1. Ka wasaminarubei wadügün danme le aweiyadeina wamá?

EIBU aweiyadeina wamá, gayaraati lanufudedagüdüniwa wasaminarun luagu siñá hali lanme wahuudun lun Heowá kei meha wadügüni luagu aban dan. Inarüni másiñati lóuguaali lan were, gama lumoun, gayaraati wayusuruni lichú wau luma le winwan wamaalibei lun gayara lan wíderaguniña nibureintiña lúntima hu hamá tidan lóundarun Heowá luma lun hibihin aban iseri dasi. Kei lariñaguni aban íbiri le barühalibei saragu irumu eseriwida kei wéiyaali lidan afiñeni: “Dan le nagumeserúnbei asandiragua nungua siñá lan nadügün saragu ladüga nirumudiri, aba níchugun seremei lun Heowá luagu añahein lan íbirigu nibureintiña héretiña ani aransetiña lun hadügüni dasi”.

2. Kaba wariha lidan aturiahani le?

² Lidan aturiahani le lubaabei le, arihatiwa sagá hamá nibureintiña buiti lídangiñe gamadagua hamá hama íbirigu derebuguhaña. Lidan aturiahani le, warihiba ka lan igaburi kei burí ǘnabuguni, lasubudiruni gürigia halía lébeda liyaraati, geteingiradi luma gíchigadi, lun gayaraabei líderaguniña íbirigu derebuguhaña lun hawadigimaridun úara hama nibureintiña, lahuuduba igaburi le houn sun lílana damuriguaü.

3. a) Según Filipuna 2:3, 4, ka mini lubéi ǘnabuguni? b) Ida liña líderaguni ǘnabuguni aban kristiánu?

³ Lunti ǘnabugu hamá íbirigu derebuguhaña anhein busén habéi híderaguniña nibureintiña. Gürigia ha ǘnabugubaña saminatiña íñutima hamá amu gürigia hawéi (aliiha huméi Filipuna 2:3, 4). Íbirigu ha derebuguhaña ha arufudubalin igaburi le furanguti houn, súnwandan lan anihein lan saragu igaburi le tídangiñeti Bíbülia ani le buiti lun ladügüniwa katei. Ítarati magurabuntiña íbirigu derebuguhaña hadügüni gürigia sun katei kei meha hadügüni luagu aban dan (Apur. 7:10). Lau sun anihein lan saragu sügǘ lun habahüdahani, subudi hamuti “lagumuchaguba”  lan ubóu le ani másiñati mosu lan héchudun luagu iseri gádantiña (1 Ko. 7:31).

4. Ida liña harufudun óunigirutiña sirkuitu aban lubuidun igaburi libe le harufudubei lewitagu?

⁴ Gunfuranda hamuti íbirigu derebuguhaña ladüga lan harumudiri siñaali lan hadügün saragu kei meha luagu aban dan. Samina wamá luagu hakesin óunigirutiña sirkuitu. Dan le hagunfulirun 70 irumu aba líchugun aban iseri dasi houn. Másiñati hénrengu lan le houn, lugundun hínsiñeti houn heseriwidun houn hábirigu lidan dasi le. Barǘ hamuti dasi le tidan hanigi ani anihamémegua tidan. Gama lumoun, gunfuranda hamuti buídutimabei lan lun íbirigu lan hátima nibureintiña ariha lau dasi le. Aba hagaburi íbirigu derebuguhaña ha kei hagaburi lewitagu ha meha lídanbaña binadu Ísüraeli, dan meha le hagunfulirun 50 irumu mosu meha hígiruni heseriwidun tidan sanduariu. Mama ladüga hadasin gunda habéi. Adüga hamuti sun hayaraati lun híderaguniña hátima nibureingiñabaña (1 Lur. 8:25, 26). Uguñe weyu, íbini óunigirutiña lan meha sirkuitu íbirigu ha, metenirun haña lun saragu damuriguaü, rútiña saragu ídemuei luma dǘgüdaguaü houn íbirigu ha lídanbaña damuriguaü le ñein habéi guentó.

5. Ka larufudahabei lani íbiri Dan tuma Katie hénpulu hun?

⁵ Ariha waméi lani íbiri Dan hénpulu le eseriwidubei lidan sirkuitu luagu 23 irumu. Dan le lagunfulirunbei íbiri le 70 irumu, aba líridun ligía tuma Katie to lani weiriou kei prekursoru espechalitiña. Ida liña lidin houn lidan iseri  hadasin? Ariñagati íbiri Dan gíbetimahali lan lidasin lidan damuriguaü, íderaguaña íbirigu lun heseriwidun kei ídehatiña lidan damuriguaü luma arufudaha houn amu lun hapurichihan lidan fulasu le ñéingiñe lubéi hásühan bandi gürigia luma lun hapurichihan furisunrugu. Íbirigu derebuguhaña, meberesenga anhein lídanñadün lunbei eseriwiduni lidan dan dayarüti o mama lan lídanñadün, gayaraati hadügün saragu lun híderaguniña amu. Ida? Lau héchudun luagu iseri gádantün lau hasaminarun luagu le habusenrunbei hadügün.

