“NÚGUCHI”, “NIYAURITE”. Ítara liña hagúahan saragu nibureintiña nun Betelirugu. Lau 89 irumu le nau hínsiñeti nun lun hagúarun nun ítara. Ariha numuti dimurei le kei aban afayeiruahaü lúmagiñe Heowá lau neseriwidun lun luagu 72 irumu lidan dan dayarüti. Lidan sun dan le sügǘ náalibei eseriwida lun Bungiu gayaraahali nachoururuni tídangiñe sun nanigi houn nibureintiña ha ‘gafayeiruahabei lan hawadigimari’ anhein mábürühan harüna (2 Kro. 15:7).

Aba háguyun nagübürigu Ukraniagiñe lun Kanadá. Aba hawinwandun lidan aban aüdü gíriti Rossburn, Manitoba. Widuñanu wügüriña hama widü würiña tisaanigu núguchu ani úatiña ni aban mádounu hadan. Au katorusubei hadan níbirigu. Hínsiñetu meha Bíbülia lun núguchi ani aliiha lumutu meha woun sagü dimaasu binaafin, afiñeti meha haseinsun lan gürigia habusenrunbei lábutigu relihión mama híderaguniña. Saragu wéiyaasu lálügüdahan núguchi lau siñagei: “Ka afayeirubalin Hesusu lun lapurichihan luma lun larufudahan?”.

Gádürü hádangiñe níbirigu wügüriña hama gádürü hádangiñe nítunu aba hánharun lun inarüni. Prekursora meha Rose, to nitu, darí tounwen. Sügǘ tumuti lagumuhóun weyu tau abagarida ariñaga houn sun gürigia lun hadügün gasu lau le tariñagubei Lererun Bungiu. Ariñagatu meha: “Busentina narihinibu lidan iseri ubóu”. Aban hádangiñe níbugaña le gíribei Ted, apurichihati meha luagu máfiougati. Sagü meha dimaasu binaafin lapurichihan tidan radiu, aba lariñagun houn burí ha aganbahabalin hagudúba lan lun súnwandan lidan máfiougati. Gama lumoun, lárigiñe, ábanhali meha lubúein Heowá le úaraguati ani chubaluguti lidan apurichihani.

Aban weyu, lidan sisi-hati, irumu 1944, lárigiñe nagiribudun leskuelarugugiñe, aba nadarirun luagu dábula aban garüdia to gíriboun La regeneración venidera del mundo. * Aliiha numuti furumiñeti ubanaü, lárigiñe aba naliihani libiaman ani siñá meha nígiruni naliihanu garüdia tuguya. Dan le nagumuchubarun aliiha, samina naali meha buidu: busentina meha neseriwidun lun Heowá ítara kei ladügüni Hesusu.

Ida liña tachülürün garüdia to luagu wadabulan? Abahüdagua lumuti Steve, le níbugaña, nun ida liña lan. Aba hásügürün bián wügüriña ha “alügürahabaña” líburu tuma garüdia. Aba lariñagun Steve: “Aba  nagañeihanu garüdia to ladüga seingü gáwanaü tuagu”. Giributiña wügüriña hagía aban dimaasu lárigiñe. Ariñagatiña woun gefentiña lan luagu Heowá hagía ani yusu hamanu Bíbülia lun hóunabuni álügüdahani burí le hadügübei gürigia. Hínsiñeti meha katei le woun lugundun arufudahati wáguchi woun lun inebe tan Lererun Bungiu woun. Ariñagatiña bián wügüriña hagía woun luagu hadügüba lan Gefentiña aban adamurini yarafa madise uburugu Winnipeg, le ñein lubéi meha tawinwanda Elise to nitu. Ítara liña nidin lidan adamurini.

Aweiyasuhatina 320 kilómeturu (200 maili) tidan beiki darí uburugu Winnipeg. Dan le nóudiña lubéi ráramaguatina Kelwood, aban aüdü le ñein lubéi meha hawinwanda bián Gefentiña ha abisidahabadiwa. Dan le ñein nubéi, ñǘdüntina lidan aban adamuridaguni ani aba níchugun fe ida liña lan aban damuriguaü. Furendeitina giñe ñein mosu lan hapurichihan ani arufudaha hagíame wügüriña, würiña hama nibureintiña tidan burí muna, ítara kei ladügüni Hesusu.

