1. Ka ladügübei Manóa dan le líchugunbei fe úguchilibei lan?

ABAN meha feru maríeitiña ísüraelina Manóa tuma lani weiriou. Saminatiña yebe meha siñabei lan gasaanigu hamá. Gama lumoun, luagu aban weyu, aba lasaliragun aban ánheli tun lani Manóa weiriou, aba líchugun aban lubuidun ñunsu tun. Aba lariñagun tun gasaaniboun lan aban irahü. Dan le tariñagunbalin lun tani weiriei, aba lagundaarun saragu. Gama lumoun, aba giñe lasaminarun luagun lanarime buligasion le lunbei hagunfuliruni. Lidan meha dan ligía, adügatiña meha saragu ísüraelina katei wuribati. Ida luba meha san ladüga Manóa tuma lani weiriou lun harufudahan lun hasaani lun línsiñedun Heowá lun ani seriwi ligíame lun? Amuriahati meha Manóa luma Heowá lunya lóunahani ánheli lun lariñaguni houn ida luba lan hagüriahani hasaani (Alidihatiña 13:1-8).

2. Ka hánibei agübürigu buligasion, ani kaba íderaguaña agunfulira lau? (Ariha huméi rekuáduru “ Aturiahatiña Bíbülia ha súdinitimabaña hun”.)

² Anhein gasaanigu hubéi, chóuruti gunfuranda humani Manóa. Mosu giñe harufudahan houn hisaanigu lun heseriwidun lun Heowá ani hínsiñe ligíame houn (Ariñawagúni 1:8). Kaba íderaguaün lun hagunfulirun lau hidasin? Súdiniti lun hadügüni Guñoun  lánina Háhuduragun Iduheñu lun Bungiu Úara sagü dimaasu. Líderagubadün katei le lun harufudahan houn hisaanigu luagu Heowá luma tuagu Bíbülia (aliiha huméi 2 Lúrudu 6:6-9). Ka amu katei gayaraabei líderagunün? Lubuidun lani Hesusu hénpulu. Inarüni masaanigu lan meha, gama lumoun gayaraati hafurendeirun agübürigu lídangiñe ligaburi larufudahan houn lani disipulugu. Lidan arütíkulu le warihibei arufuda lani meha Hesusu houn lani disipulugu hínsiñe hamá lun ani ǘnabugu lan. Ani gunfuranda lumuti meha ida liña lan hasandiragun houngua ani subudi lumuti ida luba lan líderaguniña. Warihibei giñe ida luba lan wáyeihani lani hénpulu.

3. Ka meha uagu chouru habalin lani Hesusu disipulugu hínsiñe hamá lun?

³ Héchuti meha Hesusu ariñagei houn lani disipulugu hínsiñe hamá lun (aliiha huméi Huan 15:9). Sügüti meha bandi dan hama (Márükosu 6:31, 32; Huan 2:2; 21:12, 13). Mámarügüñein meha aban máisturu Hesusu houn. Hamada meha giñe. Ligía chouru habalin hínsiñe hamá lun. Ida luba gayara lan háyeihani Hesusu?

4. Ida liña gayara lan harufuduni houn hisaanigu hínsiñe hamá hun? (Ariha humóun iyawaü burí to lídanboun lagumeseha arütíkulu.)

⁴ Ariñaga huméi houn hisaanigu hínsiñe hamá hun. Arufuda huméi houn súdini hamá hun (Ariñawagúni 4:3; Titu 2:4). Abahüdaguati aban Gefenti, lídangiñeti ageiraü Australia, gíriti Samuel sagü lan meha weyu laliihanu lúguchi líburu lánina Abahüdaguni tídangiñeti Bíbülia lun, óunabalei furumiñeguarügü álügüdahani le ladügübei lun. Lárigiñe, ábaha lóuburuni ru ligía aban chuti lun lubaragiñe lidin arounra. Fiú irumu lárigiñe, aba taweiridun lanigi Samuel lau lasubudiruni mechun hamá liduheñu lúguchi lau igaburi le. Gama lumoun, áfaaguati meha lúguchi lun larufuduni  lun hínsiñe lan lun saragu. Adügati meha katei ligía lun chouru lan lasandiragun Samuel lungua ani lun labagaridun lau ugundani. Ani gamadaguatiña biángubei hagía. Anhaün échuda ariñaga houn hisaanigu hínsiñe hamá hun, hasandiraguba houngua kei Samuel. Ligíati, óubura humaña, ru humá chuti houn, sagá humá dan lun hayanuhan hama, hou humá úara, áhurera hugíame hama.

