1. Ida liña gayara lan gamadagua hamá gürigia ha úaraguatiña luma Heowá?

LIDUHEÑU Heowá gürigia ha eseriwidubaña lun ani wéiriti línsiñe houn. Haganagua anihein Hesusu, “ligía ígiramaübei le lóugiñebei sun katei le adügǘbei”, hama saragu míñunu ánheligu (Kol 1:15; Sal. 103:20). Dan le ya lubéi Hesusu Ubouagu, arufudati gayara lan harihini gürigia ha úaraguabaña Heowá kei Háguchi. Luagu aban dan, dan le aniha lan Hesusu ayanuha hama lánigu disipulugu, ariñagati luagu Heowá “Núguchi, le giñe Húguchi” (Huan 20:17). Ligíati, dan le wederegeruni wabagari lun Heowá ani badisei wagía, aba hádangiñehadiwa lan liduheñu ha hínsiñehabubaña (Mar. 10:29, 30).

2. Kaba wakutiha lidan aturiahani le?

² Añahein hádangiñe lubúeingu Bungiu güreweiti houn harihini Bungiu kei aban Úguchili le hínsiñehabuti. Másiñati añahein lan hádangiñe ibidiñeti houn ida luba lan harufudun ínsiñeni houn híbirigu. Lidan aturiahani le, warihiba ida luba lan líderaguniwa Hesusu arihei Heowá kei aban Úguchili le hínsiñehabuti ani gayara ligía wayarafadun lun. Warihiba giñe ida luba lan wáyeihani Heowá lidan wóuseruniña wíbirigu.

3. Ka uagu yarafagüda lumutiwa lubéi furíei le gíribei wáguchi Bungiu lun Heowá?

³ Aban Úguchili hínsiñehabuti Heowá, ani busenti giñe Hesusu warihini kei larihini: kei aban Bungiu le hínsiñehabuti, le unbei gayara lan wayanuha lidan furumiñeguarügü oura, mama kei aban gürigia le mínsiñehabuti le gabafuti wawagu. Afuranguagüda lumuti Hesusu, dan le larufudahabei houn lánigu disipulugu lun hafurieidun, gumeseti lau burí dimurei le: “Wáguchi Bungiu” (Mat. 6:9). Gayaraati hamuga lariñagun Hesusu lun  wariñagun lun Heowá dimurei kéiburi “le Suntigabafu”, “le adügübalin sun ubóu” o “Warúeitebei lun sun dan”, sun iri burí le ladüna ani dariwati tidan Bíbülia (Agu. 49:25; Isa. 40:28; 1 Tim. 1:17). Lau sun lira aba lariñagun Hesusu lun wáwarun lun Heowá, “Wáguchi”.

4. Ida luba wasubudiruni busén lan Heowá wayarafadun lun?

⁴ Hénrenguti san woun warihini Heowá kei aban Úguchili le hínsiñehabuti? Anhein ítara liña lubéi warihini fiu wádangiñe, másiñati ladüga lan ligaburi wagüriarúniwa. Ruti gurasu woun wasubudiruni gunfuranda lumuti lan Heowá ida liña lan wasandiragun woungua ani busenti layarafadun woun. Ligíati, tadundehan báliwa Lererun: “Yarafa humá lun Bungiu, ábame giñe layarafadun hun” (Sant. 4:8). Wéiriti wínsiñe lun Heowá ani ariñagati woun ligíatima lan Úguchilibei le buídubei woun.

5. Según Lúkasi 10:22, ka uagu gayara lubéi líderaguniwa Hesusu lúntima wayarafadun lun Heowá?

⁵ Gayaraati líderaguniwa Hesusu ayarafada lun Heowá. Subudi lumuti buidu ani arufuda lumuti ligaburi Heowá buidu buidu. Ligía lariñagunbei: “Le arihitina, larihiñein giñe Bungiu Úguchili” (Huan 14:9). Kei aban íbugañaü, arufudahati Hesusu woun lun inebe lan Wáguchi woun luma lun gaganbadi wamá lun, ani adüga wagíame lun gunda lan wau. Lau sun le ladügübei Hesusu, dan le ya lubéi Ubouagu arufuda lumuti woun weiri lan lubuidun Heowá ani hínsiñehabu ligía (aliiha huméi Lúkasi 10:22). Ariha wamá fiu hénpulu lídangiñe le.

