LÁFAHAÑA meha lugudi barana Atlantiku tuagu waporu to aweiyasuhaboun Yuropoun. George Young aban hádangiñe ha aweiyasuhabaña tidan ani lasaminaruña meha lau ugundani luagu le ladügübei lidan lapurichihóun uganu buiti luáguti Larúeihan Bungiu Bürasíli. * Eibu awansereina lan wéiyaasu aba lagumeserun asaminara luagu iseri dasi le lunbei ladügüni: Esüpáña luma Portugali, ñein lubéi lóuguagili lan meha lapurichihóuniwa. Danme le lachülürün, agurabati meha ladügün aransehani lun líchugun íbiri Joseph F. Rutherford yanu tídangiñeti Bíbülia luma lun lederegehan 300,000 tratadu.

Lidan irumu 1925 lachülüra íbiri Young Lisboa (Portugali). Lidan meha dan ligía anihein meha chagaguaü lidan ageiraü. Adügati hachagaragun lílana polítika lidan irumu 1910 lun magumadihan lan ábanrügü urúei luma lun teferidiruni ligilisi katolika saragu lídangiñe tubafu. Gayaraahali meha hadügün gürigia lanwoun le habusenrunbei, gama lumoun, aniheingua meha chagaguaü lidan ageiraü.

Dan le aranse laali lan meha George Young sun katei lubá líchuguni íbiri Rutherford liyanun, aba lóunahaniña lúrudu milidaru lun hagíaba lan ariha hau lílana fulasu ladüga hebedaagun lun lúrudu. Aba lariñagun tani Sociedad Bíblica Británica y Extranjera seküretáriu lun íbiri Young chouru lan ñéinbaña lan mínsiñehabutiña lun le ladügübei. Lau sun lira, aba lamuriahan íbiri Young üma lun layusuruni fulasu le ñein lubéi ladügǘwa ehersísiu tidan kolehiu Camões ani anharúati lun.

Chülüha buga 13 lidan seingü-hati, weyu le lunbei lichugún yanu ani hagurabahañein meha saragu gürigia. Rúati meha ariñahani tidan gárada to ichugúboun luagu touba muna íñutu luma tidan periodiku luagu yanu le gíribei “Le lunbei hadügüni lun hawinwandun ubouagu lun súnwandan”. Ábati hóufudahan lílana relihión ha mínsiñehabutiña lun wawadigimari abürüha aban arütíkulu tidan hani periodiku eweridiraña aliihatiña sun liña lan hachülürün fiu “profetagu yéetiña”. Aba giñe hederegehan saragu milu garüdia lidan lebelaagüle fulasu le ñein lubéi ladügǘwa ehersísiu lau saminaü le múaranti luma le meha lunbei larufudahani íbiri Rutherford lidan liyanun.

Lau sun lira, chülütiña kéiburi 2,000 gürigia aganbei yanu ani hámaña fiu milu ha siñabei hebelurun. Añahein meha hádangiñe hínsiñeti meha le haganbubei houn darí lun hawarirun luagu esütépu lauti gúrudu le tóubawagubei muna ani añahein meha amu aba hañuurun luagu burí máhina lun ladügǘn ehersísiu.

Gama lumoun, susereti fiu katei mabuidunti. Aba hagúarahan áganiñu halagua hagía haláü. Lau sun lira, meferidirun lumuti íbiri Rutherford luguraasun, ábati lawarirun luagu aban dábula lun gayara lan haganbuni gürigia. Dan lagumuchunbei, yarafa lun amidi áriebu, ígira hamuti hóugiñe 1,200 gürigia hiri luma liri fulasu le ñein lubéi hawinwanda lun tounahóun agumeiraguagüdüni houn. Weyuméme lárigiñe, aba láfuachun aban arütíkulu luagu liyanun íbiri Rutherford tidan periodiku gíritu O Século.