6. Ka san uéigiñe buidu lubéi lun lasubudiruni aban gürigia halía lan lébeda le liyaraabei adüga? Ru humá aban hénpulu.

⁶ Gürigia ha ǘnabugubaña subudi hamuti halía lan lébeda le hayaraabei adüga (Ari. 11:2). Madügüntiña lóugiñe hayaraati, adügati lira lun gunda hamá ani benefatiña. Gayaraati wagounbaguagüdüni gürigia le subudibei lun halía lan lébeda liyara luma aban gürigia le abugahabei aban karü lidan wübü ani lun lasigirun amudeira mosu lasansiruni toufun karü lun aban le hamarutimaati. Ítarameme liña aban gürigia le subudibei lun halía lan lébeda le liyaraabei adüga subudi lumuti kaba lan dan “lidin lau lihamarun” lun lasigirun eseriwida lun Heowá luma lun líderaguniña ha híbiri (Fili. 4:5).

7. Ida liña larufudun Bárüsilai subudi lan lun halía lan lébeda le liyaraabei adüga?

⁷ Ariha waméi le ladügübei Bárüsilai, aban meha wügüri le meha 80 irumu lau dan le lagunbirahanbalin urúei Dawidi lun aban lan hádangiñe eseriwidutiña tidan lani urúei palasiu. Ǘnabuguti wügüri le ligía aba lamahadun lun agunbirahani le ladügübei urúei lun. Subudi lumuti siñaali lan ladügün saragu ladüga lirumudiri, ligía lariñagubei lun lan lidin Kimamü, aban nibureinti leweñegua (2 Sam. 19:35-37). Ítara kei Bárüsilai gúndaatiña íbirigu derebuguhaña lau híchuguni chansi houn ha nibureintimagiña lun hetenirun lun ítaga dasi.

8. Ida liña larufudun urúei Dawidi ǘnabuguni dan le lálugubei lábunagunu ténpulu?

⁸ Ruti giñe urúei Dawidi aban lubuidun hénpulu luáguti ǘnabuguni. Busenti meha tídangiñe sun lanigi lun lábunagun aban muna lun Heowá. Gama lumoun, dan le lariñagubei Heowá lun Salomónba lan ábunaguoun, ánhati Dawidi, ani ídehati saragu lubá bunaguaü ligía (1 Kro. 17:4; 22:5). Masaminarungubeiti Dawidi lun lan yu lan lábunagunu ténpulu ladüga nibureingili lan Salomón ani lougua lan lisubudin (1 Kro. 29:1). Subudi lumuti meha Dawidi lúmagiñeba lan Heowá liabin abiniruni lun tábunawagun ténpulu mama lídangiñe irumudiri ni lídangiñe le winwan hamaalibei ha lúnbaña hadügüni wadagimanu. Uguñe weyu ítara kei Dawidi kípuguatiña kristiánugu derebuguhaña houngua bereseguñu íbini lasansirun hadasin. Subudi hamuti labinirubaña lan Heowá nibureintiña ha etenirubaña lun dasi le meha hadügübei meha íbirigu derebuguhaña.

9. Ida liña larufudun aban hádangiñe lílana Sétanu le Arihibei tau Sukursáli ǘnabugu lan?

⁹ Aban íbiri gíriti Shigeo ligía aban hénpulu lánina ǘnabuguni le lánina wadaani. Lidan irumu 1976, dan meha le 30 lubéi irumu lau, aba híriduni kei aban hádangiñe lílana Sétanu le Arihibei tau Sukursáli. Lidan irumu 2004, aba ligíaali lan ariha lau hadasin lílana sétanu le. Lau lásügürün dan aba larihini méreeli lan kei meha ani móufun hali meha lidan luadigimari. Ítarati aba layanuhan luma Heowá luagu katei le ani aba lasaminarun buídubei lan lun lárügüdüni aban nibureintimagili lubara. Uguñe weyu mámaali íbiri Shigeo ariha luagu sétanu ligía, gama lumoun, anihamémegua ídeha lidan sétanu le. Arufudahati lani Bárüsilai, urúei Dawidi  luma Shigeo hénpulu woun meteni lan aban gürigia ǘnabuguti lun lilouguan hasubudin nibureintiña, le lan unbei letenira lun erei le hawagubei. Harihubaña kei hani paaná mama kei háganiñu (Ari. 20:29).