Uburugu Winnipeg nóundaragua luma Jack, aban hádangiñe níbugañanu; ñǘdünti giñe lidan adamurini lúmagiñe nórute lani Ontario. Furumiñeti weyu lau adamurini awisahati aban íbiri luagu aniheinbei lan badisei. Au luma Jack aba wabadiseirun lidan adamurini ligía. Aranseediwa meha lun weseriwidun kei prekursorugu lárigiñe wabadiseirun. Aba leseriwidun Jack kei prekursoru murusun dan lárigiñe adamurini. Disisi meha irumu nau ani lunti meha nasigirun leskuela, gama lumoun, aba neseriwidun kei prekursoru irumu lárigiñe.

Gumesetina eseriwida kei prekursoru úara luma íbiri Stan Nicolson lidan aban aüdü gíriti Souris, Manitoba. Murusun dan lárigiñe, aba nafurendeirun hénrengu lan leseriwidúniwa kei prekursoru. Aba werederun maseinsunga, íbini ítara, sigitiwa apurichiha. Aban weyu, dan le wagiribuduña lan wábiñoun lárigiñe wapurichihan sun weyu, lamaadiwa meha ani úati meha ni aban gáwanaü wabusedurugu. Dan le wachülürün, aba warihin aban katei le aweiridagüdübarun wanigi: ígiraali meha somu gürigia aban óunwenbu sagü lau éigini luagu wabenari. Darí guentó, ibidiñegili woun ka lan ígirubalun. Weyu ligía hóutiwa buidu. Ma lanarime abiniruni seremei mígirun wamá lun láburuhan warüna! Dan le lagumuchubei hati ligía, gágürügühadina meha.

Fiu hati lárigiñe, aba wounahóun aüdü Gilbert Plains, bián-san bián weinñein kilometuru (150 maili) lun Souris. Lidan meha dan ligía, bürüwati meha ariñahani luagu hapurichihan lílana damuriguaü luagu plataforma. Dan le míbeeli lan oura wapurichihan luagu aban hati, aba níchugun aban yanu houn lílana damuriguaü le meha ñein nubéi, lun nariñagun houn lunti lan haganwoundagüdüni hapurichihan. Dan le lagumuchunbei adamuridaguni, aba tariñagun aban íbiri derebuguharu nun ayahuaheina, to mama Gefenti tani weiriei: “Áfaaguatina yebe lúntima gibe lan dan násügürün apurichiha, ani siñá numuti adüga”. Aba giñe nayahun ani aba namuriahan ferudun tuma.

Ítara kei lasuseredun nun, gayaraati hachararun nibureintiña lau lumenrengun ani lárigiñe aba hasandiragun houngua wuriba luagu le hadügübei. Gama lumoun, furendeihadina lubaragiñe lan bígirun lun lábürühan barüna, buítimati lun bafurendeirun lídangiñe bichara ani bubaruaguounbá. Ánhabu eseriwida lun Bungiu lau úaraguni bibihuba saragu abiniruni.

Dan le 21 lubéi irumu nau, ibiha numuti lubuidun chansi lun lidin tidan Leskuela tídangiñetu Bíbülia Galaadü, ani eresibihatina lidan bián-hati, irumu 1950. Óunahouatiwa kéiburi 25 hádangiñe 103 aturiahatiña tidan leskuela to Kebekün, ñein lubéi layanuhóua faransu. Éibaaha hamutiña lílana relihión mama inarünitiña Gefentiña ñein. Aba nounahóun lidoun aban aüdü gíriti Val-d’Or, ñein lubéi lachigahóua golu. Aban weyu, aba nidin hama fiu íbirigu apurichiha yarafa lidan aban aüdü gíriti Val-Senneville. Aba lariñagun fádiri le ñeinbei woun lagayuahaba lan wawagu ánhawa midin ñéingiñe. Ábati nanügüni fádiri ligibugiñoun lúrudu ani mosu meha lafayeirun fádiri ligía seinsu luagu le lariñagubei. *

