12. Ida liña lidin houn hádangiñe wíbirigu lau hídehan luma Heowá dan le lererehan?

¹² Ánhaadün ídeha lidan le hanúadirubei wéiyaaña lidan afiñeni luáguti labugun somu hiduhe lídangiñe damuriguaü, gayaraati híderaguñein lan lun lagiribudun lun Heowá. Ariñagatu Elizabeth, to buga uáguboun wayanuhan lidan párafu 4: “Lau sun wéiriaali lan nisaani gáriti woun mayanuhanbadiwa lan luma. Dan le lagiribudunbei lun Heowá ariñagati gadüna lan labugun. Dan lárigiñe ariñagati furendei lan saragu lídangiñe abugúni ligía. Adügati le lun gebegi lan lererehan Heowá nun”. Ariñagati Mark le tani weiriei: “Irumu burí lárigiñe ariñagati wasaani nun, lagiribudunbei lan ladüga wadügüni le lunbei wadügüni. Seremei numuti Heowá lau líderaguniwa lun gaganbadi wamá lun”.

13. Ka gayaraabei líderagunün lun hawanduni igarigu?

¹³ Ayanuha humá hama umadagu ha gunfurandatiña. Sügǘ humá dan hama kristiánugu ha derebuguti hafiñen ha gayaraabei híderagunün akipura aban igaburi buiti (Ari. 12:25; 17:17). Ariñagatu Joanna, to uáguboun wayanuha lidan párafu 9: “Le linarün katei sandiguatina meha nungua nábuguarügüñadina lan. Gama lumoun, íderagua lumutina saragu nayanuhan hama umadagu ha gayaraati lafiñerúniwa hawagu”. Guentoti, ka gayaraabei hadügüni anhein ariñaga aban íbiri somu dimurei le adügübei lun hasandiragun hungua wuriba?

14. Ka uagu mosu lunbei gaguraasun wama wabaruagua ani ferudunagua wagíame wámagua?

¹⁴ Gaguraasun wamá habá íbirigu. Gabaroun waméi, mámaba lan súnwandan hariñagun dimurei le buiti léiguadun woun (Sant. 3:2). Sun wagía charatiwa, ligíati maweiriduntu wanigi anhein ibidiñe lubéi houn hádangiñe kaba lan hariñaga o hariñagun somu dimurei le abuleiseihati ibidiñega houn. Aritagua huméi dimurei le lariñagubei apostolu Pábulu: “Gaguraasun humá hubaruagua, ferudunagua huguyame húmawagua” (Kol. 3:13). Ariñagatu aban íbiri to gaduheboun aban bugawaali: “Íderagua laadina Heowá lun feruduna nániña íbirigu ha áfaagubaña lun hadügüni le buídubei, ladüga gafigoun hamá ligía hénrengu lubéi houn”. Ariha waméi guentó le gayaraabei hadügüni lílana damuriguaü lun híderaguniña iduheñu ha úaraguabaña.

15. Ida luba wíderaguniña haduheñu ha málügilibei habugún?

¹⁵ Óusera wamaña lau areini luma lau ínsiñehabuni iduheñu ha úaraguabaña. Ariñagatu aban íbiri gíritu Miriam, belú lan murusun anufudei tun tidin adamuridagua lárigiñe labugun tamulen. Ariñagatu: “Hanufudetina meha luéi le lunbei meha hariñaguni amu. Gama lumoun, añahein meha umadagu buítiña ha meha hírubaña úara numa ani mariñaguntiña meha dimurei mabuidunti luagu namulen. Seremei houn, masandiraguntina meha nungua nábugua”. Ariñagatu ábanya íbiri: “Dan le labugunbei wasaani ñünbuintiña íbirigu hínsiñehabutiña íchiga gurasu woun. Añahein hádangiñe subudi hamuti ibidiñe lan houn kaba lan hariñaga. Ayahuatiña úara numa ani abürühatiña giñe fiu burí dimurei nun. Le hadügübei nun íderagua lumutina saragu”.

