Arufuda humuti san luéirigun Heowá?
Arufuda humuti san luéirigun Heowá?
“Kei hamuga tidan aban isubusei [...] aganwoundeina liña luéirigun Bungiu wadan.” (2 KO. 3:18)
KABA HAMUGA HÓUNABA?
Ka uagu gayara lubéi warufuduni luéirigun Bungiu íbini gafigoun wamá?
Ida liña líderaguniwa furíei luma adamuridaguni lun warufuduni luéirigun Bungiu?
Kaba íderaguawa lun wasigirun íchiga uériguni lun Heowá?
1, 2. Ka uagu gayara lubéi warufuduni luéirigun Heowá?
SÚNGUBEI wagía genege wamutiña wagübürigu íbini murusun. Ligía maweiridun tubéi wanigi lau lariñawagún lun somu irahü: “Lenegetia búguchi buguya”. O dan le lariñawagún tun aban irahü: “Haritaguagüda bumutina tuagun búguchu”. Áyeiha hamuti giñe irahüñü le hadügübei hagübürigu. Agiati wagía? Gayarati san wáyeihani Heowá, Wáguchi Bungiu le siélubei? Íbini siñá lan warihini, ariha wamuti lubuidun burí ligaburi dan le waríaguni sun le ladügübei, luma dan le waturiahanu Lererun ani samina wagía luagun le waliihabei, dántima le waliihani larufudahan luma lani Hesukrístu le Liráü hénpulu (Huan 1:18; Rom. 1:20). Ligíati, gayarati warufuduni luéirigun Heowá.
2 Lubaragiñe ladügüni Bungiu Adán tuma Ewa, subuditi meha lun gayarabei lan hagunfuliruni lugundan, harufuduni ligaburi luma híchugun uéiriguni lun (aliihoualá Agumesehani 1:26, 27). Dan le warufuduni ligaburi Bungiu, ibiha wamuti giñe keisi kristiánugu lubuidun chansi lun warufuduni luéirigun. Ani sun wagía gayarati wadügüni katei le, meberesenga ka lan warasanbei, wanechanibei o anhein lougua lubéi waleskuelan o anhein mídingubei wabéi. Ka uagu? Lugundun “úati lan himei lan Bungiu aban gürigia luéi aban, lubaragiñe lira, resibirügü lumutiña sun ha inebehabubaña lun ani adüga haméi le buídubei, lídangiñe hamá yebe furumiñeguarügü néchani” (Adü. 10:34, 35).
3. Ka gayarabei wasandirun dan le weseriwidun lun Heowá?
3 Arufuda hamuti kristiánugu ha anuadirúaaña luéirigun Heowá. Abürühati apostolu Pábulu, aban hádangiñe: “Sun [...] wagía, gidawaaru belu luéi wagibu arufudeinei luéirigun Bungiu ítara, kei hamuga tidan aban isubusei; asansiragueina wagíati lun lenegebadiwa lan, ladüga aganwoundeina liña luéirigun Bungiu wadan” (2 Ko. 3:18). Danbei le lararirun profeta Moisesi lau Diisi Lúrudu luégiñe wübü Sinaí, miriñu liña meha ligibu ladüga layanuhan Heowá luma (Afu. 34:29, 30). Másügürüngidiwa wagía kristiánugu lídangiñe sügǘ le ani mamirihanti giñe wagibu. Gama lumoun, gayarati wasandirun ugundani dan le wayanuhan hama amu luagu Heowá, luagu ligaburi luma lubuidun lisuuni houn gürigia. Dandu anhein hádangiñe wabéi kristiánugu ha anúadirubaña lau sífiri o hádangiñe amu mudún, ítara waña kei aban isubusei lau warufuduni luéirigun Heowá lidan wabagari luma lidan wani ministeriu (2 Ko. 4:1). Ligíati, buiti lun wálügüdagun woungua: “Narufuduñein san luéirigun Heowá lau nóuserun kei aban kristiánu luma lau náfuridun sun dan apurichiha luagu Larúeihan Bungiu?”.