 Lidan nefu-hati, irumu 1925, aba táfuridun garüdia La Torre del Vigía, to subudiwaboun uguñe kei Garüdia Awisahatu, Portugali lidan iñeñein portugesi (lidan meha dan ligía, furihóun meha garüdia to Bürasíli lidan portugesi le ayanuhóubei ñein). Lídanmeme dan ligía, aba lagumeserun Virgílio Ferguson, aban Aturiahati Bíbülia le erederubei Bürasíli, adüga aransehani lun láguyun Portugali lun lídehan lidan apurichihani. Nadagimeinhali meha Virgílio luma George Young úara tidan tiraüraü sukursáli hani Aturiahatiña Bíbülia Bürasíli. Lidan murusun dan, aba lidin Virgílio tuma Lizzie, to lani weiriou, Portugalin lunya hadunragun luma íbiri Young. Chülüti Virgílio lidan dan ladüga chülümémeeli meha dan lun lidin íbiri Young apurichiha lidan amu fulasu, kéiburi Unión Sowiétika.

Dan le hadügübei milidaru lun lagumadihan aban gumadimati lau sun ubafu luagu sun ageiraü ábatima laganwoundun éibaahouni. Lau sun lira, arufudati íbiri Ferguson úaraguni. Aba ladügün aransehani lun lóunigiruni liraüraü sétanu hau Aturiahatiña Bíbülia luma lúntima hasigirun ídeha lidan wadagimanu lánina apurichihani. Amuriahati üma lun ladügǘn adamuridaguni lúbiñe. Lidan diisi-hati, irumu 1927, aba lánharun lúrudu lun ladügüni.

Lidan furumiñeti irumu le ídanbei lagumadihan aban gumadimati lau sun ubafu Portugali, bürüguatiña kéiburi 450 gürigia houngua lun tounahóun garüdia La Torre del Vigía houn. Ani seremei lun tederegehóun tratadu tuma garüdia, chülüti inarüni darí lidoun fulasu díseti le meha lábugiñebei lagumadihan Portugali: Angola, Asoresi, Kawu Bérüde, Timoru ñéingiñe lubéi láfuacha weyu, Goa (India), Madeira luma Mosanbíke.

Chülüti aban óunigiruti fuluri-agei gíriti Manuel da Silva Jordão uburugu Lisboa lidan irumu 1929. Dan meha lawinwanduña lan Bürasíli, aganbati aban yanu le líchugubei íbiri Young. Ouraméme ligía, aba líchugun fe anihán lan inarünibei ani aba busén lan líderaguni íbiri Ferguson apurichihei uganu buiti houn saragu gürigia. Ligía lagumeserunbei eseriwida kei prekursoru. Kei buidu lan meha aransehani le adügǘbei lun imprimírua tan agumeiraguagüdüni luma lun tederegehóun, aba aganwoundeina hamá lílana iseri damuriguaü le Lisboabei.

Mosu meha hagiribudun íbirigu Ferguson Bürasílin lidan irumu 1934. Lau sun lira, bunawaguaali meha lila inarüni Portugali. Íbini hanarimeuga lan meha Yuropa ladüga wuribu Esüpáña luma Libiaman Wuribu Wéiriti, meferidirun hamuti íbirigu úaraguatiña ha Portugalibaña hamadagua luma Bungiu. Luagu saragu dan, ítara liña meha sétanu le kei murusun liñegua watu, le aganwoundubei lidan irumu 1947 dan le lachülürünbei John Cooke, le furumiñeti misioneru ñein ani le eresibihabei tidan Leskuela tídangiñetu Bíbülia Galaadü. Lúmagiñe dan ligía, ábatima hagibedagun apurichihatiña. Ani sigimémetiña aganwounda lau sun aba lan lamahadun lúrudu lun wawadigimari lidan irumu 1962. Lidan duusu-hati, irumu 1974, danya le lánhanrubei lúrudu lun wawadigimari, añaheinhaña meha hóugiñe 13,000 apurichihatiña lidan ageiraü.

Uguñe weyu, apurichiha hamuti hóugiñe 50,000 apurichihatiña uganu buiti luáguti Larúeihan Bungiu Portugali luma lidan saragu ubouhu ñein lubéi layanuhóua portugesi, kéiburi Asoresi luma Madeira. Hadan apurichihatiña ha, añahein hadügawagun fiu ha achülürübaña aganbei liyanun íbiri Rutherford lidan irumu 1925.

Teinki wamuti Heowá hama íbirigu úaraguatiña ha agumeserubalin lapurichihóun uganu buiti luáguti Larúeihan Bungiu Portugali lau ganigi ani kei lariñagun Pábulu, seriwitiña lun Hesukrístu haganagua gürigia (Rom. 15:15, 16). (Lídangiñe ariñahani le areidúañubei tidan sukursáli to lánina Portugali).