Salba lumutiña Heowá lumutuniña súnwandan

“Salba lumutiña lubeiti Bungiu ha deregeguabaña houngua lun luéi óuchawaguni.” (2 FE.2:9)

KA UAGU GAYARA LUBÉI WACHOURURUNI KATEI BURÍ LE?

Subudi lumuti Heowá lidaani lasuseredun katei lun lagunfulirun lisuuni.

Layusurubei Heowá lubafu lun lasalbaruniña lumutuniña.

Subudi lumuti Heowá ida luba lan asuseredeina lan sügǘ le súdinitimabei.

1. Kaba burí katei asusereda lidan sun fulasu danme liabin “saragu asufuriruni”?

DANME le laguseragüdüni Heowá ubóu le lábugiñebei lubafu Satanási, ladügübei danme le magurabúniwa lan (1 Tesa. 5:2, 3). Danme liabin “lanarime luéyuri Wabureme”, gíbebei chagaguaü ubouagu (Sof. 1:14-17). Ñeinbei likesinga luma lénrengunga lidan sun fulasu, le linarün katei ñeinbei saragu idiheri “le úagili libe lúmagiñe lagumeserun ubóu” (aliihoualá Matéu 24:21, 22).

2, 3. a) Kaba burí lénrengunga le lunbei úmaba lan hagagibudagua lumutuniña Bungiu lidan “saragu asufuriruni”? b) Kaba íchiga iderebugu woun lun wawanduni le lunbei liabin yarafa madise?

² Danme le ayarafadeina lan dan lun lagumuchun “saragu asufuriruni” ábame lábürühan, “Gogu” le lídangiñeti fulasu Magogu, lau sun lúmati hawagu lumutuniña Bungiu. Le linarün katei, liábinba ‘hau súdaragu héretiña ani gíbetiña lun ladouragun lau fulasu kei aban dúeri’ (Ese. 38:2, 14-16). Lídanme dan ligía úaboun ni aban óundaruni ubouaguna ñübuin esefurawa. Búngiurügübei gayara lesefuruniwa. Kaba wadüga danme le warihin wóunwegua lan?

³ Sun lubúeingu Heowá lunti hamuga wálügüdagun woungua: “Afiñetina san tídangiñe sun nanigi lesefurubadiwa lan Heowá danme liabin saragu asufuriruni?”. Haritagua waméi le lariñagubei apostolu Féduru: “Salba lumutiña lubeiti Bungiu ha deregeguabaña houngua lun luéi óuchawaguni, ígira laña ha wuribabaña lábugiñe asufuriruni lubá hasiadirúniwa lun sun dan lídanme luéyuri aguseruni” (2 Fe. 2:9). Ánhawa asaminara luagun lesefuruniña Bungiu lumutuniña lidan dan le sügühalibei, gayarabei ganigi wamá lun wagagibudagun luma le lunbei liabin ámuñegü. Ariha wamá ǘrüwa hénpulu le lunbei lederebudagüdüni wemenigin luagu Heowá luma luagu lubafu lun lesefuruniña lumutuniña.

RÉDEITIÑA WÍNWANÑU LÁRIGIÑE GURAN

4. Ka uagu súdini lubéi dan lidan meha liabin Guran lidaaniwagu Noé?

⁴ Samina wamá furumiñe luagun Guran le asuseredubei lidaaniwagu  Noé. Súdiniti meha dan lidan lagunfulirun lugundan Bungiu. Lubaragiñe labuinchun ubóu, mosu meha ladügǘn aban óunwenbu wadagimanu lánina tábunawagun árüka luma lun hebelaagüdüniwa animaalugu tidoun. Magurabunti meha Heowá lun lagumuchúniwa lau wadagimanu le, lun desidírü lani ídaba lan meha lábürüha duna, luéi hamuga buga ladarasahan Noé. Lubaragiñe lira, arufudatu líburu Agumesehani saragu lan dan lubaragiñe lariñagun Bungiu lun Noé lun ladügünu árüka, anúadira laali buga Bungiu weyu lun latatirun Guran. Ida liña wasubudiruni?

