Sigí wamá eseriwida lun Heowá tau sun wanigi
Sigí wamá eseriwida lun Heowá tau sun wanigi
“Niráü. Subudibéi Bungiu le Habungiute bagübürigu, seriwibéi tau sun banigi.” (1 KRO. 28:9)
ÁLUAHA WAMÉI LÓUNABAGÜLE ÁLÜGÜDAHANI BURÍ LE:
Ka mini lubéi dimurei anigi tidan Bíbülia?
Kaba íderaguawa arihei ida tiña lan wanigi?
Ida luba wasigirun eseriwida lun Heowá tau sun wanigi?
1, 2. a) Ka lumegegun úgubu létima ayusurubei kei sínbolu tidan Bíbülia? b) Ka uagu súdini lubéi gunfuranda wamani le mini lubéi dimurei anigi?
ANIHEIN dan, yusuwati lumegegun úgubu tidan Bíbülia kei aban sínbolu. Aban hénpulu, abürühati urúei Dawidi: “Adügabá lun herederun marihinga luma lun ladadagarun hayada súnwandan”. Dan le tayanuhan Bíbülia luagu katei le iyereegubei lun Bungiu ayanuhatu luagu “ugudi le óufudahabei adüga wuribani”. Ariñagati Heowá: “Bürüwañubiña núhaburugu, súnwandan naritagun luagu bubarieirun”. Ani ariñagati profeta Heremíasi: “Aganba huméi le, gürigia ibidiougua tau, ha gágubaña ani marihintiña, ha garigeirugubaña ani maganbuntiña” (Sal. 69:23; Ari. 6:16-19; Isa. 49:16; Her. 5:21).
2 Anihein aban lumegegun úgubu le uágubei tayanuha Bíbülia saragu wéiyaasu: anigi. Yusu tumuti Ana aban lubúein Bungiu úaraguatu hénpulu le danbei le tafurieidun: “Nabureme gúndaatina buma tau sun nanigi” (1 Sam. 2:1). Le linarün katei, fuáti dimurei anigi kéiburi milu wéiyaasu tidan Bíbülia, ani libe-agei dan yusuwati keisi aban sínbolu. Súdiniti wasubudiruni ka lan mini lubéi dimurei anigi, lugundun ariñagatu Lererun Bungiu mosu lan wóunigirunu (aliihoualá Ariñawagúni 4:23).
KA MINI LUBÉI DIMUREI ANIGI?
3. Ka lunbei wadügüni lun gunfuranda wamani le mini lubéi dimurei anigi tidan Bíbülia, ani ka hénpulu gayarabei wayusurun?
3 Íbini mariñagun tani Bíbülia le mini lubéi dimurei anigi, íderagua tumutiwa gunfurandei le mini lubéi dimurei le. Ida liña tíderaguniwa? Ru wamá aban hénpulu, samina humá luagu aban lubuidun dibuhu, luagu touba aban muna le adügǘbei lau ámuñegueinarügü koloru. Lun gayara lan wasubudiruni ka lan dibuhu lídanbei, mosu wadisedun luéi touba numa lun warihini buidu buidu. Ítarameme lun gunfuranda wamani buidu buidu sun le mini lubéi dimurei anigi, lunti warihini sun bérusu le ídanbei láfuacha ítara kei warihini dibuhu.
4. a) Ka mini lubéi dimurei anigi? b) Ka mini lubéi le lariñagubei Hesusu lidan Matéu 22:37?
4 Yusuwati dimurei anigi tidan Bíbülia lun layanuhóun luagu kátañadiwa lan múnadagiñe wabiti, mini lan le, wagaburi, wayumahan, wasaminan, wóuserun, iarani le wawagubei, lébuna wadügüni katei luma le wabusenrubei wadügün (aliihoualá Áfuriduni 25:2; Ariñawagúni 13:12 luma Adügaü 2:26). Ariñagatu aban líburu tuagu anigi, tuguya lan arufudubalin “káteitimañein lan aban gürigia”. Gama lumoun, anihein dan mama ligía mini lubéi dimurei anigi. Aban hénpulu ariñagati Hesusu: “Hínsiñela Babureme le Bubungiute bun tau sun banigi, tau sun buani luma lau sun bisaminan” (Mat. 22:37). Lidan bérusu le, sun le lasandirubei luma le layumahabei kada gürigia ligía mini lubéi dimurei ‘anigi’. Dan le lariñagun Hesusu “banigi”, “buani” luma “bisaminan” larufuduñein mámarügübei lan lau le wasandirubei warufudei hínsiñe lan Bungiu woun, lubaragiñe lira lunti giñe warufuduni lau ligaburi wanügüni wabagari luma ligaburi wayusuruni wasaminan (Huan 17:3; Efe. 6:6). Gama lumoun, dan le lábuguarügü lan láfuacha dimurei anigi mini lan kátañadiwa lan múnadagiñe wabiti.
