1. Ka lariñagubei Isaíasi luagu Hesusu lidan aban profesía, ani ka uagu líchiga dimurei le gurasu woun?

ARIÑAGATI Isaíasi lidan aban profesía luáguti Hesusu: “Maguseragüdünbei luagu larihín aban katei, masiadihan ligíame luagu katei le machourunti. Laguseragüdüba lau irichaü houn ha débilibaña, ageindagualeime haricha lílana fulasu ha gudemebaña” (Isa. 11:3, 4). Ruti dimurei le saragu dǘgüdaguaü woun. Ka uagu? Ladüga wawinwanduña lidan aban ubóu buin hau gürigia ha asaminarubaña wuriba hawagu amu. Sun wagía memeniha wanigi lun laguseragüdüniwa Hesusu, aguseragüdüti le mafigounbei le lunbei maguseragüdünbei lan luagu le larihibei.

2. Ka lariñagubei Hesusu woun lun wadügüni, ani kaba wakutiha lidan arütíkulu le?

² Sagü weyu, saminatiwa somu katei hawagu amu. Gama lumoun, kei gafigoun wabéi, mabafutiwa lun waguseragüdün lau irichaü kei ladügüni Hesusu. Héchutiwa asaminara wuriba o buidu hawagu amu láurügü le warihibei luma le waganbubei hawagu. Íbini ítara, dan meha le ya lubéi Hesusu Ubouagu, ru lumuti gumadi le: “Maguseragüda humá luagu le harihubei, laulá irichaü haguseragüda” (Huan 7: 24). Kei aubei warihei, busenti Hesusu lun wasigiruni lani hénpulu ani lun mígiraguagüdün wamá woungua lun le warihibei o lun le waganbubei. Lidan arütíkulu le, wayanuhaba luagu ǘrüwa katei le gayaraati lagadeiruni ligaburi wasaminan hawagu amu: rasa o ageiraü, seinsu luma lirumudiri gürigia. Lidan kada kesi, warihibei ida luba lan wafalaruni ladundehan Hesusu.

3, 4. a) Ka burí katei adügübei lun lasansiruni apostolu Féduru ligaburi larihiniña gürigia ha mámabaña huríu? (Ariha huméi dibuhu le lídanbei lagumeseha arütíkulu). b) Ka iseri ariñahani larufudahabei Heowá lun Féduru?

³ Samina wamá luagu le lasaminarubei apostolu Féduru dan le lariñawagúnbei lun lun lidin uburugu Sesaréa lúbiñe Korunéliu, aban wügüri le mama huríu (Adü. 10:17-29). Ítara kei ha híbiri huríu ha lánina lidaani, hadan meha gürigia ha arihibaliña amu gürigia kei wíyetiña ligibugiñe Bungiu lagüriarua Féduru. Gama lumoun, wínwanhali meha fiu sügǘ le adügübei lun lasansirun ligaburi lisaminan. Kéiburi, larihin aban arufudúni lúmagiñeti Bungiu (Adü. 10:9-16). Lidan arufudúni le, aba larihin lararirun aban katei kamá aban sidi buin hau animaalugu wíyetiña lidan aniha lan aban umalali ariñaga lun lun láfarun hádangiñe lun leigin. Ǘrüwañein wéiyaasu lariñagun Féduru uá. Sagü lariñagun úa, aba lariñagun umalali ligía lun: “Le katei le larumadagüdübei Bungiu, mariñagabá luagu wiye lan”. Dan le lagumuchubei arufudúni ibidiñeti meha lun apostolu Féduru kaba lan ladüga ani úati gunfuranda lani le labuserunbei umalali ligía larufudahan lun. Lidan oura ligía, aba hachülürün fiu wügüriña lóunagülegu Korunéliu. Aba lafalaruni Féduru ladundehan sífiri sandu, ábati lidin hama wügüriña hagía lúbiñoun Korunéliu.