5. Ka larufudubei gumadi le lídanbei Agumesehani 6:3, ani ídabuga lariñagei Bungiu?

⁵ Ariñagati Bungiu: “Máfagun naali wügüri lau gurasu lun súnwandan, ladüga débiliti ǘgürügü. Ligíati, san-wéinrügübei lubéi irumu lidura luéyuri” (Agumesehani 6:3, NM). Anuhein somu Bíbülia wuribati tásügüragüdüni bérusu le, adügati lun hasaminarun gürigia luagu san-wéinrügübei lan irumu ladurara habagari gürigia. Gama lumoun, layanuhaña bérusu luagu asíadiruni le ñein lubéi meha lariñaga Heowá luagu lagidarubei lan wuribani ubouagugiñe. * Kei lidan lubéi irumu 2370 lubaragiñe lidaani Hesusu lasusereda Guran, gayarati wasaminarun lidan lan irumu 2490 lariñagei Bungiu dimurei burí le. Lidoun burí dan ligía 480 haali irumu lau Noé (Agu. 7:6). Ani wein irumu lárigiñe, lidan irumu 2470, ligía nasirua lan furumiñeti hádangiñe ǘrüwa lirahüñü (Agu. 5:32). Mégeigili meha, san irumu lubaragiñe liabin Guran, ani mariñagun lágili meha Heowá lun Noé luagu lagunfuliruba lan buga aban gárada súdinitu lidan hesefurúniwa gürigia. Átiriñein dan lagurabahan Heowá?

6. Ídabuga lariñawagúa lun Noé lun ladügünu árüka?

⁶ Sun le akutiha wamaalibei, arufudati darí lan saragu irumu lárigiñe, ligía lasubudiruni Noé le meha lunbei ladügüni Bungiu. Ka uagu wariñagei? Arufudatu Bíbülia wéinamuhaña lan lisaanigu ani maríeihaña lariñagunbei Bungiu lun ladügünu árüka. Aba lariñagun Heowá lun: “Tidoun ugunei [o árüka] tuguya, hebeluruba birahüñü, búmari, bídiñugu, buguya” (Agu. 6:9-18). Ligíati, másiñati bián-wein o dimi-sanrügaali lan meha irumu lubá liabin Guran dan le lariñagunbei Bungiu lun Noé lun ladügünu árüka.

7. a) Ida liña meha larufudun Noé hama lufamilian afiñeni? b) Ídabuga lariñagei Bungiu lun Noé kaba lan meha weyu liabin Guran?

⁷ Eibu awansereina lan wadagimanu lánina tábunawagun árüka, háfuga álügüdagua lan Noé hama lufamilian houngua ida luba lan buga lagunfulirun lisuuni Bungiu ani ídaba lan buga liabin Guran. Gama lumoun, mararamagunti hawadigimari ladügarügü ibidiñe lan burí fiú katei le houn. Ariñagatu Bíbülia: “Aba ladügüni Noé sun katei kei lariñaguni Bungiu lun” (Agu. 6:22). Sédürügüñein weyu lubaragiñe labuinchun ubóu lau duna —dan buídurügüti lun lebelaagüdüniñu Noé hama lufamilian animaalugu tidoun árüka— ligía lasubudiragüdüni Heowá weyu le lunbei liabin Guran. Ítara liña, aranseñu liña sun katei “weyu disedü lidan libiaman hati, sisi-san meha irumu lau Noé”, weyu le ídanbei ‘ladaara lubenari sielu íñugiñe’ (Agu. 7:1-5, 11).

8. Ida liña lederebudagüdüni abahüdaguni luagu Guran wemenigin luagu subudi lani Heowá kaba lan dan lesefuraña lumutuniña?

