Góunigi lumutiwa Heowá lun wasalbarun
Góunigi lumutiwa Heowá lun wasalbarun
“Góunigi lumutiwa Bungiu lau lubafu ladüga afiñe wamá luagu, lun gayaraabei lan wabihini asalbaruni.” (1 FE. 1:5)
KABA HAMUGA WÓUNABA?
Ida liña lanügüniwa Heowá lidoun relihión inarüniti?
Ida liña wígirun lun ladundehaniwa Heowá?
Ida liña líchugun Heowá dǘgüdaguaü woun?
1, 2. a) Ka uagu gayara lubéi wachoururuni líderagubadiwa lan Heowá akipura úaraguni? b) Darí halía lebeda lasubudiruniwa Heowá?
“LE ÁFAAGUTI darí lumoun lagumuhóun, ligíaba asalbara.” (Mat. 24:13.) Dan le lariñaguni Hesusu dimurei le, arufuda lumuti furangu lun lan werederun wínwanñu lárigiñe abeichúni le lunbei lanügüni Wáguchi Bungiu luagun ubóu le lábugiñebei lubafu Satanási, mosu wakipuragun úaraguni darí lumoun lagumuhóun. Úati mini lan dimurei le aguraba lan Heowá lun wawandun láurügü were luma lichú wau. Chóurugüda tumuti Bíbülia katei le woun: “Gúnfuliti Bungiu, mígirunbei lun hibihin óuchawaguni le hásiñarun awanda. Lubaragiñe lira, danme liabin óuchawaguni, larufudubei giñe Bungiu hun ida luba lan háfuridun lídangiñe; ítara luba gayara lan hawanduni” (1 Ko. 10:13). Ka mini lubéi dimurei le?
2 Lun wawandun ani lun mígirun lan Heowá lun wibihin óuchawaguni le wásiñarun awanda mosu lasubudiruni sun wawaguti, kéiburi lénrengunga le wasufurirubei, wagaburi luma le wayaraabei awanda. Gama lumoun, inarüni san subudi lániwa Heowá buidu? Chóuruti ítara liña lan. Arufuda tumuti Bíbülia subudi lani sun luáguti kada aban wádangiñe. Subudi lumuti ka lan wadügübei sagü weyu luma ka lan wéchunbei. Darí lun aliiha lani wasaminan ani ariha lumuti ka lan wabusenrubei wadügün (aliihoualá Sálumu 139:1-6).
3, 4. a) Ida liña larufuduni abahüdaguni luagu Dawidi berese lan Bungiu lau kada gürigia? b) Ka katei hanarimeti lubuidun ladügübei Heowá uguñe weyu?
3 Ma wéiritu wanigi lau wasubudiruni weiri lan lebereserun Bungiu hau gürigia ha ǘnabubaña? Ligiaméme álügüdahani ladügübei Dawidi lun Heowá: “Dan le narihini sielu le badügübei, luma hati hama waruguma ha bíchugubaña ñein, aba nasaminarun núnguarügü: Kátañanu san wügüriña lun basaminaruba lan hawagun?” (Sal. 8:3, 4). Másiñati luougua lan lasaminara Dawidi dan le ladügüni álügüdahani le. Íbini ligía lan meha lagumuhóun liráü Hesé, ariha lumuti Heowá kei ‘aban wügüri le auti lagundaara’ ani aba lagidaruni ‘luéi léibugun hárigi hárigi mudún’ lun ‘hábutibei lan lumutuniña’ (1 Sam. 13:14; 2 Sam. 7:8). Samina humá ida liña lan meha lasandiragun Dawidi lungua ladüga letenirun Bungiu le adügübalin sun katei, lun le lasaminarubei aban hóuniri mudún le nibureingili kei meha ligía.
4 Aba giñe taweiridun wanigi lau larufudun Heowá berese lan wau ítara kei meha lebereserun lau Dawidi. Yusu lumuti Heowá relihión le inarünibei lun lóundaraguniña gürigia gebegitiña ha lídangiñetiña sun néchani, ani líderaguñanu akipura úaraguni lidan heseriwidun lun (Ahe. 2:7). Lun gayara lan gunfuranda wamani ida liña lan líderaguniwa Heowá akipura úaraguni, akutiha waméi furumiñe ida liña lan lanügüniña Heowá gürigia lidoun áhuduraguni inarüniti.
