Káteiñein meha Hesusu?

“Ámuñegueinarügüti hasaminarun gürigia luagu [Hesusu]. Ani súngubei —dandu ha gánibaña relihión hama ha mafiñebaña— álügüdaguatiwa woungua káteiñein lan meha Hesusu.” (STAN GUTHRIE, ABAN ABÜRÜHATI)

HESUSU ligía aban gürigia le uágubei weiri lan habusenrun gürigia hasubudirun. Ligía talugurubei saragu líburu to abürüdüboun luagu, ani aba labuinchun fulasu le ñein lubéi tarufudúa fiú pelikula luagu. Gama lumoun, ámuñegueinarügüti hasaminarun gürigia luagu káteiñein lan meha Hesusu.

Fiú irumu lubaragiñe le, adügatiña bián periodista álügüdahani tidan Internet. Mosu meha hóunabuni gürigia álügüdahani le lidan Internet “Káteiñein meha Hesusu?”. Ariha waméi fiú óunabagülei.

● “Kei le aubei larihua aban máisturu le meha buídubei lanügüni libagari.”

● “Aban meha wügüri furumiñeguarügü le meha ámubei libagari hawéi ha híbiri gürigia.”

● “Úati ni kata arufuduti winwan lan meha.”

● “Liráü Bungiu le meha nasiruabei, hilati ani águyuguati lun lesefuruniwa lídangiñe wafigoun. Wínwanti Hesusu uguñe weyu ani lagiribudayaba ubouagun.”

● “Afiñetina Hesukrísturügüñein lan liráü Bungiu, lidan lúgubu dimurei gürigia ani bungiu ligía.”

● “Ligía gürigia le uágubei labahüdawagua úraga houn irahüñü weinamugaaña.”

Ka san óunabagülei inarünibei? Furanguti luagu mama lan súngubei inarüniti. Gama lumoun, halíaba san gayara lan wadarirun ariñahani inarüniti luagu Hesusu? Ha adügübarun garüdia to afiñetiwa Lererun lan Bungiu Bíbülia, ligíati tuguyarügüñoun lun tariñaguni inarüni woun luagu Hesusu (2 Timotéu 3:16). *

Lidan le aban arütíkulu warihiba fiú álügüdahani le hadügübei gürigia luagu Hesusu luma ka lan tariñagubei Bíbülia libügürü. Hesusu guánarügü arufudahabei gayaraabei lan hasalbarun ‘sun ha afiñerutiña luagu’ (Huan 3:16). Amisuraha wamutün lun hasubudiruni óunabagülei tidan Bíbülia. Lárigiñe gayarahalime desidírü humá anhein busén hubéi hasigirun afurendeira luagu Hesusu lun gayara lan hafiñerun luagu.

[Abürüdǘni]