⁴ Maweiyasuntiña meha huríu ebelura hábiñoun gürigia ha mámabaña huríu. Lun hamuga lidin Féduru láurügü le larihibei o le laganbubei maweiyasunbei hamuga ebelura lúbiñoun Korunéliu. Kati uagu ladügei? Ladüga le larihibei lidan arufudúni luma ligaburi ladundehani sífiri sandu. Lárigiñe laganbuni le lariñagubei Korunéliu, aba taweiridun lanigi Féduru darí lun lariñaguni dimurei le: “Subudi naali guentó luagu úati lan himei lan Bungiu aban gürigia luéi aban, lubaragiñe lira, resibirügü lumutiña sun ha inebehabubaña lun ani adüga haméi le buídubei, lídangiñe hamá yebe furumiñeguarügü néchani” (Adü. 10:34, 35). Ladügüba meha iseri ariñahani le leresibirubei Féduru, lun lasansirun ligaburi hasaminarun kristiánugu. Ka idan?

5. a) Ka labuserunbei Heowá lun gunfuranda hamani sun kristiánugu? b) Íbini subudi wamani ua lan himei lan Bungiu aban gürigia luéi aban, ka gayaraabei lasuseredun woun?

⁵ Lau layusuruni Heowá Féduru íderagua lumutiña sun kristiánugu gunfurandei ua lan himei lan aban gürigia luéi aban. Meberesegunti Bungiu ámuñegueinarügü lan harasan gürigia, hageira, hani türibu o hererun. Ánhati houn sun gürigia ha arufudubaña inebesei lun ani adüga haméi le buídubei ligibugiñe (Gal. 3:26-28; Aruf. 7:9, 10). Chóuruti, sun lan kristiánugu subudi wamuti luagu inarüni lan katei le ani saminatiwa masaminarun wamá wuriba hawagu amu. Gama lumoun, anhein hadan lubéi gürigia ha asaminarubaña wuriba hawagu amu waweirida másiñati anihein lan murusun lídangiñe igaburi le wawagu míchugunga wagía fe. Íbini Féduru, le gánibalin lubuidun chansi lun líderagun amu lun harihini ua lan himei lan Bungiu aban gürigia luéi aban, dan lárigiñe, arihúati luagu ligaburi wuribagili lan meha lisaminan hawagu amu (Gal. 2:11-14). Ida luba wafalaruni lugumadin Hesusu lun masaminarun wamá wuriba hawagu amu láurügü le warihibei o le waganbubei?

6. a) Kaba íderaguawa agidara furumiñeguarügü saminaü wuribati hawagu amu tídangiñe wanigi? b) Ka larufudubei le lariñagubei aban wéiyaali lidan afiñeni luagu le tídanbei lanigi?

⁶ Lun warihin anhein saminagidiwa lubéi  wuriba hawagu amu lunti wakutihan buidu anhein úara lubéi wagaburi luma le wafurendeirubei tídangiñe Lererun Bungiu (Sal. 119:105). Gayaraati giñe wálügüdüni somu wamada le afiñetiwa luagu anhein ariha lubéi awanhagua lan asaminara wuriba hawagu amu (Gal. 2:11, 14). Gayaraati güragu liña lan igaburi le tidan wanigi darí lun míchugun wamá fe. Ariha waméi le lariñagubei aban wéiyaali lidan afiñeni hawagu aban feru maríeitiña úaraguatiña ha eseriwidubaña lidan dan dayarüti. Lídangiñeti meha aban rasa le ñein lubéi mibe hamá gürigia wügüri maríeiti le, ha mínsiñebaña houn hiibe-agei gürigia. Genegeti míchugun lan wéiyaali lidan afiñeni fe luagu saminagili lan wuriba luagu lirasan íbiri le. Íbini abürüha lan saragu katei buiti luagu íbiri ligía, ariñagati giñe: “Íbini hádangiñeti lan ítaga rasa íbiri le, arufudati lumene luma ligaburi labagaridun mama lan mosu wiye lan, wuriba lan ligaburi ni lun labagaridun lidan gudemei kei hagaburi saragu hádangiñe lirasan”. Ka wafurendeirubei lídangiñe sügǘ le? Meberesenga ka lan wánibei buligasion tidan lóundarun Heowá, lunti wakutihagun woungua buidu ani aranseñu wagíame lun wánharun lun ídemuei le híchugubei amu woun anhein saminagidiwa lubéi wuriba hawagu amu. Ka amu katei gayaraabei wadügüni?

