Aban san meha lubúein Bungiu hugía? Saminadün san hagiribudun ani machouruntün leresibirubadün lanya Heowá? Anhein ítara liña lubéi, amisuraha wamutün lun haliihani arütíkulu le luma le lunbei láfuridun. Huagun lasaminarua dan le labürüdǘnbei.

“FURÍEITINA meha lun Heowá sun dan amuriaha luma lun lígirun lun nagiribudun lurugabu, luma lun feruduna lani sun wuribati le nadügübei lun”, tiña aban würi. Hadan meha lumutuniña Bungiu taweirida, ani aba tadisedun. Gudemetu san hun dan le hasaminarun luagu le tasufurirubei? Álügüdaguatün san hungua ka lan lasandirubei Bungiu hawagu gürigia ha meha eseriwidubaña lun? Haritaguati san hawagun? Busenti san hagiribudun lun? Anhein ítara liña lubéi, líchuguba le lariñagubei profeta Heremíasi dǘgüdaguaü hun (aliiha huméi Heremíasi 31:18-20).

Akutiha waméi ídabuga lan labürüdǘwa dimurei le. Saragu irumu lubaragiñe lágurahoun Heremíasi, ígirati Heowá lun hárügüdüni asiriana arúeihani le lánina diisi türibu le Ísüraelibei, lidan irumu 740 lubaragiñe lidaani Hesusu ani ígirati lun hanügüniña lílana ageiraü adaürǘwa Asiria. * Ígirati Bungiu lun lasuseredun katei le houn, lun hafurendeirun lídangiñe, ladüga meha lueirin hafigouhan luma ladüga maganbadi hamá lun eweridihani le híchugubei profetagu houn (2 Urúeigu 17:5-18). Sansi hamuti san hagaburi ladüga hanügǘn lidoun amu fulasu, dise luéi Bungiu luma luéi hageira? Buliei lumutiña funa san Bungiu? Busenbei funa san Heowá lunya leresibiruniña?

“Asakürihaadina luagu nadisedun buéi”

Aba hasansiruni ísüraelina hagaburi dan le añaha lan adaürǘwa ani aba hasakürihan. Ariha lumuti Heowá tídangiñe lan sun hanigi hasakürihan. Ariha waméi ida liña lan layanuhan Heowá luagu hagaburi luma le hasandirubei ísüraelina dan le layanuhan luagu Éfürain.

“Aganba naaña lánigu Éfürain ekehara lau igarigu.” (Bérusu 18.) Aganba lumuti Bungiu hekeharun ísüraelina lau igarigu luagu resultóu le lanügübei luriban hóuserun. Kei ladüga aban irahü le íchugubei fe wuribati lan lidin lun ladüga lebedaagun, aba lasakürihan ladüga busén lan lagiribudun lúbiñoun (Lúkasi 15:11-17) Ka meha hariñagubei ísüraelina lun harufuduni hagarigu?

“Ítara niña meha kei aban liraüraü bágasu le mabuchahati, [...] gidá baali numabuchahan.” (Bérusu 18.) Aba híchugun ísüraelina fe luagu óuseraaña lan kei aban liraüraü bágasu mabuchahati, ani lunti lan meha habeichún. Mini lan hénpulu le, ítara haña lan meha kei aban liraüraü bágasu le lunbei hamuga masandi lani “limiruni katei gágiriti lun hamuga mebeedagun lan”, tiña aban líburu.

“Giribugüdabana búmaguoun, ladüga buguya Aburemeibei le Nubungiute.” (Bérusu 18.) Wéiriti meha hasakürihan darí lun aba lan hayumuragun  lun Bungiu. Inarüni aba lan meha hadisedun luéi ani adüga hagía saragu figóu. Gama lumoun, ladüga busén hamá feruduna laniñu aba hamuriahan ídemuei luma.

“Asakürihaadina luagu nadisedun buéi; ariha naali nungua lídanñadina lan figóu.” (Bérusu 19.) Wuribati meha hasandiragun ísüraelina houngua luagu hafigoun ani subudi hamuti gadurun hamá. Wéiriti meha íruni luma maguraasuni le hasandirubei (Lúkasi 15:18, 19, 21).

