1. Ida liña larufuduni sun le adüga láalibei Heowá gíchigadi lan?

DAN lagumeserunbei Heowá adügei sun katei, lábuguarügüñein meha. Lubaragiñe lasaminarun luouguounrügün, aba ladügüniña gürigia hama sífirigu lun gabagari hamá. Aban “Bungiu gúndaati” ligía, hínsiñeti lun lun ledewehan katei buiti (1 Tim. 1:11, TNM; Sant. 1:17). Ani kei giñe busén lubéi lun gunda wamá, ligía larufudahabei woun lun gíchigadi wamá (Rom. 1:20).

2, 3. a) Ka uagu gunda wabéi dan le gíchigadi wamá? b) Kaba wakutiha lidan arütíkulu le?

² Adüga lumutiña Bungiu gürigia lenege guánarügü (Agu. 1:27). Lidan amu dimurei, adüga lumutiwa lun warufuduni ligaburi. Ligíati, anhein busén wabéi lun gunda wamá luma lun wasandiragun woungua buidu, lunti wafalaruni lani hénpulu lau webereserun hau gürigia luma lun gíchigadi wamá (Fili. 2:3, 4; Sant. 1:5). Ka uagu? Ladüga ítara liña ladügüniwa Bungiu. Íbini gafigoun wamá, gayaraati gíchigadi wamá kei ligía.

³ Arufudahatu Bíbülia woun lun gíchigadi wamá. Lidan arütíkulu le, wakutihaba fiu ariñahani tídangiñeti Lererun Bungiu  luagu katei le. Warihibei adüga lan gíchigadi wamá lun lagundaarun Bungiu wau luma lun wagunfulirun lau dasi le líchugubei woun. Wakutihabei giñe ka lan lánibei igaburi le luma ugundani ani ka lan uagu moun lumuti lubéi labuchadun wawagu.

4, 5. Ka hénpulu líchugubei Heowá luma Hesusu woun luagu gíchigadi?

⁴ Busenti Heowá lun wáyeihani, ligía gunda lubéi dan le gíchigadi wamá (Efe. 5:1). Furanguti larihín busén lan Bungiu lun gunda wamá. Arihúati luagu ligaburi ladügüniwa luma luagu ámuñegueinarügü lan katei ladügün (Sal. 104:24; 139:13-16). Ligíati, rútiwa uéiriguni lun dan le wáfaagun lun wagundaaragüdüniña amu.

⁵ Áyeiha hamuti kristiánugu inarünitiña Hesusu, le íchugubei aban hénpulu buiti woun luagu ida luba lan gíchigadi lan aban gürigia. Ligía guánarügü ariñagubei: “Mama [...] niábiña, au le Wügüri Garaüwarügüti, lun neseriwidúniwa, niábiña lun neseriwidun luma lun níchuguni nibagari lebegime hasalbarun saragu” (Mat. 20:28). Ligía lariñagunbei apostolu Pábulu houn kristiánugu: “Ítaramemela ligaburi hasaminarun kei meha ligaburi lasaminarun Kristu Hesusu [...], aba lígiruni le lánibei, aba ladügün kei ubúeini lau lágurahoun kei wügüri” (Fili. 2:5, 7). Ligíati, buídubei lun wálügüdagun woungua: “Gayaraati san buídutima lan nafalaruni Hesusu sügǘ luéi le nadügübei guentó?” (aliiha huméi 1 Féduru 2:21).

6. Ka larufudahabei Hesusu woun lidan abahüdaguni luáguti wügüri samariana? (Ariha huméi dibuhu le lídanbei lagumeseha arütíkulu).

