1. Ida luba wídehan luma Heowá?

DAN le ladügünbaliwa Heowá, busenti meha lun wídehan lidan lagunfulirun lisuuni. Íbini gafigoun wamá, wagía lubúeingu ha úaraguabaña lun, gayaraati wídehan luma sagü weyu. Ariñagatu Bíbülia ídehatiwa lan luma Bungiu dan le wapurichihan luma dan le wadügün disipulugu (1 Ko. 3:5-9). Aban lubuidun chansi lígiruniwa Suntigabafu lun wídehan luma lidan aban wadagimanu le súdinibei lun. Anihein amu igaburi lun wídehan luma Heowá. Lidan arütíkulu le, warihuba fiu lídangiñe: wíderaguniña waduheñu hama wíbirigu, weresibiruniña amu wábiñe, wídehan tidan lóundarun Heowá luma waganwoundagüdüni weseriwidun lun Bungiu (Kol. 3:23).

2. Ka uagu moun lumuti lubéi warihini le wadügübei luagu Heowá lumoun le hadügübei amu?

² Danme le waturiahañein lan arütíkulu le metenira wamá lun le hadügübei amu luagu Heowá luma le gayara wabéi adüga. Mabulieida waméi ámuñegueinarügüti lan harumudiri, hátuadi, gádantiña luma le hayaraabei kada íbirigu adüga. Ariñagati apostolu Pábulu: “Kada aban gürigia lunti laríaagun lungua ida liña lan ligaburi lóuserun. Ánheinti adariragua lungua buíduñu, gayaraati lanaagun lungua luagu le ladügübei, metenirunga lun le hadügübei amu” (Gal. 6:4).

3. Ka uagu gayara lubéi wariñagun ha lan óunigirubaliña haduheñu hídehaña lan luma Heowá?

³ Agurabati Heowá lun hetenirun lubúeingu houn haduheñu. Kei hénpulu, añahein íbirigu mosu hawadigimaridun lun gayara lan híchuguni le hemegeirubei haduheñu houn. Añahein saragu úguchuru etenira houn hasaanigu ha ñǘbürigiña. Añahein hádangiñe kristiánugu mosu hetenirun houn hagübürigu ha derebuguhaña. Mégeiwati ladügǘn katei burí le. Ariñagatu Bíbülia: “Le maritagunti hawagu lánigu, hátima liduheñu, yéeguaali lau lafiñen; wuribatimatiti sügǘ lau aban gürigia le mafiñenti” (1 Tim. 5:8). Anhein wadügüña lubéi aban lídangiñe dasi le, chóuruti siñá lan wetenirun lun katei le lánina Bungiu sun dan le wabusenrubei. Lau sun lira, mábürühan lan warüna. Gúndaati Heowá dan le wóunigiruniña waduheñu (1 Ko. 10:31).

4. Ida luba híchuguni agübürigu Larúeihan Bungiu furumiñe lidan habagari, ani ka hibihibei luagu hadügüni lira?

⁴ Hawadigimariduña agübürigu luma Heowá dan le hínchahaniña hasaanigu lun hasaminarun haganwoundagüdüni heseriwidun lun Heowá. Lau lásügürün dan, aba heseriwidun saragu hádangiñe irahüñü ha lidan dan dayarüti ani dise hawéi haduheñu. Añahein hádangiñe misionerugu, hádangiñe prekursorugu lidan fulasu le ñein lubéi mégeiwa hamá apurichihatiña ani ha híbiri heseriwiduña Betelirugu. Inarüni, kei dise lubéi hawinwandun, siñati harihiniña haduheñu oura habusenrun. Íbini ítara, ínchaha hamutiña agübürigu ha adügübaña sákürifisiu hasaanigu lun hasigirun lidan heseriwidun. Ka uagu? Ladüga gúndaagüda lumutiña hasubudiruni híchuguñein lan hasaanigu Larúeihan Bungiu lidan furumiñeti lúgaaru (3 Huan 4). Saragu hádangiñe agübürigu ha másiñati sandigua hamá houngua kei Ana, to ariñaguboun luagu anúadira taali lan tiráü lun Heowá. Ariha hamuti agübürigu ha hídehan luma Heowá lidan igaburi le kei aban lubuidun chansi le lunbei masansirun hamani luagu ni kata (1 Sam. 1:28).

