Busenti Isaani lasubudiragüdüni Lúguchi

“Úati giñe ni aban subudihabúti káteiñein lan Núguchi nuéidigia hama ha úntiña nabusenra nasubudiragüdüni.” (LUK. 10:22)

KABA HAMUGA HÓUNABA?

Ka uagu meha Hesusurügüñein lubéi gayara lasubudiragüdüni ida liña lan Lúguchi?

Ida liña meha lasubudiragüdüni Hesusu Lúguchi?

Ida luba wáyeihani Hesusu lau wasubudiragüdüni Úguchili?

1, 2. Ka álügüdahani adiheridagüdübaliña saragu gürigia, ani ka uagu?

KA BÚNGIUBEI? Anihán álügüdahani le adiheridagüdübaliña saragu gürigia. Aban hénpulu, íbini afiñe hamá hibe-agei gürigia hádangiñe ha ariñagubaña hawougua kristiánugu hamá, aban lan Trinidad Bungiu, saragu hádangiñe subudi hamuti luagu aban lan arufudahani le siñati gunfurandawa lan. Abürühati aban tílana relihión tidan aban liliburun: “Aban arufudahani le ásügürübalin liyaraa wasaminan. Lóugiñeñein lichú hau gürigia”. Luéigiñe le aban oubaü, hibe-agei gürigia ha afiñebaña luagu ewolusion mafiñentiña luagu anihein lan aban Bungiu, ani ariñagatiña saliguarügü lan sun katei buídumeraüti le adügǘwarügübei lídangiñe ni kata. Mariñagunti Charles Darwin luagu ua lan Bungiu ariñagarügüti: “Genegeti nun luagu lagumuhóun lan katei le gayarabei nariñaguni aban lan tema le lóugiñebei lichú hau gürigia”.

² Meberesenga ka lan hafiñerubei hibe-agei gürigia, chülüti aban oura lun hálügüdagun houngua anhein anihein lubéi Bungiu. Gama lumoun gíbetiña gürigia aba máluahan hamani óunabagülei ladüga madaritiña lan aban le auti gufuruma hamá. Le linarün katei “daruguaali [Satanási] lubungiute ubóu le lau harihin luma hasaminan” gürigia (2 Ko. 4:4). Ligía maweiridun tubéi wanigi ladüga hásurun hibe-agei gürigia asaminara luagu Wáguchi Bungiu, Le adügübalin sun katei ani ibidiñeti ni kata houn luagu (Isa. 45:18).

3. a) Ka asubudiragüdübalin Bungiu woun? b) Kaba álügüdahani wakutiha?

³ Gama lumoun, súdiniti hafurendeiruni gürigia inarüni luagu Bungiu. Ka uagu? Lugundun hárügübaña ‘agúaruti liri Heowá’ asalbara (Rom. 10:13, NM). Lun wagúaruni iri le súdiniti wasubudiruni ligaburi Heowá buidu buidu, ítara kei meha lasubudiragüdüni Hesusu Lúguchi houn lani disipulugu (aliihoualá Lúkasi 10:22). Ka uagu buídutima lubéi ladügüni Hesusu? Ida liña ladügüni? Ida luba wáyeihani dan le wíderaguniña amu gürigia asubudirei Úguchili? Akutiha waméi álügüdahani burí le.

 HESUKRÍSTURÜGÜÑEIN GAYARA LASUBUDIRAGÜDÜNI LÚGUCHI

4, 5. Ka uagu Hesusurügüñein lubéi gayara lasubudiragüdüni Úguchili?

⁴ Hesukrístu aransetimabei meha lun lasubudiragüdüni Lúguchi. Ka uagu? Lugundun ligía furumiñeti gabagariti le ladügübei Bungiu; aban meha sífiri gürigia ligía lubaragiñe lawinwandun kei wügüri ubouagu, ligía meha “Liráü Bungiu le ábanrügüti” (Huan 1:14; 3:18). Ma lubuidun ubaraü! Lubaragiñe ñein lan amu gürigia gabagariti, gúndaati meha Irahü lau línsiñehabu luma letenirun Lúguchi lun ani lafurendeiruñein meha ligaburi luma lóuserun Lúguchi. Chóuruti, ayanuha lan Úguchili furangu luma Irahü lidan míñunu míñunu irumu ani aba hínsiñegua hamá hámagua saragu (Huan 5:20; 14:31). Furanguti subudi lan meha ligaburi Úguchili buidu buidu lun Irahü (aliihoualá Kolosana 1:15-17).