⁶ Gayaraabei lagundaarun Heowá wau ánhawa áyeihei lubuidun igaburi le luágubei luma le luágubei Lisaani. Lun lira, lunti webereserun hau amu áluaha wagíame chansi lun wíderaguniña lidan le hemegeirubei. Lidan abahüdaguni le labahüdagubei Hesusu luagu wügüri samariana, furanguti larufuduni agurabaha lan giñe lun wíderaguniña amu, meberesenga kátaña lan (aliiha huméi Lúkasi 10:29-37). Haritagua waméi aba lan labahüdaguni Hesusu abahüdaguni le ladüga lálügüdüni aban huríu: “Kátañagia níbirigubaña?” Arufudati lóunabagüle Hesusu lunti lan aranseñu wamá lun gíchigadi wamá kei wügüri samariana lun lagundaarun Bungiu wau.

7. Ka lasigenerubei Satanási lidan fuluri-agei Edén, ani ida liña warufuduni buídutima lan ligaburi ladügüni Heowá katei?

⁷ Anihein saragu resun wama keisi kristiánugu lun gíchigadi wamá. Kei hénpulu, gániti le lasigenehabei Satanási lidan fuluri-agei Edén lidan gíchigadi wamá. Ka uagu wariñagei? Ariñagati luagu Adán tuma Ewa, íbini wawagu, buídubei lan lidin woun ánhawa asaminara wawouguoun luma lun maganbadi wamá lun Bungiu. Busentu meha Ewa lun ítara tan kei Bungiu, ánheinti Adán himei lumutu lani weiriou sügǘ lau Heowá (Agu. 3:4-6). Furanguti larihín le asuseredubei. Madügünti wasaminarun wawouguounrügü lun gunda wamá, magundani lanügübei. Ánhawa gíchigadi, warufudubei chouru wamani buídutima lan ligaburi ladügüni Heowá katei.

8. Ka meha uagu lunti lubéi hamuga lasaminarun Adán tuma Ewa hawagu amu?

⁸ Íbini lábuguarügüñein lan meha Adán tuma Ewa lidan fuluri-agei Edén,  gayaraati hamuga meha ladügün adundehani le líchugubei Heowá houn lun hasaminarun hawagu amu. Aba labiniruniña Bungiu, aba lariñagun houn lun habuinchagüdüni Ubóu hau hasaanigu ani gumadi hameime (Agu. 1:28). Ítara kei berese lan Bungiu lau le ladügübei, lunti hamuga meha giñe lasaminarun Adán tuma Ewa luagu hagundan hadügawagun. Lun yebe gunda hamá sun ladügawagun lidan paraísu, mosu meha habuinchagüdüni sun ubóu. Lun meha ladügǘn katei le mégeiwati meha hídehan sun iduheñu.

9. Ka uagu gúndaabaña lubéi hamuga gürigia lau ladügǘn sun ubóu paraísume?

⁹ Lau hamuga meha hadügüni ubóu kei aban paraísu mini lan hamuga meha lira hídehaña lan gürigia mafigountiña luma Bungiu lidan lisuuni, ani ítara luba hamuga hebelurun lidoun lemeraagun Bungiu (Ebü. 4:11). Samina wamá luagu ugundani le lunbei hamuga hasandiruni. Labiniruñanu hamuga meha Heowá saragu lau gíchigadi hamá luma luagu hebereserun hawagu amu.

10, 11. Ida luba wagunfulirun lau apurichihani luma lau wadügün disipulugu?

¹⁰ Uguñe weyu rúhali Heowá aban dasi houn lubúeingu: lun hapurichihan luma lun hadügün disipulugu. Lun gayara lan wagunfuliruni dasi le lunti berese wamá hau gürigia. Wawanduba lidan dasi le anhein hínsiñe lubéi Bungiu woun hama gürigia.

¹¹ Ariñagati apostolu Pábulu luouguoun luma hawagu amu kristiánugu lánina furumiñeti sígulu ídehatiña lan luma Bungiu hagía ladüga bunagua hamani lila inarüni lánina Larúeihan Bungiu ani tugua haméi (1 Ko. 3:6, 9, TNM). Uguñe weyu gayaraati giñe wídehan luma Bungiu. Ida? Lau wíchuguni wadaani, were luma wámati lun wagunfulirun lau dasi le líchugubei Bungiu woun. Ma lubuidun chansi le!