BARǗ LUMUTIWA BUNGIU LUMOUN LIRÁÜ
5. Ida liña lanügüniña Heowá gürigia lumoun Liráü? Afuranguagüda huméi lau aban hénpulu.
5 Ariñagati meha Hesusu: “Siñati liabin ni aban numoun anhein mama lubéi lanügün Bungiu Úguchili le óunahabalina” (Huan 6:44). Arufudati dimurei le megei wamuti lan lídehan Bungiu lun lánigu wamá Kristu disipulugu. Ida liñati lanügüniña Heowá gürigia ǘnabugutiña kei aban mudún lumoun Liráü? Yusu lumuti apurichihani luma lani sífiri sandu. Aban hénpulu, danbei lidin Pábulu hama amu misionerugu Filipu, aba hadeirun aban würi gíritu Lidia aba híchuguni uganu buiti tun. Ariñagatu Bíbülia: “Aba ladaarunu Bungiu tanigi lun tadügün gasu lau le lariñagubei Pábulu”. Kei aubei warihei ru lumuti meha Bungiu lani sífiri sandu tun lun gunfuranda tani uganu buiti, adügati katei le lun tabadiseirún hau sun tílana tuban (Adü. 16:13-15).
6. Ida liña lanügüniwa Bungiu lidoun áhuduraguni inarüniti?
6 Túnrügüñein san Lidia lasusereda katei le? Uá. Anhein deregeguaadiwa lubéi woungua lun Heowá, ligía anügübadiwa lidoun áhuduraguni inarüniti ítara kei meha ladüga tun Lidia. Ani ítara kei meha larihini Wáguchi le siélubei lubuidun igaburi le tuágubei Lidia, ariha lumuti giñe lubuidun igaburi le wawagubei. Danbei le wagumeserun aganbei uganu buiti aba líchuguni Heowá lani sífiri sandu woun lun líderaguniwa lun gunfuranda wamani (1 Ko. 2:11, 12). Dan le wáfaagun lun wawinwanduni le wafurendeirubei luma lun wadügüni lugundan, biní lumutiwa Bungiu. Ani dan le wederegerunbalin wabagari lun, aba lagundaarun saragu. Le linarün katei, lúmagiñebei wagumeserun éibuga lidan üma le anügübei lidoun ibagari, ñeinñein Bungiu luma kada aban wádangiñe íderaguawa sun dan.
7. Ida liña wasubudiruni líderagubadiwa lan Heowá lun úaragua wamá lun?
7 Lúmagiñe líderaguniwa Heowá lun wagumeserun adügei lugundan mígiragüdün lumuti wáhabu. Subudi lumuti luagu ítara lan kei mebelurun wamá wábuguarügü lidoun inarüni siñati giñe wasigirun lidan inarüni wábuguarügü. Dan le layanuhan Féduru hama kristiánugu anuadirútiña, aba lariñagun: “Góunigi lumutiwa Bungiu lau lubafu ladüga afiñe wamá luagu, lun gayaraabei lan wabihini asalbaruni le aranse láalibei wabá, le lunbei larufuduni lídounme lagumuhóun dan” (1 Fe. 1:5). Huuti giñe dimurei le houn sun kristiánugu, ani lunti webereserun kada aban wádangiñe lau. Ka uagu? Lugundun súngubei wagía megei wamuti lídehan Bungiu lun wakipurun úaraguni.
GÓUNIGI LUMUTIWA BUNGIU LUÉI WÁBÜRÜHAN LIDOUN FIGÓU
8. Ka uagu lunti lubéi wáfaagun lun mábürühan wamá lidoun figóu?
8 Dandu lénrengunga lidan wabagari kei wafigoun guánarügü gayarati ladügün lun metenirun wamá buidu lun weseriwidun lun Heowá. Ani sin wíchugun fe gayarabei ladügün katei le lun wábürühan lidoun figóu (aliihoualá Galasiana 6:1). Ariha waméi ida liña lan larufuduni aban sügǘ lidan libagari Dawidi katei le.
9, 10. Ka ladügübei Heowá lun leredehani Dawidi luéi lábürühan lidoun figóu, ani ida liña líderaguniwa uguñe weyu?