Anihán meha aban lídangiñe katei le asuseredubei woun dan le wéibaahounbei Kebekü. Lábugiñeñein meha tagumadihan ligilisi katolika Kebekü luagu lóugiñe  300 irumu, ligía héibaahabaliña fádirigu hama lílana polítika Gefentiña. Lau sun hénrengu lan meha le wásügürübei ani míbetiwa meha, mígiruntiwa lun lábürühan warüna. Buiti meha hóunabun gürigia haruma tanigi ha Kebekübaña lun uganu tídangiñeti Bíbülia ani ibiha numuti lubuidun chansi lun níchugun aturiahani houn saragu gürigia ha ánharubaña lun inarüni. Rútina aturiahani houn aban iduheñu ha díisibaña lílana ani súngubei hagía aba heseriwidun lun Heowá. Ínchaha lumutiña ganigi le harufudubei lun hígirunu amu gürigia ligilisi katolika. Sigimémetiwa apurichiha ani lau lásügürün dan, aba wagañeiruni wuribu.

Lidan irumu 1956, aba nounahóun eseriwida Aití. Hiibe-agei hádangiñe misionerugu ha meha eseriwidubaña ñein hénrenguti meha houn hayanuhan faransu. Lau sun lira, aganba hamutiña gürigia. Ariñagati aban misioneru gíriti Stanley Boggus: “Aba taweiridun wanigi dan le warihinbei íderagua hamutiwa lan gürigia lau sun hayaraati lun wayanuhani iñeñein le buidu”. Kei furendeihadina lubéi meha faransu Kebekü buiti meha lidin nun. Gama lumoun, lidan murusun dan, aba wíchugun fe saragu lan hádangiñe íbirigu ha erederubaña Aití, krióyu aitíanu hayanuhabei. Ligíati, anhein meha busén wabéi lun buidu lan lidin woun lidan apurichihani mosu meha wafurendeiruni iñeñein le. Adüga wamuti ani biniwati wáfaagun.

Ruti Musu Úaraguati üma woun lun wásügüragüdünü Garüdia Awisahatu tuma amu agumeiraguagüdüni lidoun krióyu aitíanu lúntima gayaraabei lan wíderaguniña íbirigu. Lau lóufudagun, aba haganwoundun achülürütiña lidoun adamuridaguni lidan sun ageiraü. Lidan meha irumu 1950, añahein meha 99 apurichihatiña Aití. Gama lumoun, lidan irumu 1960, añaheinhaña meha hóugiñe 800 apurichihatiña. Lídanmeme dan ligía, aba nagunbirahóun eseriwida Betelirugu. Lidan irumu 1961, ibiha numuti lubuidun chansi lun narufudahan tidan Leskuela Kristiánu lánina Apurichihani. Arufudahatiwa houn 40 wéiyaaña lidan afiñeni hama prekursorugu espechalitiña. Lidan adamurini wéiriti lidan eneru, irumu 1962, ínchaha wamutiña sun íbirigu ha lídanbaña sun ageiraü ani derebuguti hafiñen, lun haganwoundagüdüni heseriwidun ani fiu hádangiñe, aba hiridún keisi prekursorugu espechalitiña. Adügǘwati katei le lidan dan ladüga wéibaahoua lan meha.