⁸ Mámarügüñein lubafu Heowá le Labureme Dan larufuda abahüdaguni luáguti Guran, arufudati giñe aban lan Esefuragülei Heowá. Eibu dan murusuntimarügaali dan lun liabin lagumuchagüle ubóu le, ani gayarati wachouruni lachülürüba lan dan lun lagunfulirun sun le lasaminarubei Bungiu ladügün lidan lidaani, lídanmeme “weyu luma oura” le anúadira laalibei (Mat. 24:36; aliihoualá Abakúku 2:3).

SÉFUWATIÑA LIDAN BARANA FUNATI

9, 10. Ida liña layusuruniña Heowá lumutuniña kei aban emei lun léiguadagüdüniña súdaragu ehiptuna tidoun sádara?

⁹ Arihaadiwa Heowá lan desidírübalin kaba lan dan lasusereda katei lun lagunfulirun lisuuni. Lidan libiaman hénpulu warihiba ábanya resun lun wafiñerun luagu lasalbarubaña lan Heowá lumutuniña: layusurubei óunwenbu lubafu lun lagunfuliruni lugundan. Chóuruti gabafu lan Heowá lun lesefuruniña lumutuniña, darí lun anihein lan dan layusuruniña lumutuniña kei emei lun ladügün lun héiguadun láganiñu tidoun sádara. Ligía ladügübei danbei le lesefuruniña ísüraelina lídangiñe amudirawaguni Ehiptu.

 ¹⁰ Háfuga ǘrüwañanu lan míñunu ísüraelina áfuridutiña Ehiptugiñe. Ladüga líchugun Heowá gumadi lun Moisesi, aba ladundehaniña ísüraelina lau aban manera le adügübei lun lasaminarun Faraón hayuridaguña lan ani ibidiñe lan houn haliñounbaña lan (aliihoualá Áfuriduni 14:1-4). Sin lárügüdagun lungua, aba léiguadun Faraón tidoun sádara, aba lidin hau lisudaranigu hárigiñe gürigia ha meha lamudiragubaña, ragǘ meme laaña yebe laru barana Funati, genegeti yebe siñaali lan hesefurun (Afu. 14:5-10). Le linarün katei, masuseredunbei buga ni kata houn ísüraelina. Ka uagu? Lugundun lageindaguba lan buga Bungiu luagu hafulesein lumutuniña.

11, 12. a) Ka ladügübei Heowá luagu hafulesein lumutuniña? b) Ka asuseredubei lagumuhóun oura, ani ka larufudubei abahüdaguni le woun luagu Heowá?

¹¹ “Dúeri le habá” hababei ísüraelina arufudei houn halíagiñeba lan houdin, aba lerederun habadinagua ehiptuna hama ísüraelina, búrigagüdati hau lisudaranigu Faraón ani adügati lun siñá lan hárügüdüniña. Gama lumoun harugoungadagüdati houn ísüraelina áriebu (aliihoualá Áfuriduni 14:19, 20). Ábati lafanreinraguni Heowá barana lidan biama, lau aban garabali héreti luéigiñe oubaü le ñéingiñe lubéi laboucha weyu, ítara liña ladügüni Bungiu “barana múame mábeiti”. Chóuruti barǘ lan katei le dan, ladüga ariñagatu Bíbülia aba lan láfurun garabali “sun áriebu”, ani lárigiñe ‘luégiñe múa mábeiti aba hánhiñuragun Ísüraelina labadinaguagiñe bián baríeiru lauti duna’. Hámarutimati héibugun ísüraelina hawéi lisudaranigu Faraón. Gama lumoun siñati meha hárügüdüniña súdaragu ladüga ageindaguati Heowá luagu hafulesein. Le linarün katei, “aba lachagaraguagüdüniña; aba lagünrinchaguni tubalabala hakarün, aba hámaru lan hawanserun” (Afu. 14:21-25).