9 Arufudati Dawidi ragüguaü unguaü ani magiribudagüdünti wuribani luagu wuribani lun Saulu urúei gimugati, danbei le léibaahani (1 Sam. 24:2-7). Gama lumoun, fiú dan lárigiñe aba lígiraguagüdün lungua lun figóu. Kei meha megei lubéi éigini lungua, luma houn luwügüriñanigu, lau inebesei aba lamuriahan ídemuei luma aban ísüraelina gíriti Nawali. Dan le lóunabuni wügüri le lau minebeni, aba lagañidun Dawidi saragu darí lun desidírü lan lagumuchun hau sun tílana luban Nawali. Masaminarunti luagu anhein lan ladüga katei le, larihibei lan buga Bungiu kei aban gürigia le áfarahabei gürigia maduruntiña. Seremei tidin Awigaili to lani Nawali weiriou, ayanuha luma madügün lubalin lanarime katei le. Subudi lumuti Dawidi Heowá lan óunahabarun, ligía lariñagunbei tun: “Biniwati Wabureme le Lubungiute Ísüraeli, ladüga lóunahanibu nubaroun, biniwatibu giñe luagu lubuidun baritagun, lugundun rédeibaadina uguñe luéi náfarahan, luma luéi nafayeiragüdün luagu wuribani le adügǘbei nun lau núhabu guánarügü” (1 Sam. 25:9-13, 21, 22, 32, 33).
10 Ka wafurendeirubei lídangiñe abahüdaguni le? Yusu lumutu Heowá Awigaili lun lerederuni Dawidi luéi lábürühan lidoun figóu. Ani uguñe weyu yusugili amu gürigia lun líderaguniwa. Gama lumoun, moun lumuti wagurabun lóunahaba lan Bungiu aban gürigia lun leredehaniwa sagü wacharara lan. Moun lumuti giñe wasaminarun subudi wamani kaba lan ladüga Heowá lidan kada katei le asusereduti o kaba lan lígira lun lasuseredun lun lagunfulirun lisuuni (Apur. 11:5). Gama lumoun, gayarati wachoururuni súnwandan lan lasubudiruni Heowá le gádanbaliwa ani líderagubadiwa akipura úaraguni lun. Füramaseti woun: “Buágunñein narihin. Narufudahaba bun; níchuguba dimurei buíduti bun; narufudubei üma le lunbei bafalaruni bun” (Sal. 32:8). Ida liña larufudahan Heowá woun ani ida luba wasagarun buiti lídangiñe? Ka uagu gayara lubéi wachoururuni ladundehañanu lan Heowá lumutuniña uguñe weyu? Ariha waméi lóunabagüle álügüdahani le tidan líburu Arufudúni.
DARUGUATI BUNGIU WAU LAU LADUNDEHANIWA
11. Darí halía lébeda le lasubudirubei Heowá luagu le asuseredubei lidan burí damuriguaü?
11 Lidan arufudúni le adarirubei lidan kapítulu 2 luma 3 tidan líburu Arufudúni, aba líchuguni Hesukrístu larihin, lárigiñe láguyugun, luagun sedü damuriguaü le meha lídanbei Liraüraü Asia lun lasubudiruni ka lan asuseredubei ñein. Arufudati arufudúni le, mámarügüñein lan turóbuli wéinamuti lariha, teniti giñe Kristu lun burí katei le ñǘraütimati. Darí lun lariñaguni hiri fiú gürigia, ani ruti gurasu houn súngubei luma adundehani le lemegeirubei kada damuriguaü. Ka wafurendeirubei lídangiñe katei le? Gúnfuliti arufudúni le, lúmagiñe irumu 1914. Sedü damuriguaü to arihiboun lidan arufudúni le, mini tan kristiánugu anuadirútiña, ani huuti adundehani le líchugubei houn, lun sun burí damuriguaü le ñein habéi lubúeingu Bungiu lidan sun ubóu uguñe weyu. Gayarati wasaminarun yusu lumuti lan Heowá Liráü lun ladundehaniña lumutuniña. Ka lunbei wadügüni lun wasagarun buiti lídangiñe adundehani le líchugubei?