BUSENTIWA WARUFUDUNI LUÉIRIGUN HEOWÁ
4, 5. a) Kei meha Pábulu, ka uma hageindagua sun gürigia? b) Ka lánibei figóu efekütu wawagu?
4 Chóuruti, busén wamá wagía lubúeingu Heowá lun líchugun sun le wadügübei inebesei luma uéiriguni lun Wabungiute. Gama lumoun, anihein dan madügün wamuti. Íbini meha Pábulu sügüti lídangiñe le (aliihoualá Rómana 7:21-25). Lidan fiú dimurei afuranguagüda lumuti ka lan uma hageindagua sun gürigia: “Ladüga afigouhaaña sun gürigia ani díseeña luéi luéirigun Bungiu” (Rom. 3:23). Le linarün katei, sun gürigia lábugiñeñanu lagumadihan figóu le galagante hamaalibei lúmagiñe Adán (Rom. 5:12; 6:12).
5 Gama lumoun, ka figoubei? Sun le kóntürabei lun ligaburi, lilurudun luma lugundan Heowá. Gadei lumuti figóu wamadagua luma Bungiu. Adügati lun siñá lan warufuduni luéirigun Bungiu kei aubei labusenra. Dandu anhein busén wabéi o mabusenrun wamá (1 Lur. 15:27-31). Lúmagiñe turageirugugiñe wáguchu gafigountiwa ani adügati katei le lun wadisedun luéi Bungiu (Sal. 51:5; Isa. 59:2; Kol. 1:21). Hibe-agei gürigia dísetiña luéi Heowá darí lun heferidiruni chansi lun harufuduni luéirigun. Furanguti figóutima lan añawarihanbaliña gürigia.
6. Ka uagu gayara lubéi warufuduni luéirigun Bungiu íbini gafigoun wamá?
6 Íbini gafigoun wamá, Heowá Bungiu ‘íchugubei emenigini woun’ (Rom. 15:13). Ru laali katei le lunbei lesefuruniwa lídangiñe figóu: lani Hesukrístu sákürifisiu. Dan le afiñe wamá luagu sákürifisiu le, aba “meredeediwa lan keisi idamuni lun figóu”, ani gayarati warufuduni luéirigun Heowá (Rom. 5:19; 6:6; Huan 3:16). Ánhawa akipura aban lubuidun umadaguaü luma, chóuruti gúndaabei lan wau uguñe weyu, ani wesefuruba lan lídangiñe figóu winwan wagíame lun súnwandan ámuñegü. Samina wamá: íbini gafigoun wamá, ariha lumutiwa Bungiu kei gürigia ha gayarabei harufuduni luéirigun. Ma hanarimeti lubuidun katei le?
IDA LUBA WARUFUDUNI LUÉIRIGUN BUNGIU
7. Ka lunbei wasubudiruni anhein busén wabéi warufuduni luéirigun Bungiu?
7 Lun gayara lan warufuduni luéirigun Bungiu, mosu lasubudiruni kada aban wádangiñe ka lan wedebilinbei (2 Kro. 6:36). Danme leti subudi wamaali, lunti mígiraguagüdün wamá woungua lun. Ítararügübei gayara lan warufuduni luéirigun Bungiu. Aban hénpulu, ka lunbei wadügüni anhein hamuga héiguadiwa lubéi lidan figóu lánina taríawagun iyawaü lánina agamariduni? Lunti wánharun luagu megei wamá ídemuei lúmagiñe Bungiu ani lunti giñe wáluahani (Sant. 5:14, 15). Ligía furumiñeti katei lunbei wadügüni lun wíchugun uéiriguni lun Bungiu lau wabagari. Lunti waríagun woungua keisi lubúeingu Bungiu lun warihini anhein wagunfuliruñein lubéi lilurudun le richati (Ari. 28:18; 1 Ko. 10:12). Anhein busén wabéi warufuduni luéirigun Bungiu, siñati wígiraguagüdün woungua lun wedebilin, meberesenga katei lan wedebilinbei.