⁵ Anúadira lumuti Úguchili Irahü lun ladimurehan luagu, ligía lagúarunbei lun “Lererun Bungiu” (Aruf. 19:13). Ligíati, ligíarügüñein gayara lasubudiragüdüni, o larufuduni, ida liña lan Úguchili. Ligía lariñagunbei Huan luagu Hesusu tidan Ewanhéliu to labürüdüboun “le Dimureibei” ñeinñein meha ‘yarafa tun lanigi’ Úguchili (Huan 1:1, 18). Lau burí dimurei le layanuhóuña luagu aban binadu échuni lánina lañuurun aban gürigia le amisurahóubei éiga lóubagiñe le amisurahabalin lidan ligiaméme haláü, lun gayara lan hayanuhan hámagua sin eberesehani. Ítarameme lueirin liyarafan Irahü tun lanigi Úguchili adügati meha lun gayara lan hayanuhan hámagua buidu.

6, 7. Ida liña éredeina lan lumadagua Úguchili luma Irahü?

⁶ Eibu meha abuidureina lan hamadagua, ruti Irahü ugundani lun Úguchili sun dan ligía (Ari. 8:30, 31). Kei lasuseredun lidan ókaasion ítarati, ábatima léredun umadaguaü haganagua eibu lawadigimaridun Irahü lóubawagu Lúguchi aba giñe láyeihani ligaburi. Chóuruti aba laweiridun ínsiñeni le lasandirubei Irahü luagu ligaburi Bungiu, dan le meha laríaguni ida liña lan lóuseruni Heowá kada ánheli luma kada gürigia.

⁷ Danbei le lasigeneruni Satanási liricha Heowá lun larúeihan, gachansinti Irahü lun larihini ida liña lan larufuduni Lúguchi línsiñehabu, liricha, lichú lau luma lubafu lidan óunwenbu turóbuli ligía. Chóuruti furendei lan Irahü ida luba lan buga lararamun lun lénrengunga le úmabei lagagibudagua danbei liabin ubouagun (Huan 5:19).

8. Ka uagu íderagua lumutiwa lubéi abahüdaguni le tídanbei Ewanhéliu lun buídutima lan gunfuranda wamani ligaburi Úguchili?

⁸ Seremei lun lubuidun umadaguaü le lánibei Irahü luma Heowá, Irahürügüñein gayara lafuranguagüdüni buidu ida liña lan Úguchili. Ligíati, lakutihóuniwa le lariñagubei luma le ladügübei Irahü, ligía manera le buídutimabei lun wasubudiruni Úguchili. Aban hénpulu, samina wamá luagu lénrengu hamuga gunfuranda wamani buidu le mini lubéi dimurei ínsiñeni lúnrügü waliihani le mini lubéi tidan aban dimurei-agei. Gama lumoun dan le wasaminarun luagu abahüdaguni le burí tídanbei Ewanhéliu le ayanuhabei luagu lani Hesusu ministeriu luma le lasandirubei hawagu gürigia, aba gunfurandatima wamani dimurei “ínsiñeni Bungiu” (1 Huan 4:8, 16). Ani ligiaméme asuseredubei lau le líbiri ligaburi Bungiu le larufudubei Kristu houn lani disipulugu.

ARUFUDA LUMUTI HESUSU IDA LIÑA LAN LÚGUCHI

9. a) Ka bián manera ídanbei larufudei Hesusu ligaburi Lúguchi houn lani disipulugu? b) Írida humá aban hénpulu le ídanbei larufudei Hesusu lau le larufudahabei ida liña lan Lúguchi.