5, 6. a) Ka meha ladügübei Hesusu hawagu lani disipulugu? b) Ida luba harufudahan agübürigu houn hasaanigu?

⁵ Ariñagati Hesusu: “Ébecha numutiña ha hínsiñebaña nun lau iderei, arufudaha au houn” (Arufudúni 3:19). * Ida liña lererehan Hesusu houn lani disipulugu? Arihati meha Hesusu gaturobulin hamá lani disipulugu ladüga meha súnwandan lan hau asigeneha hámagua luagu ka lan hádangiñe súdinitimabei. Ligía mosu lubéi meha lererehan houn lau gurasu saragu wéiyaasu. Ani súnwandan meha láluahani dan luma fulasu le buídubei lun lererehan houn lau ínsiñehabuni (Márükosu 9:33-37).

⁶ Hínsiñetiña hisaanigu hun ani ligía subudi hubalin mosu lan harufudahan houn. Ánhaña adüga aban katei wuribati, anihein dan buídurügübei lan lau hafuranguagüdüni houn ka lan uagu mabuidun lubéi le hadügübei. Ánhañati asigira adügei katei ligía? (Ariñawagúni 22:15.) Adüga huméi le meha ladügübei Hesusu. Sigí humá adundehaña ani erereha humá houn lau gurasu. Áluaha huméi dan luma fulasu le buídubei lun hererehan houn lau ínsiñehabuni. Ayanuhatu aban Gefentu Sudáfrica gíritu Elaine luagu ligaburi harufudahan tagübürigu tun. Súnwandan meha hafuranguagüdüni tun ka lan hagurabubei túmagiñe. Kei hénpulu, wéridi hamutu anhoun lan maganbadi, habeichuboun lan. Ani gúnfuli hamuti hererun. Gama lumoun súnwandan meha hafuranguagüdüni tun ka lan uagu habeichoun, ani mabeichun hamutu lau igañi. Adügati meha katei ligía lun tachoururuni hínsiñe tan houn tagübürigu.

7, 8. a) Ka hafurendeirubei lani Hesusu disipulugu lídangiñe furíei le ladügübei? b) Dan le hafurieidun hagibugiñe hisaanigu, ida liña gayara lan harufudahan houn lun hafiñerun luagu Heowá?

⁷ Dan le meha lárügüdüwa lubéi Hesusu lun lafarún, aba lafurieidun: “Bungiu Baba, gayara bumuti sun katei; sefubána luéi uniñein gífiti le; gama lumoun mamalá kei nabusenrun, keilá babusenrun” (Márükosu 14:36). * Ka hafurendeirubei lani Hesusu disipulugu lídangiñe furíei kéiburi le? Chóuruti furendei hamani íbini lan meha mafigoun lan Hesusu, amuriahati ídemuei luma Lúguchi. Furendeitiña giñe mosu lan ǘnabugu hamá ani amuriaha hagíame ídemuei luma Heowá.

⁸ Gayaraati hafurendeirun hisaanigu saragu lídangiñe furíei le hadügübei hagibugiñe. Úati mini lan lira furíei humá lúnrügü harufudahan somu katei houn hisaanigu. Gama  lumoun, dan le hafurieidun hagibugiñe, gayaraati harufudahan houn lun hafiñerun luagu Heowá. Ida? Lubaragiñe hamuriahan luma Heowá hawagu, amuriaha humá huougua. Ariñagatu aban íbiri brasilina gíritu Ana dan le lan meha gaturóbulin hamá tagübürigu, súnwandan lan meha hamuriahan ídemuei luma Bungiu. Kéiburi dan le hasandirubei tárugutinu, súnwandan meha hamuriahan tagübürigu Ana luma Heowá lun líchugun erei luma lichú aau houn lun desidírü hamá buidu. Súnwandan meha hígiruni sun haturóbulin lúhaburugu Bungiu, íbini le hénrengutimabei. Adügati meha katei le lun tafurendeirun Ana afiñera luagu Heowá. Gayaraati hadügüni ligiaméme dan le hafurieidun hama hisaanigu. Kei hénpulu, amuriaha humá luma Heowá lun líchugun ganigi hun lun hapurichiha houn hubesinanigu o lun hamuriahan üma luma hábuti lun hidin lidan aban adamurini. Ábame harihini hisaanigu afiñe humá luagu Heowá ani ábame hadügüni ligiaméme.

