Afiñe wamá luagu Heowá, Labureme dan

“Sánsigua lumuti dan; ligía agidahabaliña urúeigu ligía íchaahaña.” (DAN. 2:21)

KABA HAMUGA WÓUNABA?

Ida liña larufuduni katei le burí le adügǘwarügübei luma profesía le gúnfulihalibei Heowá lan Laburemebei dan?

Ka efekütu lánibei wawagu gunfuranda wamani Heowá lan Bungiu Laburemebei dan?

Ka uagu mani lubéi katei burí le asuseredubei ubouagu luma haransehan gürigia efekütu lidan lidaani ladügüni Heowá katei?

1, 2. Ida liña wasubudiruni gunfuranda lumuti lan Heowá dan buidu buidu?

SARAGU dan lubaragiñe ladügüniña gürigia arufuda lumuti Heowá ida luba lan labahüdǘn dan. Lidan ligadürün weyu le ídanbei ladügǘwa katei ariñagati: “Ñeinlá burí leiti sielu lun líchugun larugounga lidoun ubóu, fánreingua láamugei wéyuagu luéi guñoun, seriwi láamuga giñe lun larufuduni burí weyu, irumu luma burí uéyuri” (Agu. 1:14, 19, 26). Ligía meha labusenrubei Bungiu ani ligía asuseredubei.

² Gama lumoun, añahagua aturiahatiña siensia álügüdagua houngua ka lan danbei. Ariñagatu aban líburu: “Dan ligía katei le hásiñarubei gürigia gunfuranda. Úati asubudiruti káteitima lan danbei”. Gama lumoun, gunfuranda lumuti Heowá buidu buidu ka lan danbei, ligía “Bungiu le adügübalin sielu, Bungiu le Aburemeibei le adügübalin múa, [ani] aranseléi”. Ligía, ‘ariñagubalin le lunbei lasuseredun lúmagiñe furumiñeti dan; ariñaga lumuti le anitebei saragu dan lubaragiñe’ (Isa. 45:18; 46:10). Wakutiha fiú lídangiñe katei le ladügübei Bungiu luma fiú profesía le gúnfulihalibei. Lederebudagüdübei akutihani le wafiñen luagu Heowá, le Labureme dan, luma tuagu Bíbülia to Lererun.

ADÜGATI SUN LE ADÜGǗWAALIBEI LUN WAFIÑERUN LUAGU LABUREME DAN

3. Ida liña larihiniwa lidan le adügǘbei lidan lan lidaani lasusereda sun katei?

³ Gayarati larihin susereti lan sun katei lidan lidaani, lidan burí katei le adügǘbei. Aban hénpulu, hánhigichun waruguma luma lánhingichun ubóu susereti lidan dan. Subudiwati ida liña lan lesetirun katei burí le siélurugu darí lun yusuwa lan lun háfayahan gürigia luma lun larufuduni kaba lan dan lagumesera luribouga luma lubachouga luma katei líbeina lira. Chóuruti luagu “wéiriti lan lubafu” Heowá le  adügübalin sun burí katei le, ani gadünati walawahani (aliihoualá Isaíasi 40:26).

4. Ka burí hénpulu lánina katei le gabagaribei arufudubalin lichú lau Heowá?

⁴ Arihúati giñe gadaani lan sun katei lidan katei burí le gabagaribei. Aban hénpulu. Gayarati larihiniwa hadan animaalugu tuma burí nadü luagu gadaaniti lan hadügüni sun katei, ítara liña kamá hamuga anihein aban wachi hadan. Subuditi houn saragu dunuru kaba lan dan houdin lídangiñe aban fulasu lun lidoun amu (Her. 8:7). Íbini hadan gürigia anihein aban wachi le adundehabaliña lidan wein-gádürü oura lánina wéyuagu luma guñoun. Ligíati, lárigiñe waweiyasuhan tidan awión ani aba wánhiñuraguni ámuñegueinarügü lóurate ageiraü, gániti efekütu lidan wágubu ani barüti dan lunya laranserun wachi le wadanbei “lidan lóurate”. Chóuruti, daritiwa lan saragu hénpulu lidan katei le adügǘwarugubei luáguti gadaani lan sun katei, le arufudubei wéiriti lan lubafu luma lichú lau Bungiu le Labureme dan (aliihoualá Sálumu 104:24). Kei ítara liña lan, gayarati wafiñerun lagunfuliruba lan lugundan Labureme dan súnwandan.