KABA UAGU WÓUNIGIROUN WANIGI?
5. Ka uagu lunti lubéi wadügüni sun wayaraati lun weseriwidun lun Heowá tau sun wanigi?
5 Ru lumuti urúei Dawidi eweridihani le lun Salomón: “Niráü. Subudibéi Bungiu le Habungiute bagübürigu, seriwibéi tau sun banigi luma lau ugundani, lugundun ariha lumuti Bungiu sun aritaguni [o anigi], subudi lumuti sun le lídanbei wasaminan” (1 Kro. 28:9). Anha ítara liña, ariha lumutu Bungiu sun anigi, íbini wanigi (Ari. 17:3; 21:2). Lun buidu lan lidin woun ámuñegü luma lun wakipuruni wamadagua luma Heowá súdiniti le larihibei tidan wanigi. Ligíati, gánitiwa resun buiti lun wafalaruni adundehani le líchugubei Dawidi ani áfaagua wagíame lun weseriwidun lun Heowá tau sun wanigi.
6. Ka uagu lunti lubéi gabaroun wamani le gayarabei lasuseredun lidan weseriwidun lun Heowá?
6 Wadügüni sun wadasin keisi kristiánugu lau ubebeni arufuda lumuti weiri lan wabusenrun weseriwidun lun Heowá tau sun wanigi. Gama lumoun, lunti gabaroun wamani gayarati lan ladügün idiheri le líchugubei lagübüri ubóu luma wafigoun guánarügü lun maweirin lan wabusenrun wadügüni (Her. 17:9; Efe. 2:2). Ligíati, lun wachoururuni medebilidunbei lan wabusenrun weseriwidun lun Bungiu, mosu warihini ida tiña lan wanigi estodi. Ida?
7. Ida luba wasubudiruni ida tiña lan wanigi?
7 Ítara kei siñá lan tarihíniwa tanigi aban tídibu wewe, siñati giñe larihíniwa káteitimañadiwa lan múnadagiñe wabiti. Gama lumoun, lidan Serumu luagu Wübü le líchugubei Hesusu, ariñagati luagu ítara lan kei tarufuduni tin wewe ida liña lan tídibu, arufuda lumuti le wadügübei ida tiña lan wanigi (Mat. 7:17-20). Ariha wamá aban lídangiñe.
ARIHA WAMÉI IDA TIÑA LAN WANIGI
8. Según le lariñagubei Matéu 6:33, ida liña warufuduni ka lan tídanbei wanigi?
8 Lidan Serumu luagu Wübü, ayanuhati Hesusu houn ha aganbubalin luagu aban wadagimanu le gayarabei hadügüni lun harufuduni busén hamá heseriwidun lun Heowá tau sun hanigi. Ariñagati: “Áluaha huméi larúeihan luma liricha Bungiu furumiñe; ábame líchuguni sun le hemegeirubei hun.” (Mat. 6:33.) Arufuda lumuti katei le anügübalin furumiñeti lúgaaru lidan wabagari kátima lan wayumahabei, wasaminarubei luma le wabusenrubei wadügün. Ligíati, wadügün aban egüsámini lun warihini kátima lan anügübalin furumiñeti lúgaaru lidan wabagari, líderagubadiwa lun wasubudiruni anhein weseriwiduña lubéi lun Bungiu tau sun wanigi.