8. Íbini gafigoun wamá, ka gayarabei wadügüni?
8 Hesusurügüñein gürigia le agundaaragüdübalin Bungiu ani arufudaléi luéirigun buidu buidu. Íbini gafigoun wamá, lunti ani gayarati wadügüni sun wayaraati lun wáyeihani Hesusu (1 Fe. 2:21). Ariha lumuti Heowá ani biní lumuti sun áfaaguni luma awanseruni le wadügübei lun wíchugun uéiriguni lun.
9. Ka uagu súdini tubéi Bíbülia lidan habagari kristiánugu ha busenbaña hagundaragüdüni Bungiu?
9 Arufuda tumuti Bíbülia woun ka lan lunbei wadügüni ani íderagua tumutiwa asansira. Ligía súdini lubéi waliihanu, wararamagun asaminara luagun le waliihabei luma lun hulili lan waturiahanu (Sal. 1:1-3). Anhoun waliiha sagü weyu, gayarabei wasansirun lidan saragu katei (aliihoualá Santiagu 1:22-25). Eibu laganwoundun wasubudin tuagu Bíbülia, derebugutimabei wafiñen ani busentimabadiwa wagundaraagüdüni Heowá luma lun madügün wamá figóu wéiriti (Sal. 119:11, 47, 48).
10. Ida liña líderaguniwa furíei aganwoundagüdei weseriwidun lun Heowá?
10 Lidan awanha lan arufudei luéirigun mégeitiwa wafalaruni adundehani tídangiñeti Bíbülia le: “Furíei humá [...] súnwandan” (Rom. 12:12). Le linarün katei, lunti ani gayarati wamuriahan luma Heowá lun líderaguniwa áhuduragua lun kei aubei labusenra. Buídubei lun wamuriahan luma lun líchuguni lani sífiri sandu woun, aban afiñeni derebuguti, erei lun wawanduni óuchawaguni luma iarani lun ‘warufuduni uganu lánina inarüni kei lubudubu’ (2 Tim. 2:15; Mat. 6:13; Luk. 11:13; 17:5). Lunti hemenigi wamá luagu wáguchi le siélubei ítara kei lemenigidun aban irahü luagu lúguchi. Danme le wamuriahan luma lun líderaguniwa lun laganwoundun weseriwidun lun, adüga waméi lau sun wafiñen luagu lóunabubadiwa lan. Maweiyasun wamá asaminara beresebei lan wafurieidun lun. Gayaraati wafurieidun lun lun walawahani, lun weteingiruni luma lun wamuriahani ladundehan luma lun wararamun lun turóbuli. Gayarati giñe wamuriahan luma lun líderaguniwa íchiga uéiriguni lun liri le sándubei lidan weseriwidun (Sal. 86:12; Sant. 1:5-7).
11. Ida liña líderaguniwa adamuridaguni lun warufuduni luéirigun Bungiu?
11 Ru laali Bungiu kárugu lun “musu úaraguati” lun lóunigiruniña lumutuniña ha ítarabaña kei mudún (Mat. 24:45-47; Sal. 100:3). Busenti “musu úaraguati” warufuduni luéirigun Heowá. Gayarati laransehani adamuridaguni wagaburi keisi kristiánugu, ítara kei gayara lan laransehani aban áhüchaguti wadaüragun (Ebü. 10:24, 25). Ligía buidu lubéi chülügie wamá. Anhein hechu wabéi achülüra tarü lidoun wadamuridagun, weferidiruba hamuga lídangiñe ídemuei lúmagiñeti Bungiu le wemegeirubei lun buídutima wamá kei lubúeingu Heowá.