6. Ka uagu wariñaga aganba lani Heowá, Hesusu?

⁶ Aganba lumutiña Heowá lisaanigu. Ariha waméi ida liña lan laganbuni Heowá Lisaani le ígiramaü. Chóuruti, aganba lani sun lafurieidun Hesusu dan le ya lubéi Ubouagu (Luk. 5:16). Adüga lumuti dan le lamuriahanbei Hesusu ídemuei luma luagu burí katei súdiniti, kéiburi dan le lanuadirúnbaaliña 12 apostolugu (Luk. 6:12, 13). Aganba lumuti giñe Heowá Hesusu dan le labahüdaguni lun le lásügürünbei lidan lénrengunga. Murusun dan lubaragiñe laluguruni Húdasi Hesusu, aba lamuriaha Hesusu luma Lúguchi lun líderaguni lidan óuchawaguni hénrenguti le úmabei lagagibudagua. Mama aganbarügü lumuti Heowá Lisaani  le hínsiñebei lun, óunahati giñe aban ánheli lun líchugun dǘgüdaguaü lun (Luk. 22:41-44).

7. Ida liña san hasandiragun houngua lau hasubudiruni óunaba lani Heowá hafurieidun?

⁷ Uguñe weyu, aganba lumutiwa giñe Heowá dan le wafurieidun lun ani óunaba lumuti wafurieidun lidan dan le buídutimabei lun ani buiti lóunabuniwa (Sal. 116:1, 2). Ariha tumuti aban íbiri Índiana tungua. Tásügürüña meha lídangiñe aban lanarime idiheri ani aba tamuriaha luma Heowá lun líderagunu. Abahüdahatu: Ayanuhati “Programa le lánina JW Broadcasting^® le lánina seingü-hati irumu 2019 le ayanuhabei luagu ida luba lan wagagibudagun luma lanarime idiheri. Ligía meha le nemegeirunbei. Aniha meha óunabagülei lun nafurieidun”.

8. Ida liña larufudun Heowá hínsiñe lan Hesusu lun?

⁸ Arufuda lumuti Heowá línsiñehabu woun ítara kei larufuduni lun Lisaani dan le ya lubéi Ubouagu (Huan 5:20). Íderagua lumuti lau sun le lemegeirunbei lun hereméme lan lumadagua luma, ru ligía dǘgüdaguaü lun dan le lemegeiruni ani ru lumuti giñe le lemegeirunbei Hesusu lun lawinwandun. Masaminarun lumuti bián wéiyaasu lariñagun hínsiñe lan lun ani hínsiñe ligía le ladügübei lun (Mat. 3:16, 17). Masanditi meha Hesusu lábuguarügüñein lan, ladüga subudi lumuti anihein lan Lúguchi le hínsiñehabuti luma lidan sun oura (Huan 8:16).

9. Ka achorugüdübalin woun luagu hínsiñe wamá lun Heowá?

⁹ Ítara kei Hesusu, sun wagía sandi wamaali línsiñehabu Heowá lidan ámuñegueinarügü igaburi. Samina wamá luagu le: Achawaha láadiwa Heowá lougua ani rúhali íbirigu woun ha ítarabaña woun kei iduheñu buin lau ínsiñeni luma úarani ha adügübaña lun gunda wamá ani íderagua hamutiwa lun buidu lan wasandiragun woungua (Huan 6:44). Súnwandan líchugun lubuidun burí ariñahani woun le ítarabei kei éigini. Ani íderagua lumutiwa lun wibihini le wemegeirubei sagü weyu (Mat. 6:31, 32). Dan le wasaminarun luagu ínsiñeni le lasandirubei Heowá wawagun, aba laganwoundun ínsiñeni le wasandirubei luagu.

10. Ida luba wáyeihani línsiñehabu Heowá hawagu wábirigu?

¹⁰ Hínsiñetiña wíbirigu lun Heowá. Lau sun lira, másiñati mama lan súnwandan ménrengun lan woun wasandirun ínsiñeni hawagu ni lun wariñaguni houn. Anihein dan ladüga ámuñegueinarügü lan wechun o amu lan wagüriarúniwa. Sun wagía charatiwa le gayarabei ladügün lun hasandiragun amu wuriba o hagañidun wama. Íbini ítara, gayaraati wídehan lun ñein lan ínsiñeni haganagua wíbirigu ha ítarabaña woun kei iduheñu, ítara kei larufuduni Heowá (Efe. 5:1, 2; 1 Huan 4:19). Ariha waméi le larufudahabei lani hénpulu woun.

11. Ida liña larufuduni Hesusu “línsiñehabu luma lugudemehabu” Heowá?

¹¹ Arufuda lumuti Heowá “línsiñehabu luma lugudemehabu” (Luk. 1:78). Gürigia le gudemehabuti nidiheriti hawagun ha asufurirubaña ani áluahati ida luba lan líderaguniña ani ru ligía gurasu houn. Ani arufuda lumuti Hesusu lau ligaburi lóuseruniña gürigia lau berese lan Heowá hau (Huan 5:19). Ariñagatu Bíbülia, “dan larihiniña gürigia, aba hagudemedagun lun, ladüga nidiheri hamá, maguraasun hagía, kamá mudún ha móuniritiña” (Mat. 9:36). Mámarügü sandirügüti Hesusu gudemehabu. Areidaguagüdati sanditiña ani íderagua lumutiña ha nadagimeinbaña saragu ani hǘrüti hanügün (Mat. 11:28-30; 14:14).