¹² Dan le séfuhaña sun ísüraelina luégiñe le aban louba barana, aba lariñagun Bungiu lun Moisesi: “Iñurabéi búhabu luagun barana lun ladunragun lárigoun darugua láamuga hau Ehiptuna tau sun hakarün hama hagabayun”. Íbini áluga hamá hanurahan luéi léiguadun lubarieirun duna hawagun “aba lañaradaguagüdüniña Bungiu baranaha”. Siñaali buga hanurahan: “Meredeti ni aban lisudaran urúei wínwanñu.” (Afu. 14:26-28.) Lau manera le, arufuda lumuti Bungiu furangu luagu gabafu lan lun lesefuruniña lumutuniña luéi furumiñeguarügü peliguru.

ANURAHATIÑA LUBARAGIÑE LAGÜNRINCHAWAGUN HERUSALÉN

13. Ka meha adundehani líchugubei Hesusu houn ha afalarubalin, ani ka álügüdahani másiñati adüga hamani hóuniwagua?

¹³ Subudi lumuti Heowá buidu buidu ida luba lan asuseredeina lan katei lun lagunfulirun lisuuni. Súdiniti katei le, kei aubei larufudei lǘrüwan hénpulu le lunbei wakutihani: legeyedawagun Herusalén lidan furumiñeti sígulu. Yusu lumuti Heowá Liráü lun líchugun adundehani houn kristiánugu ha Herusalénbaña hama ha Hudeabaña, lun hanurahan luéi lagünrinchawagun uburugu lidan irumu 70. Ariñagati Hesusu houn: “Danme le harihin chülühali lan katei [iyereeguti] ligía lidoun fulasu le sánduti [...] hámeti Hudeabaña, lúntime hanurahan luagun burí wübü” (Mat. 24:15, 16). Gama lumoun, ida luba buga híchugun lani Hesusu disipulugu fe luagu lagunfuliruña lan profesía le?

14. Ida liña ladügün le asuseredubei lun lafurangudun adundehani le líchugubei Hesusu?

¹⁴ Arufuda lumuti le asuseredubei furangu ka lan labusenrubei Hesusu lariñagun. Lidan irumu 66, chülütiña súdaragu rómana lábugiñe lalidihan Cestio Galo Herusaléun lun hararamuniñu huríu ha ebedaagubaña. Aba haramudagun ebedaagutiña ha, lidan fulasu le derebugutimabei tuagu ténpulu, ábati hatatirun rómana achíaha laru laru lubarieirun uburugu. Ariha hamuti kristiánugu ha erederubaña agaradahañu furangu ka lan mini lubéi  le asuseredubei: “Katei iyereeguti le gagünrinchaguagüdadibei” (súdaragu ha mama huríu lau hafanidira le ítarabei kei aban guáriua) aba hachülürün darí lubadu “fulasu le sánduti” (tubarieirun ténpulu). Anihán buga hadaani lani Hesusu disipulugu lun “hanurahan luagun burí wübü”. Ida lubati buga háfuridun lídangiñe aban uburugu le geyeguawáalibei? Lasansiragua buga katei.

15, 16. a) Ka adundehani furanguti líchugubei Hesusu, ani ka uagu súdini lubéi meha haganbuni lani disipulugu? b) Ka lunbei wadügüni lun wasalbarun?

¹⁵ Íbini genege lan úati lan resun, aba lidin Cestio Galo hama lisudaranigu, ábati hatatirun huríu ha meha ebedaagubaña éibaahaña. Sódini, kei aba lubéi houdin sun ha ageindaguatiña Herusaléngiñe, aba gachansin hamá lani Hesusu disipulugu lun hanurahan. Ariñagaali meha Hesusu furangu lun hígiruni hemegegun luma lun hanurahan lau lóufudagun (aliihoualá Matéu 24:17, 18). Mosu san buga hanurahan lau lóufudagun? Málühali buga óunabagülei arihúa furangu. Fiú weyu lárigiñe, aba hagiribudun huríu ha meha ebedaagubaña aba hatatirun afosuraña lílana Herusalén luma Hudea lun hebedaagun úara hama. Aba asansireina lan katei lidan uburugu lau lóufudagun dan le hagumeserun huríu ageindagua hámagua luagu ubafu. Aba hénrengutima lan lanurahóuniwa lídangiñe uburugu, danti le hagiribudun rómana lidan irumu 70, siñaali lanurahóuniwa lídangiñe uburugu (Luk. 19:43). Siñaali buga háfuridun ha adarasahabaña lídangiñe uburugu. Gama lumoun, séfutiña kristiánugu ha gaganbadibaña lun adundehani le líchugubei Hesusu lun hanurahan lidoun burí wübü. Ariha hamuti houngua salba lumutiña lan Heowá lubúeingu. Ka wafurendeirubei lídangiñe abahüdaguni le?