⁹ Ida liña larufuduni Hesusu ligaburi Lúguchi houn furumiñetiña lani disipulugu, luma giñe houn ha afalarubalin dan lárigiñe? Adüga lumuti lidan bián manera: lau larufudahan luma lau le ladügübei. Ayanuha wamá furumiñe luagu le larufudahabei, lidan larufudahan arihatiwa luagu weiri lan gunfuranda lani ligaburi lisaminan, le lasandirubei luma lóuserun Heowá. Aban hénpulu, konpararü lumuti Lúguchi luma aban hóuniri mudún hínsiñehabuti le ñǘdünbei áluahoun aban hádangiñe lilügüniña mudún to eferidirutu ani dan le ladeirunu ‘gúndaati tau sügǘ hau ha mayuridagunbaña’. Ida liña layusuruni Hesusu hénpulu le lun larufudahan? Ariñagati Hesusu: “Mabusenrunti  Húguchi Bungiu le siélubei lun leferidirun ni aban hádangiñe ǘnabugutiña ha.” (Mat. 18:12-14.) Ka gayarabei wafurendeirun luagu Heowá lau hénpulu le? Furendeitiwa íbini lan wasandirun luagu mebegi wamá ani bulíeiwaadiwa lan, bereseti Wáguchi le siélubei wau, lugundun hádangiñetiwa “ǘnabugutiña” ha uágubaña layanuha Hesusu.

10. Ida liña larufuduni le ladügübei Hesusu ligaburi Lúguchi?

¹⁰ Lau le ladügübei ligía libiaman manera le ídanbei larufudei Hesusu ligaburi Lúguchi houn ha afalarubalin. Ligíati, danbei le lamuriahan apostolu Felipe luma lun larufuduni Úguchili houn, aba lóunabuni: “Le arihitina, larihiñein giñe Bungiu Úguchili” (Huan 14:8, 9). Ariha wamá fiú hénpulu le ídanbei larufudei Kristu ligaburi Bungiu. Danbei le lamuriahan “aban wügüri gawaguti lépüra” luma lun lareidaguagüdüni, aba laguuruni ani aba lariñagun lun: “Busentina, areidaguabá”. Chóuruti ariha lani gawaguti lépüra ligía, lúhabu Heowá lidan le ladügübei Hesusu (Luk. 5:12, 13). Ani danbei le lounwen Lásaru, ariha hamuti disipulugu lugudemehabu Bungiu lidan Hesusu dan le “lírudagun tidan lanigi [...] aba layahun”. Íbini subudi lani luagu láguyuguagüdübei lan, ñuluguagüda lumutu lanigi larihini igarigu le hasandirubei liduheñu hama lumadagu óunweti (Huan 11:32-35, 40-43). Chóuruti anihein lan somu lídangiñe burí abahüdaguni le hínsiñetimati woun, le íderagubaliwa arihei Wáguchi le gudemehabubei lidan le ladügübei Liráü.

11. a) Ka larufudubei Hesusu luagu Lúguchi danbei labugaguniña alugurahatiña tídangiñe ténpulu? b) Ka uagu ru lubéi abahüdaguni le dǘgüdaguaü woun?

¹¹ Lidan ámuya ókaasion aba ladügün Kristu aban abeihagülei lau gúrudu, ábati labugaguniña alugurahatiña bágasu hama mudún tídangiñe ténpulu aba lachagaraguni haseinsun ha asansihabaña seinsu múarugun garabagualéi hadabulan (Huan 2:13-17). Ka wafurendeirubei lídangiñe le? Le ladügübei haritaguagüda lumutiña disipulugu luagu le lariñagubei urúei Dawidi lidan aban profesía: “Lagumuchaguagüdüñadina nemeidin tau buban” (Sal. 69:9). Dan le ladügüni katei le, arufuda lumuti Hesusu weiri lan labusenrun lageindagun luagu lufulesein áhuduraguni inarüniti. Ariha wamuti san lidan abahüdaguni le, ida liña lan larufuduni ligaburi Lúguchi? Mámarügü luagu mébeha lan lubafu Bungiu lun lagumuchun lau wuribani ubouagugiñe laritaguagüdawa abahüdaguni le, haritaguagüda lumutiwa giñe luagu wéiriti lan layumahan ladügüni. Ligaburi lóunabun Hesusu arufuda lumuti woun ida liña lan lasandiragun Úguchili lungua dan le larihin gíbetimahali lan wuribani ubouagu uguñe weyu. Ma ruti dǘgüdaguaü gabaroun wamani le, dan le ladügǘn marichaü woun?