12. Ida luba buídutima lan warufudun ínsiñehabuni luma gudemehabu?

¹² Anhein busén wabéi warufudun ínsiñeni luma gudemehabu hawagun wíbirigu, lunti wasaminarun luagu turobuli le úmabei hagagibudagua. Kei hénpulu, másiñati anuhein lan aban  íbiri to wéiriti tisandi. Ani mekeheraditu, lau sun lira másiñati mégeitün lan murusun ídemuei. Hénrenguti san tun lun tíchuguni le hemegeirubei tiduheñu houn? Seremei tubadiwa san lau wíderagunu aranseha éigini o lau woudin arumadahoun tuban? Samina wamá anihein lan aban íbiri le féridi laali luadigimari. Gayaraati wíderaguni lau murusunraü seinsu, sin lasubudiruni ka lan íchugubalin lun, lun wíderaguni darí ladarirun wadagimanu.

13, 14. Ida luba gayara lan wasigiruni lani Heowá hénpulu luáguti gíchigadi?

¹³ Gíchigaditi Heowá (Mat. 5:45). Anhein busén wabéi lun hínsiñehabu wamá ani gudemehabu wagía moun lumuti wagurabun lun hamuriaha íbirigu wama, gayaraati wíchugun houn lubaragiñe hamuriahan wama ítara kei ladügüni Heowá. Sagü weyu, adügati lun láfuridun weyu mamuriahanga waméi luma, ani huuti weyu houn sun gürigia mámarügü houn ha geteingiradibaña. Ma inarüni, arufuda lumuti lan Heowá línsiñehabu lau líchuguni le wemegeirubei woun? Ma lubuidun Heowá, ani gíchigadi ligía, hínsiñeti woun saragu!

¹⁴ Saragu hádangiñe wábirigu sigí hamuti lani Heowá hénpulu lau hanügüni ubaraü lidan gíchigadi hamá. Ariha waméi le asuseredubei lidan irumu 2013 dan le lagünrinchaguni aban lanarime hiriri Haiyan fiu fulasu Filipína. Gíbetiña wíbirigu féridi hamutu haban luma sun hámati. Lau sun lira, aba hánhingichun íbirigu lidan sun ubóu ha ítarabaña woun kei iduheñu lun híderaguniña lau lóufudagun. Seremei budagia luma wadagimanu le hadügübei saragu íbirigu, gayara lubéi meha ladügǘn aba óunwenbu dasi lun taransehóun 750 muna lídanrügü aban irumu. Ani lidan lidaani sandi le gíribei COVID-19, áfaaguatiña Gefentiña lun híchuguni le hemegeirubei hábirigu houn. Dan le, aranseñu wamá lun wíderaguniña wábirigu ha ítarabaña woun kei iduheñu, arufuda wamuti luagu hínsiñe hamá woun.

15, 16. Según le lariñagubei Lúkasi 6:36, ka lunbei wadügüni anhein busén wabéi wáyeihani Wáguchi le siélubei?

¹⁵ Gudemehabuti Heowá ani feruduna lumutiwa (aliiha huméi Lúkasi 6:36). Sagü weyu, larufudun Wáguchi Bungiu le siélubei gudemehabu woun (Sal. 103:10-14). Ítarameme, íbini chará hama lánigu Hesusu disipulugu,  arufudati gudemehabu houn ani feruduna lumutiña. Darí lun lederegeruni libagari lun gayara lan feruduna lániwa lídangiñe wafigoun (1 Huan 2:1, 2). Ma yarafagüda lumutiwa lun Heowá luma lun Hesusu wasubudiruni gudemehabu hamá woun ani feruduna hamawa?

¹⁶ Dan le feruduna wamá lau lumenrengun, ídehati lun here lan ínsiñeni waganaguabei (Efe. 4:32). Chóuruti, anihein lan dan hénrengu lan woun lun feruduna wamaniña amu, lau sun lira mosu wáfagun lun wadügüni. Abahüdahatu aban íbiri íderagua lanu aban aturiahani le tídanbei Garüdia Awisahatu le gíribei “Feruduna humá húmagua”. * Abürühatu: “Íderagua láadina naturiahani aturiahani le lun narihini súdini lan feruduna nániña amu. Afuranguagüdatu dan le aranseñu wamá lun feruduna wamaniña amu úati mini lan lira gunda wamá lau luriban igaburi le harufudubei o magari lan le hadügübei woun. Le mini lubéi, moun lumuti lan wágürün igarihabu tidan wanigi luagu le adüga hamaalibei woun, dan le mágürün wamá igarihabu aba wasandirun darangilaü”. Dan le feruduna wamaniña wíbirigu lau lumenrengun, arufuda wamuti hínsiñe hamá woun ani wáyeihañein lan Wáguchi, Heowá.