5. Ka ídemuei gayaraabei wíchuguni houn wíbirigu? (Ariha humóun iyawaü to lídanboun lagumeseha arütíkulu).

⁵ Ka lunbei wadügüni anhein maweirin lubéi buligasion le wámabei hadan waduheñu? Másiñati gayara lan wíderaguniña íbirigu derebuguhaña, sanditiña o ha aniheinbei hemegeirun. Gayaraati giñe wídehan hama ha óunigirubaliña íbirigu ha. Ka uagu máluahan wabéi lidan damuriguaü kaba lan wíderagua o wasaminarun luagu somu gürigia le gayaraabei wíderaguni? Samina wamá anuhein lan aban íbiri to óunigirutu aban hádangiñe tagübürigu le derebuguhali. Gayaraati san woudin óunigirei lun gayara lan tidin íbiri to adügei tagararagun? Gayaraati san wíderagun somu íbiri lau wanügüni lidoun adamuridaguni, abisidaha somu liduhe háspitalirugu, agañeiha o adüga somu gararaguaü? Lau wadügüni lira, gayaraati wídehaña lan luma Heowá óunabei hafurieidun íbirigu ha (aliiha huméi 1 Korintuna 10:24).

6. Ida liña warufudun resibi wamutiña lan chülüdügütiña wábiñe?

⁶ Ha ídehabaña luma Bungiu subudiwatiña kei gürigia ha eresibirubaña achülürütiña hábiñe (Ebü. 13:2). Anihein saragu abahüdaguni tidan Bíbülia le arufudubalin woun mosu lan weresibiruniña chülüdügütiña wábiñe (Agu. 18:1-5). Buídubei wadüga lun wéchudun ayusurei sun chansi le wibihibei lun wíderagun amu, wábirigu lan yebe o mama lan wábirigu (Gal. 6:10).

7. Ka uagu lunti lubéi weresibiruniña íbirigu ha eseriwidubaña lidan dan dayarüti ha abisidahabalin damuriguaü wábiñe?

⁷ Gayaraati wídehan luma Bungiu lau weresibiruniña lubúeingu ha eseriwidubaña lidan dan dayarüti wábiñe (aliiha huméi  3 Huan 5, 8). Ruti burí bisida le chansi lun wíchugun “gurasu wóuniwagua” (Rom. 1:11, 12). Ariha huméi likesin aban íbiri gíriti Olaf. Dan meha le nibureingili, aba labisidahani aban óunigiruti sirkuitu mamarieidungili damuriguaü le ñein lubéi ani úatiña meha kaba lan íchiga halíaba lan larumuga óunigiruti sirkuitu. Aba lálügüdüniña Olaf lagübürigu ani mama Gefentiña hagía, anhein gayara lubéi lerederun íbiri le hábiñe. Aba hariñagun gayara lan, gama lumoun luáguba lan sofá larumuga. Buiti hásügürüni dimaasu ligía. Abahüdaguati Olaf: “Saragiñeheitina meha au luma óunigiruti sirkuitu sagü weyu ani aba wayanuhan luagu katei le buidu buriti dan le wátuña lubéi bachati. Adügati gurasu le neresibirubei lun busén nan neseriwidun lidan dan dayarüti”. Seriwihali Olaf kei misioneru lidan saragu ageiraü lidan 40 irumu le sügühalibei.