12, 13. Ka burí afayeiruahaü weresibirubei dan le wadügün disipulugu?

¹² Gúndagüda lumutiwa saragu wíchuguni wadaani luma were lun wapurichihan. Saragu wíbirigu ha gachansin haña lun híchugun aturiahani tídangiñeti Bíbülia subudi hamuti anihán lan aban lídangiñe katei létima íchugubei saragu ugundani houn. Gúndaatiwa dan le warihini lasansiragun hagibu gürigia dan le gunfuranda hamani inarüni le tídanbei Bíbülia, laganwoundun hafiñen, hadügün sánsiguaü lidan habagari luma hagumeserun ayanuha hama amu luagu le hafurendeirubei. Ma lugundan Hesusu dan le hagiribudunbei 70 disipulugu ha lóunahabaña apurichiha lau lubuidun ariñahani luáguti dasi le hadügübei gúndaañu (Luk. 10:17, TNM, 18-21).

¹³ Lidan sun ubóu, gúndaatiña apurichihatiña luagu harihini ida liña lan  hóunabun gürigia lun uganu lánina Larúeihan Bungiu le wapurichihabei. Samina wamá luagu tikesin Ana, aban íbiri mamarieidungiru to águyuboun lidoun aban lídangiñe fulasu le Yuropabei, le ñein lubéi mégeiwa hamá apurichihatiña. * Ariñagatu: “Hínsiñeti nun narihini busén hamá saragu gürigia haturiahanu Bíbülia. Ruti apurichihani ugundani nun. Dan le nachülürün múnadoun madaanitina lun lasaminarun nuouguoun. Neteniruña houn ha únbaña níchiga aturiahani, lun haturobulin luma lun hadiheri. Áluahatina chansi lun níderaguniña luma lun níchugun gurasu houn. Chouru naali gúndaatimati lan le íchugubei sügǘ lau le eresibirubei” (Adü. 20:35).

14. Íbini murusunrügüñanu lan gürigia ánharutiña lun uganu buiti, ida luba wasandirun ugundani lidan apurichihani?

¹⁴ Íbini mabusenrun hamá gürigia haganbuniwa, buídubei wasandiragun woungua lau wíchugun chansi houn lun hánharun lun uganu buiti. Genegeguati dasi le wadügübei luma le leresibirubei profeta Esekiéli. Aba lariñagun Heowá lun: “Apurichihabei nererun houn, aganba hamabu maganbun” (Ese. 2:7; Isa. 43:10). Íbini anhein meberesegun habéi fiu gürigia lau uganu le wapurichihabei gebegiti áfaaguni le wadügübei lun Heowá (aliiha huméi Ebüréu 6:10). Ariñagati aban íbiri: “Bunaguadiwa, tugua ani furíeitiwa lau emenigini lun laganwoundagüdüni Heowá habusenrun gürigia hasubudirun luagu” (1 Ko. 3:6).

15. Ida liña hóunabun saragu gürigia lun uganu le wanügübei houn, ani lunti san leberesehani katei le wíchigadi?

¹⁵ Busenti Hesusu lun gunda wamá. Ligía lariñagubei woun: “Ru humá, rúa láamuga giñe hun. Líchuguba Bungiu saragu hun; ladügüba hun kéigubeirügü hadüga houn amu” (Luk. 6:38). Saragu gürigia hínsiñeti houn lun lichugúniwa houn. Inarüni mama lan sun gürigia ánhatiña lun uganu le wanügübei houn, gama lumoun, ha ánharutiña lun uganu buiti gayaraati hínchahaniña amu lun  giñe hánharun lun. Ligíati, lunti gíchigadi wamá íbini genege lan mebegi lan houn gürigia. Ibidiñeti woun kaba lan asusereda dan le gíchigadi wamá.