7. Ida luba warufuduni dará wamaaru lan wanigi houn amu?

⁷ Anhein hínsiñehabu wabéi ladügüba ínsiñeni lun lagidarun saminaü wuribati hawagu amu tídangiñe wanigi (2 Ko. 6:11-13). Héchutiwa san ásügüra dan hámarügü ha ayanuhabalin wererun o hámarügü lílana warasan, lílana wageira o wani türibu? Anhein ítara liña lubéi, áfaagua wamá lun wóundarun hama ha mítarantiña kei wagía. Ka uagu magunbiraha wabaliña apurichiha, eiga wábiñe o ásügüra murusun dan wama? (Adü. 16:14, 15). Ánhawa adügei, buin tuba wanigi lau ínsiñeni ani masaminarunbadiwa wuriba hawagu amu. Anihein giñe ámuya katei le gayaraabei ladügün lun wasaminarun wuriba hawagu amu gürigia: seinsu.

8. Según Fádirigu 19:15, ka gayaraabei ladügün lun amu lan warihiniña amu?

⁸ Ábaya katei le gayaraabei ladügün lun warihiniña amu wuriba ladüga gaseinsun hamá o gudeme hamá. Luagu le layanuhóua tidan haliburun Fádirigu 19:15 dan le tariñagun: “Richagualá haguseragüdün danme hasiadihan; midin humá lúmagiñe le débilibei, ni lúmagiñe le gabafubei. Ragǘ humá luéigiñe irichaü danme hasiadihan”. Ida liña ladügün lirisin aban gürigia o lugudemen lun amu lan warihiniña?

9. Ka dimurei inarüniti labürüdübei Salomón, ani ka wafurendeirubei lídangiñe?

⁹ Lau lubafu sífiri sandu, abürüha lumuti Salomón inarüni le hawagu gürigia gafigountiña: “Iyereegutiña ha gudemebaña íbini houn hamadagu guánarügü; ánhaña ha rísibaña, ígiraguatiña umadagu houn” (Ari. 14:20). Ka wafurendeirubei lídangiñe ariñawagúni le? Furendeitiwa ánhawa lan móunigiragun woungua gayaraabei wáluahan íbirigu gaseinsuntiña lun wamadagume ani ábame mamadagua wamá hama ha gudemetiña. Ka uagu dencha lubéi lun gebegitima hamá amu woun ladügarügü le hámabei?

10. Ka turobuli uágubei layanuha Santiagu?

¹⁰ Ánhawa arihaña amu buidu ladügarügü gaseinsun hamá gayaraati ñein lan fánreinguaü lidan damuriguaü. Lidan furumiñeti sígulu, eweridihati disipulu Santiagu lafánreinraguagüdüña lan turobuli le fiu damuriguaü (aliiha huméi Santiagu 2:1-4). Mígira wamá lun lasuseredun katei le lidan damuriguaü le ñein wabéi. Ida luba wageindagun luma igaburi le?

11. Le san lúmabei gürigia adügübei lun gamadagua lan luma Heowá? Afuranguagüda huméi.

¹¹ Mosu warihiniña wíbirigu kei larihiniña Heowá. Úati himei lan ni rísitiña ni gudemetiña. Mama ladüga libe o mibe lan wámati gamadagua wabéi luma Bungiu. Inarüni ariñaga lan Hesusu “hénrengu lan lun lebelurun aban rísiti  lidoun arúeihani le siélubei”, gama lumoun, mariñagunti luagu siñá lan (Mat. 19:23). Luagu amu oubaü, ariñagati giñe: “Fuleseiwatün, huguya le gudemebei, ladüga hánihali larúeihan Bungiu” (Luk. 6:20). Mama meha lariñaguña haganbubei lan sun gudemetiña ani heresibiruba lan abiniruni espechaliti. Añahein meha saragu gudemetiña madügaguntiña houngua lánime Hesusu disipulugu. Le linarün katei, siñati wariñagun gamadagua lan o mamadagua lan somu gürigia luma Heowá ladügarügü le lúmabei.