8. Ka uagu lunti lubéi areida wamá íbini genege lan meteingirun hamutiwa lan amu? Abahüdagua humá aban sügǘ.

⁸ Gayaraati wadügün buiti houn terenchana lidan ámuñegueinarügü igaburi íbini anhein meteingirun hamutiwa lubéi furumiñe. Ariha wamá aban sügǘ. Aban weyu Esüpáña, tíchuguña meha aban íbiri aturiahani tun aban gürigia ekuadóruna gíritu Yésica, aba tagumeserun ayahuaha. Aba tálügüdünu íbiri ka lan mégeibei tun, aba tabahüdahan Yésica tun lubaragiñe lan meha tidin Esüpáñoun gudeme tan meha saragu. Aban weyu, ibidiñeti meha tun kaba lan teiga tau tisaani, dunarügüñein meha gayara tíchuguni tun. Lidan tarumugagüdüñoun lan tisaani tarünarugu, aba tafurieidun lun Bungiu. Murusun dan lárigiñe, aba hadaünha bián Gefentiña luagu tubenari. Würibati meha tóuseruniña Yésica íbirigu hagía darí lun taheiridagunu garüdia to híchuguboun tun. Aba tagúaragun houn: “To ban san níchiga tun niráü lun teigin?”. Álugatiña yebe íbirigu lun hámalihanu, gama lumoun, siñá hamutu ámaliha. Murusun dan lárigiñe, aba hígirun aban faniñe lau éigini luagu tubenari. Aba tañuludagun tanigi dan le taritagubalin lubuidun igaburi le harufudubei íbirigu hagía tun, íbini sandigua tan tungua lau duru dan le taritaguni óunaba lani Bungiu tafurieidun ani madügüntun gasu lau. Ani guentó, aranseñu tiña meha lun teseriwidun lun Heowá. Ani sun le seremei lun gíchigadi hamá íbirigu hagía (Apur. 11:1, 6).

9, 10. a) Lidan binadu Ísüraeli, ka meha dan hemegeirua ídehatiña? b) Ka burí katei lunbei letenirúniwa lun lidan damuriguaü?

⁹ Lidan binadu Ísüraeli, anihein meha dan mégeiwa hamá ídehatiña (Afu. 36:2; 1 Kro. 29:5; Neem. 11:2). Uguñe weyu, gachansintiwa giñe lun wíchuguni wadaani, wámati luma le wayaraabei adüga lun wíderaguniña wábirigu. Anhein wadüga ítara, gúndaabadiwa ani weresibiruba saragu abiniruni.

¹⁰ Ínchaha tumutiña Lererun Bungiu wügüriña lun hídehan luma Heowá lau háfaagun lun heseriwidun kei ídehatiña o kei wéiyaaña lidan afiñeni (1 Tim. 3:1, 8, 9; 1 Fe. 5:2, 3). Ha adügübalin katei le, busentiña híderaguniña hábirigu lidan hamadagua luma Bungiu luma lidan amu katei (Adü. 6:1-4). Álügüda hamaadiwa san wéiyaaña lidan afiñeni anhein aranseñu wabéi lun wíchugun buiti achülürüni houn gürigia lidoun adamuridaguni, lun warihin tau agumeiraguagüdüni o lau fulasu le ñein lubéi wapurichiha, lun wídehan lidan taransehóun Luban Adamuridaguni o wadügün amu wadagimanu lenege le? Ha arihubaña lau buligasion le, chóuruti hariñaguba lan woun gunda hamá lau híderagun amu lau hadügüni katei le.