ÁYEIHA WAMÉI BUNGIU
12. Ida liña wáyeihani Bungiu?
12 Lun gayara lan warufuduni luéirigun Heowá mosu wáyeihani (Efe. 5:1). Warihini katei kei aubei larihei ligía aban manera lun wadügüni. Anhein meberesen wabéi lau le lubeibei, wíchuguba minebeni lun ani wuribabei hamuga woun. Lábugiñeñein lubafu Mafia ubóu le, ligía lunti lubéi hínsiñe lan le hínsiñebei lun Bungiu woun, ani iyereegu ligíame le iyereegubei lun woun (Sal. 97:10; 1 Huan 5:19). Wachóuruni tídangiñe sun wanigi wadügüñein lan sun katei lun wíchugun uéiriguni lun Bungiu, ligíarügüñein manera buiti lun weseriwidun lun (aliihoualá 1 Korintuna 10:31).
13. Ka uagu lunti lubéi iyereegu lan figóu woun, ani ka lunbei wadügüni?
13 Iyereeguti figóu lun Heowá, lunti giñe iyereegu lan woun. Ligíati, lubaragiñe wayarafahóun lun figóu lun warihini anhein méiguadunbadiwa lubéi lidoun, dise wamá luéi. Aban hénpulu, lunti wadisedun hawéi ha agarabaagubaña lun Heowá, lugundun gayarabei hadügün lun madüna wamani wíchugun uéiriguni lun Bungiu (2 Lur. 13:6-9). Ligíati, móundara wamá hamá ha agarabaagubaña lun Bungiu, ni hama ha ariñagubaña kristiánugu hamá ani míchuguntiña uériguni lun, íbini aban lan waduhe (1 Ko. 5:11). Magañeiruntiwa ni kata asigeneha hamá ha agarabaagubaña lun Bungiu o hama ha ayanuhabaña wuriba tuagu lóundarun Heowá. Mabuidunti nírügü lun waliihani o waganbahani le hariñagubei —dandu anhein tidan lubéi somu garüdia láfurida, tidan Internet o lidan amu fulasu—, lugundun gayarati ladügün damichi lun wamadagua luma Heowá (aliihoualá Isaíasi 5:20 luma Matéu 7:6).
14. Ka ligaburi Heowá lunbei warufudunitima ani ka uagu?
14 Warufudun ínsiñeni ligía aban manera buiti lun wáyeihani Wáguchi le siélubei (1 Huan 4:16-19). Ínsiñeni le warufudubei wámagua subudigüda lumutiwa kei lani Hesusu disipulugu luma kei lubúeingu Heowá (Huan 13:34, 35). Íbini anihein lan dan ebereseha lani wedebilin wadügüni katei le, moun lumuti wígiraguagüdün woungua lun, lunti wáfaagun lun warufudun ínsiñeni. Ánhawa arufudei igaburi le luma burí amu, madügünbadiwa ni kata le marufudunti ínsiñeni, madügünbadiwa giñe figóu le wéiriti (2 Fe. 1:5-7).
15. Ka lánibei ínsiñeni efekütu lidan ligaburi wanaagun woungua hama amu?
15 Ínchaha lumutiwa ínsiñeni adügei le buídubei houn sun gürigia (Rom. 13:8-10). Anhein hínsiñe lubéi gürigia le úmabei wamarieida woun, úaraguabadiwa lun. Anhein hínsiñe habéi wéiyaaña lidan afiñeni woun ani inebe ligía hawadigimari woun, gaganbadibadiwa houn. Anhein hínsiñe habéi hagübürigu nibureintiña houn, inebenbaña houn ani gaganbadibaña giñe houn, mayanuhanbaña wuriba hawagu. Ánhaña hínsiñe gürigia wáladi woun, wóuserubaña lau inebesei, móuserun wabaña kamá hamuga íñutimatiwa hawéi (Sant. 3:9). Ánhaña hínsiñe lilügüniña Bungiu mudún houn wéiyaaña lidan afiñeni, hóuserubaña buidu (Adü. 20:28, 29).