9. a) Ida liña meha larufudahan Hesusu ǘnabuguni houn lani disipulugu luma lun híderagun amu? b) Anhein ǘnabugu hubéi, ani aranseñu hugíame lun híderagun amu, kaba hadüga hisaanigu?

⁹ Arufudahati meha Hesusu houn lani disipulugu lun hóuserun lau ǘnabuguni luma lun híderagun amu. Ida liña meha ladügüni? Ru lumuti hénpulu houn (aliiha huméi Lúkasi 22:27). Adügati sákürifisiu luagu Heowá luma lun líderagun amu. Ani furendeitiña giñe apostolugu adügei ligiaméme. Gayaraati giñe harufudahan houn hisaanigu lau hani hénpulu. Samina humá luagun le asuseredubei tun aban Gefentu gíritu Debbie luma lun tani weiriei, gíriti Pranas. Biámañanu hasaanigu, ani wéiyaali lidan afiñeni Pranas. Ariñagatu Debbie masandi tan ni murusun igañi luagu lásügürün tani weiriei saragu dan etenira lun damuriguaü. Chouru tumuti meha ñeinbei lan súnwandan  lun líderaguniña liduheñu dan le hemegeiruni (1 Timotéu 3:4, 5). Ka meha buiti hasagarubei hasaanigu Debbie luma Pranas lídangiñe hani hénpulu? Ariñagati Pranas gunda hamá hasaanigu ani buidu lan hanaagun houngua hama sun íbirigu. Ani súnwandan meha hídehan lidan adamurini. Uguñe weyu, sun haduheñu heseriwiduña lidan dan dayarüti. Anhein ǘnabugu hubéi ani aranseñu hugíame lun híderagun amu, hafalarubei hisaanigu hani hénpulu.

10. Ka meha ladügübei Hesusu dan le hóudinbei fiú gürigia Galiléagiñe áluahei?

¹⁰ Mafigounti meha Hesusu ani gayaraati meha lasubudiruni ka lan hasaminanbei gürigia (Huan 2:25). Ligía mama lubéi ariharügü lumuti le hadügübei, gunfuranda lumuti giñe ka lan uagu hadügei. Kei hénpulu, luagu aban weyu, háluahañein fiú gürigia galiléana Hesusu (Huan 6:22-24). Gama lumoun, subudi lumuti meha éigini lan habusenrubei, mama haganbuni. Ligía lererehanbei houn gürigia hagía lau ínsiñeni, afuranguagüdalei houn ka lan lunbei hadügüni lun hasansiruni hagaburi (aliiha huméi Huan 6:25-27).

11. a) Ka gayaraabei líderagunün asubudirei anhein hínsiñe lubéi apurichihani houn hisaanigu? b) Ka gayaraabei hadügün lúntima línsiñedun apurichihani houn hisaanigu?

¹¹ Furanguti gafigoun humá siñá ligía hasubudiruni ka lan hasaminarubei hisaanigu. Gama lumoun, gayaraati houchun lun hasubudiruni ka lan uagu hadüga fiú katei. Kei hénpulu, chóuruti furí hamá hisaanigu apurichiha huma. Álügüdagua humá hungua: “Ka uagu háfurida apurichiha? Ladüga funa san hínsiñe lan houn? O ladügarügü anihein lan dan wararamagun eiga o ata somu katei?”. Anhaün íchiga fe le lan lúgubu mínsiñe lan apurichihani houn, houcha humá hadügün lun línsiñedun houn. Ru humá dasi houn lun hasandiragun houngua hu hamá lidan apurichihani.

12. a) Ka meha lafuranguagüdübei Hesusu houn lani disipulugu? b) Ka meha uagu mosu lubéi leweridiruniña Hesusu disipulugu?