Weyu 23 lidan eneru, irumu 1962, murusun dan lárigiñe adamurini, aba hachülürün súdaragu Beteli ani aba hárügüdünina luma misioneru Andrew D’Amico ani aba wadaürǘn. Aba giñe hanügünu súdaragu sun garüdia ¡Despertad! to lánina 8 lidan eneru, irumu 1962, to lídanboun faransu. Ayanuhati aban  arütíkulu tídangiñe garüdia to tuagu saragu periodiku faransuna ha ariñagubaña adüga hamá gürigia aban luwuyeri abiñarahani Aití gíriti budú. Mínsiñeti meha katei le houn fiu gürigia ani ariñagatiña abürüha wamani arütíkulu le Betelirugu. Fiu dimaasu lárigiñe, aba wabugún sun misionerugu lídangiñe ageiraü. * Lau sun lira, sigimémetiña íbirigu ha lídanbaña ageiraü le adügei wadagimanu ani adüga hamuti buidu ladüga arufudahani le hibihubei. Gúndaatina lau naritaguni awanduni le harufudubei luma luagu aba lan lederebugudun hafiñen. Guentó, anuheinharu Traducción del Nuevo Mundo de las Santas Escrituras hama lidan krióyu atíanu, aban katei le meha masaminarun wamuti wibihibei lan.

Lárigiñe neseriwidun Aití, aba nounahóun eseriwida kei misioneru Repúblika Lamidan Áfürika. Lau lásügürün dan, aba neseriwidun kei óunigiruti sirkuitu ani lárigiñe, kei le arihibei tau Beteli.

Lidan meha dan ligía, maweirinti meha tubuidun Luban burí Adamuridaguni. Aba nafurendeirun abudaha murisi lun nafidihani tábulugun muna. Aba meha hararamagun gürigia arihana adügei wadagimanu le. Ani ínchaha lumutiña íbirigu lúntima hídehan lidan tábunawagun luma tounigirún Luban Adamuridaguni to ñein habéi. Aba meha hadügün lábutigu relihión bula wau ladüga lautu meha singi tábulugu haligilisin, ánheinti Luban Wadamuridagun mítarantu meha. Lau sun lira, madügünti le lun weferidiruni waguraasun, sigitiwa afidiha murisi tábulugun Luban Wadamuridagun. Gumuti hadügün bula wau dan le ladagarunbei aban lanarime liñawan dan uburugu Bangi, le lichügüdina ageiraü. Aba láguruni garabali tisingin ligilisi lun lamidangua üma létima ñéingiñe lubéi hásügüra gürigia. Ánheinti tábulugu Luban Wadamuridagun masuseredunti ni kata. Lúntima buidu lan larihíniwa wadagimanu lánina apurichihani, aba wábunagun aban sukursáli tuma aban muna houn misionerugu lídanrügü seingü hati. *

Lidan irumu 1976, aba lamahadun lúrudu lun wapurichihan Repúblika Lamidan Áfürika, ábati nounahóun Yamena, le lichügüdina Chad. Ñein nasubudiroun Happy, aban prekursora espechalitu kamerúna to apurichihaboun lau ubebeni. Aba wamarieidun 1 lidan gádürü-hati, irumu 1978. Ma lirun lídanmeme lan hati ligía aba lagumeserun aban wuribu, ani ítara kei hadüga saragu, aba giñe wanurahan suru lun ageiraü. Dan le lagumuchunbei wuribu, aba wagiribudun wábiñoun ani aba wíchugun fe barǘ hamaaru lan wuribatiña waban hábanme. Úaaru meha agumeiraguagüdüni ñein ani úaaru meha tidunigu Happy to tadaürüboun dan le wamarieidunbei ni idewesei le ichugúbei woun. Íbini ítara, mígiruntiwa lun lábürühan warüna. Anuheingua meha Happy numa ani anaheingua meha tuma ani busenmémegidiwa meha wasigirun eseriwida lun Heowá.

Kéiburi bián irumu lárigiñe, ábaya lánharun lúrudu lun wapurichihan Repúblika Lamidan Áfürika. Aba wagiribudun ñein ani aba neseriwidun kei óunigiruti sirkuitu. Aban meha karü wábanboun, ani tidan, anuhein meha aban gabana to gayaraati tóuburawagun, aban duromu le gayaraati lanügün 200 líturu duna (53 galun), aban refüri lauti gasi luma aban estufa lauti gasi. Hénrenguti meha lun waweiyasuhan. Dan le waweiyaasuhanbei luagu aban dan, ráramagüda hamutiwa súdaragu kéiburi 117 wéiyaasu.