LAGUNFULIRUN PROFESÍA LIDAN LIDAANI RUTI AFIÑENI WOUN

5. a) Ka rügüñein manera ídanbei gayara lan wasubudiruni le lunbei lasuseredun ámuñegü? b) Ka uagu gayara lubéi lariñaguni Heowá le lunbei lasuseredun luma ídaba lan lasusereda?

⁵ Katei burí le ladügübei Heowá arufuda lumuti “le marihínbei luagu”, gama lumoun, marufudun lumuti lóunabagüle álügüdahani le súdinibei, kéiburi ka lan hemeniginbei gürigia lubá ámuñegü (Rom. 1:20). Lun gayara lan wóunabuni lunti wakutihani le lariñagubei Bungiu tidan Bíbülia. Tidan daritiwa saragu hénpulu lani profesía le agunfulirubei lidan dan le ariñawagúbei. Ka uagu gayara lubéi lariñaguni Heowá le lunbei lasuseredun? Furumiñe, ladüga gabafu lan lun larihini furangu le lunbei lasuseredun ámuñegü. Ladüga giñe, gayara lan ladügün lun lasuseredun katei según lisuuni luma lidan lidaani.

6. Ida liña wasubudiruni busenti lan Heowá gunfuranda wamani lagunfulirun profesía le tídanbei Bíbülia?

⁶ Busenti Heowá lun gunfuranda hamani lubúeingu profesía le tídanbei Bíbülia ani sagá hagíame buiti lídangiñe. Gunfurandatima lumuti dan wawéi, dan le lariñaguni lasusereduba lan aban katei lidan somu dan, yúsuti dimurei le gayarabei gunfuranda wamani (aliihoualá Sálumu 90:4). Aban hénpulu, tidan líburu Arufudúni ayanuhóuati hawagu ‘gádürü ánheligu ha aranserúaaña lubá oura ligía, weyu ligía, hati ligía, luma irumu ligía’ (Aruf. 9:14, 15). Ariha wamá fiú profesía le agunfulirubei lidan dan le lariñagubei Heowá. Wakutihani katei le, líchuguba afiñeni woun luagu Bungiu le Labureme dan luma tuagu Lererun.

7. Ida liña larufuduni profesía luáguti Herusalén luma Hudá Heowá lan Laburemebei dan?

⁷ Furumiñe, akutiha waméi le asuseredubei lidan sígulu sedü lubaragiñe lidaani Hesusu. “Lidan ligadürün lirumudiri larúeihan Hoakimü, le liráü Hosíasi Hudá” aba líchugun Heowá aban uganu “lun Heremíasi habügürü sun lílana Hudá” (Her. 25:1). Lidan aban profesía ariñagati Labureme dan luagu lagünrinchawaguba lan Herusalén ani hanügǘba lan huríu Hudágiñe lun Babilónioun, lun lábugiñe hamá “lilurudun lurúeite Babilónia [...] luagu ǘrüwa-wein-diisi irumu”. Lidan irumu 607 lubaragiñe lidaani Hesusu, günringua hamuti súdaragu babilóniana Herusalén ani barǘ hamutiña huríu adaürawagúa. Ka asuseredubei lárigiñe lagumuchun ǘrüwa-wein-diisi irumu? Ariñagati meha Heremíasi lidan aban profesía: “Danme lagunfulirun ǘrüwa-wein-diisi irumu lun Babilónia, nuadigimariba luagu hufulesein, nagunfulirubei nererun lau nagiribudagüdünün lidoun fulasu le” (Her. 25:11, 12; 29:10). Gúnfuliti profesía le lidan dan le ariñagubei: irumu 537 lubaragiñe lidaani Hesusu, lárigiñe halíbüreruniña médiana hama pérüsiana huríu Babilóniagiñe.

8, 9. Ida liña larufuduni profesía le labürüdübei Danieli luagu lachülürün Mesíasi luma luagu lagumeserun Larúeihan Bungiu agumadiha sielu, Heowá lan Laburemebei dan?