17. Ítara kei larufuduni Matéu 5:16, ida luba wíchugun uéiriguni lun Wáguchi le siélubei?

¹⁷ Wéiriti weteingiradi luagu hádangiñe wamá íbirigu ha ítarabaña kei iduheñu ha lídanbaña sun ubóu. Ani busentiwa giñe lun haganwoundun gürigia lun eseriwidubaña lun Heowá úara wama. Ligíati, mabusenrúntiwa wadügün ni kata le awiyeduti liri Wáguchi le siélubei ni le awiyeduni hiri lumutuniña. Arufuda wamá aban igaburi buiti súnwandan, achawaha wamaamugaña amu lun haganbahani uganu buiti le lúmagiñeti Heowá (aliiha huméi Matéu 5:16).

18. Kaba íderaguawa lun wapurichihan lau ganigi?

¹⁸ Anihein dan, iyereegutiwa houn amu o darí lun héibaahaniwa ladüga gaganbadi wamá lun Wáguchi le siélubei. Ka lunbei wadügüni anhein hanufude wabéi lun wayanuha houn  amu luagu wafiñen? Mabulieida waméi líderagubadiwa lan Heowá luma Lisaani. Ariñagati Hesusu houn lani disipulugu lun madiheridun hamá luagu kaba lan hariñaga o ida luba lan hariñaguni. Afuranguagüdati Hesusu: “Danme lachülürün oura lun hadimurehan líchugubei Bungiu le lunbei hariñaguni hun. Mámaba huguya adimureha, lániba Húguchi Bungiu sífiri adimureha hídangiñe” (Mat. 10:19, 20).

19. Ru huma aban hénpulu luagu aban gürigia le apurichihabei lau ganigi?

¹⁹ Ariha waméi likesin aban íbiri le gíribei Robert. Dan meha le lagumeseruña lan aturiahoun Bíbülia ani subudihali meha murusun tuáguti Bíbülia lun, mosu meha lararamun hagibugiñe Liñun-agei Lúrudu le hani milidaru Suru Áfürika. Lau ganigi, aba lafuranguagüdüni houn ka lan uagu masudarahabei lan ladüga ínsiñeni le lasandirubei hawagu líbirigu. Furanguti larihín gebegi hamá íbirigu lun ha ítarabaña keisi iduheñu. Sódini, aba hálügüdüni aban hádangiñe aguseragüdütiña: “Kátañati bíbirigu baaña?”. Magurabun lumuti yebe Robert álügüdahani le, lau sun lira lau lóufudagun aba laritaguni bérusu lánina weyu ligía. Matéu 12:50: “ladüga furumiñeguarügü le adügüti lugundan Núguchi le siélubei, ligía namulenbei, nitu, núguchu”. Lau sun málügili lan meha Robert aturiahoun Bíbülia, íderagua lumuti lani Heowá sífiri sandu lun lóunabuni álügüdahani le magurabun lumuti. Chóuruti weiri lan lugundan Heowá lau! Ani ítarameme, gúndaabei giñe wau ánhawa afiñera luagu dan le wapurichiha lau ganigi lidan sügǘ hénrenguti.

20. Ka lunbei wasigirun adüga? (Huan 17:11, 15).

²⁰ Wéiriti chansi le wámabei lau hádangiñe wamá íbirigu ha ítarabaña woun keisi iduheñu. Weseriwiduña lun aban úguchili le buídutimabei lidan sun ubóu ani añahein giñe saragu íbiri ha wéiribei wínsiñe houn. Moun lumuti warihini katei le kamá ni kata. Mabulieida waméi busenti lan Satanási hama lánigu lun lebelurun machouruni woun luagu hínsiñe wamá lun Wáguchi le siélubei, ani busenti giñe lagünrinchaguni úarani le wádanbei. Luagu le aba oubaü, furíeiti Hesusu wawagu ani amuriaha ligía luma Heowá lun lóunigiruniwa lun hasigirun íbirigu ha ítarabaña woun kei iduheñu úaraguñu (aliiha huméi Huan 17:11, 15). Ani lóunabubei Heowá furíei burí lira. Áyeiha waméi lani Hesusu hénpulu ani mabulieida waméi hínsiñe wamá lun Wáguchi le siélubei ani líderagubadiwa lan. Sigiméme wamá ayarafada hou íbirigu ha ítarabaña woun kei iduheñu.