16. Ida luba hasigirun lílana damuriguaü íderaguaña iduheñu úaraguatiña?

¹⁶ Ítarameme wamá íderaguaña iduheñu ha úaraguabaña. Megei hamuti wíchugun gurasu houn luma warufuduni wínsiñehabu houn sügǘ luéi amu dan (Ebü. 10:24, 25). Anihein burí dan, ariha hamuti haduheñu ha abugunbaña mayanuhaaña lan fiu íbirigu houn, kamá hamuga hagía abugunbaña. Maweiyasun wamá adügei le! Nibureintiña ha gagübürigubaña bugawaaña megeitimaatiña lun wínchahaniña lun hasigirun habaruaguóun luma lun wariñagun houn buidu lan hadüga lau añahagua lan lurugabu Heowá. Abahüdahatu aban íbiri gíritu María luagu le asuseredubei tun dan le labugunbei tani weiriei ani ígiraloun hau sun hasaanigu: “Añahein hádangiñe numadagu ñǘbuintiña ebeluha numoun, ábouguatiña ani íderagua hamutina aturiaha hama nisaanigu. Sandí hamuti nigarigu ani ayahuaha hagía numa. Ayanuhatiña nuéigiñe dan le haburuchaguagüdübei fiu gürigia iyeeni nuagu. Rútiña saragu dǘgüdaguaü nun” (Rom. 12:13, 15).

17. Ka gayaraabei hadügüni wéiyaaña lun híchugun gurasu houn ha asufurirubaña?

¹⁷ Wéiyaaña lidan afiñeni, meferidira humá ni murusun chansi lun hederebudagüdüni hafiñen iduheñu ha úaraguabaña. Huguyatima gadasinbalin híchugun gurasu houn íbirigu ha gaduheñubaña bugawaaña (1 Tesa. 5:14). Barǘ huméi  ubaraü lun híchugun dǘgüdaguaü houn lubaragiñe o lárigiñe adamuridaguni. Bisida humaaña ani furíei humá úara hama. Gayaraati giñe hapurichihan úara hama o hagunbirahaniña lidoun áhuduraguni hadan iduheñu. Lunti harufudun wéiyaaña lidan afiñeni gudemehabu, ínsiñeni luma lun hetenirun lun le hemegeirubei lubúeingu Heowá (1 Tesa. 2:7, 8).

18. Según le lariñagubei 2 Féduru 3:9, ka labusenrunbei Heowá lun hadügüni ha ígira hamaalibei heseriwidun lun?

¹⁸ Mabusenrunti Heowá “lun leferidirun ni aban hádangiñe; labusenrun lun hasakürihan sun gürigia” (aliiha huméi 2 Féduru 3:9). Íbini ladügün aban gürigia aban figóu wéiriti, aritagua huméi gebegimemegili lan libagari gürigia ligía lun Bungiu. Aritagua huméi fayei lan Heowá aban ebegi íñutimati luagu kada wádangiñe: libagari liráü le hínsiñetimabei lun. Lau ínsiñeni, láfaagua Bungiu líderaguniña ha ígira hamaalibei lun gayara lan hagiribudun lun. Agurabati lun hanúadirun hagiribudun lun, kei wafurendeiruni lídangiñe abahüdaguni luáguti isaani le acharagadubei (Luk. 15: 11-32). Saragu hádangiñe ha adisedubaña luéi inarüni, dan lárigiñe aba hagiribudun lun Háguchi le hínsiñehabuti le siélubei, ani resibi hamutiña lílana damuriguaü lau háhabu daragu. Elizabeth, to buga uáguboun wayanuhan sandítu aban ugundani dan le lagiribudunbei tisaani lun Heowá. Ariñagatu: “Seremei numutiña sun ha ínchahabaliwa lun meferidirun wamani wemenigin”.

19. Ka uagu gayara lubéi wasigirun afiñera luagu Heowá?

¹⁹ Súnwandan gayara lan wafiñerun luagu Heowá. Maweiyasunbei ariñaga woun lun wadügün somu katei le gayaraabei ladügün dañu woun. Aban úguchili gíchigaditi ani gudemehabuti le asandirubei óunwenbu ínsiñeni hawagun sun ha hínsiñehabubaña lun ani hudugua hagía lun. Chouru waméi magu lubadiwa lan Heowá lidan dan hénrenguti (Ebü. 13:5, 6). Ariñagati Mark, le buga uágubei wayanuhan lidan párafu 12: “Magu lumutiwa Heowá. Súnwandan anihein lan warugabu dan le wásügürün lídangiñe lénrengunga”. Lasigiruba Bungiu íchiga “óunwenbu ubafu” woun (2 Ko. 4:7). Ligíati gayaraati wakipuruni wafiñen luma wemenigin íbini anhein ligira aban hádangiñe waduheñu Heowá.