 ⁸ Akutiha wamá amu profesía le ayanuhabei hawagu lumutuniña Bungiu lidan dan le sügühalibei. Kéiburi bián irumu lubaragiñe háfuridun huríu Babilóniagiñe, yusu lumuti Heowá profeta Danieli lun lariñagun luagu lachülürüba lan Mesíasi, gádürü-san-gádürü-wein-ǘrüwa irumu lárigiñe lichugún gumadi lun lararamawagüdünya Herusalén. Ru lumuti lurúeite Media luma Pérüsia gumadi le lidan irumu 455 lubaragiñe lidaani Hesusu. Gádürü-san-gádürü-wein-ǘrüwa irumu lárigiñe —lidan irumu 29 lidan lidaani Hesusu—, anuadirúati Hesusu le Nasarétüna lau sífiri sandu ábati ligía lan Mesíasi (Neem. 2:1, 5-8; Dan. 9:24, 25; Luk. 3:1, 2, 21, 22). *

⁹ Guentó, ayanuha wamá luagu profesía tídangiñeti Bíbülia le ayanuhabei luagu Larúeihan Bungiu. Ariñawagúaali meha tidan Lererun Bungiu luagu lagumeseruba lan Urúei le lanúadirubei Bungiu agumadiha sielu lidan irumu 1914. Aban hénpulu, dan le lariñawagún “liseinin” lagumeserun Hesusu arúeiha, ariñawagúti lidan profesía kaba burí lan buga sügǘ hanarimeti hasufurira gürigia ubouagu ladüga labugun Satanási siélugiñe (Mat. 24:3-14; Aruf. 12:9, 12). Arufudati giñe amu profesía tídangiñeti Bíbülia luagu lidanba lan meha irumu 1914 “lagumuchun dan le ichugúbei houn” ha mámabaña huríu, ani gumese ligíame Larúeihan Bungiu agumadiha sielu (Luk. 21:24; Dan. 4:10-17). *

10. Kaba burí sügǘ agunfulira lidan lidaani ámuñegü?

¹⁰ Kaba asusereda ámuñegü? Furumiñe, ariñagati Hesusu lidan aban profesía ñeinbei lan “saragu asufuriruni”. Lárigiñe, lagumeseruba Arúeihani le lánina Milu Irumu. Chóuruti lasusereduba lan biángubei katei le lidan dan. Haritagua waméi danbei lan ya lubéi Hesusu ubouagu, anúadira laali meha Heowá “weyu luma oura” lun lasuseredun katei burí le (Mat. 24:21, 36; Aruf. 20:6).

‘YUSU WAMÉI WADAANI LIDAN KATEI BUITI’

11. Ka efekütu lunbei gani lan wawagu wasubudiruni wawinwanduña lan lidan lagumuhóun dan?

¹¹ Ka efekütu lunbei gani lan wawagu wachoururuni luagu gumeseeli lan Larúeihan Bungiu agumadiha luma wawinwanduña lan lidan “lagumuhóun dan”? (Dan. 12:4.) Gíbetiña gürigia arihati luagu laribadatimaña lan ubóu le, gama lumoun míchutiña fe ligía lan meha tariñagubei Bíbülia lasusereduba lan buga lidan lagumuhóun dan. Añahein saminatiña lagünrinchawaguba lan ubóu ámuñegü, añahein amu saminatiña lachülürüba lan aban weyu lun habihin gürigia lun lidan lan “darangilaü luma achoururuni sun katei” (1 Tesa. 5:3). Agia wagía, ka wasaminarubei? Anhein gunfuranda wabalin buidu wawinwanduña lan lidan lagumuhóun dan lani ubóu le lani Satanási, ma lunti  hamuga beresegu wamá eseriwida lun Heowá le Labureme dan, luma íderaguaña gürigia asubudirei? (2 Tim. 3:1.) Kada aban wádangiñe lunti lachoururuni layusuruñein lan lidaani buidu (aliihoualá Éfesuna 5:15-17).