9. Ka amisurahani ladügübei Hesusu houn fiú wügüriña, ani ka larufudubei ligaburi hóunabun?
9 Fiú dan lárigiñe lariñagun Hesusu houn lani disipulugu lun háluahani “larúeihan luma liricha Bungiu furumiñe”, susereti aban katei le arufuduti le lan anügübalin furumiñeti lúgaaru lidan wabagari, arufudubalin ka lan tídanbei wanigi. Tidan Ewanhéliu to labürüdüboun Lúkasi abahüdaguati aba lan “lárügüdün [Hesusu] anigi lun ladügüni luéiyasun Herusaléun”. Íbini subudi lani gaturobulinbei lan ñein, aba lidin. Lidan “sun éibugeina” lan Hesusu hama lani apostolugu, aba lachülaagun aban wügüri le únbei lariñaga Hesusu: “Falabana”. Íbini busén lan wügüri le lafalaruni aba lóunabun: “Nabureme, ígiraba lun nábununi núguchi, lárigiñeme, ábame nafalarunibu”. Óunabati ábanya wügüri le únbei ladügei ligiaméme amisurahani: “Nabureme, busentina nafalarunibu, gama lumoun neiba yebe [o furumiñe] ayouragua houn ha wábiñebaña” (Luk. 9:51, 57-61). Amu ligaburi Hesusu hawéi, lugundun rúguati lungua tau sun lanigi, ánhañati hagía aba hariñagun anihein lan katei lunti hadügüni furumiñe. Lau híchuguni le habusenrubei lidan furumiñeti lúgaaru ani Larúeihan Bungiu lidan libiaman, arufudatiña mabuseruntiña lan heseriwidun lun Bungiu tau sun hanigi.
10. a) Ida liña wóunabun lun amisurahani lánina wafalaruni Kristu? b) Ka lariñagubei Hesusu lidan Lúkasi 9:62?
10 Mítarantiwa kei wügüriña ha meha máhabaña lun lánigu hamá Kristu disipulugu, ánhatiwa lun lánigu wamá Kristu disipulugu ani guentó weseriwiduña lun Heowá sagü weyu. Ítarati arufuda wamuti le wasandirubei luagu. Gama lumoun, danme le wagunfulirun lau wani buligasion lidan damuriguaü, lunti wóunigirunu wanigi luéi aban katei peliguruti. Katei funa san? Lídanmeme abahüdaguni le uágubei ladimureha Lúkasi, ariñagati Hesusu: “Le íchuguti lúhabu luagu awouhagülei, lárigiñe aba larihin lárigoun, mabuidunti lun lílaname larúeihan Bungiu” (Lúkasi 9:62). Ka gayarabei wafurendeirun lídangiñe dimurei burí le?
“FALÁ HUMÉI LE BUÍDUBEI”
11. Ka asuseredubei lau luadigimari ábunaguti le uágubei ladimureha Hesusu ani ka uagu?
11 Lun gunfuranda wamani arufudahani le lídanbei Lúkasi 9:62, dirá waméi hénpulu le. Aban ábunaguti le awouhabalin múa. Sun anihán lan adügei katei le, anihán asaminara tuagun luban, liduheñu hama lumadagu, añahán lan eiga, éheraha luma aganbaha músika. Wéiriti layumahan ñein lan hama. Lárigiñe lawouhan saragu, siñaali lasigirun lau luadigimari ladüga wéiriti labusenruni le lígirubei, aba “larihin lárigoun”. Íbini gíbegili lan lunti ladügüni lubaragiñe lagumeserun ábunagua, aba meteni haali lan ábunaguti lun luadigimari ani magumuchun lumuti. Le hírutimabei, ladüga máfaagun lan lidan luadigimari magundanti liyubudiri luma.
12. Ka idan genegeguaü lan ábunaguti le uágubei layanuhóua lidan Lúkasi 9:62 hama fiú kristiánugu uguñe weyu?
12 Guentó konpararü waméi luma aban katei le asuseredubei uguñe weyu. Gayarati konpararü wamani ábunaguti luma aban kristiánu le chubaluguti lidan leseriwidun lidan damuriguaü, gama lumoun lídanñoun peliguru lanigi. Íbini apurichiha lan súnwandan ani ñüdün ligía lidan adamuridaguni, gama lumoun, súnwandan lasaminaruña lan luagu somu burí katei le líchugubei ubóu le, ani busenti libihini. Le linarün katei, wéiriti layumahani. Lagumuhóun oura, lárigiñe saragu irumu eseriwida lau úaraguni, siñaali lárügüdagun lungua luéi ayumahani ligía, aba “larihin lárigoun” luagun katei le ígira laalibei. Íbini gíbegili lan lunti ladügüni lidan lani ministeriu, márügüdünti ‘luagu uganu lánina ibagari’, ani gániti katei le efekütu lidan ligaburi leseriwidun lun Bungiu (Fili. 2:16). Híruti hamuga lun magundan lan Heowá Bungiu le Labureme nadü wamá, ladüga máfaagun wamá lidan wawadigimari (Luk. 10:2).