12. Ka tariñagubei Bíbülia houn rísitiña luma houn gudemetiña?

¹² Añahein saragu íbirigu, wügüriña hama würiña, hadan lumutuniña Heowá ha hínsiñehabutiña lun ani seriwitiña lun tídangiñe sun hanigi. Añahein hádangiñe rísitiña ani ha híbiri gudemetiña. Ariñagatu Bíbülia houn rísitiña ‘lun míchugun hamani hemenigin luagu irisini machourunti, lun híchuguni hemenigin luagu Bungiu’ (aliiha huméi 1 Timotéu 6:17-19). Ariñawagúati giñe houn sun lubúeingu Bungiu, dandu houn ha rísibaña kei houn ha gudemebaña, luagu dencha lan ínsiñehabuni luagu seinsu (1 Tim. 6:9, 10). Ánhawa arihaña wíbirigu kei larihiniña Heowá, masaminarubadiwa buidu o wuriba hawagu ladügarügü le hámabei. Gama lumoun, buiti hamuga san lun warihiniña amu wuriba ladügarügü harumudiri? Ariha waméi.

13. Ka tariñagubei Bíbülia luagu ida luba lan wóuseruniña wéiyaaña mutu?

¹³ Ariñagatu Bíbülia saragu wéiyaasu lun lan wóuseruniña wéiyaaña mutu lau inebesei. Ariñagatu haliburun Fádirigu 19:32: “Ráramaba arufuda báamugei binebenehabu houn wéiyaaña mutu. Arufudabéi lineben Bubungiute bun”. Ariñagati giñe Ariñawagúni 16:31: “Afayeiruahaü aban ibagari migifeti houn gürigia ha richaguabaña, ítara liña hagaruban kei aban ridi”. Ani ariñagati apostolu Pábulu lun Timotéu: “Madeinhabá lun aban weiriei mutu; lubaragiñe lira, adimurehabá lun kamá hamuga lun búguchi” (1 Tim. 5:1, 2). Íbini meha gabafuraü lan Timotéu hawagu wéiyaaña mutu lun líchugun adundehani houn lunti meha lóuseruniña lau inebesei luma gudemehabu.

14. Ka idan buidu lan lun wererehan lun aban wéiyaali mutu?

¹⁴ Kaba hamuga wadüga ánhawa íchiga fe afigouhaali lan aban íbiri derebuguhali lau lichú lau o línchahañanu lan amu adüga somu katei le aubei magundan lan Bungiu? Maguseragüdünti Heowá ladügarügü ligaburi larihín gürigia ni ladüga derebuguhali lan. Ariha waméi adundehani le tídanbei liliburun Isaíasi 65:20: “Leme óunweti luagu san irumu lau, nibureingili lounwen, le machülüti san irumu, íñarawaguati”. Daritiwa aban adundehani lenege le lidan arufudúni le larihibei Esekiéli (Ese. 9:5-7). Ligíati, le súdinitimabei woun warufudun inebesei lun Heowá, le “Weiriei Mutu” (Dan. 7:9, 10, 13, 14). Ligíati, manufudedunbadiwa lun wererehan lun somu íbiri le mégeibalin meberesenga ka lan lirumudiribei (Gál. 6:1).

15. Ka wafurendeirubei lúmagiñe apostolu Pábulu luagu warufudun inebesei houn íbirigu nibureingiña?

¹⁵ Ida luba wóuseruniña nibureintiña? Ariha waméi likesin Timotéu. Ariñagati apostolu Pábulu lun: “Mígiraba lun banügǘniwa kei ni kata luéigiñe nibureingidibu lan; lubaragiñe lira, lunti aban ban hénpulu buiti houn ha afiñebaña, lidan ligaburi badimurehan luma bóuserun, lidan ínsiñehabuni, lidan bafiñen, luma lidan laruman bibagari” (1 Tim. 4:12). Dan le labürüdübalin apostolu dimurei burí le másiñati lóugiñe lan 30 irumu lau Timotéu dan ligía. Lau sun lira, rúhali meha Pábulu buligasion le hanarimeti lun. Meberesenga ka lan uagu líchigei adundehani le lun, furendeitiwa mabuidun lan lun warihiniña íbirigu nibureintiña wuriba ladügarügü harumudiri.  Mabulieida waméi íbini lan Hesusu lóugiñe meha 30 irumu lau dan le lagumeserunbalin lani ministeriu.