¹⁶ Lídanme óunwenbu asufuriruni danme anihán lan katei le ariñawagúbei lidan profesía asusereda, mosume gaganbadi hamá kristiánugu lun adundehani le lunbei líchuguni Bungiu houn tidan Lererun luma tídangiñe lóundarun. Kéiburi gumadi le líchugubei Hesusu: “Lúntime hanurahan luagun burí wübü”. Íbini lagunfuliruba lan giñe lidan wadaani, ibidiñegili woun ida luba lan wanurahan. * Gama lumoun, gayarati wachouruni lariñagubei lan Heowá woun danme le lachülürün dan ligía. Kei mosu lubéi gaganbadi wamá lun gayara lan wasalbarun, buiti wálügüdagun woungua: “Ka nadügübei dan le líchugun Heowá adundehani uguñe weyu houn lubúeingu? Adüga numuti san lau lóufudagun, o samina numuti bián wéiyaasu?” (Sant. 3:17).

RUTI BUNGIU IDEREBUGU WOUN LUBÁ LE LUNBEI LIABIN

17. Ka lariñagubei lani Abakúku profesía libügürü le lunbei lasuseredun houn lumutuniña Bungiu?

¹⁷ Guentó ayanuhaya wamá luagun lábürühan Gogu hawagun lumutuniña Bungiu. Lidan aban profesía le ayanuhati luagu katei le, ariñagati Abakúku: “Dan naganbuni sun le aba nanufudedagun. Aba ladadagarun niyumaaru, siñá lágüdahanina núruna, aba leferidiruni sun núgubu lere. Lau sun lira, nagurabahaba darangilu darime lachülürün weyu lun ladiheridagüdüniña Wabureme hasudaranigu ha íchugubaña lidere dan woun” (Abak. 3:16). Kei aubei warihei, láurügü líchugun profeta fe luagu le lunbei lasuseredun danme le lábürühoun hawagun lumutuniña Bungiu aba lanufudedagun, aba ladadagarun liyumaaru, aba lásiñarun lágüdahani lúruna. Le lasandirubei Abakúku íderagua lumutiwa gunfurandei luagu hénrengubei lan gádantiwa danme le hábürühan lisudaranigu Gogu wawagun. Gama lumoun, ítara kei meha profeta le, lunti wagurabahan darangilañu meferidirunga waméi wemenigin, lunti wachoururuni luagu lasalbarubaña lan Heowá lumutuniña lidan lanarime luéyuri (Abak. 3:18, 19).

18. a) Ka uagu moun lumuti lubéi wanufudedagun luéi hábürühan áganiñu wawagu ámuñegü? b) Kaba wakutiha leweñegua dimaasu?

¹⁸ Ǘrüwagubei hénpulu le akutiha wamaalibei arufuda lumuti lau ichouruni salba lumutiña lan Heowá lumutuniña súnwandan. Maweiyasunti lisuuni eredera magunfulirunga. Chóuruti lagañeiruba lan. Gama lumoun, anhein busén wabéi gadan wamá lidan lubuidun agañeiruni le, lunti wakipurun úaraguni darí lumoun lagumuhóun. Ida liña líderaguniwa Heowá akipura úaraguni uguñe weyu? Ligíaba wakutiha lidan le aban arütíkulu.

[Abürüdǘni burí]

[Álügüdahani lánina aturiahani]