13. Ka mini lubéi weseriwidun lun Heowá tau sun wanigi?
13 Furanguti le gayarabei wafurendeirun. Buiti woudin lidan adamuridaguni, wáfuridun apurichiha luma wagunfulirun lau amu wadagimanu lánina weseriwidun lun Bungiu. Gama lumoun, mégeitiwa lanwoun lira lun weseriwidun lun Bungiu tau sun wanigi (2 Kro. 25:1, 2, 27). Anhein hínsiñegili lubéi somu katei le lánina ubóu le lun aban kristiánu, peliguruti luéi leferidiruni lumadagua luma Heowá (Luk. 17:32). Lun gayara lan ‘lílana wamá larúeihan Bungiu’ mosu gaganbadi wamá lun gumadi le: “Iyereegulá wuribani hun, falá huméi le buídubei” (Luk. 9:62; Rom. 12:9). Ligíati, sun wagía mosu wóunigiragun woungua lun ua lan ni kata lídangiñeti ubóu le lani Satanási, eredehawa luéi weseriwidun lun Heowá tau sun wanigi, íbini genege lan buidu lan (2 Ko. 11:14; aliihoualá Filipuna 3:13, 14).
AGAGUDÚAÑU WAMÁ
14, 15. a) Ka layusurubei Mafia lun lagadeirunu wanigi? b) Ida liña larufuduni hénpulu le lídanbei párafu peliguru tan sádara to layusuruboun Satanási?
14 Ínchaha lumutiwa meha ínsiñeni le wasandirubei luagu Heowá lun ederegeragua woungua lun. Ani saragu wádangiñe arufuda wamaali lau lásügürün dan luagu desidírühadiwa lan weseriwidun lun tau sun wanigi. Gama lumoun, mígirun lumutiwa Satanási woungua busenmemegili lagadeirunu wanigi (Efe. 6:12). Háfuga ru haali fe mígirun wabéi lan Heowá sunsuinagubei sódini. Gama lumoun, gayarati ledebilidagüdüni ubebeni le aubei weseriwida hámaru hámaru lau layusuruni “katei lánina ibagari le” (aliihoualá Márükosu 4:18, 19). Ka uagu buidu lubéi lidin lun Mafia dan le layusurunu sádara to?
15 Lun wóunabuni álügüdahani le. Samina humá haliihaña lan guñoun lau aban bonbiyu héreti, sódini aba lágudun. Furanguti rédeihadün lan lidan luburiga. Aba hafidirun amu bonbiyu, ábayati larugoungadun tidan hirumun. Gama lumoun, sin híchugun fe ábanya lasansirúniwa luagu amu le maweirinbei lere. Rutu san fe luagu méretima lan dan le hébeduni? Háfuga míchutün fe. Larugan ábaya lasansirún luagu amu le mérebei, háfuga giñe míchubadün lan fe luagu mama lan ligiaméme lere. Ka uagu? Lugundun abulubudeina liña lere leiti murusun murusun sin híchugun fe. Ítarameme gayarati ladügün ubóu le murusun murusun lun eferidireina wamani ubebeni le aubei weseriwida lun Heowá. Aban kristiánu le meredebei agagudúañu háfuga míchugunbei fe luagu asansireina liña lan murusun murusun (Mat. 24:42; 1 Fe. 5:8).
SÚDINITI FURÍEI
16. Kábati íderaguawa óunigiragua woungua tuéi lisadaran Satanási?
16 Kábati íderaguawa óunigiragua woungua tuéi lisadaran Satanási luma lun wasigirun eseriwida lun Heowá tau sun wanigi? (2 Ko. 2:11.) Súdiniti furíei. Ariñagati apostolu Pábulu houn líbirigu lun ‘deregüdagu hamá luéi leyeedagunün Mafia’. Ani lárigiñe ariñagati giñe houn: “Adüga huméi sun le lau saragu ayumuraguni [...] afurieida humá lun Bungiu súnwandan” (Efe. 6:11, 18; 1 Fe. 4:7).