¹² Íderagua lumutiña meha Hesusu lani disipulugu lidan amu igaburi. Subudi lumuti meha anhein lan acharara aban gürigia, gayaraabei lan ladügün aban figóu le wéiritimati lárigiñe. Ligía lariñagunbei houn lani disipulugu lun lan hóunigiragun houngua. Subudi hamuti meha moun lumuti lan héiguadun lidoun figóu, kéiburi agamariduni mamarieidunga. Ligía lafuranguagüdünbalin Hesusu houn ka lan gayaraabei ladügün lun héiguadun lidoun figóu. Ariñagati: “Furumiñeguarügü [...] le awamadirutu aban würi, agabarahaali tuma tidan lanigi. ‘Ánhabu lubeiti lafigougüda bagu le bóunwenren, sagabei, fuibei buáriua’” (Matéu 5:27-29). Ka meha uagu megei habéi lani Hesusu disipulugu lun lafuranguagüdüni katei le houn? Lugundun wíyeti meha housan saragu gürigia ha geyegubaña hau, adügatiña meha magíaguni, aríagua hagía katei lánina agamariduni tidan burí tiáturu, ayanuha hagía bulagiadi. Kei le meha hínsiñe habéi lani Hesusu disipulugu lun, ligía meha lariñagunbei houn lun mayarafahóun hamá lun sun le gayaraabei ladügün lun hafigouhan.

13, 14. Ida luba gayara lan híderaguniña hisaanigu lun hadisedun luéi isebáhari le wuribati?

¹³ Mosu hóunigiruniña hisaanigu lun madügün hamá ni kata le iyereeguti lun Heowá. Híruti íbini lan irahüñü uguñe weyu gayaraati hábürühan lidoun peliguru lánina taríawagun iyawaü o bidéu lánina agamariduni o amu burí iwiyei. Ida luba hóunigiruniña hisaanigu? Furanguti mosu lan hariñaguni houn wuriba lan katei le. Gama lumoun, úati  buídurügü lan lira. Álügüdagua humá hungua: “Subuditi san houn nisaanigu ka lan uagu peliguru lubéi laríawagun katei burí le? Ka gayaraabei ladügün lun busén hamá haríaguni? Afiñetiña san nuagu lun hayanuhan numa luagu furumiñeguarügü katei? Ánhaña asandira busén hamá haríagun katei lánina agamariduni, hariñagubei san nun?”. Íbini ñǘbürigiña lan hisaanigu, gayaraabei hariñagun houn: “Anhein achülüra weyu lun badunragun tuma iyawaü lánina agamariduni lidan Internet ani busentibu baríagunu, ariñagabéi nun. Manufudedabá, madiheri buguyame, busentina níderagunibu”.

¹⁴ Danme le hanúadahan somu isebáhari húniwagua, samina humá ka lan hénpulu híchugubei houn hisaanigu. Ariñagati úguchili le uágubei layanuhóua lidan párafu 9 gayara lan hariñagun agübürigu saragu katei houn hasaanigu, gama lumoun, hadügübei isaanigu le harihibei hadügün hagübürigu. Anhaün anúadira uremu, pelikula tuma líburu to harumatu, háfuga hadügübei lan hisaanigu ligiaméme (Rómana 2:21-24).

15, 16. a) Ka uagu gayara lubéi hachoururuni líderagubadün lan Heowá lun hagüriahaniña hisaanigu? b) Kaba wariha lidan le aban arütíkulu?

¹⁵ Ka meha asuseredubei dan le lamuriahanbei Manóa ídemuei luma Heowá lun larufudahan lun lisaani? “Aba lóunabuni Wabungiute lafurieidun Manóa.” (Alidihatiña 13:9.) Ligía gayara lubéi hachoururuni laganbubei lan giñe Heowá hafurieidun ani líderagubadün lun hagüriahaniña hisaanigu. Líderagubadün lun harufuduni houn hínsiñe hamá hun, lun harufudun ǘnabuguni luma lun harufuduni houn gunfuranda humaniña.

¹⁶ Gama lumoun, mámarügüñein dan le ñǘbürigiña hisaanigu líchiga Heowá ídemuei hun. Lasigiruba íderaguaün éibume aweirideina hamá. Lidan le aban arütíkulu, warihibei ida luba lan háyeihani lani Hesusu hénpulu lun harufuduni houn hisaanigu nibureingiña hínsiñe hamá hun, ǘnabugu humá ani gunfuranda humaniña. Ítara, gayaraabei harufudahan houn lun heseriwidun lun Heowá.