12. Ida liña wígirun lun ladundehani Heowá wémeri?
12 Waturiahanu Bíbülia woungua ligía aban manera lun weresibiruni adundehani le líchugubei Heowá lau ínsiñehabuni. Yusu lumutu agumeiraguagüdüni to ladügüboun musu úaraguati lun líchugun saragu adundehani tídangiñeti Bíbülia woun (Mat. 24:45). Anhein busén wabéi wasagarun buiti lídangiñe, mosu wígirun dan lun wakutihani ani lárigiñe ábame wawinwanduni. Le linarün katei, yusu lumuti Heowá aturiahani le wadügübei wábuguarügü lun lóunigiruniwa luéi ‘wéiguadun lidoun figóu’ (Hud. 24). Saminadün san lidan aünha lan aturiahei somu fánreinti tídangiñe agumeiraguagüdüni, huagun lan lasamanirua dan le labürüdǘnbei? Anhein ítara liña lubéi, ariha huméi kei aban adundehani lúmagiñeti Heowá. Anihein dan gayarati ladunruni aban humada hege lun larufuduni somu katei le madügün hubéi buidu. Ítarameme, gayarati layusuruni Heowá lani sífiri lun larufuduni hun o houn amu lubúeingu anihein lan somu katei lidan higaburi luma hóuserun le lunti hasansiruni. Anhein gaganbadi wabéi lau ǘnabuguni lun adundehani le líchugubei sífiri sandu, wígiruba lun ladundehani Heowá wémeri (aliihoualá Sálumu 139:23, 24). Lau katei le lidan wasaminan, buídubei lun waríagun woungua lun warihini anhein hechu wabéi aturiaha.
13. Ka uagu buidu lubéi lun warihini anhein hechu wabéi aturiaha?
13 Anhein gibe lubéi dan wígirun lun isebáhari madaani báadiwa lun waturiahan wábuguarügü. Ariñagati aban íbiri: “Ménrengunti bígiruni baturiahan. Uguñe weyu sügǘ luéi amu dan ménrengun haali badeirun isebáhari ani meserunti giñe. Gayarati wadeirun isebáhari tidan bigibigitu, konputadora, gágamuru. Gayarati wadeiruni lidan sun fulasu”. Ánhawa móunigi, alouguadeina lubá dan le wígirubei lun waturiahan wábuguarügü buidu buidu, darime lun madaani háadiwa lanme lun wadügüni (Efe. 5:15-17). Buiti lun wálügüdagun woungua: “Áluahatina san dan lun naturiahanu Lererun Bungiu buidu buidu? Odi dánrügüñein gayanun nan lidan adamuridaguni nadügei?”. Anhein ítara liña lubéi, lunti wayusuruni guñoun le ídanbei waturiaha kei familia o wábuguarügü, lun gayara lan wasagarun buiti lídangiñe lichú aau le tídanbei Bíbülia le ítarabei kei irisini, le líchugubei Heowá woun lun lóunigiruniwa lun gayara lan wasalbarun (Ari. 2:1-5).
ÓUNIGIRA LUMUTIWA BUNGIU LAU LÍCHUGUN DǗGÜDAGUAÜ WOUN
14. Ida liña tarufuduni Bíbülia teni lan Heowá lun le wasandirubei?
14 Gíbeti lénrengunga le úmabei ladunragua Dawidi lidan libagari (1 Sam. 30:3-6). Dimurei le labürüdübei lau ladundehan lani Bungiu sífiri arufuda lumuti subudi lumuti lan meha Heowá buidu ida liña lan lasandiragun lungua (aliihoualá Sálumu 34:18 luma 56:8). Ani subudi lumuti giñe buidu ida liña lan wasandiragun woungua. Dan le weiri lan íruni wasandirun ani ‘gáritu wasandirunu wanigi’ o dan le ‘féridi wamaali wemenigin’ aba layarafadun Bungiu woun. Ruti katei le dǘgüdaguaü woun, ítara kei meha lun Dawidi, le ariñagubei lidan uremu le labürüdübei: “Barüti bínsiñehabu ugundani nun . Ariha baali nirun, subudi bumuti nidiheri” (Sal. 31:7). Gama lumoun, mama subudirügü lumuti Bungiu waturobulin, ágüdaha lumutiwa lau líchugun dǘgüdaguaü luma gurasu woun. Ani wadamuridagun keisi kristiánugu aban lídangiñe katei le layusurubei lun ladügüni.