11. Ida liña híderagunu umadagu ha tadügübaña aban íbiri dan le tídehanbei lidan tábunawagun Luban burí Adamuridaguni?

¹¹ Ha ídehabaña lidan wadagimanu tidan lóundarun Heowá gíbetiña hamadagu. Ariha waméi le asuseredubei tun Margie, aban íbiri  to nadagimeinhaaru 18 irumu lidan tábunawagun Luban Hadamuridagun gefentiña luagu Heowá. Lidan sun irumu ligía, arufudahatu houn saragu íbirigu würiña nibureingiña. Ariha tumuti ligía lan dan buídutimabei lun tíchugun gurasu houn amu lidan hamadagua luma Bungiu (Rom. 1:12). Dan le tásügürün lídangiñe lénrengunga lidan tibagari, sun umadagu hagía rútiña gurasu tun. Ídehaadiwa san lidan bunaguaü? Gayaraati wadügüni, anihein lan yebe wayaraati adüga o ibidiñe lan somu fisiu woun.

12. Ida luba wídehan lidan wadagimanu lánina wíderaguniña wíbirigu lárigiñe lásügürün aban lanarime liñawan dan?

¹² Adügati chagaguaü le lanügübei liñawan dan lun gachansin hamá lubúeingu Bungiu lun houdin awadigimarida luma íderaguaña íbirigu. Kei hénpulu, óunahatiña seinsu houn ha asufurirubaña (Huan 13:34, 35; Adü. 11:27-30). Gayaraati giñe hídehan lidan tarumadahóun luma tábunawagun haban íbirigu. Aba terederun aban íbiri poloniana gíritu Gabriela mábanga ladüga labuinchun fulasu le ñein lubéi tawinwanda lau duna. Gama lumoun, aba tasandiragun tungua buidu dan le hóudinbei íbirigu ha lílana damuriguaü le yarafabei tun íderaguoun. Abahüdaguatu: “Mabuseruntina nayanuhan luagu le neferidirubei, lugundun umegegunirügüñein neferidira. Himei nágili nayanuhan luagu saragu katei le nibihubei. Le nawinwandubei chóurugüda lumuti nun aba lan lubuidun chansi le móubati hádangiñe nan lílana damuriguaü kristiánu ani ruti katei le ugundani nun”. Saragu íbirigu ha eresibirubaña ídemuei lárigiñe somu chagaguaü lánina liñawan dan ariñagatiña derebugüda lani sügǘ burí le hawinwandubei hafiñen. Ha ídehabaña luma Heowá lau híderagun amu gúndaati hasandiragun houngua (aliiha huméi Adügaü 20:35; 2 Korintuna 9:6, 7).

13. Ida liña derebugutima lan ínsiñeni le wasandirubei luagu Heowá dan le wídehan tidan lóundarun? Abahüdagua humá aban sügǘ.

¹³ Sandi tumuti aban íbiri gíritu Stephanie hama amu íbirigu ugundani le lanügübei hídehan luma Heowá lau híderagun amu Gefentiña ha anurahabaña Merigoun ladüga wuribu. Ídehatiña áluaha muna ani ídehatiña lidan taransehóun muna burí tuguya houn íbirigu ha. Abahüdaguatu Stephanie: “Ruti ugundani woun warihini teinki hamaniwa lau harihini ínsiñeni le hádanbei lumutuniña  Heowá. Saminatiña wagía lan íderagubaliña, le linarün katei, gíbetimati le hadügübei wawagu. Adügati ínsiñeni, úarani, afiñeni luma ichouruni luagu Heowá le warihubei, lun lederebugudun ínsiñeni le wasandirubei luagu. Adügati katei le lun gebegitima lan woun sun le líchugubei woun tidan lóundarun”.

14, 15. a) Ka igaburi larufudubei profeta Isaíasi? b) Ida luba wáyeihani ligaburi profeta Isaíasi?