10. Ida luba harihiniña íbirigu derebuguhaña nibureintiña ha lídanbaña damuriguaü?

¹⁰ Ariha hamutiña íbirigu derebuguhaña nibureintiña kei aban idewesei lúmagiñeti Heowá ani rútiña seremei lun luagu le hadügübei. Keiti le abulubudei liña lan here, íbirigu derebuguhaña, gebegiti houn erei le hawagubei nibureintiña ha busenbaña ani ha gayaraabei hawadigimaridun lun hadügüni le mégeiwabei lidan damuriguaü.

11. Ida liña tarufuduni líburu to gíriboun Rudu 4:13-16 sagá hamá íbirigu derebuguhaña buiti dan le geteingiradi hamá lun ídemuei le híchugubei nibureintiña houn?

¹¹ Noemí tuguya aban tubuidun hénpulu to uáguboun tayanuhan Bíbülia tuagu aban gürigia derebuguharu to getengiradiboun ani anha tuguya lun ídemuei le híchugubei hátima nibureintiña. Lárigiñebei lounwen tisaani Noemí, aba tariñagun tun Rudu to tídiñu lun tagiribudun hamóun tiduheñu. Dan le tariñagubei Rudu tun Noemí luagu mígiruntuboun lan, tídiba lan tuma darí Belén, ánhatu Noemí lun tidin Rudu tuma (Rudu 1:7, 8, 18). Aban abiniruni lira houn biángubei hagía (aliiha huméi Rudu 4:13-16). Sigí hamuti íbirigu ha derebuguhaña ani ha ǘnabugutiña tani Noemí hénpulu.

12. Ida liña larufuduni apostolu Pábulu geteingiradi lan?

¹² Apostolu Pábulu ligía ábaya hénpulu hani gürigia ha arufudubaña geteingiradi luagu ídemuei le íchugubei lun. Luagu aban dan, aba líchugun seremei houn kristiánugu ha Filipubaña luagu ídemuei le hóunahabei lun (Fili. 4:16). Ariñagati giñe seremei lani Timotéu luagu le adüga laalibei luagu (Fili. 2:19-22). Ruti giñe  seremei lun Bungiu hawagu íbirigu ha íchugubaña gurasu lun dan le lóudiña lubéi adaürǘwa uburugu Roma (Adü. 28:15). Aban meha wügüri chubaluguti Pábulu le áfayahabei saragu kilometuru lun lapurichihan luma lun lederebudagüdüni damuriguaü. Mígirunti lun ladügün pantaü lun lamahadun lun ídemuei le híchugubei líbirigu lun.

13. Ida luba gayara lan harufudun íbirigu derebuguhaña seremei hamani le hadügübei nibureintiña?

¹³ Íbirigu derebuguhaña, anihein saragu igaburi le gayaraabei lídehan lun harufuduni heteingiradi luagu le hadügübei nibureintiña ha lídanbaña damuriguaü. Ánhaña ariñaga hun lun hanügünün lidoun ítaga fulasu, hanügünün agañeiha o lun hanügünün adüga somu gararaguaü le hemegeirun, anha humá, teinki humaaña luagu ídemuei le. Ariha huméi kei aban ínsiñeni lúmagiñeti Heowá. Íbidiñewati anhein aban lubéi agumesehani le lánina aban lubuidun umadaguaü lira. Berese humá súnwandan lau ida liña lan lawanserun hamadagua nibureintiña ha luma Bungiu. Ariñaga humá houn gunda humá harihiniña saragu nibureintiña áfaagua lun gayara lan heseriwidun lidan damuriguaü. Aranseñu humá lun hásügürün dan hama ani abahüdaha huméi houn buiti le sügǘ humaalibei. Danme le hadügüni harufuduñein seremei humani Heowá hawagu nibureintiña ha lachawahabaña lidoun damuriguaü (Kol. 3:15; Huan 6:44; 1 Tesa. 5:18).