16. Ka uagu lunti lubéi warufudun ínsiñeni lidan wani ministeriu?
16 Lunti giñe warufudun ínsiñeni lidan wani ministeriu. Ladüga lueirin línsiñe Heowá woun sigitiwa apurichihei uganu buiti sin wígirun lun lararamúniwa mabahüdüni le harufudubei gürigia o ligaburi hóunabun. Aransetiwa giñe buidu ani áfaaguatiwa lun buídutima lan wapurichihan luagu Larúeihan Bungiu. Anhein hínsiñe lubéi Bungiu hama gürigia woun tídangiñe sun wanigi, marihin wabéi wadagimanu le kei aban ihürügu ni keirügü aban buligasion, lubaragiñe lira warihubei kei aban wadagimanu súdiniti le lunti wadügüni lau ugundani (Mat. 10:7).
SIGÍ WAMÁ ÍCHIGA UÉIRIGUNI LUN HEOWÁ
17. Ida liña líderaguniwa gunfuranda wamani adüga lan figóu lun siñá lan warufuduni luéirigun Bungiu?
17 Úati gunfuranda hamani hibe-agei gürigia, sériuti lan figóu, anati wagía gunfuranda wamuti. Ligíati, gabaroun wamuti, mosu lan wáfaagun kóntüra wedebilin lun gayara lan warufuduni luéirigun Bungiu. Wasubudiruni gafigoun wamá íderagua lumutiwa lun waranseruni wasaminan lun buidu lan wóuserun dan le wayumahan wadügün somu figóu tidan wanigi luma lidan wasaminan (Rom. 7:22, 23). Íbini débili wamá, líchuguba Bungiu erei le wemegeirubei lun úaragua wamá lidan furumiñeguarügü óuchawaguni (2 Ko. 12:10).
18, 19. a) Ida luba wagañeirun lidan wageindagun hama sífirigu wuribatiña? b) Ka lunbei desidírü wamani?
18 Wageindagun hama sífirigu wuribatiña ligía ámuya katei le lunbei wadügüni lun wíchugun uéiriguni lun Heowá, lun gayara lan wadügüni anuhein “sun daüguaü lánina asudarahani to líchuguboun Bungiu” wama (Efe. 6:11-13). Busenmemegili Satanási lóuyedun lau uéiriguni le yuubei lúnrügü Bungiu. Anihagua giñe ayusura sun tuwuyeri sádara lun lagadeiruni wamadagua luma Heowá. Ligíati, wéiriti leferidirun Mafia sagü úaragua hamá saragu míñunu gürigia lun Heowá ani ru hagía uériguni lun meberesenga anhein aban lubéi wügüri, aban irahü o aban würi íbini gafigoun hamá. Ligíati, alawaha waméi Heowá kei hadügüni ánheligu ha ariñagubaña sielu: “Garichatibu lun beresibiruni uéiriguni, inebesei, luma ubafu, ladüga buguya adügübalin sun katei; lau bugundan badügei, lau giñe bugundan anihein lubéi sun le aniheinbei” (Aruf. 4:11).
19 Desidírü wamá wíchugun uériguni lun Heowá meberesenga kaba lan asusereda. Chóuruti, weiri lan ugundani le lasandirubei Bungiu dan larihin saragu gürigia adügei sun hayaraati lun háyeihani luma lun harufuduni luéirigun (Ari. 27:11). Ítara kei Dawidi, ariñagatiwa: “Nabureme, Nubungiute, neremuhaba bun tau sun nanigi, níchuguba uéiriguni lun biri lun súnwandan” (Sal. 86:12). Ámuñegü, harufudubei sun lubúeingu Heowá luéirigun buidu buidu ani gayarabei halawahani gumugua dan. Mame lubuidun! Hínsiñeti hamuga san hun harufuduni luéirigun Heowá lun súnwandan? Anhein ítara liña lubéi, harufuduñein san lidan sun le hadügübei?
[Álügüdahani lánina aturiahani]
[Iyawaü to lídanboun páhina 31]
Harufuduñein san luéirigun Heowá lidan manera burí le?