15. Ka wafurendeirubei lídangiñe le asuseredubei lun Asafü?
15 Íderagua lumutiwa le asuseredubei lun Asafü gunfurandei ka lan uagu súdini lubéi woudin lidan adamuridaguni. Arihati meha fádiri le saragu marichaü darí lun lasaminarun úati lan hu lan láhuduragun lun Bungiu ani aba giñe leferidiruni luguraasun. Ariñagati: “Buin niña buga lau íruni sandí au igarigu tidan nanigi”. Ladüga katei le ítagaraü yebe lígiruni leseriwidun lun Heowá. Ka íderagubalin asansirei lisaminan? Ligía guánarügü ariñagubei aba lan ‘lebelurun lúbiñoun Bungiu’. Lúbiñe Bungiu, geyegu hau líbirigu lidan afiñeni aba lasansiruni ligaburi larihini katei. Aba gunfuranda lani madurabei lan lubuidun hadaani ha wuribabaña lun súnwandan ani laransehabei lan Heowá sun katei (Sal. 73:2, 13-22). Uguñe weyu susereti giñe aban katei ítarati woun. Gayarabei wasandiragun woungua buchá lan wawagu awandei marichaü le lídanbei ubóu le lábugiñebei lubafu Satanási. Gama lumoun, dan le wadamuridagun úara hama wíbirigu resibitiwa dǘgüdaguaü luma ídemuei lun wasigirun eseriwida lun Heowá lau ugundani.
16. Ida liña lahuudun tani Ana hénpulu woun?
16 Gama lumoun, anhein anihein lubéi somu katei asusereduti lidan damuriguaü le adügübei lun gürewei lan woudin adamuridagua? Másiñati sandí wamá busiganu ladüga ígira wamá lan somu buligasion lánina eseriwiduni. O másiñati giñe gaturobulin wamá luma o tuma aban íbiri. Anhein ítara liña lubéi, huubei tani Ana hénpulu woun (aliihoualá 1 Samueli 1:4-8). Haritagua wamá luagu weiri lan meha tasufurirun ladüga gaturobulin tan tuma Peniná to tubuyamun. Ani aba laweiridagun turóbuli sagü houdin adagaragüda lun Heowá tidan sanduariu to Silóboun, kei hadügüni meha sagü irumu. Wuribati meha tásügürüni Ana darí lun ‘aba lan tayahun, ani méigintu’. Gama lumoun, mígiruntu lun ladügün katei le lun máhuduragun tan lun Heowá, le arihibalin buidu buidu luagu úaragua tan ani aba labinirunu (1 Sam. 1:11, 20).
17, 18. a) Ida liña weresibirun dǘgüdaguaü lidan adamuridaguni? b) Ida liña hasandiragun hungua luagu ligaburi lóunigiruniwa Heowá lau ínsiñeni lun líderaguniwa asalbara?
17 Keisi kristiánugu gánitiwa resun buiti lun wáyeihani tani Ana hénpulu. Mégeitiwa wachülürün lidoun sun wadamuridagun, lugundun lidan weresibirei dǘgüdaguaü le wemegeirubei (Ebü. 10:24, 25). Ruti hínsiñehabu luma hamadagua wíbirigu dǘgüdaguaü woun. Gayarati laguurunu somu dimurei le ariñawagúbei lidan aban yanu wanigi, o aban lan hóunabagüle wíbirigu. Gayarati giñe laganbuniwa somu íbiri o lariñagun dimurei burí le ruti dǘgüdaguaü woun dan le wayanuhan luma lubaragiñe o lárigiñe adamuridaguni (Ari. 15:23; 17:17). Iseridaguagüda lumuti were weremuhan úara hamá wíbirigu lun walawahani Heowá. Le linarün katei, dan le ‘lagibedagun idiheri wasaminanrugu’, ligíatima wemegeiruni dǘgüdaguaü le weresibirubei lidan adamuridaguni. Lidan adamuridaguni, ‘ruti Heowá dǘgüdaguaü woun luma ugundani’ ani adügati lun busentima wamá wakipurun úaraguni (Sal. 94:18, 19).
18 Kei chouru wabalin óunigira lumutiwa lan Bungiu lau ínsiñeni, sandiguatiwa woungua kei Asafü, le meha eremuhabei: “Ragǘ baali núhabu le nóunwenren, alidiha báadina lau barufudahan nun” (Sal. 73:23, 24). Ma lueirin weteingiruni Heowá luagu lóunigiruniwa lun gayara lan wasalbarun!
[Álügüdahani lánina aturiahani]
[Iyawaü to lídanboun páhina 29]
Barǘ laadün Heowá lúmaguoun
[Iyawaü to lídanboun páhina 30]
Adundehani le líchugubei Heowá woun lunti lóunigiruniwa
[Iyawaü to lídanboun páhina 31]
Ágüdaha lumutiwa dǘgüdaguaü le weresibirubei