Liibe-agei dan, hanarimeti meha lárouga darí lun lachülürün lun 50 °C (122 ^oF).Anihein meha dan hénrengu lan woun wadarirun duna nófuti lun ladügǘniwa badisei lidan adamurini. Aba méhati hachigahan íbirigu lidan aban lémeri duna le mábeihali lun hadabuhan duna lun ladügǘniwa badisei, le meha adügǘbei lidan aban duromu.

Lidan irumu 1980, aba wounahóun Niherioun, ñein lubéi wídeha bián irumu dimí lidan aransehani le adügǘbei lun tábununiwa iseri sukursáli. Agañeinhaña meha íbirigu aban budigü bián fuló to lunboun haragachagunu ábameti haranserunu lidan wafulasun. Aban weyu binaafin, aba nawarirun iñun tun muna lun nídehan. Murusun lubaragiñe amidi, ábaya nararirun le ñéingiñe lubéi  nawarira. Gama lumoun, kei meha gidawaali lan fánreinti ligía ñéingiñe aba néiguadun. Genegeti meha weiri lan nabuleseirun, gama lumoun lárigiñe ladügün surusia fiu egüsámini nuagu, aba lariñagun tun Happy: “Madiheridabá. Tumuguarügüti lilagülei, yáagiñe lun aban dimaasu areidagualime”.

Lidan irumu 1986, aba woudin Kosu Marüfíli, le ñein lubéi neseriwida kei óunigiruti sirkuitu. Mosu meha giñe nidin bisidaña lílana damuriguaü Burukina Fasu. Masaminarungubeitina meha ñeinba lan weredera dan lárigiñe luagu somu dan.

Lidan irumu 2003, lárigiñe bián-wein-sedü irumu, aba nagiribudun Kanadaoun tuma Happy lun weseriwidun tidan Beteli. Ariñagatu wani dugumedu kanadána wamá, gama lumoun tidan wanigi lídangiñetiwa Áfürika.

Lídanbei irumu 2007, dan le 79 lubéi irumu nau, aba wagiribudun Áfürikoun. Aba wounahóun eseriwida Burukina Fasu, ñein lubéi neseriwida lidan Sétanu le arihibei lau apurichihani lidan ageiraü. Dan lárigiñe, seriwitu áfisi to lun lásügüragüdüniwa ariñahani lidan amu iñeñein ani lábugiñeñoun taríaahan sukursáli to Beninboun. Lidan widü-hati, irumu 2013, aba wounahóun eseriwida tidan Beteli to Beninboun.

Lau sun wuribaali lan nátuadi, hínsiñegili apurichihani nun. Lidan burí ǘrüwa irumu le ásügürübei, seremei lun hídehan wéiyaaña lidan afiñeni tuma nani weiriou, badiseihaña bián hádangiñe gürigia ha únbaña níchiga aturiahani, Gédéon luma Frégis. Guentó heseriwiduña lun Heowá lau ubebeni.

Lárigiñe, aba nounahóun, au tuma Happy, eseriwida tidan sukursáli to Suruboun Áfürika, le ñein lubéi hóunigirana íbirigu lau saragu ínsiñeni. Suru Áfürika ligía lisedünbei ageiraü Áfürika le ñein lubéi neseriwida. Lidan diisi-hati, irumu 2017, ibihatiwa aban lubuidun abiniruni. Aba wagunbirahóun lidoun tederegerúniwa sukursáli Warwick (Newayóru). Aban sügǘ le lunbei mabulieidun wamani!

Ariñawagúati tidan líburu Anuario to lánina irumu 1994 lidan páhina 255: “Sun ha awandañabaña luagu saragu irumu lidan wadagimanu lánina apurichihani, busentiwa wariñagun houn: ‘Ganigi humá, mábürühala harüna, lugundun gafayeiruahabei huádigimari’” (2 Kro. 15:7). Dandu au kei Happy, aranseñu waña lun gaganbadi wamá lun dimurei le, ariñaga wagíame houn amu lun hadügüni ligiaméme.