12. Ka gayarabei wafurendeirun lídangiñe eweridihani le líchugubei Hesusu luáguti lidaani Noé?

¹² Lidan ubóu le buinbei lau katei le gayarabei lagidaruni wadaani, hénrenguti ‘wayusuruni wadaani lidan katei buiti’. Eweridihati Hesusu: “Ítara kei meha lasuseredun lidan meha lidaani Noé, ítara luba giñe danme le niabin, au le Wügüri Garaüwarügüti”. Ida liña meha katei lidaaniwagu Noé? Ariñawagúaali meha lidan profesía luagu lagumuchuba lan ubóu lidan dan ligía, ani hañaradaguba lan gürigia wuribatiña lidan aban guran le meha asuseredubei lidan sun ubóu. “Noérügüñein le apurichihabei” asubudiragüdei uganu lúmagiñeti Heowá houn gürigia ha awiwanwandubaña lidaaniwagu (Mat. 24:37; 2 Fe. 2:5). “Heredera meha gürigia eiga, ata, amarieidagua, íchaahaña hasaanigu lun maríei [...] mefentiña, darí ladibirun ubóu, aba hañaradagun súngubei”. Ligía leweridihanbei Hesusu: “Aranseñu humá lubéi; ladüga leme oura magaradahan humá, ligíaba niabin, au le Wügüri Garaüwarügüti” (Mat. 24:38, 39, 44). Lunti wáyeihani Noé, moun lumuti wáyeihaniña gürigia ha awinwandubaña lidaaniwagu. Kaba íderaguawa lun aranseñu wamá?

13, 14. Lidan awanha lan agurabahei liabin Wügüri Garaüwarügüti, ka lunbei waritaguni luagu Heowá lun gayara lan úaragua wamá?

¹³ Íbini liábinba lan Wügüri Garaüwarügüti danme le magurabúniwa lan, lunti waritaguni Heowá lan Laburemebei dan. Ni le asuseredubei ubouagu ni le haransehan wügüriña meberesehan lumuti lidaani ladügüni Bungiu katei. Lun gayara lan lagunfulirun lugundan, gabafuti lun lariñaguni kaba lan asusereda luma ídaba lan (aliihoualá Danieli 2:21). Ariñagati Ariñawagúni 21:1: “Ítara tiña lanigi urúei lúhaburugu Bungiu kei lémeri duna, ñǘdünti le ñéingiñe lubéi labusenrei Bungiu”.

¹⁴ Le linarün katei gayarati ladügün Heowá lun lasuseredun katei lun lagunfulirun lisuuni lidan dan le anúadira laalibei. Saragu lídangiñe sügǘ le súdinitimabei le susereelibei ubouagu ídehaali lun lagunfulirun profesía tídangiñe Bíbülia, létima luáguti lapurichihóun uganu buiti le luáguti Larúeihan Bungiu lidan sun ubóu. Aban hénpulu, samina wamá luagu le asuseredubei lidan burí ageiraü le ñein lubéi ábanrügü lan gürigia agumadiha. Lóuguatiña gürigia asaminarutiña luagu ñeinbei lan buga asansiruni wéinamuburiti lidan luáguti polítika lídanrügü fiú dan. Gama lumoun, kei resultóu lapurichihóuña uganu buiti lidan burí fulasu le ñein lubéi meha maha hamá gumadimatiña wadügüni. Chóuruti, súdini lan wayusuruni dan lidan weseriwidun lau úaraguni lun Bungiu le Labureme dan.

HEMENIGI WAMÁ LUAGU LAGUNFULIRUBEI LAN HEOWÁ LISUUNI LIDAN DAN

15. Ida liña warufudun afiñe wamá dan le ñein lan asansiruni tidan lóundarun Heowá?

¹⁵ Lun gayara lan wasigirun apurichiha luagu Larúeihan Bungiu lidan lagumuhóun dan, lunti wachoururuni luagu lagunfulirubei lan Heowá lisuuni lidan dan. Másiñati mosume lan wasansiruni ligaburi wapurichihan luma wadügün disipulugu, ladüga asansireina liña lan le asuseredubei ubouagu. Anihein dan, adügatu lóundarun Heowá somu burí asansiruni lun tíderaguniwa lun buídutima lan wapurichihani uganu buiti. Ida liña warufudun afiñe wamá luagu Bungiu le Labureme dan? Lau wadügüni le ariñawagúbei woun luma lau úaragua wamá lun Liráü, le ‘lichügüdinabei’ damuriguaü (Efe. 5:23).