12, 13. Ka larufudubei ligaburi meha lóuseruniña Hesusu lani disipulugu woun luagu Heowá?

¹² Ariha wamá amu hénpulu lidan ligaburi lóuseruniña Hesusu lani disipulugu. Magumuti meha hasigenehan luagu ka lan súdinitimabei hádangiñe (Mar. 9:33-35; 10:43; Luk. 9:46). Lau sun dan le lásügürübei luma Lúguchi subudi lumuti Hesusu buidu ka lan lasaminarubei luagu anaaguni unguaü (2 Sam. 22:28; Sal. 138:6). Ariha lumuti giñe ida liña lan meha larufudun Satanási barüguati lan lungua, aban gürigia le asaminarubei luouguounrügü le meha wéiribei layumahan ubafu luma lun iñu lan lanügǘn. Ligíati, wéiriti funa ligari lun Kristu larihini ligiaméme igaburi hadan lani disipulugu, ha meha únbaña larufudaha saragu, íbini ha lanúadirubaña lun lánigu hamá apostolugu arufuda hamuti igaburi güridíti le, íbini lagumuhóun weyu lánina libagari Hesusu ya ubouagu (Luk. 22:24-27). Gama lumoun, mabuchati luagu arufudaha houn lau ínsiñeni ani meferidirun lumuti lemenigin luagu hafurendeiruba lan buga áyeihei ǘnabuguni le larufudubei (Fili. 2:5-8).

¹³ Ariha wamuti san ligaburi Úguchili lidan saragu gurasu le aubei larufudaha Hesusu houn lani disipulugu, wuribati lan igaburi le harufudubei? Lidan lererun Kristu luma le ladügübei ariha wamuti san Úguchili, le míchugunbalin lanagan hawagun lubúeingu íbini hachararun lun saragu wéiyaasu? Dan le wasaminarun luagu ligaburi Bungiu, ma ínchaha lumutiwa arufudei lun, asaküriha wamá luagu charati le wadügübei?

 GÚNDAATI IRAHÜ LUN LASUBUDIRAGÜDÜNI LÚGUCHI

14. Ida liña meha larufuduni Hesusu gunda lan lun lasubudiragüdüni Lúguchi?

¹⁴ Gíbetiña urúeigu ha agumadihabaña hábuguarügü akipurutiña lílana ageiraü lábugiñe habafu, luéi híchugun fe luagu katei le asusereduti. Gama lumoun, mítaranti Hesusu, mánginti meha lun lasubudiragüdüni saragu lídangiñe katei le lasubudirubei luagu Lúguchi (aliihoualá Lúkasi 10:22). Ariñagati aban hádangiñe lani disipulugu: ‘Rúhali gunfurandaü woun lun wasubudiruni Bungiu le tímatimaati’ (1 Huan 5:20). Kati mini lubéi le? Aba lan ladaaruni Hesusu hasaminan lun gayara lan gunfuranda hamani le lariñagubei houn luagu Úguchili. Maramudun lumuti Hesusu Heowá hawéi gürigia lau larufudahan houn luagu ǘrüwañein lan Bungiu lidan aban, le siñati gunfurandawa lan.

15. Ka uagu mariñagun lubalin Hesusu sun le lasubudirubei luagu Lúguchi?

¹⁵ Ariñaga lumuti san Hesusu sun le lasubudirubei luagu Lúguchi? Uá, gíbeti katei mariñagun lumuti (aliihoualá Huan 16:12). Ka uagu? Ligía guánarügü afuranguagüdübalin dan le lariñagun houn lani disipulugu: “Hásiñarubei gunfuranda guentó”. Gama lumoun, afuranguagüdati houn luagu gunfurandabaña lan buga saragu katei danme lachülürün le lunbei ‘líderaguniña’, sífiri sandu, le meha lunbei ladundehaniña lidoun “sun inarüni” (Huan 16:7, 13). Ítara kei hagurabun agübürigu buítiña lun haweinamudun hasaanigu lun gayara lan gunfuranda hamá somu katei lubá hariñaguni houn, mariñagun lumuti meha giñe Kristu somu burí katei luáguti Lúguchi houn lani disipulugu, darí dan le derebuguhaña lidan hafiñen ani gayara ligía gunfuranda hamani. Lau ínsiñeni gabaroun lumuti lébeha le hayaraabei adüga.