Furanguti meha asakürihaaña lan. Wéiriti meha hírun darí lun hagufeseruni hafigoun lun Bungiu ani aba hígiruni luriban hémeri. Buídurügübei funa san meha katei le lun feruduna lániña luma lun lagiribudagüdüniña hageiroun?

“Gudemehabutu nanigi lun”

Hínsiñetiña meha ísüraelina lun Heowá. Ariñagati lidan Heremíasi 31:9: “Au lúguchibei Ísüraeli, Éfürain nígiramabei”. Máweiyasunti aban úguchili amahada leresibiruni liráü le hínsiñebei lun, le asakürihaalibei tídangiñe sun lanigi. Ariha waméi ida liña lan larufuduni Heowá línsiñehabu hawagu lumutuniña kei aban úguchili.

“ítara haña lumutuniña Éfürain nun kei aban isaani hínsiñeguti; ligía isaani le hínsiñetimabei nun. Lau sun nadeinhan lun, mabulieidun numuti.” (Bérusu 20.) Ma lubuidun dimurei lánina ínsiñeni! Chóuruti, aban lan úguchili hínsiñehabuti Bungiu, gama lumoun, mosu meha dǘgüda lan layanuhan hama lisaanigu, lun leweridiruniña luagu luriban hóuserun. Ligíati, danbei le hamahadun ísüraelina lun haganbuni leweridihan, aba labeichuniña lau lígirun lun hanügǘn adaürǘwa. Lau sun lira, mabulieidun lumutiña ítara kei mabulieidun lániña aban úguchili hínsiñehabuti lirahüñü. Ida liñati lasandiragun Heowá lungua dan le larihini asakürihaaña lan lumutuniña tídangiñe sun hanigi?

“Gudemehabutu nanigi lun.” (Bérusu 20.) Ayumahati meha Heowá hagiribudun lirahüñü lun. Asakürihani le hadügübei tídangiñe sun hanigi dun lumutu lanigi Heowá ani ayumahati meha hagiribudun lurugabu. Ítara kei úguchili le uágubei layanuha Hesusu lidan hénpulu luáguti irahü le achagaragubalin liseinsun, aba ‘hagudemedagun’ ísüraelina lun Heowá (Lúkasi 15:20). Wéiriti layumahan lunya leresibiruniña lisaanigu.

“Ígirati Heowá lun nagiribudun”

Dimurei burí le lídanbei Heremíasi 31:18-20 adügati lun warihini lueirin lugudemehabu luma lareini Bungiu. Mabulieidun lumutiña gürigia ha eseriwidubaña lun luagu aban dan. ‘Gíchigaditi Bungiu ferudun’ ánhaña agiribuda lun (Sálumu 86:5). Maweiyasunti íchigei lanagan hawagun ha agiribudubaña lárigiñe hasakürihan (Sálumu 51:17). Lubaragiñe lira, tulegu liña lúhabu habá lun leresibiruniña (Lúkasi 15:22-24).

Aba desidírü tan würi to uáguboun wayanuha tagiribudun lun Heowá, ábati táluahan ídemuei lidan damuriguaü hani gefentiña luagu Heowá lidan fulasu le ñein lubéi teredera. Furumiñe hénrengunti meha tun, masaminarun tan luagun katei wuribati le tasandirubei. Ariñagatu: “Saminatina meha madünatina lan feruduna lánina Bungiu”. Gama lumoun, aba híchugun wéiyaaña lidan afiñeni dǘgüdaguaü tun ani íderagua hamutu ederebudagüdei tumadagua luma Bungiu. Ariñagatu tídangiñe sun tanigi: “Ma lubuidun ígira lan Heowá lun nagiribudun”.

Anhein seriwi hubéi meha lun Heowá ani busentün hagiribudunya lun, amisuraha wamutün lun habisidahani damuriguaü hani gefentiña luagu Heowá lidan fulasu le ñein lubéi heredera. Haritagua huméi resibi lumutiña lan Heowá gürigia ha asakürihaaña ha ariñagubaña: “Resibiyabana, ígiraba lun nagiribudun bun”.

Le gayarabei haliihan tídangiñe Bíbülia lidan hati le:

▪ Heremíasi 17 darí 31

[Abürüdǘni]