Súdiniti san wasubudiruni óunabagülei?

“Ábame hasubudiruni inarüni, ábame lesefurunün inarüni.” (HUAN 8:32)

TÍDANÑEIN Bíbülia inarüni le gayarabei lesefuruniwa luéi afiñeni charati ani iyeeniti luagu Hesusu. Gama lumoun, súdiniti san le wafiñerubei? Anha súdiniti. Bereseti Heowá lau. Bereseti giñe Hesusu lau. Ani lunti giñe weberesedun.

● Ka uagu berese lubéi Heowá lau? Lidan fiú dimurei, ladüga ‘ínsiñeni lan’ ligía (1 Huan 4:8). Busenti Bungiu lun gunda lan wawinwandun lun súnwandan. Kei lafuranguagüdüniwa lidan Huan 3:16, ‘wéiriti hínsiñe gürigia ha ubouagubaña lun Bungiu darí lun lóunahani Liráü le ábanrügüti, lun sun lan ha afiñerutiña luagu, gabagari hamá aban ibagari le magumuchaditi’. Óunaha lumuti Liráü lun lafayeiruni lebegi wasalbarun luma lun wawinwandun lun súnwandan lidan aban paraísu ya ubouagu, kei aubei labusenra furumiñe (Agumesehani 1:28). Busenti Bungiu líchugun ibagari magumuchaditi kei aban idewesei houn sun ha afurendeirubalin inarüni luagu Liráü ani winwan haméime le furendei hamaalibei (Rómana 6:23).

● Ka uagu súdini lubéi lun Hesusu? Ladüga hínsiñetiña giñe gürigia lun, ani arufuda lumuti lau líchuguni libagari kei sákürifisiu wawagu súngubei (Huan 15:13). Subuditi meha lun ligíarügüñein lan gayara ladügün lun hasalbarun gürigia (Huan 14:6). Lunti san taweiridun wanigi ladüga busén lan Hesusu hasagarun hibe-agei gürigia buiti lídangiñe sákürifisiu le ladügübei? Ligía lóunahanbaliñu lani disipulugu asubudiragüdei lugundan luma lisuuni Bungiu houn gürigia lidan sun ubóu (Matéu 24:14; 28:19, 20).

● Ka uagu lunti lubéi súdini lan woun? Samina humá luagu katei le súdinibei kéiburi hátuadi hama hiduheñu. Ma busentün buidu lan hátuadi luma lun gunda lan hibagari hama hiduheñu? Layusurubei Heowá Hesusu lun líchugun átuadi buiti luma ibagari magumuchaditi houn súngubei, lidan aban iseri ubóu ñein lumuti úaali lanme asufuriruni luma igarigu (Sálumu 37:11, 29; Arufudúni 21:3, 4). Hínsiñeti hamuga san hun hawinwandun lidan aban ubóu ítarati? Lun gayara lan hibihini mosu hadügün somu katei.

Haritagua humuti bérusu tídangiñeti Bíbülia le lídanbei lagumeseha arütíkulu? “Ábame hasubudiruni inarüni, ábame lesefurunün inarüni.” Inarüni luáguti Hesusu luma ida liña lan lídehan lun lagunfulirun lisuuni Bungiu le lunbei lesefuruniwa lídangiñe lamudihan figóu luma óunweni. Gama lumoun, lun gayara lan wabihini mosu ‘wasubudiruni inarüni’. Hínsiñeti hamuga san hun hasubudiruntima luagu Hesusu luma ida luba lan hasagarun huguya hama hiduheñu buiti lídangiñe hafurendeiruni inarüni luagu? Lau sun hagundan híderagubadün gefentiña luagu Heowá.