16. Ka uagu wafiñerubei tídangiñe sun wanigi luagu líderagubadiwa lan Heowá ‘lidan wemegeiruni’?

¹⁶ Subuditi lun Heowá gayarati lan líderaguniwa dan le ‘wemegeiruni’, ligía busén lubéi wafurieidun lun lau sun wafiñen luagu líderagubadiwa lan (Ebü. 4:16). Ma arufuda lumuti katei le wéiriti lan wínsiñe lun ani berese lan lau kada  aban wádangiñe? (Mat. 6:8; 10:29-31.) Arufuda waméi wafiñen lau wamuriahan ídemuei luma Bungiu sun dan, ani úaragua ligíame wóuserun luma wafurieidun luma ladundehan. Ani mabulieida waméi wafurieidun hawagu wíbirigu.

17, 18. a) Kaba ladüga Heowá houn láganiñu yarafa madise? b) Ka lunbei mabulieidun wamani?

¹⁷ Mama lidaani ‘lalouguadun wafiñen’, lidaani waganwoundagüdüni luma wederebudagüdüni wafiñen (Rom. 4:20). Hóuchatiña láganiñu Bungiu —Satanási hama sun ha lábugiñebaña lubafu— hararamuni wadagimanu le lariñagubei Hesusu lun wadügün (Mat. 28:19, 20). Hóuchagua lumutiwa Mafia, gama lumoun subuditi woun luagu Heowá lan aban Bungiu le “wínwanbei, le Hasalbaragüle sun gürigia; hátima afiñebaña luagu”. Ani subuditi giñe woun ‘salba lumutiña lan Bungiu ha deregeguabaña houngua lun luéi óuchawaguni’ (1 Tim. 4:10; 2 Fe. 2:9).

¹⁸ Yarafa madise, lagumuchuba Heowá lau lagübüri ubóu le. Lagumuchuba Kristu hau láganiñu Bungiu, ani lerederuba furangu Heowá lan garichabei lun Larúeihan. Ibidiñeti woun ida luba lan ni ídaba lan lasusereda, gama lumoun subudi wamuti lasusereduba lan lidan dan. Ligíati, moun lumuti wabulieiduni ka lan “dan” ídanbei wawinwanda. Masaminara wamá “ítaramemegili [lan] sun katei kei meha lúmagiñe dan le ladügǘnbei ubóu” (1 Tesa. 5:1; 2 Fe. 3:3, 4).

ARUFUDA WAMÉI ‘GAGURABAHADI’ WAMÁ

19, 20. Ka uagu lunti lubéi warufudun ‘gagurabahadi’ wamá?

¹⁹ Hawinwandun gürigia lun súnwandan lun hafurendeirun luagu katei buíduburiti le ladügübei, ligía meha aban lídangiñe katei le labusenrubei Bungiu dan le ladügüniña gürigia. Ariñagati Apurichihati 3:11: “Ru lumuti Bungiu lidaani sun katei. Ru lumuti ayumahani tidoun hanigi gürigia [“lun hawinwandun lun súnwandan,” NM] lun gunfuranda habéi lan sun le susereelibei luma le lunbei lasuseredun, lau sun machülü hamá gürigia gunfurandei le ladügübei Bungiu buidu buidu”.

²⁰ Wéiriti wagundan lau wasubudiruni masansiragungili lan lisuuni Heowá houn gürigia (Mal. 3:6). Le linarün katei, ‘ligiaméme Bungiu súnwandan; úati sánsiguaü lidan, mamuñougadun ligía’ (Sant. 1:17). Asansireina liña lamuñan ladüga lánhingichun Ubóu, gama lumoun mániti lásügürün dan efekütu luagu Heowá lugundun wínwanti lun súnwandan (1 Tim. 1:17). Ligíati, ‘agurabaha wamá lúmagiñe Bungiu le wesefuragüle’ (Mik. 7:7). Kei tariñagun Bíbülia lidan Sálumu 31:24: “Sun huguya ha hemenigibaña luagu Aburemei here humá gaguraasun huguyame”.

[Abürüdǘni burí]

[Álügüdahani lánina aturiahani]

[Iyawaü to lídanboun páhina 25]

Afiñeti meha Danieli luagu lagunfulirun lani Bungiu profesía

[Iyawaü to lídanboun páhina 27]

Yusu humuti san hidaani buidu lun hadügüni lugundan Heowá?