17. Ka gayarabei wafurendeirun lídangiñe ligaburi lafurieidun Hesusu?
17 Lun deregüdagu wamá luéi leyeedagúniwa Mafia, buídubei lun wáyeihani Hesusu. Súnwandan meha lafurieidun lun Lúguchi, ítara liña larufuduni wéiriti lan labusenrun leseriwidun lun tau sun lanigi. Akutiha waméi manera le aubei lafurieida áriebu le lubaragiñebei lounwen. Abürühati Lúkasi: “Dan létima laweiridun ligarigu, ligíatima lafurieidun lau erei” (Luk. 22:44). Íbini furíeiñahaali lan meha Hesusu lau erei, lidan ókaasion le lagagibudagua buga luma óuchawaguni le wéiritimabei lun lidan libagari ya ubouagu, “ligíatima lafurieidun lau erei”, ani lagumuhóun oura aba lóunabuni Lúguchi. Arufuda lumuti lafurieidun Hesusu ámuñegueinarügüti lan lere furíei. Ligíati dan létima hénrengu lan óuchawaguni le úmabei wagagibudagua ani dan le hanarimetima tan lisadaran Satanási, ‘ligíabatima wafurieidun lau erei’, lunti wamuriahan luma Heowá lun líderaguniwa luma lun lóunigiruniwa.
18. a) Ka álügüdahani lunbei wadügüni wóuniwagua luagu furíei le wadügübei? b) Ka katei gánibei efekütu tidan wanigi, ani ida liña? (Ariha huméi rekuadru le lídanbei páhina 22.)
18 Ka efekütu lunbei gani lani furíei le wadügübei wawagu? Ariñagati apostolu Pábulu: “Madiherida humá luagu ni kata, ariñagarügü huméi sun katei lun Bungiu súnwandan dan le hafurieidun; amuriaha humá luma, mabulieidagunga lun híchugun eteingiruni lun. Ábameti líchuguni Bungiu lidarangilan hun, le wéiritimabei luéi sun subudi; lun lóunigirunu hanigi luma sun hisaminan” (Fili. 4:6, 7). Ítara liña, súdiniti wafurieidun súnwandan lau erei lun wasigirun eseriwida lun Heowá tau sun wanigi (Luk. 6:12). Ligíati, lunti wálügüdagun woungua: “Furíeitina san súnwandan lau erei?” (Mat. 7:7; Rom. 12:12). Arufuda lumuti wóunabagüle lun álügüdahani le anhein weiri lubéi wabusenrun weseriwidun lun Bungiu.
19. Kaba burí katei hadüga lun hasigirun eseriwida lun Heowá tau sun hanigi?
19 Kei aubei warihei, wakutihani ka lan anügübalin furimiñeti lúgaaru lidan wabagari íderagua lumutiwa arihei ida tiña lan wanigi. Súdiniti agagudúañu wamá luéi wígirun lun ledebilidagüdüni katei le ígira wamaalibei tuma lisadaran Mafia, wabusenrun weseriwidun lun Heowá tau sun wanigi (aliihoualá Lúkasi 21:19, 34-36). Ligíati, ítara kei meha ladügüni Dawidi lunti wamuriahan luma Heowá lun líchugun “aban anigi dayarütu” woun (1 Kro. 29:19).
[Álügüdahani lánina aturiahani]
[Rekuáduru le lídanbei páhina 22]
ǗRÜWA KATEI LE ÍDERAGUBALIWA ÓUNIGIROUN WANIGI
Ítara kei anihein lan somu burí katei le íderagubaliwa lun buidu lan téibugun wanigi, anihein giñe somu katei le gánibei efekütu tuagu anigi to uáguboun tayanuha Bíbülia. Ariha wamá ǘrüwa lídangiñe.
1 Éigini. Mégeitu anigi éigini nófuti le buídubei tun. Mégeiti giñe aban kristiánu laganwoundagüdüni lisubudin lau laturiahan, lasaminarun luagu le lafurendeirubei, luma lau lidin adamuridagua, ítara liña sun le kei éigini buiti ani nófuti le tídangiñeti Lererun Bungiu (Sal. 1:1, 2; Ari. 15:28; Ebü. 10:24, 25).
2 Ehersísiu. Lun buidu lan téibugun wanigi, anihein dan mégeitu lan lun wadügün lun here lan tawadigimaridun. Ítarameme, lawadigimaridun aban kristiánu saragu lidan lani ministeriu —háfuga lau laganwoundagüdüni le ladügübei— ídehati lun buidu lan téibugun lanigi to uáguboun tayanuha Bíbülia (Luk. 13:24, NM; Fili. 3:12).
3 Ha úmabaña wóundara. Wawadigimaridun luma wawinwandun haganagua ubouaguna barüti idiheri tun anigi lidan biángubei igaburi le ídanbei layanuhóua tuagu. Gayarati lalouguadun wadiheri lau wóundaragun hama wíbirigu, ha beresebaña wau tídangiñe sun hanigi ani seriwi hagía lun Heowá tau sun hanigi (Sal. 119:63; Ari. 13:20).