16. Kaba un gíchigadi wamá, ani ka uagu?

¹⁶ Le gíchigadibei tídangiñe sun lanigi magurabunti ni kata hámagiñe amu. Gabaroun lumuti meha Hesusu le dan le lariñagubei: “Danme le badügün fedu, amisuraha baña ha gudemebaña, ha siñaguabaña ungua, ha danimabaña, hama ha marihinbaña. Ábame gunda ban, ladüga siñati hafayeirunibu” (Luk. 14:13, 14). Ariñagatu Bíbülia habinirúba lan ha gíchigadibaña ani gúndaatiña lan “ha haritaguabaña hawagun ha mérebaña hama ha gudemebaña” (Ari. 22:9; Sal. 41:1). Ligíati, lunti wíchugun ladüga wagundaaruba lau wíderagun amu.

17. Ka katei gayaraabei wíchuguni lun gunda wamá?

¹⁷ Dan le láguyuguagüdübalin Pábulu le lariñagubei Hesusu, “fuleseiwatimati le íchugubei sügǘ lau le eresibirubei”, mámarügü layanuhaña meha luagu lichugún umegeguni, layanuhaña meha giñe luagu lichugún gurasu, adundehani luma ídemuei houn ha emegeirubalin (Adü. 20:31-35). Arufudahati Pábulu woun lau le lariñagubei luma lau le ladügübei lun wíchugun lídangiñe wadaani luma were houn amu luma lun wetenirun houn, arufuda wagíame ínsiñeni houn.

18. Ka san hariñagubei saragu sásaamu?

¹⁸ Ariha hamaali giñe sásaamu luagu ru lan gíchigadi ugundani. Según aban ariñahani, ariñagatiña gürigia gúndaatima hamá dan le híderagun amu. Según le hariñagubei sásaamu buiti lasandiragun gürigia lungua dan le líderagun amu. Liibe-agei dan, ariñagatiña sásaamu houn gürigia lun híderagun amu ladüga ladügüba lan le lun buídutima lan hátuadi luma lun gúndaatima hamá. Maweiriduntu wanigi waganbuni dimurei burí le, wagía le arihubarun Bíbülia kei Lererun Heowá, Wáguchi le hínsiñehabubei (2 Tim. 3:16, 17).

19, 20. Ka uagu lunti lubéi gíchigadi wamá?

¹⁹ Dan le lawinwandun gürigia geyegu hau gürigia ha míchigaditiña gayaraati hénrengu lan lun gíchigadi lan. Gama lumoun, ariñagati Hesusu gumadi lan le súdinitimabei lun lan hínsiñe lan Heowá woun tau sun wanigi, tau sun wawani, lau sun wasaminan luma lau sun were luma lun hínsiñe hamá gürigia woun kei wínsiñegua woungua (Mar. 12:28-31). Kei warihini lidan arütíkulu le, ha hínsiñehabubaña lun Bungiu áfaaguatiña háyeihani. Dandu ligía kei lisaani gíchigaditiña, ani biángubei hagía ariñagatiña woun lun gíchigadi wamá ladüga gúndaatimabadiwa. Lau wáfaagun lun gíchigadi wamá lun Bungiu luma houn gürigia líchuguba uéiriguni lun Heowá ani lanügüba buiti woun luma houn ha híbiri.

²⁰ Chóuruti wáfaaguña lan lun wíderaguniña gürigia wáledigu, wíbirigutima (Gal. 6:10). Anhein mabuchadun wawagu, chóuruti heteingirubadiwa lan amu gürigia, hínsiñebadiwa houn ani gúndaabadiwa. Ariñagati Ariñawagúni 11:25: “Ha gareinibaña, awansetiña; ha íchugubaña, ibihatiña giñe”. Anihein saragu igaburi le ídanbei gayara lan warufudun gíchigadi wamá dandu lidan wabagari kei lidan apurichihani, arufuda wagíame ínsiñeni magurabahanga ni kata hámagiñe amu. Lidan leweñegua arütíkulu warihuba fiu lídangiñe.