14. Ida liña larufudun urúei Dawidi gíchigadi lan?

¹⁴ Aban giñe hénpulu buiti urúei Dawidi le lánina aban igaburi le súdiniti le lunbei harufuduni íbirigu kristiánugu ha derebuguhaña: gíchigadi. Ídehati lau ledewehan saragu irisini lun gayara lan tábunawagun ténpulu (1 Kro. 22:11-16; 29:3, 4). Ídehati, íbini Sálomonba lan asubudirúa luagu ligíaba lan ábunaguoun ténpulu. Anhein derebuguhadün lubéi ani méreedün lun hídehan lidan dasi lun tábunawagun muna lun leseriwidúniwa lun Heowá, gayaraagili hídehan lau hani budagia darí le ñein lumuti lébeda gádantün. Ani abahüdaha huméi houn ha nibureintimagiña sun le winwan humaalibei lidan dan le sügühalibei.

15. Ka katei le wéiriti lebegi líchugubei Pábulu lun Timotéu?

¹⁵ Ruti giñe apostolu Pábulu aban hénpulu luáguti gíchigadi. Amisuraha lumuti apostolu Pábulu aban nibureinti gíriti Timotéu lun lidin luma lidan aban wéiyaasu apurichiha ani arufudaha ligía lun ida liña lan lapurichihóun luma larufudahóun (Adü. 16:1-3). Adügati arufudahani le larufudahabei Pábulu lun Timotéu lun aban lan máisturu buiti le lánina uganu buiti (1 Ko. 4:17). Ánheinti Timotéu, yusu lumuti arufudahani le larufudahabei apostolu Pábulu lun lun larufudahan houn amu.

16. Ka uagu larufudahan íbiri Shigeo houn amu?

¹⁶ Manufudeduntiña íbirigu derebuguhaña ha lídanbaña wadaani luéi meseriwidunhaña lan ánhaña arufudaha houn íbirigu ha nibureintimagiña lun hagía lan hariha luagu dasi le meha hadügübei lidan damuriguaü luagu aban dan. Kei hénpulu, arufudahati Shigeo le buga uágubei wayanuhan lidan párafu 9, lidan sun dan le ásügürübei, arufudahati houn íbirigu hátima nibureintimagiña ha lídanbaña Sétanu le harihibei tau Sukursáli. Adüga lumuti lira lun gayara lan lídehan lidan dasi le lánina Larúeihan Bungiu, lidan ageiraü le ñein lubéi leseriwida. Adügati lira, lun ménrengun lan lun, lederegeruni lidasin houn amu íbiri, anihein meha aban íbiri le furendeihali le gayaraabei letenirun lun dasi le meha ladügübei íbiri Shigeo. Anihagua íbiri Shigeo arufudaha houn ha nibureingiñabaña, sun le furendei laalibei lidan 45 irumu le laubei lidan Sétanu le Arihibei tau Sukursáli kei arihiti luagu hawadigimaridun lílana  Sétanu ligía. Chóuruti aban lan abiniruni íbiri Shigeo hadan lumutuniña Bungiu.

17. Ka gayaraabei híchuguni íbirigu derebuguhaña houn amu? (Lúkasi 6:38)

¹⁷ Íbirigu derebuguhaña, huguya aban hádangiñe ha gayaraabei achoururagüdüni dan le lan leseriwidúniwa lun Heowá lau afiñeni luma lau úaraguni ligía lan ibagari le buídutimabei. Arufuda lumuti hani hénpulu buidu lan, dan le láfaagun gürigia lun lasubudiruni ladundehan Bungiu ani wínwanlei. Lau le winwan humaalibei subudi humuti ida liña lan ladügün katei lidan dan le sügühalibei, ariha humuti giñe lisudinin ladügün sánsiguaü. Anhein málügili lubéi luéigiñe labadiseirun aban hídangiñe, anihein giñe saragu lun híchuguni lidan heseriwidun lun Heowá, gayaraabei habahüdahani houn amu ka lan uagu ru lubéi ugundani hun hasubudiruni Heowá íbini derebuguhadün lan. Hínsiñebei houn ha nibureintiña haganbuni le furendei humaalibei. Anhein hechu hubéi afanreinhei sun le furendei humaalibei, labinirubadün Heowá saragu (aliiha huméi Lúkasi 6:38).

18. Ida luba hídehan íbirigu derebuguhaña úara hama nibureingiña?

¹⁸ Ánhaña ayarafada íbirigu derebuguhaña houn ha nibureingiña gayaraabei híchugun dǘgüdaguaü hámagua (Rom. 1:12). Kada aban hádangiñe anihein katei gebegiti hama le úabei luma le aban. Anihein lichú au hama wéiyaaña luma subudi le ibiha hamaalibei lau lásügürün irumu. Ánhañati nibureintiña anihein erei hawagu luma ubafu. Dan le hídehan íbirigu derebuguhaña úara hama nibureintiña kei umadagu rútiña uéiriguni lun Wáguchi hínsiñehabuti le siélubei ani aban abiniruni houn sun lílana damuriguaü.