ÁYEIHA WAMÉI HESUSU ÍDERAGUAÑA GÜRIGIA ASUBUDIREI HEOWÁ

16, 17. Ka uéigiñe wariñaga resibi háadiwa lan aban lubuidun chansi lun wasubudiragüdüni ida liña lan Úguchili?

¹⁶ Dan le wasubudirun aban gürigia le buiti ligaburi ani gebegi ligía wama, ma busentiwa wayanuhan luagu? Ligía meha ladügübei Hesusu danbei ya lubéi ubouagu: ayanuhati luagu Lúguchi (Huan 17:25, 26). Gayarati san wáyeihani lau wasubudiragüdüni houn gürigia ida liña lan Heowá?

¹⁷ Kei warihini, subudi lumuti meha Hesusu Lúguchi luéi furumiñeguarügü gürigia, ani mánginti lau le lasubudirubei. Ru lumuti lichú aau le hemegeirubei lani disipulugu houn lun gunfuranda hamani somu burí katei huliliti luagu ligaburi Bungiu. Seremei lun Kristu, subuditima wamaali Heowá sügǘ lau hasubudiruni hibe-agei gürigia uguñe weyu, ani wéiriti weteingiruni luagu larufudahan luma le ladügübei lau sun lugundan lun lasubudiragüdüni woun ida liña lan Lúguchi. Le linarün katei, gayarati wapantahan lau wasubudiruni Bungiu (Her. 9:24; 1 Ko. 1:31). Kei áfaaguaadiwa lubéi lun wayarafadun lun Heowá, yarafaali giñe woun (Sant. 4:8). Ligíati, resibitiwa aban lubuidun chansi lun wasubudiragüdüni le subudi wamaalibei luagu Bungiu. Ida luba wadügüni?

18, 19. Ka burí manera ídanbei gayara lan wasubudiragüdüni Úguchili? Afuranguagüda huméi hóunabagüle.

¹⁸ Lunti wáyeihani Hesusu lau wasubudiragüdüni houn gürigia ida liña lan Úguchili, lau wererun luma lau le wadügübei. Gabaroun waméi ibidiñe lan houn saragu hádangiñe gürigia ha únbaña wapurichiha ida liña lan Bungiu. Gayarati adüga lan arufudahani le mama inarüniti lun hasaminarun gürigia aban katei le iyeeniti luagu Bungiu. Gama lumoun, gayarati warufuduni houn le wasubudirubei luagu liri, lisuuni luma ligaburi Bungiu según tarufuduni Bíbülia. Luéigiñe amu oubaü, buiti lun wayanuhan hama íbirigu lidan afiñeni luagu abahüdaguni tídangiñeti Bíbülia le arufudubalin ida liña lan ligaburi Bungiu lidan aban manera le marihinñaha wamagili. Ítarati huubei giñe houn.

¹⁹ Agiati lun wasubudiragüdüni Úguchili lau wáfaagun lun lítaradun le wadügübei luma le meha ladügübei Hesusu? Danme harihini amu gürigia luagu arufuda wamuti lan línsiñehabu Kristu lidan sun le wadügübei, busenbaña hayarafadun lun Úguchili luma lun Irahü (Efe. 5:1, 2). Ariñagati apostolu Pábulu woun: “Áyeiha humana keisi náyeihani Kristu” (1 Ko. 11:1). Resibi wamaali óunwenbu chansi lun wíderaguniña gürigia arihei ligaburi Heowá le warufudubei lidan le wadügübei. Ligíati, sigí wamá áyeihei Hesusu lau wasubudiragüdüni houn amu ida liña lan Úguchili.

[Alügüdahani lánina aturiahani