¹⁴ Hínsiñeti hamuga san woun lúntima waganwoundagüdüni weseriwidun lun Heowá? Aranseñu waña san lun wáguyun lidoun fulasu le ñein lubéi megei tan lóundarun Heowá ídehatiña? Inarüni mafosurún hamá lubúeingu Bungiu lun houdin eseriwida dise tuéi haban lun harufuduni gíchigadi hamá. Lau sun lira, ídehati le gádanbaliña fiu íbirigu lun houdin dise eseriwida lun Heowá. Aban hagaburi luma ligaburi Isaíasi. Aba lálügüdahan Heowá: “Kaba san nóunaha?”, aba lóunabun Isaíasi: “Anahán, óunahabana” (Isa. 6:8). Hínsiñeti hamuga san woun wóunabun kei lóunabun Isaíasi danme le wibihini chansi ani gadaani wagía lun wadügüni? Ka mégeiwabei lun ladügǘn guentó?

¹⁵ Dan le layanuhabei Hesusu luagu apurichihani luma hadügǘn disipulugu, aba lariñagun: “Saragu haña gürigia busentiña haganbuni uganu luáguti asalbaruni; le linarün katei gíbeti lunti lalubahóun ani lóuguatiña nadagimeintiña. Lunti lubeiti hamuriahan luma Labureme nadü lun lóunahan nadagimeintiña lun halubahan” (Mat. 9:37, 38). Gayaraati san weseriwidun kei prekursorugu le ñein lubéi mégeiwa hamá apurichihatiña? O gayaraati wíderagun amu lun hadügüni? Le buídutimabei houn saragu íbirigu harufuduni hínsiñehabu lun Bungiu luma houn gürigia lau heseriwidun kei prekursorugu lidan fulasu le ñein lubéi mégeiwa hamá apurichihatiña. Gayaraati san wasaminarun luagu amu burí katei le gayaraabei wadügüni lun waganwoundagüdüni weseriwidun lun Bungiu? Ánhawa aganwoundagüdei weseriwidun lun Bungiu gúndaabadiwa.

16, 17. Ka burí amu katei gayaraabei hadügüni ha busenbaña haganwoundagüdüni heseriwidun lun Heowá?

¹⁶ Wánharuba hamuga san lun weseriwidun Betelirugu o lidan ábunaguni luagu murusun dan o luagu fiu weyu lidan dimaasu? Súnwandan mégeiwa hamá íbirigu lun heseriwidun lun Heowá lidan furumiñeguarügü fulasu o lidan furumiñeguarügü dasi le ichugúti houn. Másiñati mosu lanme wídehan ñein lubéi mégeiwa habéi ídehatiña íbini gayaraagua wamá woungua lidan amu wadagimanu. Lau sun lira, gebegitiña gürigia ha ídehabaña ñein lumuti hemegeirúa lun Heowá (Sal. 110:3).

¹⁷ Anhein busén wabéi lúntima larufudahóun woun lun waganwoundagüdüni weseriwidun lun Heowá másiñati gayara lan woudin tidan Leskuela houn Apurichihatiña Larúeihan Bungiu. Tidan leskuela to, arufudahóuati houn wügüriña hama würiña ha derebuguti hafiñen, ha eseriwidubaña lidan dan dayarüti, lúntima tayusuruniña lóundarun Heowá lidan ámuñegueinarügü igaburi. Ha busenbaña houdin tidoun leskuela to, lunti aranseñu hamá lun hánharun lun heresibirun furumiñeguarügü dasi lárigiñe heresibiha. Aranseñu waña hamuga san lun wayusuruni chansi le lun wibihin lanwoun wani buligasion lidan weseriwidun? (1 Ko. 9:23).

18. Kaba buiti wibiha ánhawa ídeha luma Heowá sagü weyu?

¹⁸ Keisi lubúeingu Heowá, busentiwa gíchigadi wamá, warufudun ínsiñeni luma areiduni houn amu sagü weyu luma lun wetenirun lun le hemegeirubei amu. Ruti ugundani luma darangilaü woun wadügüni katei le (Gal. 5:22, 23). Meberesenga le gádanbaliwa, gayaraati wagundaarun lau wáyeihani líchigadi Heowá luma lau aban wamá hádangiñe ha ídehabaña luma (Ari. 3:9, 10).