16, 17. a) Ka hadügübei wéiyaaña lidan afiñeni lun harihini anhein gayaraahali lubéi liridún somu íbiri kei ídehati o kei wéiyaali? b) Ka turobuli gayaraabei ñein lan lidan le tariñagubei Bíbülia luma wechun o luma wasaminan guánarügü?

¹⁶ Másiñati lídangiñetiwa lan aban échuni le arufudubei mebegi hamá wügüriña nibureingiña houn saragu. Anhein ítara liña lubéi gayaraati maha hamá wéiyaaña lidan afiñeni lun liridún aban íbiri nibureingili kei ídehati lidan damuriguaü o kei wéiyaali lidan afiñeni. Lunti haritaguni wéiyaaña lidan afiñeni míchugun tan Bíbülia aban irumudiri lun hiridún wíbirigu wügüriña kei ídehatiña o kei wéiyaaña lidan afiñeni (1 Tim. 3:1-10, 12, 13; Titu 1:5-9). Anhein íchiga aban wéiyaali lidan afiñeni lúrudu le lídangiñeti lechun, mama ladügüñein le tarufudahabei Bíbülia. Moun lumuti hasaminarun wéiyaaña lidan afiñeni wuriba hawagu nibureintiña ladügarügü ligía lan échunibei lidan fulasu le ñein lubéi heredera o ladüga ligaburi hasaminan, mosu harihiniña según le tariñagubei Lererun Bungiu (2 Tim. 3:16, 17).

¹⁷ Ánhaña ígiraguagüda wéiyaaña lidan afiñeni lun hechun lubaragiñe hafalaruni le tariñagubei Bíbülia, másiñati madügünbaña lan ni kata lun liridún aban íbiri le gayaraabei liridún kei ídehati o wéiyaali lidan afiñeni. Lidan aban ageiraü, aban meha ídehati afiñewati luagu anügübalin fiu buligasion súdiniti lidan aban damuriguaü. Íbini subudi hamani wéiyaaña lidan afiñeni gayara lan liridún kei wéiyaali máhatiña meha lun liridún. Ariñagatiña fiu hádangiñe luagu nibureingili lan lun liridún kei wéiyaali lidan afiñeni. Ma lirun maha hamá ladügarügü ligaburi larihín. Lau sun ábanrügü lan hénpulu le, según ariñahani, ítara liña hasaminarun saragu wéiyaaña lidan afiñeni lidan ámuñegueinarügü fulasu ubouagu. Súdiniti lun wayusurunu Bíbülia lubaragiñe wafalaruni wechun o le wasaminarubei. Ítararügüba gaganbadi wamá lun Hesusu ani marihin wabaña amu wuriba ladügarügü ligaburi haríawagun.

18, 19. Ka lunbei wadügüni lun warihiniña amu kei larihiniña Heowá?

¹⁸ Lau sun gafigoun wamá, gayaraati wafurendeirun arihaña amu masaminarunga wuriba hawagu, ítara kei larihiniña Heowá (Adü. 10:34, 35). Lunti wáfaagun súnwandan ani falá wameime adundehani le tídanbei Lererun Bungiu. Ánhawa adügei, warufuduña gaganbadi lun gumadi le líchugubei Hesusu lun maguseragüdün wamaniña gürigia láurügü le warihibei (Huan 7:24).

¹⁹ Yarafa madise, laguseragüdübaña Hesusu, le warúeite, gürigia lau irichaü, masiadihanbei lau le larihibei o le laganbunbei (Isa. 11:3, 4). Chóuruti buídubei lan katei le!